“Mga Panudlo sa Teyolohiya (‘Mga Panudlo sa Pagtuo’),” Mga Hisgutanan sa Kasaysayan sa Simbahan
“Mga Panudlo sa Teyolohiya”
Lectures on Theology (“Lectures on Faith”) [Mga Panudlo sa Teyolohiya (“Mga Panudlo sa Pagtuo”)]
Ang Lectures on Faith usa ka inila nga ulohan sa usa ka hugpong sa pito nga teyolohikanhong mga panudlo nga gitugyan diha sa Tunghaan sa mga Elders sa Kirtland, Ohio, sa tingtugnaw sa 1834–35. Kini nga mga panudlo nagrepresentar tingali sa pinakasayo nga paningkamot sa paghimo og hinan-ay nga teyolohiya sa Santos sa Ulahing mga Adlaw, nahibalo pinaagi sa Basahon ni Mormon ug sayong mga pagpadayag ngadto ni Joseph Smith. Ilang gipasabut ang hugot nga pagtuo ug mga kondisyon diin kini gikinahanglan ug gialimahan. Tulo ka butang ang gikinahanglan, ang mga panudlo nagtudlo, nga ang bisan unsang “makatarunganon ug intelihenting binuhat” maggamit sa hugot nga pagtuo sa Dios nga gikinahanglan alang sa kaluwasan: una, ang ideya nga adunay Dios; ikaduha, ang sakto nga ideya sa Iyang kinaiyahan ug mga hiyas; ug ikatulo, kahibalo nga ang dalan sa kinabuhi nga gisunod sa usa ka tawo nahisubay sa Iyang kabubut-on.1 Ang mga panudlo mipasabut ug mipatin-aw niining mga ideya.
Ang unang panudlo namantala isip broadside [usa ka dako nga papel nga atubangan lang ang gi-printahan] niadtong Pebrero 1835, ug ang ikalima ug ika-unom gimantala diha sa pamantalaan sa Simbahan niadtong Mayo 1835. Ang tanang pito nga mga panudlo gimantala og dungan sa wala madugay nianang tuiga sa unang edisyon sa Doktrina ug mga Pakigsaad, ang mga panudlo naglangkob sa “doktrina,” ug mga pagpadayag ni Joseph Smith, ang “mga pakigsaad.” Ang mga panudlo gilakip sa Iningles nga mga edisyon sa Doktrina ug mga Pakigsaad hangtud 1921 ug sa kasagaran nga dili-Iningles nga mga hubad.
Ang mga panudlo walay piho nga tagsulat, ug walay manuskrito nga mga kopya, nga misangput sa pagtagna-tagna mahitungod sa kinsa ang misulat sa mga panudlo. Sumala ni Jedediah M. Grant, usa ka lumolupyo sa Kirtland niadtong 1835, si Joseph Smith us si Sidney Rigdon milihok isip mga magtutudlo diha sa tunghaan. Ang mga eskolar kinsa misusi sa gamay nga makasaysayanon nga dokumento milalis nga si Sidney Rigdon mao ang tagsulat o bisan nalang maoy dako og natampo sa pagbuhat sa mga panudlo.2 Sa pagkatinuod, si Brigham Young mitawag kanila nga mga panudlo “nga giandam ni Brother Sidney.”3 Ang gilapdon sa kalambigitan ni Joseph Smith sa paghimo sa mga panudlo, kon aduna man gani, wala mahibaloi. Bisan pa niana, ang pagkalakip sa mga panudlo nga naa sa Doktrina ug mga Pakigsaad niadtong 1835 kusganong misugyot nga si Joseph Smith mitugot sa unod sa mga panudlo.4
Ang pagmantala sa Lectures on Faith [Mga Panudlo sa Pagtuo] diha sa Doktrina ug mga Pakigsaad mipasaka sa estado niini diha sa mga miyembro sa Simbahan. Sa sayong bahin sa ika-20 nga siglo, hinoon, ang mga lider sa Simbahan nag-anam og kabalaka mahitungod sa mga pamahayag dinha sa Mga Panudlo sa Pagtuo. Sama pananglit, ang ikalima nga panudlo naghisgut sa Amahan isip ang “personahi nga espiritu,” nga daw misumpaki sa panudlo ni Joseph Smith (gipahayag niadtong 1843, pipila ka tuig human ang mga panudlo gihatag) nga “Ang Amahan adunay lawas nga unod ug mga bukog nga mahikap ingon sa tawo,”(DP 130:22).5 Si Elder James E. Talmage, usa ka sakop sa Korum sa Napulog Duha ka mga Apostoles kinsa nangulo sa komitiba nga nag-usab sa 1921 nga Doktrina ug mga Pakigsaad, mibati nga labing maayo ang “paglikay sa kalibug ug panagbingkil mahitungod niining importante nga punto nga gituohan.”6 Agig dugang, ang mga panudlo wala dawata sa Simbahan isip adunay bili gawas lang sa teyolohikal nga mga leksyon, ang komitiba ni Talmage milalis. Base niini nga mga rekomendasyon, ang Mga Panudlo sa Pagtuo gitangtang gikan sa Doktrina ug mga Pakigsaad.
Bisan human sa ilang pagkatangtang gikan sa Doktrina ug mga Pakigsaad, ang Mga Panudlo sa Pagtuo kasagarang gitun-an sa mga misyonaryo ug ubang mga miyembro sa Simbahan diha sa giprinta og usab nga mga edisyon, ug ang mga pamantalaan sa Simbahan usahay mokutlo gikan sa mga panudlo. “Ang relihiyon nga wala magkinahanglan og sakripisyo sa tanang mga butang,” usa sa kasagaran nga gikutlo nga linya nga atong mabasa, “walay gahum nga igong makaugmad og hugot nga pagtuo nga gikinahanglan sa kinabuhi ug kaluwasan.”7
May Kalabutan nga mga Hisgutanan: Doktrina ug mga Pakigsaad