Patriyarkal nga mga Panalangin

Ang Biblia ug ang Basahon ni Mormon naghulagway sa karaang mga patriyarka nga mitugyan og mga kabilin ngadto sa ilang kaliwatan pinaagi sa paghatag kanila og mga panalangin. Sama pananglit, si Jacob mipanalangin sa iyang mga apo nga si Ephraim ug Manases og espesyal nga mga kabilin, ug sa iyang katapusang mga gutlo, si Lehi mipundok sa iyang pamilya aron sa palitok og mga panalangin ug panagna mahitungod sa ilang kaugmaon.¹ Giniyahan pinaagi sa pagpadayag nga gihatag ngadto ni Joseph Smith, ang unang mga Santos sa Ulahing mga Adlaw mibuhat og balik sa biblikanhon nga pamaagi sa pagpanalangin sa mga amahan sa ilang mga anak, usahay mitawag niini nga “patriyarkal nga mga panalangin.”²

Si Joseph Smith mipadayon sa karaang pamaagi nga naglakip sa mga gi-orden nga mga patriyarka, kinsa iya usahay nga gitawag nga “mga ministro sa ebanghelyo” ug kinsa gisangunan sa paghatag og mga panalangin ngadto sa mga indibidwal kansang mga amahan patay na o dili mga miyembro sa Simbahan. Siya mitudlo nga “ang pinakatigulang nga tawo sa Dugo ni Joseph o sa binhi ni Abraham … kinahanglan mahimong usa ka patriyarka alang sa kabulahanan sa kaliwatan sa mga Santos sama ni Jacob sa paghatag sa iyang patriyarkal nga panalangin ngadto sa iyang mga Anak.”³ Kini nga pribelihiyo unang napunta ngadto ni Joseph Smith Sr., Kinsa gi-orden ni Joseph Smith nga Patriyarka sa Simbahan sa Kirtland, Ohio, niadtong Disyembre 1834.⁴ Si Joseph Sr. mipundok sa mga sakop sa pamilya, namulong og mga panalangin nga nagpahayag sa ilang kaliwatan sa pakigsaad diha sa Balay ni Israel, ug misilyo og espirituhanon nga mga kabilin base sa mga pasalig sa pakigsaad. Sa wala madugay siya nagsugod sa pagpamulong og mga panalangin sa mga Santos sa Ulahing mga Adlaw nga gawas sa iyang pamilya.⁵

Atol sa mga bulan padulong ngadto sa pagpahinungod sa Templo sa Kirtland, daghang mga Santos sa Ulahing mga Adlaw ang nakadawat og patriyarkal nga mga panalangin. Mipahigayon sila og dagkong mga panagtigum diin ubay-ubay nga mga katawhan ang midawat sa mga panalangin gikan kang Joseph Sr., ug sila misaulog niini nga mga okasyon uban sa mga pyesta, musika, ug pagpamatuod.⁶ Bisan kon ang naandang buhat nga magpahigayon og mga panagtigum alang sa patriyarkal nga panalangin nag-anam kawala human sa pagpahinungod sa templo, daghang mga Santos ang mipadayon pagdapit ni Joseph Sr. (ug sa kaulahian, ang ubang mga patriyarka) ngadto sa ilang mga panimalay aron sa pagdawat og espesyal nga mga panalangin.

Sugod niadtong 1837, ang ubang mga patriyarka nasugdan pag-orden, ug ang pagpihig mitumaw tali sa Patriyarka sa tibuok Simbahan ug niadtong mga patriyarka nga anaa sa mga branch o mga stake.⁷ Human sa kamatayon ni Joseph Smith Sr., usa ka pagpadayag ang mitawag kang Hyrum Smith nga sunod nga Patriyarka sa Simbahan “pinaagi sa panalangin ug usab sa katungod,” ug ang panulundon nga pagpuli nagpadayon, sa mga anak nga lalaki ni Joseph Sr. ug ubang mga kaliwatan (gawas sa pipila lang ka higayon) nga nagsilbi isip mga Patriyarka sa Simbahan hangtud nga gipahibalo nga si Elder Eldred G. Smith nahimong emeritus nga dili mahulipan niadtong 1979.⁸ Ang pagtawag og mga lokal nga patiryarka nagpadayon karon.

Niadtong 1835, si Oliver Cowdery nagsugod sa pagrekord sa patriyarkal nga mga panalangin isip tigsulat sa usa ka basahon nga mga sulat. Ang Simbahan nagkolekta ug nagtipig og mga patriyarkal nga mga panalangin sukad niadto.⁹ Usa ka pamaagi ang gipasiugdahan niadtong sayong bahin sa ika-20 nga siglo diin ang mga lokal nga lider, kasagaran mga bishop, morekomendar og mga tawo ngadto sa mga patriyarka alang sa usa ka panalangin, ug ang mga patriyarka mosumiter og kopya sa mga panalangin ngadto sa Simbahan. Ang paningkamot nagpadayon bisan sa kusog nga pagtubo sa Simbahan ug minilyon ka mga panalangin ang giproseso. Niadtong 2015, ang Library sa Kasaysayan sa Simbahan milunsad og usa ka website nga nagtugot sa mga miyembro sa Simbahan sa pagpangayo og mga kopya sa ilang patriyarkal nga mga panalangin ug niadtong patay na nga ilang mga katigulangan.