Tamin’ny 12 Septambra 1831 dia niala tao Kirtland, Ohio i Joseph Smith sy ny fianakaviany ka nifindra monina tany Hiram, Ohio, sahabo ho 48 kilometatra any atsimo antsinanan’i Kirtland. Noho ny fanarahana ny torohevitry ny Tompo no nanaovany izany (jereo ny & 63:65). Nifindra monina niaraka tamin’ny fianakavian’i John sy Alice Johnson, izay vao niova fo tao amin’ny Fiangonana ny Mpaminany sy ny fianakaviany. Ny antony lehibe nialany tany Kirtland dia ny hanohizany ny fandikana ny Baiboly araka ny fanentanam-panahy. Vantany vao tany Hiram dia nanohy izany asa izany i Joseph. Tamin’ny 30 Ôktôbra 1831 dia nandray fanambarana izay voarakitra ao amin’ny Fotopampianarana sy Fanekempihavanana 65 i Joseph Smith. Ao amin’io fanambarana io dia nampianatra ny Tompo fa handeha hiparitaka manerana ny firenen-drehetra ny filazantsara ho fanomanana ny Fiavian’ny Mpamonjy Fanindroany ary nasaina hivavaka ny Olomasina mba hampandrosoana ny fanjakan’ Andriamanitra.
Manambara ny Tompo fa hanenika ny tany manontolo ny filazantsara
Asao ny mpianatra mba hitanisa ny lisitr’ireo zavatra sasantsasany izay angatahiny tsy tapaka amin’ny alalan’ny vavaka ao anatin’ny kahieny ao an-dakilasy na ny diary fandalinany soratra masina. Azonao atao ny mangataka mpianatra vitsivitsy mba hizara ny zavatra nosoratany raha tsy manahirana azy ireo ny manao izany.
Asao ny mpianatra iray hamaky mafy ny teny fanolorana ao amin’ny Fotopampianarana sy Fanekempihavanana 65. Hazavao fa ao anatin’ity fanambarana ity ny Tompo dia milaza amintsika ny zavatra izay tokony hangatahantsika amin’ny alalan’ny vavaka—indrindra fa manatri-maso ny fahatanterahan’ny faminaniana ny amin’ireo tranga izay hiseho amin’ny andro farany isika.
Asao ny mpianatra iray hamaky mafy ny Fotopampianarana sy Fanekempihavanana 65:1–2. Angataho ny mpianatra hanaraka ny vakiteny sy hitady ny filazalazan’ny Tompo ny fanapariahana ny filazantsara.
Handeha ho aiza ny filazantsaran’i Jesoa Kristy? (Tokony hamantatra izao fotopampianarana izao ny mpianatra: Handeha hatrany am-paran’ny tany ny filazantsaran’i Jesoa Kristy. Soraty eny amin’ny solaitrabe io fotopampianarana io.)
Araka ny andininy 2, inona no zavatra “ankinin’ny Tompo amin’ny olona” ka mahatonga ny filazantsara mameno ny tany iray manontolo? (Ny fanalahidin’ny fanjakan’ Andriamanitra. Azonao atao ny mampahatsiahy ireo mpianatra fa ny andian-teny hoe “ny fanalahidin’ny fanjakana” dia milaza ny fanalahidin’ny fisoronana hiahy ny Fiangonana. Noho ireo fanalahidy ireo dia mitarika ny ezaka ataontsika amin’ny fitoriana ny filazantsara ny Filohan’ny Fiangonana. Zarainy amin’ny mpitarika ao amin’ny fisoronana eo an-toerana sy maneran-tany ny sasany amin’ireo fanalahidy.)
Sary
Milaza ny hevitry ny nofin’i Nebokadnezara i Daniela
Asehoy an’ny mpianatra ilay sary mitondra ny lohateny hoe Milaza ny hevitry ny nofin’i Nebokadnezara i Daniela (Boky Mirakitra Sary Momba ny Filazantsara [2009], lah. 24; jereo koa ny LDS.org). Asao ny mpianatra hanazava ny zavatra fantany momba ny fandikan’i Daniela ny nofin’ny Mpanjaka Nebokadnezara. (Azonao atao ny mamaky na mamintina ny Daniela 2:31–45. Ampio ireo mpianatra hahatakatra fa sahiran-tsaina tamin’ny nofy iray ny Mpanjaka Nebokadnezara ary nanambara ilay nofy sy ny dikany tamin’i Daniela ny Tompo. Tao anatin’ilay nofy dia nopotehin’ny vato iray izay voaendaka nefa tsy nendahan-tànana ny sarivongana lehibe iray, izay naneho fanjakana ara-pôlitika maro isan-karazany. Tamin’ny voalohany dia kely ilay vato saingy nihalehibe izany ambara-pamenoany ny tany iray manontolo.)
