ຊາວເທສະໂລນິກ, ສານເຖິງ
ໜັງສືສອງເຫລັ້ມໃນພຣະຄຳພີໃໝ່. ມັນເປັນຈົດໝາຍສະບັບຕົ້ນທີ່ໂປໂລ ໄດ້ຂຽນເຖິງຊາວເທສະໂລນິກ ໃນຂະນະທີ່ລາວຢູ່ເມືອງໂກຣິນໂທ ລະຫວ່າງການໄປຢ້ຽມຢາມເອີຣົບເທື່ອທຳອິດຂອງລາວ ປະມານ ຄ.ສ. 50. ວຽກງານຂອງລາວ ໃນເມືອງເທສະໂລນິກ ໄດ້ຖືກບັນຍາຍໄວ້ ໃນ ກິດຈະການ 17. ໂປໂລ ຢາກກັບຄືນໄປເມືອງເທສະໂລນິກ ແຕ່ບໍ່ສາມາດເຮັດໄດ້ (1 ທສນ 2:18). ສະນັ້ນລາວຈຶ່ງໄດ້ສົ່ງຕີໂມທຽວໄປໃຫ້ກຳລັງໃຈຜູ້ປ່ຽນໃຈເຫລື້ອມໃສ ແລະ ມາລາຍງານລາວກ່ຽວກັບຄວາມທຸກສຸກຂອງສະມາຊິກ. ໂປໂລໄດ້ຂຽນສານສະບັບທຳອິດ ເນື່ອງດ້ວຍຄວາມຂອບພຣະໄທຂອງລາວສຳລັບການກັບຄືນມາຂອງຕີໂມທຽວ.
ເທສະໂລນິກ ສະບັບທີໜຶ່ງ
ບົດທີ 1–2 ບັນຈຸຄຳທັກທາຍຂອງໂປໂລ ແລະ ຄຳອະທິຖານຂອງລາວສຳລັບໄພ່ພົນຂອງພຣະເຈົ້າ; ບົດທີ 3–5 ໄດ້ໃຫ້ຄຳແນະນຳເລື່ອງການເຕີບໂຕທາງວິນຍານ, ຄວາມຮັກ, ແລະ ພົມມະຈັນ, ຄວາມພາກພຽນ, ແລະ ການສະເດັດມາຄັ້ງທີສອງຂອງພຣະເຢຊູຄຣິດ.
ເທສະໂລນິກ ສະບັບທີສອງ
ບົດທີ 1 ບັນຈຸຄຳອະທິຖານສຳລັບໄພ່ພົນຂອງພຣະເຈົ້າ. ບົດທີ 2 ກ່າວເຖິງການປະຖິ້ມຄວາມເຊື່ອທີ່ຈະເກີດຂຶ້ນ. ບົດທີ 3 ບັນຈຸຄຳອະທິຖານຂອງໂປໂລ ເພື່ອອຸດົມການແຫ່ງພຣະກິດຕິຄຸນຈະມີໄຊ.