Mga Unibersidad sa Simbahan
Sukad sa mga pagsugod niini niadtong mga 1800, ang mga unibersidad nga gipasiugdahan sa Simbahan nagtinguha sa pagtanyag og mas taas nga edukasyon nga naghiusa sa pagtuon ug sa hugot nga pagtuo diha ni Jesukristo. Ang mga Santos sa Ulahing mga Adlaw unang milunsad og usa ka unibersidad sa Nauvoo, Illinois, niadtong mga 1840. Ang University of the City of Nauvoo, hinuon, wala makaestablisar og usa ka gipahinungod nga pasilidad sa wala pa mobiya ang kadaghanan sa mga Santos sa Ulahing mga Adlaw padulong sa North American West niadtong 1846. Paglabay sa upat ka tuig, ang mga Santos sa Ulahing mga Adlaw milunsad sa University of Deseret sa Siyudad sa Salt Lake, apan ang mga problema sa pinansiyal ang nakapugong sa regular nga mga klase hangtod niadtong 1869, sa dihang ang pagkahuman sa riles sa tren nga motadlas sa laing lugar nagdala og bag-ong komersyo nga nakapalambo sa lokal nga ekonomiya. Niadtong 1875, ang branch sa University of Deseret sa Provo giusab og Brigham Young Academy, nga nagtanyag og programa sa primary, secondary, ug postsecondary nga mga klase nga naghiusa sa relihiyoso ug sekular nga pagtuon. Ang mga tig-edukar ug mga lider sa Simbahan miorganisar og General Church Board of Education niadtong 1888 ug wala madugay giusab ang Brigham Young Academy ngadto sa Brigham Young University (BYU). Ang University of Deseret nahimong pampubliko nga eskwelahan ug giusab ang ngalan ngadto sa University of Utah niadtong 1892.
Ang orihinal nga gambalay sa Brigham Young Academy sa Provo, Utah, tali sa 1892 ug 1901.
Sa mosunod nga mga dekada, ang Simbahan nag-abli og pipila ka laing mga akademya, mga kolehiyo, ug mga unibersidad sa mga gipuy-an sa mga Santos sa Ulahing mga Adlaw sa tibuok amihanang bahin sa Mexico, sa kasadpang bahin sa Estados Unidos, ug sa habagatang bahin sa Canada. Wala madugay, kadaghanan niini wala na magpadayon o lahi na ang nagdumala, ug ang BYU, ang Latter-day Saints University sa Siyudad sa Salt Lake, ug ang Ricks College sa Rexburg, Idaho, mao na lamang ang nagpabilin. Sa samang higayon, ang mga lider nagpadayon sa pagpasiugda og sinemana nga panudlo sa ebanghelyo alang sa mga estudyante sa secondary ug postsecondary pinaagi sa mga programa sa seminary ug institute. Sa tunga-tunga sa ika-20 nga siglo, ang Simbahan mihiusa sa daghan niining paningkamot sa edukasyon ubos sa sentralisado nga administrasyon nga nailhan isip Church Educational System (CES).
Human sa Ikaduhang Gubat sa Kalibotan, ang mga tigdumala sa CES mipalapad sa mga programa sa kolehiyo, ilabi na sa BYU, aron mapahiluna ang nagkadaghan nga mga miyembro sa Simbahan. Sa sunod nga pipila ka dekada, ang enrolment sa BYU padayong nagkadaghan, nga sa kadugayan miabot og 35,000, ug ang BYU nahimong usa sa labing dako sa mga pribadong relihiyoso nga unibersidad sa Estados Unidos. Sa panan-aw sa publiko, kadaghanan sa kalamboan sa BYU makita sa mga kompetisyon sa mga programa sa sport. Dugang pa, ang kalamboan sa J. Reuben Clark Law School ug sa Marriott School of Business, uban sa laing mga programa human sa pagradwar ug ang empasis sa faculty research, nagpakita sa kalamboan sa BYU sa mga natad sa akademiko ug propesyonal. Ang padayon nga rekord sa BYU sa pagpahimutang sa mga migradwar ngadto sa lig-on nga mga trabaho ug ang pagtakda og ubos nga bayranan sa eskwelahan kon itandi sa uban nakapabilin sa reputasyon niini isip nag-unang institusyon sa kolehiyo.
