Mga Kolonya sa Mexico

Niadtong 1882 ang Kongreso sa Estados Unidos mipasa sa Edmunds Act, nga naghatag og dugang nga gahum ngadto sa pederal nga mga tigdakop sa pag-aresto, pagbilanggo, ug pagpamulta sa mga Santos sa Ulahing mga Adlaw kinsa miapil sa dinaghang kaminyoon. Isip resulta, ang mga lider sa Simbahan nagsugod sa pagpangita og mga dapit gawas sa Estados Unidos diin ang pipila ka mga Santos makakita og kadangpan gikan niini nga mga balaud, nga ilang gibati nga milapas sa ilang katungod sa pagbansay sa ilang relihiyon. Niadtong 1885 si Presidente John Taylor ug pipila pa nga mga lider sa Simbahan mibiyahe ngadto sa Mexico, diin ang mga misyonaryo nakapangita na og potensyal nga mga dapit nga kapuy-an. Nakadesisyon sila sa usa ka lokasyon sa Mexican state sa Chihuahua alang sa pagpabalhin sa pipila ka mga pamilya nga Santos sa Ulahing mga Adlaw. Ang presidente sa Mexico, si Porfirio Diaz, midasig sa maong pagpanglangyaw nga adunay palisiya nga gituyo aron sa pag-awhag sa kolonisasyon sa bakante nga yuta.¹

Bisan sa wala pa makapalit og yuta ang mga Santos sa Ulahing mga Adlaw sa Chihuahua, ang mga lalaki nga daghan og asawa gikan sa Arizona nagsugod na sa pagtabok sa utlanan ngadto sa Mexico aron sa pag-ikyas sa pagpanggukod.² Sulod sa lima ka bulan niadtong 1886, dul-an sa 400 ka mga Santos ang nanghipos sa ilang mga panginahanglan sa sulod sa mga karwahe o nagpuyo sa mga balay-balay kilid sa mga bungtod daplin sa Suba sa Casas Grandes, naghulat alang sa pagtugot nga makapuyo aron ilang mapahibalo ang ilang mga pamilya nga pwede na silang moapas. Ang mga pamilya sa katapusan naghimo og dam sa Suba sa Piedras Verdes, mipatubig sa mga tanom, ug misusi sa usa ka dapit aron himoon nga lungsod nga ilang ginganlan og Colonia Juárez. Sa wala madugay sila midaghan ngadto sa bag-ong mga kolonya nga pamuy-anan sa Dublán, Díaz, Cave Valley, Pacheco, García, ug Chuichupa. Mitukod usab sila og mga kolonya sa Oaxaca ug Morelos sa estado sa Sonora. Pipila ka mga Santos ang miabut gikan sa amihanan sa central Mexico aron motipon sa mga langyaw gikan sa Estados Unidos samtang midaghan ang mga kolonya.³

Sa mga tuig taliwala sa mga pagronda batok sa pagpangasawa og daghan sa Utah niadtong 1880 ug sa Mexican Revolution sa 1910, ang mga kolonya nagsilbi nga usa ka malinawon nga panimalay alang sa pipila ka gatusan nga mga pamilya sa mga Santos sa Ulahing mga Adlaw. Unom ka Apostoles ang nagpuyo sa mga kolonya atol sa ulahing bahin sa ika-19 nga siglo. Niadtong 1895 ang unang stake sa Mexico natukod, nga adunay punoang buhatan sa Juárez. Ang mga Santos sa mga kolonya wala lamang magtukod og mga komunidad nga makasangkap sa ekonomikanhong paagi apan naghatag og gibug-aton sa kultura ug edukasyon, nagtukod sa Juárez Stake Academy, usa ka eskwelahan nga naghatag og elementarya og hayskul nga edukasyon alang sa kabataan.⁴ Sa sayo sa ika-20 nga siglo, gibana-bana nga 4,000 ka Santos sa Ulahing mga Adlaw ang nagpuyo sa mga kolonya.⁵ Daghang umaabut nga mga lider sa Simbahan, lakip na ni Marion G. Romney sa Unang Kapangulohan ug Rey Lucero Pratt sa Unang Korum sa Seventy, nga gipadako diha sa mga kolonya. Ang pagkalarino ni Pratt sa Kinatsila nakapahimo niya nga maghupot og importante nga tahas isip lider sa misyonaryo nga buhat sa Mexico.⁶

Ang gambalay sa Juarez Stake Academy sa Colonia Juárez.

Human sa 1890 nga Manipesto ni Presidente Wilford Woodruff, nga misaad nga ang Simbahan motuman sa mga balaud sa kaminyoon sa Estados Unidos, ang ubang mga Santos sa Ulahing mga Adlaw nagtuo nga ang dinaghang kaminyoon makapadayon sa Mexico. Niadtong 1901, ang sumusunod ni Woodruff, si Presidente Lorenzo Snow, miklaro nga ang Manipesto naglakip usab sa mga Santos bisan asa sila nagpuyo. Upat ka tuig human niana, ang sumusunod ni Snow, si Presidente Joseph F. Smith, mibiyahe ngadto sa Mexico aron pagsiguro nga matuman ang mga palisiya nga mitapos sa gitugutan sa Simbahan nga dinaghang mga kaminyoon.⁷

Atol sa Mexican Revolution sa 1910, ang sentimyento batok sa Amerika nakapahimo sa sitwasyon nga delikado alang sa mga Santos nga European-American diha sa mga kolonya. Niadtong 1912 ang rebolusyonaryong heneral nga si José Inés Salazar mipunting og mga kanyon sa Colonia Dublán, ug sulod sa usa ka adlaw, ang presidente sa stake nga si Junius Romney mihukom sa pagbiya sa kolonya. Ang mga pamilya nga milangyaw sa amihanan gikan sa tunga-tungang Mexico nagpabilin aron sa pag-atiman sa mga kolonya samtang ang mga Santos nga adunay Euro-American nga mga kagikan namutos kutob sa ilang madala nga mga kabtangan ug mibiya padulong sa El Paso, Texas.⁸

Sa dihang nahibalik na sa Estados Unidos, kadaghanan sa mga Santos nga nanglayas mibalhin ngadto sa bag-ong mga panimalay sa Kasadpang Amerika. Ang kinabuhi diha sa mga kolonya nagpadayon alang sa mga Mehikano nga mga Santos kinsa nagpabilin, ug ang unang Kinatsila og pinulongan nga branch sa amihanang Mexico giorganisar sa Colonia Dublán niadtong 1916. Human sa rebolusyon, mokabat sa ikaupat nga bahin sa mga Santos kinsa miikyas ang mibalik ngadto sa ilang mga panimalay sa amihanang Mexico. Kadtong kinsa mibalik miayo sa mga gambalay ug mga umahan ug nagpadayon sa ilang mga paningkamot sa edukasyon ug pagtukod og komunidad. Ang Colonia Dublán ug Colonia Juárez nagpadayon sa pagmintenar og importanting presensya sa mga Santos sa Ulahing mga Adlaw, ug usa ka templo ang gipahinungod sa Juárez niadtong 1999.⁹

May Kalabutan nga mga Hisgutanan: Antipolygamy Legislation, Mexico, Canada