Kasaysayan sa Simbahan
Mga Organisasyon sa Batan-ong mga Babaye

“Mga Organisasyon sa Batan-ong mga Babaye,” Mga Hisgutanan sa Kasaysayan sa Simbahan

“Mga Organisasyon sa Batan-ong mga Babaye,”

Mga Organisasyon sa Batan-ong mga Babaye

Sa Mayo 25, 1870, si Brigham Young nakigtagbo sa iyang mga anak nga babaye ug sa ubang mga sakop sa iyang dako nga pamilya didto sa sala sa Lion House sa Siyudad sa Salt Lake. Gisultihan niya ang iyang pamilya nga ang mga Santos nahimong abtik kaayo sa pagsunod sa mga uso sa kalibutan, ug gusto niya sa iyang mga anak nga babaye sa paghimo og panig-ingnan alang sa ubang batan-ong mga babaye. Sayo nianang tuiga, si Mary Isabella Horne nakadawat og tawag gikan ni Presidente Young sa pag-organisar og usa ka Ladies’ Cooperative Retrenchment Association alang sa katuyoan sa pagpaminos sa pag-usik-usik ug sa pagpalambo og mas dako nga ekonomikanhong panaghiusa.1 Karon, gisultihan ni Brigham Young ang iyang mga anak nga babaye sa pag-organisar og usa ka Young Ladies’ Department diha sa asosasyon. Sa Mayo 27 ang mga anak nga babaye ni Young midawat og pormal nga mga resolusyon nga naghimo sa bag-ong organisasyon, ug si Ella Young Empey ang ginganlan nga presidente sa unang lokal nga grupo.2

Imahe
Mga anak nga babaye ni Brigham Young

Usa ka litrato sa pipila ka mga anak nga babaye ni Brigham Young, kadaghanan kinsa mga sakop sa orihinal nga Young Ladies’ Department of the Ladies’ Cooperative Retrenchment Association.

Ang petsa sa karaang pagsaulog isip ang pagtukod nga petsa sa Young Ladies’ Department (ug sa ingon, ang Church’s Young Women nga programa) mao ang Nobyembre 28, 1869. Kini nga petsa nasayop sa paghatag sa usa ka kasaysayan ni Susa Young Gates nga namantala sa 1911.3 Ang asoy ni Gates, nga gisulat sa daghang mga katuigan human ang mga hitabo nahinabo, nagpahigayon sa handumanan ni Bathsheba W. Smith, kinsa diha sa miting sa pamilyang Young. Kini ingon og bisan kinsa ni Gates o Smith ang mihiusa sa miting sa Mayo 1870 uban sa lahi nga miting nga gihimo sa milabay nga Nobyembre.4 Sa Hunyo 1870, pipila ka semana lamang human ang Young Ladies’ Department natukod, ang Deseret News mimantala sa mga resolusyon, nanghimatuod nga ang pagtukod nga petsa mao ang Mayo 27, 1870.

Ang organisasyon mihatag og importansya una sa pagtarong sa pagsinina ug sa ekonomikanhong panaghiusa, pag-awhag sa batan-ong mga babaye sa pagbaton og mas yano, dili mahalon nga mga istilo sa pagsinina nga hinimo gikan sa lokal nga produktong mga materyal. Wala madugay, susamang pagdaginot nga mga kapunongan natukod alang sa batan-ong mga babaye sa tibuok Siyudad sa Salt Lake ug ubang mga pamuy-anan sa Utah.5 Sa una, ang kategoriya sa “batan-ong dalaga” wala magdala og piho nga pagpasabut sa edad, ug ang asosasyon milakip sa tin-edyer nga mga babaye ingon man mga babaye sa ilang mga sayo nga bahin sa pagkabaynte, ang pipila mga minyo.

Apan ang gihatagan og gibug-aton sa “pagdaginot” daling miabli ngadto sa mas positibo nga tema sa “pagpauswag,” naglukop sa espiritwal, edukasyonal, kultural, ug sosyal nga pagpalambo.6 Sa 1877 ang mga asosasyon misagop sa ngalang Young Ladies’ Mutual Improvement Association (YLMIA), nagtukod og sama nga Young Men’s Mutual Improvement Association (YMMIA) nga gi-organisar sa 1875.7 Sa 1880 si Elmina Shepherd Taylor gitawag isip ang unang Kinatibuk-ang Presidente sa YLMIA, ug sa misunod nga mga dekada, ang duha ka mga asosasyon nagkumbuya sa literaryo, dramatiko, musikal, ug relihiyosong mga kalihokan ug mihimo og tinuig nga panag-uban nga mga komperensya sa matag Hunyo.

