ຊາມູເອນ, ສາດສະດາໃນພຣະຄຳພີເດີມ
ລູກຊາຍຂອງເອນການາກັບນາງຮັນນາ, ຊາມູເອນໄດ້ເກີດມາ ເພື່ອເປັນຄຳຕອບໃຫ້ແກ່ຄຳອະທິຖານຂອງແມ່ລາວ (1 ຊມອ 1). ຕອນຍັງນ້ອຍ ລາວໄດ້ຖືກພາໄປຢູ່ນຳເອລີ, ຜູ້ເປັນມະຫາປະໂລຫິດຢູ່ພຣະວິຫານຂອງພຣະເຈົ້າຢູ່ເມືອງຊີໂລ (1 ຊມອ 2:11; 3:1). ພຣະຜູ້ເປັນເຈົ້າໄດ້ເອີ້ນຊາມູເອນ ຕອນລາວຍັງນ້ອຍ ໃຫ້ເປັນສາດສະດາ (1 ຊມອ 3). ຫລັງຈາກເອລີໄດ້ຕາຍໄປ, ຊາມູເອນໄດ້ກາຍເປັນສາດສະດາ ແລະ ຜູ້ຕັດສິນທີ່ຍິ່ງໃຫຍ່ຂອງອິດສະຣາເອນ ແລະ ໄດ້ສະຖາປະນາກົດໝາຍ, ລະບຽບ, ແລະ ແບບແຜນການນະມັດສະການຝ່າຍສາດສະໜາ ໃນແຜ່ນດິນຄືນມາໃໝ່ (1 ຊມອ 4:15–18; 7:3–17).
1 ຊາມູເອນ 28:5–20 ບັນຈຸເລື່ອງລາວຂອງຊາມູເອນ ທີ່ໄດ້ຖືກເອີ້ນເອົາວິນຍານຄືນມາ ໂດຍຜູ້ຍິງຄົນໜຶ່ງທີ່ເປັນໝໍຜີ ຢູ່ເມືອງເອນໂດເຣ ຕາມຄຳຂໍຮ້ອງຂອງກະສັດໂຊນ. ສິ່ງນີ້ຄົງບໍ່ແມ່ນພາບນິມິດຈາກພຣະເຈົ້າ, ເພາະວ່າໝໍຜີ ຫລື ຜູ້ມີເວດມົນຄາຖາ ບໍ່ມີອຳນາດທີ່ຈະສັ່ງໃຫ້ສາດສະດາເຮັດຕາມຄຳຂໍຮ້ອງຂອງພວກເຂົາ.
ໜັງສືຂອງຊາມູເອນສະບັບທີໜຶ່ງ ແລະ ສອງ
ໃນພຣະຄຣິສຕະທຳຄຳພີບາງສະບັບ, ໜັງສືຂອງຊາມູເອນສະບັບທີ 1 ແລະ 2 ຖືກຮວມໄວ້ເປັນປຶ້ມເຫລັ້ມດຽວກັນ. ໃນບາງສະບັບກໍຖືກແຍກເປັນສອງເຫລັ້ມ. ໜັງສືສອງເຫລັ້ມນີ້ໄດ້ຮວບຮວມປະຫວັດສາດເປັນເວລາປະມານ 130 ປີ, ຈາກຕອນຊາມູເອນເກີດ ຈົນເຖິງກ່ອນການສິ້ນຊີວິດຂອງກະສັດດາວິດ.
ພຣະທຳຊາມູເອນທີໜຶ່ງ
ບົດທີ 1–3 ບັນຍາຍວ່າ ພຣະຜູ້ເປັນເຈົ້າໄດ້ສາບແຊ່ງ ແລະ ລົງໂທດຄອບຄົວຂອງເອລີ ແລະ ໄດ້ເອີ້ນຊາມູເອນ ໃຫ້ເປັນມະຫາປະໂລຫິດ ແລະ ຜູ້ຕັດສິນ. ບົດທີ 4–6 ບອກກ່ຽວກັບຫີບຄຳໝັ້ນສັນຍາ ໄດ້ຕົກຢູ່ໃນກຳມືຂອງຊາວຟີລິດສະຕິນ. ບົດທີ 7–8 ບັນທຶກຄຳເຕືອນຂອງຊາມູເອນ ກ່ຽວກັບການມີພຣະປອມ ແລະ ມີກະສັດທີ່ຊົ່ວຮ້າຍ. ບົດທີ 9–15 ບັນຍາຍເຖິງການແຕ່ງຕັ້ງໂຊນໃຫ້ເປັນກະສັດ ແລະ ການປົກຄອງຂອງເພິ່ນໃນຖານະກະສັດ. ບົດທີ 16–31 ເລົ່າປະຫວັດຂອງດາວິດ ແລະ ການມີອຳນາດຂອງເພິ່ນ—ຊາມູເອນໄດ້ເຈີມດາວິດ ຜູ້ໄດ້ຂ້າໂກລີອາດ. ໂຊນກຽດຊັງດາວິດ, ແຕ່ດາວິດປະຕິເສດບໍ່ຍອມຂ້າໂຊນ ເຖິງແມ່ນເພິ່ນມີໂອກາດທີ່ຈະເຮັດກໍຕາມ.
ພຣະທຳຊາມູເອນທີສອງ
ໜັງສືບັນຈຸລາຍລະອຽດເລື່ອງການປົກຄອງດາວິດ ໃນຖານະກະສັດຂອງຢູດາ ແລະ ໃນທີ່ສຸດ ຂອງອິດສະຣາເອນທັງໝົດ. ບົດທີ 1–4 ສະແດງໃຫ້ເຫັນເຖິງການດີ້ນລົນລະຫວ່າງຜູ້ຕິດຕາມຂອງດາວິດ, ຫລັງຈາກເພິ່ນໄດ້ຂຶ້ນເປັນກະສັດຂອງຢູດາ, ແລະ ຜູ້ຕິດຕາມຂອງໂຊນ. ບົດທີ 5–10 ສະແດງໃຫ້ເຫັນ ວິທີທີ່ດາວິດກາຍເປັນຜູ້ມີພະລັງຕະຫລອດທົ່ວແຜ່ນດິນ. ບົດທີ 11–21 ສະແດງໃຫ້ເຫັນຄວາມເສື່ອມໂຊມຂອງພະລັງທາງວິນຍານຂອງດາວິດ ເພາະການບາບ ແລະ ການກະບົດຂອງເພິ່ນ ພາຍໃນຄອບຄົວຂອງເພິ່ນເອງ. ບົດທີ 22–24 ບັນຍາຍເຖິງຄວາມພະຍາຍາມຂອງດາວິດ ທີ່ຈະຄືນດີກັບພຣະຜູ້ເປັນເຈົ້າ.