Korum sa Napulog Duha

“Korum sa Napulog Duha,” Mga Hisgutanan sa Kasaysayan sa Simbahan

Ang basahon sa Mga Taga-Efeso nagtudlo nga ang simbahan sa Bag-ong Tugon “natukod diha sa pundasyon sa mga apostoles ug mga propeta.”¹ Ang mga apostoles nagsilbi usab nga kabahin sa pundasyon sa gipahiuli nga Simbahan sa ulahing mga adlaw. Niadtong Hunyo 1829, nakadawat si Joseph Smith og usa ka pagpadayag nga si Oliver Cowdery ug si David Whitmer kinahanglan mangita og napulog duha ka mga kalalakin-an nga mahimong mga disipulo sa Ginoo ug kinsa “mosangyaw sa akong ebanghelyo, ngadto sa mga Hentil ug ngadto sa Judeo.”² Sa mosunod nga pipila ka mga tuig, ang mga hunahuna nilang Cowdery ug Whitmer anaa sa “nagmakanunayon sa paghunahuna sa pagpangita kinsa kining Napulog Duha,” ug sila kanunay nga,” “nagtinguha sa Ginoo pinaagi sa pagpuasa ug pag-ampo” aron masayud.³

Niadtong Pebrero 1835, si Joseph Smith ug ang Tulo ka mga Saksi sa Basahon ni Mormon—Oliver Cowdery, David Whitmer, ug Martin Harris—mipili og napulog duha ka kalalakin-an sa pagserbisyo isip mga Apostoles sa Simbahan. Bisan ang ulohan nga Apostol nahatag na kaniadto ngadto sa mga indibidwal kinsa naghimo sa katungdanan sa pag-proselyte sa bag-ohay pa ang Simbahan, lakip ni Oliver Cowdery ug David Whitmer,⁴ ang Napulog Duha ka mga Apostoles, sumala sa gipasabut diha sa pagpadayag sa 1829, wala natawag hangtud sa 1835.

Niadtong Pebrero 14, 1835, si Joseph Smith mipatawag og usa ka miting didto sa Kirtland, Ohio, aron ipaila ang mga indibidwal kinsa miapil diha sa Kampo sa Israel (Kampo sa Zion) niadtong 1834.⁵ Atol niining miting, misugo siya ni Cowdery, Whitmer, ug ni Harris sa “pagpili sa napulog duha ka kalalakin-an gikan sa simbahan isip mga Apostoles sa pag-adto sa tanang mga kanasuran, kaliwatan, mga pinulongan ug mga katawhan.”⁶ Human ang kapangulohan sa halangdong pagkapari mipanalangin sa Tulo ka mga Saksi, ang Tulo ka mga Saksi (tataw nga nakigkonsulta ni Joseph Smith) mipili sa mosunod nga kalalakin-an isip mga Apostoles: Lyman Johnson, Brigham Young, Heber C. Kimball, Orson Hyde, David W. Patten, Luke Johnson, William E. McLellin, John F. Boynton, Orson Pratt, William Smith, Thomas B. Marsh, ug Parley P. Pratt. Walo sa napulog duha miuban ni Joseph didto sa biyahe sa Kampo sa Israel; ang tanan nakasangyaw og taas nga panahon isip mga misyonaryo.

Sulod sa mosunod nga mga semana, ang Napulog Duha nakadawat og mga panalangin sa pagka-orden ug usa ka sugo gikan ni Oliver Cowdery. Si Joseph Smith mitudlo usab kanila mahitungod sa ilang mga calling. Diha sa usa ka miting nga gipahigayon sa Pebrero 27, 1835, si Joseph miingon nga ang mga Apostoles “maghupot sa mga yawe bahin niining pagpangalagad, aron maablihan ang mga ganghaan sa gingharian sa langit ngadto sa tanang mga nasud, ug masangyaw ang Ebanghelyo ngadto sa tanang nilalang.” Sila maila isip “nagbiyahe nga halangdong konseho,” nga “modumala sa kinatibuk-an sa mga simbahan sa mga Santos taliwala sa mga Hentil, diin walay kapangulohan nga naestablisar.”⁷ Nagpasabut kini nga ang Napulog Duha maoy responsable sa mga kongregasyon sa Simbahan nga gawas na sa punuang mga sentro sa Simbahan sa Kirtland ug sa Missouri.