Gikan sa mga 1890 ngadto sa 1920, ang YLMIA misunod og dako nga programa nga naghatag sa batan-ong mga babaye og mga oportunidad alang sa paglingaw-lingaw, edukasyon, kalipay sa mga sining pangkultura, ug espiritwal nga kalamboan. Misagop ang asosasyon og may sumbanan nga mga leksyon sa 1893 ug mimantala og binulan nga Young Woman’s Journal sugod sa 1889. Sa 1903 gibahin sa YLMIA ang batan-ong mga babaye pinaagi sa edad ngadto sa junior ug senior nga ang-ang, ug dugang nga mga pagbahin misunod sa nagsunod nga mga dekada.8 Sa 1934 ang dawaton nga edad gipahimutang sa 12 (sa kaniadto 14), nga ang pagkamiyembro gilugway ngadto sa mga babaye nga anaa sa mga 30 anyos. Ang ngalan usab giilisan ngadto sa mas modernong paminawon nga Young Women’s Mutual Improvement Association.

Sa panahon sa mga 1910, daghang mga stake naghimo sa unang mga kampo sa ting-init alang sa batan-ong mga babaye. Sa 1929 ang Kinatibuk-ang Presidente nga si Ruth May Fox mianunsyo og programa sa tibuok Simbahan nga kamping sa ting-init, nagtukod og tradisyon nga nahimong usa ka timaan sa mga programa sa batan-ong mga babaye. Sa 1915, panahon sa kapangulohan ni Martha Horne Tingey, ang YLMIA mipaila sa Bee-Hive Girls, ang unang programa sa kalampusan sa organisasyon. Gisunod kini sa nasudnong organisasyon sa Camp Fire Girls ug mihingpit sa YMMIA nga pagsunod sa programa sa Boy Scouts of America. Sa nagsunod nga mga dekada, ang ubang mga programa sa kalampusan gipaila alang sa mga batang babaye sa tanang mga grupo sa edad. Gikan sa mga 1930 ngadto sa 1960, ang Mutual Improvement Association mitubo sa dinagko, madasigon nga programa nga midani og nasudnong atensyon. Sa kulturang Amerikano nga mas gitutokan og maayo ang mga tin-edyer, ang mga programa sa mga kabatan-onan sa Mga Santos sa Ulahing mga Adlaw mitanyag og puno nga lista sa mga kalihokan, naglakip sa mga kampo, mga sayaw, ug mga kalingawan, ingon man sa usa ka dako nga komperensya sa MIA matag Hunyo.

Imahe
batan-ong mga babaye sa Brighton Girls’ Camp

Batan-ong mga babaye sa Brighton Girls’ Camp.

Samtang nagtubo ang Simbahan sa tibuok kalibutan, nakabantay ang mga pangulo nga ang mga programa nga gidesinyo alang sa kasarangang pundok sa mga kabatan-onan sa Amihanang Amerika dili sa kanunay maayo sa ubang mga dapit. Ang bili sa maong mga programa ug ang panginahanglan sa daghan nga may kasinatian nga mga pangulo nagpasabut nga ang bag-ong mga dapit sa Simbahan walay mga kawani o ubang mga kapanguhaan aron sa pagsuporta sa hingpit nga programa sa MIA. Sa 1971 ang mga pangulo sa Simbahan mihimo og importanting mga kausaban sa mga programa sa kalampusan sa MIA aron mas maayo ang pagtubag sa mga panginahanglan sa batan-ong mga babaye sa tibuok kalibutan. Sa pagkasunod nga tuig, ang Unang Kapangulohan mi-anunsyo nga ang organisasyon sa batan-ong mga babaye may pagkatinugyanan sa mga batang babaye nga nag-edad og 12 ngadto sa 17. Dayon, sa 1974, ang organisasyon sa batan-ong mga babaye ginganlan pag-usab og yanong Young Women, wala ipadayon ang ngalan nga MIA. Ang batan-ong mga babaye ug ang ilang mga pangulo mihimo sa ilang katapusang tibuok Simbahan nga Hunyong komperensya sa 1975.

