Palmyra ug Manchester

Sa pagsugod sa ulahing bahin sa 1700, ang mga taga New England namalhin ngadto sa kasadpan sa New York sa dinagko nga mga pundok, nadani sa tambok nga yuta ug barato nga balor sa yuta. Ang pagkompleto sa Erie Canal niadtong 1825 nakadugang sa paglambo, ug ang gamay nga barangay sa Palymra dali kaayong nahimong sentro sa komersyo. Uban sa nagkadako nga populasyon nagkadako usab ang pagkadaiya sa relihiyon sama sa mga Baptist, mga Methodist, mga Presbyterian, ug mga Quaker ang tanan nagkapundok sa usa ka dapit ug nagsugod sa paglabwanay sa mga kinabig.¹ Ang mga residente sa tibuok rehiyon miapli sa mga relihiyosong panagtigum, lakip sa mga miting sa relihiyosong kalihokan.

gawas nga bahin sa Smith cabin

Ang gitukod pag-usab nga log home sa umahan sa Smith didto sa Palmyra, New York

Ang mga Smith didto sa Palmyra ug Manchester

Ang pamilyang Joseph Sr. ug Lucy Mack Smith milalin ngadto sa kasadpan sa New York niadtong 1816 ug 1817 human ang ngil-ad nga ani ug kalisud sa panalapi mihasi sa ilang panginabuhian. Namuyo una sila sa barangay sa Palmyra ug miabang og balay sulod sa duha ka tuig, nabuhi sa kinitaan gikan sa pagpanarbaho ug adunay gamayng tindahan. Niadtong 1820 ang pamilya nakapalit og 40 ka ektarya nga umahan pipila ka milya sa habagatan nga Kalungsuran sa Palmyra sa Manchester.

Pipila sa mga mahinungdanong mga panghitabo sa sayo nga bahin sa Pagpahiuli nahitabo dinhi niining dapita. Si Joseph Smith Jr. miasoy nga sa mga panahon nga namalhin ang iyang pamilya ngadto sa kasadpan sa New York, ang iyang “hunahuna nahimong seryoso sa”, relihiyosong mga pangutana.² Kining espirituhanon nga mga kabalaka misangpot sa iyang Unang Panan-awon, nga nahitabo didto sa kakahoyan nga dapit sa umahan sa pamilya. Sa usa ka log home diha sa umahan didto unang mibisita kaniya ang anghel nga si Moroni. Upat katuig ang milabay, nakuha ni Joseph ang bulawan nga mga palid gikan sa usa ka bungtod duol sa barangay sa Manchester, ug niadtong 1830 ang Basahon ni Mormon naimprinta didto sa Palmyra.

Sa iyang kasaysayan, si Lucy Mack Smith miingon nga si Joseph nakadawat og usa ka pagpadayag niadtong tinglarag sa 1830 nga nagsugo sa pamilya ni Joseph Sr. sa pagbalhin ngadto sa Waterloo, New York. Niadtong Oktubre ang pamilya mibiya sa Manchester paingon sa Waterloo, diin nagpabilin sila didto hangtud ang mga Santos nagkatigum ngadto sa Ohio sayong bahin sa misunod nga tuig. Niadtong 1907 ang Simbahan nakaangkon og umahan sa Manchester gikan sa anak nga lalaki sa kababata nga higala ni Joseph Smith.³

