ການເຮັດໃຫ້ມະນຸດຄືນດີນຳພຣະເຈົ້າ.
ດັ່ງທີ່ໃຊ້ຢູ່ໃນພຣະຄຳພີ, ການຊົດໃຊ້ແມ່ນການຮັບເອົາໂທດສຳລັບການເຮັດບາບ, ຊຶ່ງໂດຍການນັ້ນຈຶ່ງໄດ້ຍົກບາບອອກຈາກຄົນບາບທີ່ກັບໃຈ ແລະ ອະນຸຍາດໃຫ້ເຂົາຄືນດີນຳພຣະເຈົ້າ. ພຣະເຢຊູຄຣິດເທົ່ານັ້ນທີ່ສາມາດເຮັດການຊົດໃຊ້ອັນບໍລິບູນສຳລັບມະນຸດຊາດທັງປວງ. ພຣະອົງສາມາດເຮັດເຊັ່ນນັ້ນໄດ້ ເພາະວ່າພຣະອົງໄດ້ຖືກເລືອກ ແລະ ຖືກແຕ່ງຕັ້ງໄວ້ແລ້ວໃນກອງປະຊຸມມະຫາສານກ່ອນໂລກນີ້ໄດ້ຖືກສ້າງຂຶ້ນ (ອທ 3:14; ມຊ 4:1–2; ອຣຮ 3:27), ການເປັນພຣະບຸດແຫ່ງສະຫວັນຂອງພຣະອົງ, ແລະ ຊີວິດທີ່ປາດສະຈາກບາບຂອງພຣະອົງ. ການຊົດໃຊ້ຂອງພຣະອົງລວມທັງການຮັບທຸກທໍລະມານສຳລັບບາບຂອງມວນມະນຸດ, ການຫລັ່ງໂລຫິດຂອງພຣະອົງ, ແລະ ການສິ້ນພຣະຊົນຂອງພຣະອົງ ແລະ ການຟື້ນຄືນພຣະຊົນຈາກຫລຸມຝັງສົບ (ອຊຢ 53:3–12; ລກ 22:44; ມຊຢ 3:5–11; ແອວ 7:10–13; ຄພ 19:16–19). ເພາະການຊົດໃຊ້ນັ້ນ, ທຸກຜູ້ຄົນຈະລຸກຂຶ້ນຈາກຄວາມຕາຍດ້ວຍຮ່າງກາຍທີ່ເປັນອະມະຕະ (1 ກຣທ 15:22). ການຊົດໃຊ້ຍັງຈັດທາງໄວ້ສຳລັບເຮົານຳອີກ ເພື່ອຮັບການໃຫ້ອະໄພຈາກບາບຂອງເຮົາ ແລະ ມີຊີວິດຢູ່ກັບພຣະເຈົ້າຕະຫລອດການ. ແຕ່ຄົນທີ່ມີອາຍຸເຖິງກະສຽນທີ່ຈະຮັບຜິດຊອບ ແລະ ໄດ້ຮັບກົດ ສາມາດໄດ້ຮັບພອນເຫລົ່ານີ້ ພຽງແຕ່ຖ້າຫາກເຂົາມີສັດທາໃນພຣະເຢຊູຄຣິດ, ກັບໃຈຈາກບາບຂອງເຂົາ, ຮັບພິທີການແຫ່ງຄວາມລອດ, ແລະ ເຊື່ອຟັງຕໍ່ພຣະບັນຍັດຂອງພຣະເຈົ້າ. ຄົນທີ່ມີອາຍຸບໍ່ເຖິງກະສຽນທີ່ຈະຮັບຜິດຊອບ ແລະ ຄົນທີ່ປາດສະຈາກກົດຈະຖືກໄຖ່ຜ່ານການຊົດໃຊ້ (ມຊຢ 15:24–25; ມຣນ 8:22). ພຣະຄຳພີສິດສອນຢ່າງແຈ່ມແຈ້ງວ່າ ຖ້າຫາກພຣະຄຣິດບໍ່ໄດ້ຊົດໃຊ້ແທນບາບຂອງເຮົາ, ແລ້ວບໍ່ມີກົດ, ພິທີການ, ຫລື ການເສຍສະລະໃດ ຈະສາມາດຕອບສະໜອງຄວາມຮຽກຮ້ອງຕ້ອງການຂອງຄວາມຍຸດຕິທຳໄດ້, ແລະ ມະນຸດບໍ່ສາມາດຢູ່ໃນທີ່ປະທັບຂອງພຣະເຈົ້າໄດ້ອີກ (2 ນຟ 2; 9).