Sa 1977 ang mga pangulo sa Young Women mipaila sa My Personal Progress, usa ka programa sa kalampusan nga gibase sa espiritwal ug personal nga mga kalihokan sa pagpalambo sa unom ka “mga dapit nga gihatagan og importansya.” Ang Batan-ong mga Babaye kinsa nakakompleto sa programa midawat og Young Womanhood Recognition. Sa 1980, isip kabahin sa usa ka bag-ong gitipon nga iskedyul sa Dominggo nga miting, ang batan-ong mga babaye misugod sa pagdawat og mga Dominggo nga panudlo, usa ka butang nga ang mga pangulo sa Young Women mipasiugda sulod sa daghang mga katuigan.9 Sa 1985 ang Kinatibuk-ang Presidente sa Young Women nga si Ardeth G. Kapp ug ang iyang hunta miusab paghimo sa programa sa Young Women gibase sa usa ka bag-ong tema ug sa pito ka espiritwal nga mga hiyas.10 Ang bag-ong programa nakasentro sa pag-andam alang sa ug ang pagkatakus nga moapil sa mga ordinansa sa templo, usa ka importante nga timaan nga nagpadayon ngadto sa ika-21 ka siglo.

Imahe
Sister Ardeth G. Kapp

Si Sister Ardeth G. Kapp mipaila sa bag-ong sanglitanan, bag-ong tema, ug bag-ong mga hiyas alang sa organisasyon sa Young Women sa 1985.

Kalabut nga mga Hisgutanan: Retrenchment, Young Men Organizations

  1. Tan-awa ang Hisgutanan: Retrenchment.

  2. “Resolutions Adopted by the First Young Ladies’ Department of the Ladies’ Co-operative Retrenchment Association, S.L. City, Organized Mayo 27, 1870,” Deseret Evening News, Hunyo 20, 1870, 2.

  3. Susa Young Gates, History of the Young Ladies’ Mutual Improvement Association of the Church of Jesus Christ of Latter-day Saints (Siyudad sa Salt Lake: Deseret News, 1911), 5–10.

  4. Ang kasaysayan ni Gates naghulagway ni George A. Smith nga nagtambong og miting kauban ni Brigham Young ug sa mga anak niyang babaye, apan si Smith wala sa Siyudad sa Salt Lake sa Nobyembre 28, 1869. Sumala sa usa ka tala diha sa Historian’s Office Journal, hinoon, si Smith ug ang iyang asawa si Bathsheba diha sa Mayo 25, 1870 nga miting. Ang asoy sa mga palakat sa miting sa Mayo nga gihatag niining tala sa journal adunay tin-aw nga pagkasama sa kaulahiang panumduman ni Bathsheba, apan ang petsa sa miting nga gihatag sa kasaysayan ni Gates’ ingon og nasayop. Tan-awa sa Jill Mulvay Derr, Carol Cornwall Madsen, Kate Holbrook, and Matthew J. Grow eds., The First Fifty Years of Relief Society: Key Documents in Latter-day Saint Women’s History (Siyudad sa Salt Lake: Church Historian’s Press: 2016), 353–54.

  5. Gates, History of the Young Ladies’ Mutual Improvement Association, 59–69.

  6. Ang bag-ong gipatigbabaw sa pagpauswag mas maayong nagpakita sa dugay nang pilosopiya nga ang pagdaginot milakip “sa tanang mohimo kanato nga maalamon, mapuslanon ug malipayon niini nga kinabuhi” (Georgina Cuthbert, “Retrenchment,” Woman’s Exponent, vol. 3, nu. 21 [Abr. 1, 1875], 163).

  7. Tan-awa ang Hisgutan: Young Men Organizations.

  8. Sama pananglitan, sa 1950 ilang gihimo ang bag-ong mga pagbahin sa edad: Mga Beehive, mga edad 12–13; Mga MIA Maid, mga edad 14–15; Mga Junior Gleaner, mga edad 16–18; ug Mga Gleaner, mga edad 19–25. Ang mga Junior Gleaner sa kaulahian ginganlan og mga Laurel.

  9. Jennifer Reeder ug Kate Holbrook, eds., At the Pulpit: 185 Years of Discourses by Latter-day Saint Women (Salt Lake City: Church Historian’s Press, 2017), 206.

  10. Ang ikawalo nga hiyas gidugang sa 2008 atol sa paghupot sa katungdanan ni Sister Elaine S. Dalton.