ການລວມເຂົ້າກັນຂອງຮ່າງກາຍທີ່ເປັນວິນຍານ ແລະ ຮ່າງກາຍທີ່ເປັນເນື້ອໜັງ ແລະ ກະດູກ ຫລັງຈາກຄວາມຕາຍ. ຫລັງຈາກການຟື້ນຄືນຊີວິດ, ວິນຍານ ແລະ ຮ່າງກາຍ ຈະບໍ່ມີວັນແຍກອອກຈາກກັນອີກ ແລະ ບຸກຄົນນັ້ນຈະກາຍເປັນອະມະຕະ. ທຸກຄົນທີ່ເກີດຢູ່ເທິງແຜ່ນດິນໂລກ ຈະຟື້ນຄືນຊີວິດ ເພາະພຣະເຢຊູຄຣິດໄດ້ເອົາຊະນະຄວາມຕາຍ (1 ກຣທ 15:20–22).
ພຣະເຢຊູຄຣິດເປັນຜູ້ທຳອິດທີ່ໄດ້ຟື້ນຄືນພຣະຊົນຢູ່ເທິງແຜ່ນດິນໂລກ (ກຈກ 26:23; ກລຊ 1:18; ພນມ 1:5). ພຣະຄຳພີໃໝ່ມີຫລັກຖານພຽງພໍ ວ່າພຣະເຢຊູໄດ້ລຸກຂຶ້ນດ້ວຍພຣະກາຍຂອງພຣະອົງ: ອຸບມຸງຂອງພຣະອົງເປົ່າວ່າງ, ພຣະອົງໄດ້ກິນປາ ແລະ ນ້ຳເຜິ້ງ, ພຣະອົງມີພຣະກາຍທີ່ເປັນເນື້ອໜັງ ແລະ ກະດູກ, ຜູ້ຄົນໄດ້ຈັບບາຍພຣະອົງ, ແລະ ທູດໄດ້ກ່າວວ່າ ພຣະອົງໄດ້ຟື້ນຄືນພຣະຊົນແລ້ວ (ມຣກ 16:1–6; ລກ 24:1–12, 36–43; ຢຮ 20:1–18). ການເປີດເຜີຍຍຸກສຸດທ້າຍຢືນຢັນຄວາມເປັນຈິງຂອງການຟື້ນຄືນພຣະຊົນຂອງພຣະຄຣິດ ແລະ ການຟື້ນຄືນຊີວິດຂອງມະນຸດຊາດທັງປວງ (ແອວ 11:40–45; 40; 3 ນຟ 11:1–17; ຄພ 76; ມຊ 7:62).
ທຸກຄົນຈະບໍ່ຟື້ນຄືນຊີວິດສູ່ລັດສະໝີພາບອັນດຽວກັນ (1 ກຣທ 15:39–42; ຄພ 76:89–98), ທັງທຸກຄົນຈະບໍ່ຟື້ນຄືນຊີວິດໃນເວລາດຽວກັນ (1 ກຣທ 15:22–23; ແອວ 40:8; ຄພ 76:64–65, 85; 88:96–102). ໄພ່ພົນຂອງພຣະເຈົ້າຢ່າງຫລວງຫລາຍໄດ້ຟື້ນຄືນຊີວິດ ຫລັງຈາກພຣະຄຣິດໄດ້ຟື້ນຄືນພຣະຊົນ (ມທ 27:52). ຄົນຊອບທຳຈະຟື້ນຄືນຊີວິດກ່ອນຄົນຊົ່ວ ແລະ ຈະອອກມາໃນການຟື້ນຄືນຊີວິດຄັ້ງທຳອິດ (1 ທສນ 4:16); ຄົນບາບທີ່ບໍ່ກັບໃຈ ຈະອອກມາໃນການຟື້ນຄືນຊີວິດຄັ້ງສຸດທ້າຍ (ພນມ 20:5–13; ຄພ 76:85).