“Sibya sa Media,” Mga Hisgotanan sa Kasaysayan sa Simbahan (2022)
“Sibya sa Media,” Mga Hisgotanan sa Kasaysayan sa Simbahan
Sibya sa Media
Sulod lang sa duha ka tuig, gikan sa 1920 ngadto sa 1922, ang gidaghanon sa lisensiyado nga mga operasyon sa radyo diha sa Estados Unidos mitubo gikan sa usa ka estasyon ngadto sa sobra sa 500.1 Ang mga lider sa Simbahan usa sa mga sayo nga migamit niining bag-o nga teknolohiya, nakakuha alang sa Latter-day Saints University diha sa Siyudad sa Salt Lake sa unang lisensiya sa radyo nga gihatag ngadto sa usa ka pang-edukasyon nga institusyon. Si Presidente Heber J. Grant mihatag sa unang sibya sa Simbahan sa radyo niadtong Mayo 6, 1922, gamit ang KZN nga estasyon sa Siyudad sa Salt Lake, nga adunay usa lang ka transmitter diha sa usa ka payag [tin shed] diha sa atop sa Deseret News Building. Alang sa iyang mubo nga pakigpulong, si Presidente Grant mikutlo sa pagpamatuod ni Joseph Smith ug Sidney Rigdon sa Doktrina ug mga Pakigsaad 76.2 Pagkasunod tuig, ang kinatibuk-ang komperensiya gisibya pinaagi sa radyo ngadto sa usa ka service area nga mga usa ka milyon ang mga residente.3 Ang Simbahan nakakuha og mayoriya nga pagpanag-iya sa estasyon niadtong 1925, ug ang ngalan giusab ngadto sa KSL. Gipadagan gihapon kini ubos sa pagpanag-iya sa Simbahan usa ka siglo ang milabay.4
Si Presidente Heber J. Grant nga mihatag sa unang sibya sa Simbahan sa radyo gikan sa KZN nga payag [tin shed] diha sa atop sa Deseret News Building diha sa Siyudad sa Salt Lake, Mayo 1922.
Sa misunod nga dekada, ang Simbahan naningkamot sa pagpalapad sa radyo nga mga operasyon niini lapas pa sa Utah. Niadtong 1929, ang KSL nakigtambayayong sa National Broadcasting Company (NBC) diha sa siyudad sa New York ug milunsad og sinemana nga sibya sa Mormon Tabernacle Choir.5 Ang Musika & ang Gipamulong nga Pulong nga programa sa Choir, nga naglakip og mga mensahe nga gisulti sa magsisibya sa radyo nga si Richard L. Evans, midako nga nakaabot og nasodnon nga tigpaminaw. Kini ang kinatas-an nga nagpadayon nga sibya sa radyo sa kalibotan.6 Niadtong 1933, ang KSL nahimong usa ka kaanib sa Columbia Broadcasting System (CBS) ug midugang og serye sa gipasiugdahan sa Simbahan nga mga programa nga gitawag og “The Church of the Air.”7
Niadtong 1935, ang mga lider sa Simbahan miporma sa Radio, Publicity, and Mission Literature Committee. Ang komite miempleyo sa bag-ong returned missionary ug umaabot nga Presidente sa Simbahan nga si Gordon B. Hinckley aron sa pagsulat og debosyonal nga mga mensahe ug mga drama sa radyo, lakip sa mga programa sama sa Sunday Church Hour [Takna sa Simbahan sa Dominggo], The Fulness of Times [Ang Kahingpitan sa mga Panahon], A New Witness for Christ [Usa ka Bag-o nga Saksi ni Kristo], ug The Church’s Attitude [Ang Kinaiya sa Simbahan].8 Sa samang higayon, ang Simbahan mipalapad sa maabtan sa mga programa niini pinaagi sa pagpalit og mga estasyon sa radyo sa tibuok Estados Unidos.