Mga tunga-tunga sa Marso 1 ug Mayo 1, 1835, si Joseph Smith miandam usab og usa ka instruksyon kabahin sa priesthood nga naghisgut sa katungdanan ug mga responsibilidad sa Napulog Duha. Kini nga dokumento misubli sa pagpasabut nga ang Napulog Duha adunay hurisdiksyon sa mga branch nga gawas na sa Kirtland ug sa Missouri ug namahayag nga sila kinahanglan molihok “ubos sa direksyon sa kapangulohan sa simbahan.” Ang Napulog Duha “managsama diha sa awtoridad” ngadto sa Unang Kapangulohan ug moserbisyo isip “linain nga mga saksi sa ngalan ni Kristo, sa tibuok kalibutan.”⁸

Sa pagsugod ang Napulog Duha nagdala og bug-at nga palas-anon sa pagproselyte, sa pagsangyaw ug pagdumala sa mga kongregasyon sa mga Santos sa Ulahing mga adlaw diha sa silangang bahin sa Estados Unidos atol sa ting-init sa 1835 ug dayon nagsangyaw sa ebanghelyo didto sa England pagsugod sa 1837. Pagka 1841 daghan sa mga Apostoles ang namalik gikan sa England, ug atol sa komperensya sa Simbahan sa Agosto, ang Korum sa Napulog Duha gigiyahan sa “pagbarug diha sa ilang dapit sunod sa unang Kapangulohan,”⁹ ingon nga nahatagan sa responsibilidad sa “pag-abag sa pagdumala sa mga kalihokan sa gingharian,” dili lang diha sa mga misyon apan didto sa Nauvoo.¹⁰

Paghulagway sa artist nilang Joseph ug Hyrum Smith ug sa pipila ka mga sakop sa Korum sa Napulog Duha diha sa Nauvoo.

Sumala ni Orson Hyde, dihay panahon sa unang bahin sa 1844, nga si Joseph Smith misulti sa Napulog Duha nga ang Ginoo misugo kaniya sa “pagpadali ug paghatag” sa endowment sa mga Apostoles. Dayon si Joseph “mipahigayon diri kanamo sa matag ordinansa sa balaan nga priesthood.” Sa iyang pagtapos, namahayag siya, “ Karon kon sila mopatay kanako anaa na kaninyo ang tanang mga yawe, ug ang tanang mga ordinansa.” Ang Propeta mipadayon, “Sa inyong mga abaga gisangon ang responsibilidad sa pagpangulo niining mga katawhan, tungod kay ang Ginoo mopapahulay kanako og taud-taud.”¹¹

Human sa pagkamartir ni Joseph Smith, ang kinabag-an sa mga Santos didto sa Nauvoo mipaluyo ni Brigham Young isip Presidente sa Korum sa Napulog Duha sa pagpangulo sa Simbahan. Ubos sa iyang direksyon, ang mga Santos mikompleto sa Templo sa Nauvoo sa wala pa ang exodo ngadto sa Great Basin. Ang pagpuli ni Brigham Young nakaestablisar sa sumbanan nga kon ang Presidente sa Simbahan mamatay, ang Korum sa Napulog Duha adunay awtoridad sa pagpangulo ubos sa direksyon sa presidente niini. Niadtong Disyembre 1847, si Brigham Young miorganisar pag-usab sa Unang Kapangulohan, apan ang Napulog Duha padayong naghupot og kritikal nga katungdanan sa pagdumala sa Simbahan.¹²

Sa pagkamatay nilang Brigham Young ug John Taylor, ang Napulog Duha ka mga Apostoles midumala sa Simbahan sulod sa pipila ka tuig sa wala pa ang Unang Kapangulohan ma-organisar pag-usab. Hinoon, si Presidente Wilford Woodruff mitambag sa senior nga Apostol nga si Lorenzo Snow sa pag-organisar pag-usab sa Unang Kapangulohan sa walay langay. Sa pagkamatay ni Woodruff, si Snow miorganisar sa Unang Kapangulohan sulod sa usa ka semana. Sa samang paagi si Presidente Snow miawhag ni Joseph F. Smith, kinsa ang sunod nga mahimong Presidente sa Simbahan, sa “pagpadayon” human sa iyang kamatayon sa pag-organisar pag-usab sa Unang Kapangulohan.¹³ Ang Korum sa Napulog Duha ka mga Apostoles misunod niining sundanan sukad niadto, nga ang senior nga Apostol o ang Presidente sa Napulog Duha ang mahimong Presidente sa Simbahan.

Gikan sa 1835, sa dihang ang Korum sa Napulog Duha naorganisar, kapin na sa usa ka gatos ka kalalakin-an ang nakaserbisyo isip mga Apostoles. Karon ang Napulog Duha nagpadayon sa pagserbisyo isip espesyal nga mga saksi ni Jesukristo, nagdumala sa misyonaryo nga mga paningakamot diha sa Simbahan sa tibuok kalibutan, ug nakigtambag sa Unang Kapangulohan sa paggiya sa mga kalihokan sa Simbahan.