Araka nyFotopampianarana sy Fanekempihavanana 65:2dia inona ilay vato nendahina hiala tamin’ny tendrombohitra nefa tsy nendahan-tànana? (Ny fanjakan’ Andriamanitra. Hazavao fa ao anatin’io andininy io, ny andian-teny hoe “fanjakan’ Andriamanitra” dia milaza ny fanjakan’ Andriamanitra eto an-tany—Ny Fiangonan’i Jesoa Kristy ho an’ny Olomasin’ny Andro Farany. Azonao atao ny manasa ny mpianatra hanoratra io fanazavana io ao amin’ny soratra masiny eo akaikin’ny andininy 2
Raha azo atao dia omeo ny tahadikan’ity fanambarana manaraka ity ny mpianatra mba hahafahany mametraka izany ao amin’ny soratra masiny. Fa raha tsy mety kosa izany dia azonao atao ny manoratra ilay fanambarana eny amin’ny solaitrabe alohan’ny fiandohan’ny fotoam-pianarana ka asao ireo mpianatra hanoratra izany ao amin’ny kahieny ao an-dakilasy na ny diary fandalinany soratra masina. Asao ny mpianatra iray hamaky mafy ilay fanambarana.
Hoy ny Filoha Gordon B. Hinckley hoe:
Sary
Filoha Gordon B. Hinckley
“Olom-pirenena ao amin’ny fanjakana lehibe indrindra eto an-tany isika—fanjakana tsy tarihin’ny fahendren’ny olombelona fa tarihin’i Jesoa Kristy Tompo. Tena misy tokoa izany. Azo antoka ny ho aviny. Io ilay fanjakana izay noresahan’i Daniela—vato iray, izay sariteny ihany, izay tokony hendahina hiala amin’ny tendrombohitra, nefa tsy nendahin-tànana ka hikodiadia ary hanenika ny tany. (Jereo ny Dan. 2:34–35.)
Inona ireo porofo hitanao izay manamarina fa eo andalam-pahatanterahana io faminanian’i Daniela io?
Ahoana no fomba anamafisan’io porofo io ny fijoroana ho vavolombelona anananao momba ny Fiangonan’i Jesoa Kristy ho an’ny Olomasin’ny Andro Farany?
Midika inona aminao ny hoe mpikambana ao amin’ny fanjakan’ Andriamanitra eto an-tany?
Vakio mafy ity fanambarana nataon’ny Loholona Neil L. Andersen ao amin’ny Kôlejin’ny Apôstôly Roambinifolo manaraka ity: Alohan’ny hamakianao dia lazao ireo mpianatra mba hampihato ny vakiteny eo antenantenan’ny fehezan-teny farany ao amin’ilay fanambarana. Angataho izy ireo mba hihaino tsara sy hieritreritra momba ny fomba mety hamenoany ny banga ao amin’ilay fehezan-teny farany.
Sary
Loholona Neil L. Andersen
“Moa ve ianareo efa nieritreritra hoe inona no antony nandefasana anareo tety an-tany amin’izao fotoana manokana izao? Tsy teraka nandritra ny fotoan’i Adama sy Eva ianareo, na nandritra ny fotoana nanjakan’ireo farao tany Egypta, na nandritra ny fiankohonan’i Ming. Tonga teto an-tany amin’izao taonjato roapolo taorian’ny fiavian’i Kristy voalohany izao ianareo. Naverina tamin’ny laoniny teto an-tany ny fisoronan’ Andriamanitra, ary efa noraisin’ny Tompo eo An-tanany ny fanomanana an’izao tontolo izao ho amin’ny Fiaviany indray amim-boninahitra. Andro ahafahana manao zava-dehibe sy andron’ny fihazonana andraikitra manan-danja lehibe izao. Andronareo izao. … Iray amin’ireo andraikitra manan-danja hazoninareo ny …” (“Fanomanana izao tontolo izao ho amin’ny Fiaviana Fanindroany,” Ensign na Liahona, mey 2011, 49).
Asao ny mpianatra vitsivitsy mba hilaza ny fomba hamenoany ny banga ao amin’ilay fehezan-teny farany tao amin’ny fanambarana nataon’ny Loholona Andersen. Asao ny mpianatra iray hamaky mafy ny Fotopampianarana sy Fanekempihavanana 65:3. Asaivo manaraka ny vakiteny ny mpianatra sy hitady ny didin’ny Tompo ho antsika amin’ny maha-mpikambana antsika ao amin’ny Fanjakany.
Inona no dikan’ny hoe asaina manomana ny làlan’ny Tompo sy ny fanasan’ny Zanakondry ary vonona ho an’ny Mpampakatra isika? (Milaza ny andraikitra amin’ny fanomanana an’izao tontolo izao ho amin’ny Fiavian’i Jesoa Kristy Fanindroany ireo andian-teny ireo.)
