ຕີໂມທຽວ, ສານເຖິງ
ໜັງສືສອງເຫລັ້ມໃນພຣະຄຳພີໃໝ່. ມັນເປັນໜັງສືສະບັບຕົ້ນທີ່ໂປໂລໄດ້ຂຽນເຖິງຕີໂມທຽວ.
ຕີໂມທຽວສະບັບທຳອິດ
ໂປໂລໄດ້ຂຽນສານສະບັບທຳອິດ ຫລັງຈາກລາວໄດ້ຕິດຄຸກເທື່ອທຳອິດ. ລາວໄດ້ປະຕີໂມທຽວໄວ້ເມືອງເອເຟໂຊ, ໂດຍທີ່ຕັ້ງໃຈຈະກັບຄືນມາ (1 ຕມທ 3:14). ເຖິງຢ່າງໃດກໍຕາມ, ໂປໂລໄດ້ຮູ້ສຶກວ່າ ລາວຈະໄປເຖິງຊ້າ, ສະນັ້ນລາວຈຶ່ງໄດ້ຂຽນເຖິງຕີໂມທຽວ, ບາງທີຈາກມາເກໂດເນຍ (1 ຕມທ 1:3), ເພື່ອແນະນຳຊຸກຍູ້ລາວໃນການບັນລຸພາລະກິດຂອງລາວ.
ບົດທີ 1 ບັນຈຸຄຳທັກທາຍຂອງໂປໂລ ແລະ ຄຳແນະນຳຂອງລາວນຳອີກ ກ່ຽວກັບການຄາດຄະເນທີ່ໂງ່ຈ້າ ຊຶ່ງແຊກຊຶມເຂົ້າມາໃນສາດສະໜາຈັກ. ບົດທີ 2–3 ໃຫ້ຄຳແນະນຳກ່ຽວກັບການນະມັດສະການໃນສາທາລະນະ ແລະ ກ່ຽວກັບລັກສະນະ ແລະ ການກະທຳຂອງຜູ້ປົກຄອງ. ບົດທີ 4–5 ບັນຈຸຄຳບັນລະຍາຍກ່ຽວກັບການປະຖິ້ມຄວາມເຊື່ອໃນຍຸກສຸດທ້າຍ ແລະ ແນະນຳຕີໂມທຽວກ່ຽວກັບວິທີປະຕິບັດສາດສະໜາກິດແກ່ຜູ້ທີ່ລາວນຳພາ. ບົດທີ 6 ເປັນຄຳແນະນຳເພື່ອພິສູດສັດທາ ແລະ ຫລີກເວັ້ນຈາກຄວາມຮັ່ງມີທາງໂລກ.
ຕີໂມທຽວສະບັບທີສອງ
ໂປໂລໄດ້ຂຽນຈົດໝາຍສະບັບທີສອງ ລະຫວ່າງທີ່ລາວໄດ້ເຂົ້າຄຸກເທື່ອທີສອງ, ບໍ່ດົນກ່ອນຖືກຂ້າຍ້ອນຄວາມເຊື່ອ. ມັນບັນຈຸຖ້ອຍຄຳສຸດທ້າຍຂອງອັກຄະສາວົກ ແລະ ສະແດງຄວາມກ້າຫານ ແລະ ຄວາມໄວ້ວາງໃຈ ຊຶ່ງໄດ້ເຮັດໃຫ້ລາວປະເຊີນກັບຄວາມຕາຍ.
ບົດທີ 1 ບັນຈຸຄຳທັກທາຍຂອງໂປໂລ ແລະ ຄຳສັ່ງຕໍ່ຕີໂມທຽວ. ບົດທີ 2–3 ໃຫ້ຄຳເຕືອນ ແລະ ຄຳແນະນຳຫລາຍຢ່າງ, ພ້ອມດ້ວຍຄຳທ້າທາຍ ທີ່ຈະປະເຊີນສິ່ງອັນຕະລາຍທີ່ຢູ່ຂ້າງໜ້າ. ບົດທີ 4 ເປັນຂ່າວສານເຖິງໝູ່ເພື່ອນຂອງໂປໂລ, ບັນຈຸຄຳແນະນຳກ່ຽວກັບວິທີທີ່ຈະຈັດການກັບການປະຖິ້ມຄວາມເຊື່ອ.