Kirtland, Ohio

Ang Kirtland, Ohio, mao ang dapit sa daghang mga mahinungdanon nga mga panghitabo sa sayong bahin sa kasaysayan sa Simbahan. Samtang nagpuyo sulod ug sa palibut sa Kirtland, si Joseph Smith nakadawat og daghang mga pagpadayag nga nagpadangat og importante nga mga instruksyon nga gikinahanglan alang sa pag-establisar sa Simbahan. Sa Kirtland, si Joseph Smith miorganisar sa mga buhatan ug mga korum sa priesthood, ug ang mga Santos mitukod sa unang templo.

Niadtong Disyembre 1830, usa ka pagpadayag ngadto kang Joseph Smith miila “sa Ohio” isip ang unang dapit nga pundokanan alang sa mga Santos.¹ Sa sayong bahin niana nga tuig, si Oliver Cowdery, Parley P. Pratt, ug uban pa mibunyag og daghan kinsa nahisakop sa mga kongregasyon nga gipangulohan ni Sidney Rigdon duol sa Kirtland. Kini nga sayo nga mga pagkakabig midugang sa pagdako pag-ayo sa Simbahan ug naglakip sa mga lalaki ug mga babaye kinsa maghupot og importanting mga papel sa kasaysayan sa Simbahan.²

Ang Kirtland, Ohio, niadto usa sa duha ka mga dapit nga pundukanan alang sa mga Santos niadtong mga 1830. Daghan usab nga mga Santos ang nagpundok sa Missouri, apan tungod kay si Joseph Smith ug ang iyang pamilya nagpuyo sa Ohio sa daghang katuigan sa dekada, ang Kirtland nagsilbi isip ang punoang mga buhatan sa Simbahan. Kadaghanan sa mga pagpadayag nga nadawat sa Kirtland gihatag sa mga panimalay diin ang pamilyang Smith nagpuyo nianang higayuna.³ Daghan niining mga pagpadayag unang namantala sa Kirtland uban sa unang libro sa mga himno ug mga parte sa dinasig nga pag-usab ni Joseph Smith sa Biblia nga karon makita sa Perlas nga Labing Bililhon.⁴

Dihang gipahibalo nga ang Kirtland mao ang dapit nga pundukanan, ang Ginoo misaad nga iyang panalanginan ang mga Santos sa Kirtland sa Iyang “balaod” ug motuga kanila og “gahum gikan sa kahitas-an.”⁵ Sa diha na sa Kirtland, ang Ginoo mipadayag sa balaod sa pagpahinungod––usa ka ekonomikanhon nga baruganan kon diin ang mga partisipante mohatag sa ilang kabtangan ngadto sa Simbahan, midawat sa pagkatinugyanan alang sa pagsuporta sa ilang kaugalingon ug mohatag sa sobra alang sa pagsuporta sa mga kabus.⁶ Kini nga balaod mitabang aron sa paglimpyo sa mga kasingkasing ug hunahuna sa mga Santos sa pagpangandam sa gisaad nga pagtuga sa gahum.

Si Lucy Mack Smith nahinumdum nga bisan og gitukod pa, ang Templo sa Kirtland mao ang “nag-unang gipunting sa tanan namong mga hunahuna.”⁷ Ang mga Santos mihatag sa ilang panahon ug kapanguhaan ngadto sa pagtukod sa templo. Ang mga lalaki naghago aron sa pagtukod sa mga bong-bong sa templo, ug ang mga babaye naorganisar ngadto sa daghang mga grupo aron sa pagtahi og sinina alang sa mga lalaki nga nagtrabaho sa templo.⁸ Ang mga bata miapil usab sa trabaho pinaagi sa pagpundok sa mga gipanglabay nga mga tipak-tipak sa porselana ug kulon alang sa mora og hinaklap-haklap nga paghuman [stucco finish] sa gawas nga bahin sa templo.⁹

Ang pagtukod sa templo gitugbangan sa padayon nga espiritwal nga pagpangandam. Si Joseph Smith miorganisar sa Tunghaan alang sa mga Elder aron sa pagtudlo sa mga kalalakin-an ug sa pag-andam kanila alang sa pangalagad.¹⁰ Ang mga lalaki ug mga babaye midonar usab sa ilang panahon ug mga kapanguhaan sa nagkalain-laing mahigugmaong mga kalihokan.¹¹

Sa dihang ang templo hapit nang mahuman, si Joseph nakadawat og pinadayag nga mga instruksyon nga naglatid sa organisasyon sa priesthood ug naningkamot nga pormal nga maorganisar ang mga katungdanan ug korum sa mga Aaronic ug Melchizedek Priesthood. Ang importante nga mga panghitabo naglangkob sa organisasyon sa Unang Kapangulohan ug Ang Korum sa Napulog Duha.¹²

Ang pagkahuman ug pagpahinungod sa templo sa sayong bahin sa 1836 giubanan sa dili hitupngan nga pagbu-bu sa Espiritu. Sa mga adlaw human sa pagpahinungod, ang Ginoo mipakita ngadto nila ni Joseph Smith ug Oliver Cowdery. Si Moises, Elijah, ug Elias mipakita usab ug mitugyan og balaan nga mga yawe nga kinahanglanon aron sa pagpundok sa Israel ug mausa sa pagbugkos ang pamilya sa Dios. ¹³ Niini nga mga miting, ang mga Santos, lakip niadtong gitawag aron sa pagdala sa ebanghelyo ngadto sa tibuok kalibutan, midawat sa pagtuga sa espiritwal nga gahum nga gisaad kanila.¹⁴

Ang talagsaong kalampusan sa pagpahinungod gisundan og ekonomikanhon nga kalisud ug apostasiya sa misunod nga tuig. Ang Kirtland Safety Society, usa ka pinansyal nga institusyon nga naestablisar pinaagi sa mga lider sa Simbahan lakip ni Joseph Smith, nahagsa niadtong 1837 isip kabahin sa nasyonal nga krisis pinansyal nga nailhan nga Kalisang sa 1837 [Panic of 1837]. Isip resulta sa misunod nga ekonomikanhon nga mga kalisud, ang ubang mga mamuhunan, lakip na ang mga lider sa Simbahan, mikwestiyon sa propetikanhon nga tawag ni Joseph Smith.¹⁵ Ang pipila gani mihulga sa kinabuhi ni Joseph Smith. Sa sayo nga mga bulan sa 1838, si Joseph Smith ug ubang mga lider sa Simbahan miikyas sa Kirtland ug mibiyahe ngadto sa Far West, Missouri.

Daghan sa mga Santos nga nagpuyo sa Kirtland sa katapusan mikuyog sa kadaghanan sa mga Santos sa Missouri ug Nauvoo, gibiyaan ang ilang mga kabtangan. Ubay-ubay sa mga building nga nasentro sa mga kasinatian sa mga Santos sa Kirtland, lakip na ang templo, nagbarog lang gihapon hangtud karon. Ang Komunidad ni Kristo [Community of Christ] nanag-iya ug nagpreserbar sa Templo sa Kirtland, nga abli sa publiko alang sa mga tour.¹⁶ Ang ubang mga building lakip na ang gipaayo nga panimalay ug tindahan ni Newel K. Whitney hasta usab ang gitukod og balik nga bansohan ug ashery, gimentinar sa Ang Simbahan ni Jesukristo sa mga Santos sa Ulahing mga Adlaw ug abli usab sa publiko alang sa mga tour.

May Kalabutan nga mga Hisgutanan: Templo sa Kirtland