Debate kabahin sa Relihiyusong kalihokan sa Palmyra

kinulit nga talan-awon sa kadalanan nga may mga building

Main Street, Palmyra, New York

Pipila sa mga tigsiksik adunay pangutana kon ang Palmyra talan-awon ba sa talagsaon nga relihiyoso nga kaguliyang ug panagbangi tali sa mga simbahan niadtong 1820, sumala sa gihulagway sa kasaysayan ni Joseph Smith.⁴ Hinoon, sa istorya ni Joseph, wala lang maghisgut sa Palmyra apan gipakita nga ang kaguligayang mitumaw sa “tibuok distrito sa Nasud.”⁵ Halapad ang pag-uyon sa mga historian nga ang nagkadako nga kaikag, naglakip sa paglabwanay tali sa mga simbahan tungod sa mga kinabig, komon kaayo sa kasadpan sa New York atol sa panahon nga nagpuyo ang mga Smith sa Palmyra.⁶ Niadtong Hunyo 1818, pananglitan, usa ka kampo sa Methodist nga miting gipahigayon sa Palmyra. Sa misunod nga ting-init, ang mga Methodist nanagpundok na usab 15 ka milya [24 kilometros] gikan sa umahan sa pamilyang Smith, sa Vienna (karon Phelps), New York. Usa ka byahero nga tigsangyaw sa Methodist misulat sa iyang journal sa mga relihiyusong kalihokan duol sa Palmyra ug sa Manchester niadtong 1819 ug 1820.⁷ Alang sa batan-ong Joseph Smith, kinsa nakasaksi sa relihiyosong mga kalainan sulod sa kaugalingon niyang pamilya, mao gayud kadto ang usa ka panahon sa relihiyosong kaguliyang, sumala sa iyang giingon sa iyang kasaysayan.

Mga Kapanguhaan sa Simbahan

Don Enders, “The Sacred Grove,” Mayo 19, 2014, history.lds.org.

“First Vision Accounts,” Mga Hisgutanan sa Ebanghelyo, topics.lds.org.

“Early Sites of the Restoration: New York and Pennsylvania,” history.lds.org.

“Palmyra Township, New York,” josephsmithpapers.org.

“Manchester Township, New York,” josephsmithpapers.org.

Bibliograpiya

Ang mosunod nga mga pagmantala nakahatag og dugang impormasyon kabahin niining hisgutanan. Pinaagi sa pagpakita o pag-link nimo ngadto niining mga kapanguhaan, wala kami mag-indorso o mogarantiya sa sulod o sa mga panglantaw sa tagsulat.

Steven C. Harper, Joseph Smith’s First Vision: A Guide to the Historical Accounts (Salt Lake City: Deseret Book, 2012).

Larry C. Porter, “Palmyra/Manchester, New York,” sa Encyclopedia of Mormonism, ed. Daniel H. Ludlow, 5 vols. (New York: Macmillan, 1992), 3:105.

May Kalabutan nga mga Hisgutanan: Sacred Grove and Smith Family Farm [Sagrado nga Kakahuyan ug Umahan sa Pamilyang Smith], Printing and Publishing the Book of Mormon [Pag-imprinta ug Pagmantala sa Basahon ni Mormon], Awakenings and Revivals [Mga Pahigmata ug mga Relihiyusong Kalihokan], Founding Meeting of the Church of Christ [Miting sa Pagsugod sa Simbahan ni Kristo]

Mubo nga mga sulat

1. Donald Enders, “Palmyra and Manchester, 1816–1830,” sa Brandon S. Plewe, ed., Mapping Mormonism: An Atlas of Latter-day Saint History (Provo, Utah: Brigham Young University Press, 2012), 16–17.

2. Joseph Smith, “History, circa Summer 1832,” 1, josephsmithpapers.org, spelling gipamoderno.

3. Lucy Mack Smith, “Lucy Mack Smith, History, 1845,” 178, 186–89, josephsmithpapers.org; Don Enders, “The Sacred Grove,” Mayo 19, 2014, history.lds.org.

4. Tan-awa sa Milton V. Backman, Joseph Smith’s First Vision: Confirming Evidences and Contemporary Accounts (Salt Lake City: Deseret Book Company, 1971), 195–210.

5. Joseph Smith, “History, circa June 1839–circa 1841 [Draft 2],” 1, josephsmithpapers.org.

6. Whitney R. Cross, The Burned-over District: The Social and Intellectual History of Enthusiastic Religion in Western New York, 1800–1850 (Ithaca: Cornell University Press, 1950); Paul E. Johnson, A Shopkeeper’s Millennium: Society and Revivals in Rochester, New York, 1815–1837 (New York: Hill and Wang, 1983); Nathan O. Hatch, The Democratization of American Christianity (New Haven: Yale University Press, 1989).

7. Benajah Williams diary, Hulyo 15, 1820, Church History Library, Siyudad sa Salt Lake.