Ang mga tigdumala sa CES mipalapad usab sa Latter-day Saints University sa Siyudad sa Salt Lake. Ang eskwelahan nagsugod isip Salt Lake Stake Academy sa ulahing bahin sa mga 1880. Bisan og ang mga lider sa sinugdanan nagtan-aw niini isip labing prominente nga eskwelahan sa Simbahan, sa sayo sa ika-20 nga siglo ilang gisugdan ang pagbalhin sa mga kapanguhaan ngadto sa BYU. Sa mga 1920, ang business college na lamang ang nagpabilin, ug ang Latter-day Saints University giusab ang ngalan ngadto sa Latter-day Saints College unya, pagka-1931, giusab ngadto sa LDS Business College. Ang eskwelahan gibalhin sa pipila ka higayon sa wala pa ipahimutang ngadto sa usa ka kampus sa sentro sa Siyudad sa Salt Lake niadtong 2006. Giusab ang ngalan niini ngadto sa Ensign College pagka-2020 ug misugod sa pagtanyag og upat ka tuig nga mga kurso pagka-2021.
Ang Ricks College sa Rexburg, Idaho—sa sinugdanan gitawag og Bannock Stake Academy apan wala madugay giusab ang ngalan aron sa pagpasidungog kang Thomas Ricks, nga nagtrabaho aron sugdan ang eskwelahan sa dapit—gitutokan ang pagbansay sa mga magtutudlo sa sayong mga dekada niini. Bisan kon nagtanyag og mga bachelor’s degree sa sayo sa 1950, ang Ricks College nagpabilin nga alang lamang sa duha ka tuig sa kolehiyo hangtod niadtong 2001, sa dihang ang Presidente sa Simbahan nga si Gordon B. Hinckley mipahibalo nga palapdan kini ngadto sa upat ka tuig nga kurikulom ug usbon ang ngalan ngadto sa Brigham Young University–Idaho.
Sa mga Isla sa Pasipiko, ang Church College of Hawaii mitubo human sa pagpahinungod niini niadtong 1958. Sa dihang ang Presidente sa Simbahan nga si David O. McKay misuroy sa amihanang bahin sa baybayon sa O‘ahu sa milabayng mga dekada ug mibisita sa naglambo nga komunidad sa mga Santos sa Ulahing mga Adlaw, iyang napanan-awan ang usa ka gipalapdan nga kolehiyo didto nga makaserbisyo ilabi na sa mga miyembro sa Simbahan gikan sa Rehiyon sa Pasipiko. Ang eskwelahan giila isip upat ka tuig nga kolehiyo niadtong 1961, giusab ang ngalan ngadto sa Brigham Young University–Hawaii niadtong 1974, ug gihimong independente nga unibersidad ubos sa administrasyon sa CES pagka-2003.
Pangserbisyo nga mga misyonaryo nga nagtabang sa paghuman sa pagtukod sa Church College of Hawaii niadtong 1958.
Sukad sa tunga-tunga sa ika-20 nga siglo, ang mga tigdumala sa BYU namuhonan sa laing mga aspeto sa pagpalambo sa gawas sa Estados Unidos. Ang mga programa sa pag-eskwela sa laing nasod gikan sa mga 1950 mitubo ngadto sa pipila ka internasyonal nga pagtuon sa mga institusyon sa gawas sa nasod, nga labing nailhan sa Salzburg, London, ug Siyudad sa Mexico. Ang programa sa pag-eskwela sa gawas sa nasod didto sa Jerusalem, nga nagsugod niadtong 1968 nakaangkon og dakong popularidad sa mga estudyante ug sa ulahing bahin sa mga 1970 hilabihan nga mitubo nga ang mga lider nakaamgo nga kinahanglan og mas dagkong mga pasilidad. Ang Brigham Young University Jerusalem Center for Near Eastern Studies, nga gitukod sa Bukid sa mga Oliba, nga nag-umbaw sa Karaang Siyudad, gipahinungod niadtong 1989.
Ang BYU Jerusalem Center for Near Eastern Studies, Jerusalem, Israel.
Ang mga tigdumala sa CES naglantaw usab sa pagpalapad sa sistema sa BYU sa akademiko ug propesyonal nga pagbansay nga molukop sa kalibotan. Tali sa 2009 ug 2017, ang mga tig-edukar sa CES, BYU–Idaho, ug BYU mipalambo og online nga programa alang sa mas taas nga edukasyon nga gitawag og BYU–Pathway Worldwide. Pagka-2020, ang programa miserbisyo og sobra sa 50,000 ka estudyante nga mga Santos sa Ulahing mga Adlaw sa sobra sa 150 ka nasod.
May Kalabotan nga mga Hisgotanan: Tulunghaan sa mga Propeta, Mga Akademya sa Simbahan, Mga Seminary ug mga Institute, Brigham Young