ພຣະນິມິດຂອງໂຢຮັນ
ໜັງສືເຫລັ້ມສຸດທ້າຍຢູ່ໃນພຣະຄຳພີໃໝ່, ບັນຈຸການເປີດເຜີຍທີ່ມອບໃຫ້ແກ່ອັກຄະສາວົກໂຢຮັນ. ເພິ່ນໄດ້ຖືກອະນຸຍາດໃຫ້ເຫັນປະຫວັດສາດຂອງໂລກ, ໂດຍສະເພາະໃນຍຸກສຸດທ້າຍ (ພນມ 1:1–2; 1 ນຟ 14:18–27; ຄພ 77). ພຣະນິມິດຂອງໂຢຮັນ ກໍຮູ້ຈັກກັນອີກວ່າເປັນ ໜັງສືນິມິດ.
ໂຢຮັນໄດ້ຮັບການເປີດເຜີຍນີ້ກ່ຽວກັບວັນເວລາຂອງພຣະຜູ້ເປັນເຈົ້າ ຕອນຢູ່ເກາະປັດໂມ (ພນມ 1:9–10), ໃກ້ຝັ່ງເອເຊຍ, ບໍ່ໄກຈາກເມືອງເອເຟໂຊ. ບໍ່ຮູ້ຄັກແນ່ກ່ຽວກັບວັນທີຂອງການເປີດເຜີຍນີ້.
ຂໍ້ຄວາມສຳຄັນທີ່ຊ່ວຍໃຫ້ເຂົ້າໃຈໜັງສືນີ້ ແມ່ນຮ່ວມຢູ່ໃນ 1 ນຟ 14:18–27 ແລະ ຄພ 77 (ອທ 4:15–16).
ບົດທີ 1–3 ເປັນຄຳນຳສູ່ປຶ້ມ ແລະ ຈົດໝາຍເຖິງສາດສະໜາຈັກເຈັດແຫ່ງໃນເອເຊຍ. ໂຢຮັນໄດ້ຂຽນຈົດໝາຍ ເພື່ອຊ່ວຍເຫລືອໄພ່ພົນຂອງພຣະເຈົ້າແກ້ບັນຫາບາງຢ່າງໂດຍສະເພາະ. ບົດທີ 4–5 ບັນທຶກ ພາບນິມິດທີ່ໂຢຮັນໄດ້ຮັບ ທີ່ສະແດງເຖິງອຳນາດທີ່ສະຫງ່າຜ່າເຜີຍ ແລະ ຊອບທຳຂອງພຣະເຈົ້າ ແລະ ພຣະຄຣິດ. ໃນ ບົດທີ 6–9, 11, ໂຢຮັນໄດ້ບັນທຶກວ່າ ໄດ້ເຫັນໜັງສືເຫລັ້ມໜຶ່ງທີ່ມີຕາປະທັບເຈັດດວງ, ແຕ່ລະດວງເປັນຕົວແທນໃຫ້ໜຶ່ງພັນປີ ແຫ່ງປະຫວັດສາດຝ່າຍໂລກຂອງແຜ່ນດິນໂລກ. ສ່ວນຫລາຍແລ້ວບົດເຫລົ່ານີ້ ກ່ຽວພັນກັບເຫດການທີ່ເກີດຂຶ້ນໃນຕາປະທັບດວງທີເຈັດ (ເບິ່ງ ພນມ 8–9; 11:1–15). ບົດທີ 10 ບັນຍາຍໜັງສືທີ່ໂຢຮັນໄດ້ກິນ. ໜັງສືດັ່ງກ່າວເປັນຕົວແທນໃຫ້ແກ່ພາລະກິດໃນອະນາຄົດ ທີ່ເພິ່ນຈະປະຕິບັດ. ບົດທີ 12 ບັນທຶກພາບນິມິດເຖິງຄວາມຊົ່ວຮ້າຍ ທີ່ໄດ້ເລີ່ມຕົ້ນໃນສະຫວັນ ເມື່ອຊາຕານໄດ້ກະບົດ ແລະ ຖືກຂັບໄລ່ອອກໄປ. ສົງຄາມທີ່ໄດ້ເລີ່ມຕົ້ນຢູ່ທີ່ນັ້ນ ໄດ້ດຳເນີນຕໍ່ໄປຢູ່ເທິງແຜ່ນດິນໂລກ. ໃນ ບົດທີ 13, 17–19, ໂຢຮັນໄດ້ບັນຍາຍເຖິງຄວາມຊົ່ວຮ້າຍຂອງອານາຈັກຢູ່ໃນໂລກທີ່ຄວບຄຸມໂດຍຊາຕານ ແລະ ໄດ້ບັນທຶກຊາຕາກຳຂອງພວກເຂົາ, ລວມທັງຄວາມພິນາດຄັ້ງສຸດທ້າຍຂອງຄວາມຊົ່ວຮ້າຍ. ບົດທີ 14–16 ບັນຍາຍເຖິງຄວາມຊອບທຳຂອງໄພ່ພົນຂອງພຣະເຈົ້າ ໃນບັນດາຂອງຄວາມຊົ່ວຮ້າຍ ບໍ່ດົນກ່ອນການສະເດັດມາຄັ້ງທີສອງຂອງພຣະຄຣິດ. ບົດທີ 20–22 ບັນຍາຍເຖິງໄລຍະພັນປີ, ເມືອງເຢຣູຊາເລັມໃໝ່ທີ່ສວຍງາມ, ແລະ ເຫດການສຸດທ້າຍແຫ່ງປະຫວັດສາດຂອງແຜ່ນດິນໂລກ.