Joseph Fielding Smith

Si Joseph Fielding Smith miserbisyo isip ang ika-10 nga Presidente sa Simbahan gikan sa 1970 hangtod sa iyang kamatayon sa 1972. Natawo siya sa 1876 ngadto ni Julina Lambson Smith ug Joseph F. Smith, usa ka sakop sa Korum sa Napulog Duha ka Apostoles kinsa sa kaulahian nahimong ika-6 nga Presidente sa Simbahan. Si Joseph Fielding Smith migahin sa iyang pagkabata sa pagtabang sa iyang inahan, kinsa usa ka lisensyado nga mananabang, ug nagtrabaho diha sa umahan sa pamilya kauban sa iyang amahan ug mga igsoong lalaki.¹ Ang amahan ug mga paryente ni Joseph mipraktis og dinaghang kaminyoon, ug daghan ang nagtago sa tibuok nga mga 1880 sa dihang ang usa ka agresibong kampanya sa gobyerno sa Estados Unidos batok sa dinaghang asawa misanta sa kinabuhing pamilya alang sa daghang mga Santos. Nahinumdom si Joseph nga mga tinugyanan sa federal naggukod sa iyang amahan ug ang ubang mga lider sa Simbahan kanunay nga moimbestigar kaniya, sa iyang pamilya, ug sa iyang mga silingan. Nahinumdom siya nga “gihadlok sa federal nga opisyal sa tigpatuman sa balaod” pinaagi sa pagtan-aw sa mga pamilya nga “gitibulaag ngadto sa upat ka direksiyon sa hangin,” ilabi na samtang ang iyang amahan atua sa layo.²

Naminyo og katulo ka higayon si Joseph Fielding Smith. Nahimamat niya si Louie Shurtliff samtang nag-eskwela sa Latter-day Saints College, ug ang duha nagminyo sa 1898. Nanganak si Louie og duha ka babaye, apan sa 1908 giantos niya ang mga komplikasyon sa pagmabdos sa ikatulong bata ug namatay nga wala ikapanganak ang bata.³ Walo ka bulan ang milabay, nangasawa si Joseph ni Ethel Reynolds, ug sila adunay siyam ka anak. Sa 1937, namatay si Ethel sa talinugo sa utok, nagbiya ni Joseph nga balo sulod sa ikaduhang panahon.⁴ Sa pagkasunod tuig, nangasawa si Joseph ni Jessie Evans, usa ka batid nga tig-awit nga binugtong sa Tabernacle Choir. Sa milabay nga sunod 30 ka tuig, kasagaran siyang mipasundayag (usahay sa mga duet kauban ni Joseph) atol sa ilang daghang mga biyahe sa serbisyo sa Simbahan.⁵

Si Presidente Joseph Fielding Smith nag-andam og musika kauban ni Jessie Evans Smith, iyang asawa ug usa ka batid nga mang-aawit.

Sa pagkatinuod tanan sa hamtong nga kinabuhi ni Joseph gihalad ngadto sa serbisyo sa Simbahan. Wala madugay human sa iyang unang kaminyoon, mibiya siya alang sa usa ka misyon ngadto sa England. Samtang anaa sa yutang natawhan sa iyang mga kagikanan, gitubag niya ang hangyo sa iyang amahan sa pagsiksik sa ilang family tree ug sa pagpangita og impormasyon sa kagikanan gikan sa daang mga rekord sa parokya, nagpakidlap og tibuok kinabuhi nga kadasig alang sa kasaysayan sa pamilya.⁶ Diha sa iyang pagpauli, nadawat ni Joseph ang tanyag sa pagtrabaho diha sa Opisina sa Tigsulat sa Kasaysayan sa Simbahan [Church Historian’s Office], diin siya mitabang sa pagtigom og bag-ong mga balita mahitungod sa Simbahan ug ubang mga report. Kasagaran siyang makasugat og mga materyal nga gisulat sa pagpakaulaw o pagdaot sa dungog sa Simbahan ug sa mga miyembro niini, ug nahimong naanad siya sa pagtubag sa mga hiwi nga mga gisulti sa eskriptuhanon ug makasaysayanong impormasyon nga paagi. Lima ka tuig ngadto sa iyang propesyonal nga panarbaho, gitudlo si Joseph nga kaabag sa tigsulat sa kasaysayan sa Simbahan ug mipadayon sa iyang makasaysayanong pagsiksik ug pagsulat alang sa laing 70 ka tuig.⁷

