Inahan sa Langit

Ang doktrina sa usa ka Langitnong Inahan maoy usa ka gihandum ug talagsaong gituohan sa mga Santos sa Ulahing mga adlaw.¹ Sumala sa gisulti ni Elder Dallin H. Oaks sa Korum sa Napulog Duha ka mga Apostoles, “Ang atong teyolohiya nagsugod sa Langitnong mga ginikanan. Ang atong pinakataas nga pangandoy mao nga mahisama kanila.”² Samtang walay rekord sa usa ka pormal nga pinadayag ngadto ni Joseph Smith bahin niining doktrina, ang pipila sa mga nahaunang mga Santos nga kababayen-an mihinumdom nga personal niyang gitudlo kanila ang mahitungod sa usa ka Inahan sa Langit.³ Ang pinakasayo nga namantala nga mga pakisayran sa doktrina gipakita sa wala madugay human sa kamatayon ni Joseph Smith niadtong 1844, sa doktrina nga gisulat sa iyang suod nga mga kauban.⁴ Ang labing naila nga pagpahayag sa ideya makita sa usa ka balak ni Eliza R. Snow nga giulohan og “My Father in Heaven” ug karon naila isip himno nga “O My Father.” Gideklarar sa teksto niini nga: “Usa ra bang ginikanan? / Dili, way katarungan; / May kamatuoran—ako sa langit / may inahan.”⁵

Gipamatud-an sa misunod nga mga lider sa Simbahan ang pagka-anaa sa usa ka Inahan sa Langit. Niadtong 1909, ang Unang Kapangulohan nagtudlo nga “Tanan nga mga lalaki ug babaye may pagkasama sa tibuok kalibutan nga Amahan ug Inahan ug literal nga mga anak sa Dios.”⁶ Si Susa Young Gates, usa ka prominenting lider sa Simbahan, misulat niadtong 1920 nga ang mga panan-awon ni Joseph Smith ug mga pagtulun-an mipadayag sa kamatuoran nga “ang balaang Inahan, [anaa] sa kiliran uban sa balaan nga Amahan.”⁷ Ug diha sa “Ang Pamilya: Usa ka Pamahayag ngadto sa Kalibutan,” gi-isyu niadtong 1995, ang Unang Kapangulohan ug ang Korum sa Napulog Duha ka mga Apostoles namahayag, “Ang matag usa hinigugmang espiritu nga anak nga lalaki o babaye sa langitnong mga ginikanan, ug, sa ingon, ang matag usa adunay mga kinaiya sa pagkadios.”⁸