ຄວາມສະຫວ່າງ, ຄວາມສະຫວ່າງຂອງພຣະຄຣິດ
ພະລັງແຫ່ງສະຫວັນ, ອຳນາດ, ຫລື ອິດທິພົນທີ່ມາຈາກພຣະເຈົ້າຜ່ານພຣະຄຣິດ ແລະ ມອບຊີວິດ ແລະ ຄວາມສະຫວ່າງໃຫ້ແກ່ທຸກສິ່ງ. ມັນແມ່ນກົດ ຊຶ່ງໂດຍກົດນັ້ນທຸກສິ່ງໄດ້ຖືກປົກຄອງໃນສະຫວັນ ແລະ ເທິງແຜ່ນດິນໂລກ (ຄພ 88:6–13). ມັນຍັງຊ່ວຍເຫລືອຜູ້ຄົນໃຫ້ເຂົ້າໃຈຄວາມຈິງຂອງພຣະກິດຕິຄຸນນຳອີກ ແລະ ຊ່ວຍເຫລືອເຂົາເຈົ້າໃຫ້ໄປຫາທາງແຫ່ງພຣະກິດຕິຄຸນ ທີ່ນຳໄປສູ່ຄວາມລອດ (ຢຮ 3:19–21; 12:46; ແອວ 26:15; 32:35; ຄພ 93:28–29, 31–32, 40, 42).
ບໍ່ຄວນເຂົ້າໃຈຜິດເລື່ອງຄວາມສະຫວ່າງຂອງພຣະຄຣິດກັບພຣະວິນຍານບໍລິສຸດ. ຄວາມສະຫວ່າງຂອງພຣະຄຣິດບໍ່ແມ່ນບຸກຄົນ. ມັນເປັນອິດທິພົນທີ່ມາຈາກພຣະເຈົ້າ ແລະ ຕຽມບຸກຄົນໃຫ້ຮັບເອົາພຣະວິນຍານບໍລິສຸດ. ມັນເປັນອິດທິພົນສຳລັບຄວາມດີໃນຊີວິດຂອງຜູ້ຄົນທັງປວງ (ຢຮ 1:9; ຄພ 84:46–47).
ການສະແດງໃຫ້ປະຈັກຢ່າງໜຶ່ງຂອງຄວາມສະຫວ່າງຂອງພຣະຄຣິດແມ່ນຄວາມສຳນຶກ, ຊຶ່ງຊ່ວຍເຫລືອບຸກຄົນໃຫ້ເລືອກລະຫວ່າງຄວາມຖືກຕ້ອງ ແລະ ຄວາມຜິດ (ມຣນ 7:16). ເມື່ອຜູ້ຄົນຮຽນຮູ້ຫລາຍຂຶ້ນກ່ຽວກັບພຣະກິດຕິຄຸນ, ຄວາມສຳນຶກຂອງເຂົາຈະຮູ້ສຶກໄວຫລາຍຂຶ້ນ (ມຣນ 7:12–19). ຜູ້ຄົນທີ່ເຊື່ອຟັງຕໍ່ຄວາມສະຫວ່າງຂອງພຣະຄຣິດ ຈະຖືກພາໄປສູ່ພຣະກິດຕິຄຸນຂອງພຣະເຢຊູຄຣິດ (ຄພ 84:46–48).