Bisan og ang gieksperimento nga mga himan malamposong mipadala og mga imahe pinaagi sa mga radio wave sukad sa sayong bahin sa mga 1900, ang circuitry nga mga imbensiyon ni Edwin H. Armstrong ug Philo T. Farnsworth, usa ka Santos sa Ulahing mga Adlaw gikan sa Idaho, mao ang nagdala sa telebisyon ngadto sa mga panimalay.9 Niadtong Oktubre 1948, ang mga lider sa Simbahan mieksperimento sa pagpasalida sa kinatibuk-ang komperensiya sa telebisyon gamit ang closed-circuit nga mga telebisyon diha sa mga gambalay sa Temple Square. Ang KSL milunsad sa unang komersiyal nga estasyon sa telebisyon diha sa Utah pagkasunod tuig ug midala sa unang sibya sa kinatibuk-ang komperensiya diha sa mga airwave nga ma-access sa publiko niadtong Oktubre 1949. Samtang ang Simbahan mipadayon sa pagtubo gawas sa kasadpang Estados Unidos, ang mga kauban sa KSL ug ang ubang mga estasyon nga gipanag-iya sa Simbahan mitabang sa pag-abot sa mga tumatan-aw sa tibuok Estados Unidos ug diha sa Uropa ug Latin America.10
Niadtong 1962, ang unang komunikasyon nga mga satellite nga naglibot sa kalibotan mipadala og mga transmisyon sa radyo, telebisyon, ug telepono latas sa kalibotan. Ang Tabernacle Choir mipakita nianang tuiga diha sa unang tibuok kalibotan nga satellite nga sibya pinaagi sa telebisyon, usa ka bayanihon nga pasundayag nga gi-transmit gikan sa Mt. Rushmore sa Estados Unidos.11 Si David M. Kennedy, usa ka Santos sa Ulahing mga Adlaw nga banker ug panagsa nga espesyal nga tigrepresentar sa Unang Kapangulohan, miserbisyo diha sa hunta sa COMSAT, usa ka satellite nga serbisyo nga departamento sa federal nga gobyerno sa Estados Unidos.12 Migamit sa kasinatian ni Kennedy, ang mga lider sa Simbahan paspas nga milihok aron sa pagpatuman niining bag-o nga teknolohiya taliwala sa usahay nga nag-usab-usab nga mga lagda. Mitaod sila og mga satellite dish diha sa daghang meetinghouse sa tibuok kalibotan ug mihimong korporasyon sa Bonneville International aron sa paghatod og satellite nga mga transmisyon. Sugod sa mga1980, daghang mga satellite dish nga gipadagan sa Simbahan mipadala ug midawat og mga sibya sa kinatibuk-ang komperensiya ug ubang mga miting, nagtugot sa mga Santos sa Ulahing mga Adlaw latas sa lagyong mga distansiya nga moambit sa buhi nga mga kalihokan. Ang internasyonal nga pagsibya mipasiugda usab sa paghubad sa kinatibuk-ang komperensiya ngadto sa laing mga pinulongan, usa ka buhat nga gisugdan niadtong 1961 sa dihang ang kalihokan gihubad ngadto sa Dutch, Aleman [German], Samoan, ug Kinatsila. Niadtong Abril 2000, ang Presidente sa Simbahan nga si Gordon B. Hinckley midumala sa unang sibya pinaagi sa telebisyon sa pagpahinungod sa templo gikan sa Palmyra New York Temple duol sa Sagradong Kakahoyan ngadto sa mga stake center sa tibuok kalibotan.13
Ang Mormon Tabernacle Choir nga nagpasundayag didto sa Mt. Rushmore alang sa unang tibuok kalibotan nga satellite nga sibya sa telebisyon, 1962.
Ang makanunayon nga paglambo sa radyo ug telebisyon mitanyag og dako ug nagkadaiya nga mass media alang sa internasyonal nga mga tumatan-aw. Sukad sa mga 1990, ang internet nga teknolohiya padayong mipalapad sa maabot sa media sa Simbahan, ilabi na human ang broadband internet misugod sa pagsuporta sa digital streaming. Ang Oktubre 1999 nga kinatibuk-ang komperensiya mao ang unang halapad nga matan-aw sa tibuok kalibotan pinaagi sa sibya sa internet, ug ang Simbahan sukad misibiya og mga kalihokan sa tanang matang pinaagi sa mobile ug tradisyonal nga mga plataporma sa media.14 Niadtong 2021, ang kinatibuk-ang komperensiya gisibiya pinaagi sa telebisyon ug radyo ngadto sa sobra sa 70 ka nasod, uban sa minilyon pa nga mga tawo nga mi-access niini online.15
May Kalabotan nga mga Hisgotanan: Public Relations [Mga Relasyon nga Pangpubliko], Tabernacle Choir