Fanny Alger

Nahimugso niadtong 1816 ngadto ni Samuel ug Clarissa Alger, si Fanny Alger mipasakop sa Simbahan uban sa iyang pamilya sa sayong bahin sa mga 1830 ug nagtrabaho sa panimalay ni Joseph Smith sa Kirtland, Ohio.¹ Wala madugay pipila ka mga Santos sa Ulahing mga Adlaw kinsa nanimuyo sa Kirtland sa mga 1830 mitaho nga si Fanny Alger naminyo kang Joseph Smith, nahimong iyang unang asawa sa dinaghan nga kaminyoon [first plural wife].² Ang kaminyoon dayag kaayo nga wala magdugay. Si Fanny mibiya sa Ohio uban sa iyang mga ginikanan niadtong 1836 paingon ngadto sa Missouri, mipuyo kuno sa balay abutanan nga gipanag-iya sa pamilya ni Solomon Custer sa Dublin, Indiana.³ Sulod sa pipila ka bulan, si Fanny naminyo ni Solomon.⁴ Nagpabilin siya sa Dublin human ang iyang mga ginikanan mipadayon ngadto sa Far West, Missouri. Ang pamilya ni Fanny misunod sa dakong grupo sa mga Santos gikan sa Missouri ngadto sa Illinois ug sa katapusan ngadto sa habagatang Utah. Sa dihang ang amahan ni Fanny, usa ka patriarch, mipanaw niadtong mga 1870, ang mensahe uban sa pahibalo sa iyang kamatayon [obituary] misaulog sa kamatinud-anon sa iyang pamilya.⁵

Si Fanny ug si Solomon dihay siyam ka anak, duha lamang kanila ang nabuhi og mas dugay pa kay ni Fanny. Ang mga Custer adunay grocery store sa Dublin ug namuhunan sa usa ka bansuhan sa Lewisville.⁶ Ang pamilya mibalhin ngadto sa Lewisville atol sa panahon sa kalisud sa panalapi, ug si Solomon misulay sa pagbaligya sa bansuhan apan sa katapusan mideklarar og pagkabangkaruta.⁷ Si Fanny ug si Solomon mibalik ngadto sa Dublin, diin sila nagpabilin hangtud sa kamatayon ni Solomon niadtong 1885.⁸

Si Fanny ug si Solomon mitambong sa lokal nga Universalist nga Simbahan nga gitabangan sa pagtukod sa amahan ni Solomon. Atol sa iyang katapusang mga katuigan, si Fanny nahimo usab nga interesado sa espiritwalismo.⁹ Human sa kamatayon ni Solomon, si Fanny mibalhin ngadto sa Indianapolis aron sa pagpuyo uban sa iyang anak nga lalaki nga si Lafayette. Siya namatay niadtong 1889 ug gilubong sa Dublin tupad ni Solomon sa luna sa yuta nga gihawanan ni Solomon sa bata pa siya.¹⁰

Relasyon ngadto kang Joseph Smith

Diyutay ra kaayo ang nahibaloan mahitungod sa kaminyoon tali ni Joseph Smith ug Fanny Alger. Ang labing sayo nga mga tinubdan migawas human sa pagkahugno sa Kirtland Safety Society niadtong 1837. Ang nasuko nga mga namuhunan sa katilingban ug lokal nga mga kaatbang mipakatap og daghang mga hungihong nga miatake ni Joseph, lakip na ang pasangil nga siya nakahimo og pagpanapaw. Ang ubang mga hungihong naggikan kuno ni Oliver Cowdery, kansang kanhiay suod nga relasyon ni Joseph naapektuhan tungod sa nagkadaiyang mga rason. Ang ubang tawo miangkon nga si Oliver nakadungog nga si Joseph mikumpisal sa gawas sa kaminyoon nga relasyon nila ni Fanny Alger.¹¹ Sa tinglarag niadtong 1837, si Joseph Smith misita ni Cowdery mahitungod sa hungihong diha sa panagtigum nga gitambungan sa dili mominos sa tulo pa ka laing mga tawo. Niana nga panagtigum, si Cowdery milimod sa hungihong nga si Joseph mikumpisal ngadto kaniya.¹² Sa misunod nga Abril, sa dihang si Cowdery gitaral sa Missouri alang sa iyang pagkamiyembro sa Simbahan sa daghang mga pasangil, ang high council mihisgut sa mga hungihong nga gipakatap ni Cowdery. Si Joseph mihatag og pagpasabut sa iyang relasyon ni Fanny nga murag nakatagbaw sa high council.¹³ Si Cowdery na-excummunicate atol niini nga panagtigum.

Gawas sa ebidensya sa usa ka pagbisita sa sayong bahin sa mga 1840 ngadto sa iyang pamilya nga nahisakop sa branch sa Simbahan sa Lima, Illinois, ang pangalan ni Fanny nagpabiling wala igkita gikan sa mga talaan sa Santos sa Ulahing mga Adlaw sulod sa dul-an sa 30 ka tuig.¹⁴ Sa katapusang bahin sa ika-19 nga siglo, pipila ka mga pamahayag sa mga Santos sa Ulahing mga Adlaw ug kanhi mga miyembro sa Simbahan mipasabut nga ang relasyon ni Joseph Smith ug Fanny Alger usa ka sayo nga dinaghan nga kaminyoon.¹⁵ Si Eliza R. Snow, usa sa dinaghan nga mga asawa ni Joseph Smith, milakip lang ni Fanny sa lista sa mga asawa ni Joseph.⁶ Si Mosiah Hancok niadtong 1896 ug Benjamin F. Johnson niadtong 1903 sa gihapon mihulagway sa relasyon ni Fanny ngadto kang Joseph isip usa ka dinaghan nga kaminyoon nga gihimong kompidensyal. Si Hancock misulti mahitungod sa pribado nga pag-seal sa kaminyoon nga gipahigayon sa amahan ni Hancock didto sa Kirtland. Sumala ni Johnson, si Fanny gipangutana mahitungod sa iyang relasyon kang Joseph apan nagdumili siya sa paghisgut sa ilang relasyon.¹⁷

Bisan og diyutay lang ang atong nahibaloan kabahin sa pagsugod ug sayong paghimo sa dinaghan nga kaminyoon, ang mga Santos sa Ulahing mga Adlaw mitahud sa hugot nga pagtuo sa unang mga miyembro sa Simbahan kinsa nagsakripisyo aron sa pagtuman niining lisod nga sugo.