Sa edad nga 33, si Joseph gitawag ngadto sa Kurom sa Napulog Duha ka Apostoles. Ang iyang apostolikanhong pangalagad mikabat og unom ka dekada ug gilakip og dugang ang mga bulohaton isip libraryan ug sa kadugayan presidente sa Genealogical Society sa Utah (gikan sa 1910 ngadto sa 1961) ug Tigsulat sa Kasaysayan sa Simbahan ug Rekorder (gikan sa 1921 ngadto sa 1970).⁸ Malamboon siya nga misulat, nagsulat og dili maihap nga mga sermon, gatosan ka mga artikulo kabahin sa kagikanan, doktrinal, ug makasaysayanong mga hilisgotan; ug 18 ka basahon. Ang iyang hinugpong nga giulohan og Mga Pagtulun-an ni Propeta Joseph Smith mipasaka og kinatibuk-ang pagkasinati ngadto sa hunahuna ug mga pagtulon-an ni Joseph Smith. Usa ka tuig ngadto sa iyang tagal isip Tigsulat sa Kasaysayan sa Simbahan ug Rekorder, gimantala ni Elder Smith ang Essentials in Church History, nga miagi og 20 ka pag-imprinta og balik ug mipabilin nga usa ka labing himalitan hangtod ngadto sa mga 1970. Ang mga dili manunulat sa mga tinumotumo [fiction] nga kasaysayan niana nga panahon kasagarang misulat og tag-as ug dasok sa mga istorya; ang Essentials in Church History mibiya og dali gikan niini nga estilo pinaagi sa pagmubo sa mas tag-as nga mga saysay ug sa pagpresentar sa diretso ug yano nga mga pahayag mahitungod sa mga panghitabo sa nanglabay nga panahon, diin mi-impluwensya og maayo sa paagi ang mga manwal ug ubang mga materyal nasulat alang sa mga miyembro sa Simbahan. Ang dili mausab nga pasalig ni Elder Smith ngadto sa kamatuoran sa ebanghelyo diha sa pulpito ug sa papel nakahatag kaniya og usa ka reputasyon isip ang labing hugot nga tigdepensa sa pagtuo sa iyang henerasyon.⁹

Wala madugay human sa kamatayon ni Presidente David O. Mckay sa 1970 si Joseph Fielding Smith gipaluyohan isip Presidente sa Simbahan. Gipangulohan ni Presidente Smith ang usa ka ribyu sa mga pagpadagan sa Simbahan nga mipalambo sa pakigtakdo sa mga pagmantala ug mga komunikasyon, giusab ang paagi sa mga departamento sa mga punoang buhatan sa Simbahan, gihimo ang Korum sa Napulog Duha ka Apostoles ngadto sa paghimo og mas daghang administratibong desisyon nga sa kaniadto gigahin lamang alang sa Unang Kapangulohan. Gitambongan usab niya ang mga komperensya sa erya aron mas maayo ang pagkakonektar sa mga General Authority ug sa tibuok kalibotan nga mga kongregasyon.¹⁰ Ingon nga nagtagamtan og maayong panglawas sa iyang tibuok kinabuhi, naospital si Presidente Smith sa unang higayon sa edad nga 94. Mipadayon siya sa pagtambong og mga miting ug sa pagbisita sa mga Santos hangtod nga hapit na ang iyang ika-96 nga adlawng natawhan, sa dihang sa hilom siya namatay sa usa ka gabii sa Dominggo sa Hulyo 1972.¹¹

Alang sa dugang nga impormasyon mahitungod sa kinabuhi ni Joseph Fielding Smith, tan-awa ang Prophets of the Restoration nga mga bidyo kalabot sa history.ChurchofJesusChrist.org o diha sa Gospel Library app.

Kalabot nga mga Hilisgotan: Joseph F. Smith, George Albert Smith, Family History and Genealogy, Organic Evolution, Correlation