Mga Panimuyoan sa Pioneer

Samtang daghang mga politiko naghunahuna sa dako kaayong North American West nga may tinguha sa pagpalapad sa Estados Unidos, nakita ni Joseph Smith ang posibilidad alang sa mga Santos sa Ulahing mga Adlaw nga matukod ug mapalapad ang Zion.¹ Upat ka mga bulan sa wala pa ang iyang kamatayon, giaghat ni Joseph ang Korum sa Napulog Duha ka mga Apostoles sa pagpangita og posibling mga panimuyoan didto sa California ug Oregon, nagpaabut kon unsaon kaha sa mga Santos “pagtukod og panimuyoan sa labing dali” ug sa “pagbaton og usa ka [gobyerno] nga atong kaugalingon.”² Sa wala pa ug sa human gipatay si Joseph sa 1844, ang Konseho sa Kalim-an naghunahuna og nagkalain-laing mga destinasyon alang sa pamuy-anan, sa kadugayan nakahukom diha sa mga walog sa bukid duol sa Dakong Salt Lake. Sa 1846 nahimong dinalian ang ilang mga plano human nangusog ang mga opisyales sa estado sa Illinois sa pagpapahawa sa mga Santos sa Nauvoo.³

Sulod sa usa ka dekada, ang mga Santos sa Ulahing mga Adlaw nga gipangulohan ni Brigham Young padulong sa kasadpan mitukod og dakong panimuyoan sulod ug libut sa Dakong Walog sa Salt Lake.⁴ Sa unang pagsulod sa usa ka dapit, kasagarang makita sa mga Santos ang mga komunidad sa Lumad nga Amerikano nga namuyo na diha niana nga yuta. Bisan pa sa ilang mga paglaum nga magpuyo nga malinawon uban ang Lumad nga mga Amerikano, ilang relasyon kasagaran lisud ilabi na nga ang duha ka mga grupo managlahi sa ilang tumong kung unsaon paggamit sa yuta og mga kapanguhaan. Nagsunod og mas kasagarang mga sumbanan sa panimuyoan, ang mga Santos sa Ulahing mga Adlaw sa kinatibuk-an miangkon ug migamit sa bisan unsa nga mga yuta nga ilang napilian alang sa panimuyoan. Tungod sa gidak-on ug epekto sa mga panimuyoan sa mga Santos sa Ulahing mga Adlaw diha sa lugar, miresulta kini sa dili makatarungan nga pagpahawa sa mga Lumad diha sa ilang mga yutang natawhan.⁵

Sayo sa mga 1860, dinosena nga mga komunidad nga nagsunod sa modelo [urban template] nga dinasig sa mga pagpadayag ug mga desenyo ni Joseph Smith ang gitukod tali sa Walog sa Bear Lake didto sa amihanan ug sa St. George didto sa habagatan, ang tanan sulod sa 300 ka milya (480 ka kilometro) sa Siyudad sa Salt Lake.⁶ Sa panahon sa pagka-presidente ni Brigham Young (1847–1877), ang mga paningkamot nga makabaton og kapuy-an miabut hangtud sa Dagat Pasipiko, nag-abli og bag-o nga mga panimuyoan nga milugway ngadto sa San Bernardino, California, ug ngadto sa bag-ong sistema sa ekonomiya ug mga misyon sa industriya sa wala pa ang 1860. Bisan pa sa dili maayo nga yuta, batoon nga dalan, ug kakulang sa tubig diha sa mga panimuyoan, ang pioneer nga mga komunidad misustinar og populasyon nga labaw sa 96,000 pagka 1870, nga may 11 ka mga stake nga gihimo didto sa Idaho ug Utah. Sa katapusan sa gatusan ka tuig, ang mga Santos nakatukod og kapin o kulang sa 500 ka mga komunidad tabok sa Intermountain West.⁷

Panimuyoan, Idaho Falls, Idaho, mga 1866–1906.

Ang katuigan sa pioneer sa Teritoryo sa Utah natapos sa pag-abut sa agianan sa tren sa 1869 ug ang misunod nga pagkaylap sa mga linya sa agianan sa tren sa tibuok rehiyon.⁸ Ang paningkamot nga makatukod og panimuyoan mipadayon, bisan pa niana, nga may mga kolonya sa mga Santos sa Ulahing mga Adlaw didto sa Mehiko ug Canada sa mga 1880.⁹ Sa katapusan sa ika-19 nga siglo, bag-ong mga panimuyoan sa mga Santos sa Ulahing mga Adlaw mipunting ngadto sa pagpalambo sa simbahan, pamilya, ug kinabuhi sa komunidad bisan asa sila nagpuyo.

Kalabut nga mga Hisgutanan: Colonies in Mexico, Salt Lake Valley, Utah, Zion/New Jerusalem