Soraty eny amin’ny solaitrabe ity fahamarinana manaraka ity: Manana andraikitra hanomana ny tenantsika sy ny hafa amin’ny Fiavian’i Jesoa Kristy Fanindroany isika. Azonao atao ny manasa ny mpianatra hanoratra io fahamarinana io ao amin’ny soratra masiny eo akaikin’ny Fotopampianarana sy Fanekempihavanana 65:3. Hazavao fa nijoro ho vavolombelona momba an’io fahamarinana io ny Loholona Neil L. Andersen. Vakio ilay fehezan-teny farany nalaina tao amin’ny teny nambarany: “Iray amin’ireo andraikitra manan-danja hazoninareo ny manampy amin’ny fanomanana an’izao tontolo izao ho amin’ny Fiavian’ny Mpamonjy Fanindroany” (“Fanomanana izao tontolo izao,” 49).
Rehefa mieritreritra momba ny andraikitrao amin’ny fanomanana ny tenanao sy ny hafa amin’ny Fiaviana Fanindroany ianao dia inona no eritreritra sy fahatsapana anananao?
Asao ny mpianatra iray mba hamaky mafy nyFotopampianarana sy Fanekempihavanana 65:4, ary asao ny iray kilasy hitady ny zavatra azontsika atao hanomanana ny tenantsika sy ny hafa amin’ny Fiaviana Fanindroany. Asao ireo mpianatra hizara ny zavatra hitan’izy ireo.
Amin’ny fomba ahoana no ahafahantsika “mampahafantatra any anivon’ny olona ireo asan’[ny Tompo] mahatalanjona”?
Asao ny mpianatra iray mba hamaky mafyFotopampianarana sy Fanekempihavanana 65:5–6, ary angataho ny iray kilasy hitady ny zavatra izay tokony angatahantsika amin’ny alalan’ny vavaka.
Araka ireo andininy ireo dia inona no zavatra tokony angatahantsika amin’ny alalan’ny vavaka eo am-panomanantsika ny Fiaviana Fanindroany? (Eo am-pamalian’ireo mpianatra io fanontaniana io dia azonao atao ny manasa azy ireo hampitaha ny andininy 6 amin’ny tonon’ny vavaka nataon’ny Tompo ao amin’ny Matio 6:10.)
Amin’ny fomba ahoana no mety hanampiana antsika hanomana ny tenantsika sy ny hafa ho amin’ny Fiaviana Fanindroany rehefa mangataka ireo zavatra ireo amin’ny alalan’ny vavaka isika?
Asao ny mpianatra iray hamaky mafy ity fanambarana nataon’ny Filoha Thomas S. Monson ity ary asao ny iray kilasy hihaino ny zavatra izay tokony hatsofotsika ao anatin’ny vavaka ataontsika.
Sary
Filoha Thomas S. Monson
“Mangataka aho ny hitohizan’ny vavakareo sy ny finoanareo ho an’ireo izay any amin’ny faritra izay mbola voafetra ny fitaomantsika ary mbola tsy azo atao ny mizara amim-pahalalahana ny filazantsara amin’izao fotoana izao. Mety hisy fahagagana hitranga rehefa manao izany isika” (Tonga soa ato amin’ny Fihaonambe,” Ensign na Liahona, nôv. 2009, 6).
Araka ny voalazan’ny Filoha Monson, inona no tokony hangatahantsika amin’ny alalan’ny vavaka? Ahoana no fomba hanampian’ireny vavaka ireny amin’ny fanomanana ny làlana ho amin’ny Fiaviana Fanindroany?
Ahitana izao teny fanolorana manaraka izao ny sora-tanana voalohany voarakitra tao amin’ny Fotopampianarana sy Fanekempihavanana 65: “Fanambarana ho an’i Joseph ilay Mpahita, ny 30 Ôktôbra 1831 ao amin’ny toko faha-6ao amin’ny Matio andininy faha-10” (William E. McLellin copy of Revelation, 30 Ôkt. 1831 [F&F 65], tao amin’ny William E. McLellin Papers, 1831–1878, Tahirim-bokin’ny Tantaran’ny Fiangonana). Ny Matio 6:10dia mirakitra ny ampahany amin’ny vavaka nataon’ny Tompo manao hoe : “Ho tonga anie ny fanjakanao. Hatao anie ny sitraponao etỳ an-tany tahaka ny any an-danitra.” Ny fanambarana ao amin’ny Fotopampianarana sy Fanekempihavanana 65 dia mampiseho ny fomba samihafa hahatongavan’ny fanjakan’ny Tompo eto an-tany sy hitohizan’ny fandrosoany. Ary miafara amin’ny teny izay mitovy amin’ny teny farany ao amin’ny Vavaka nataon’ny Tompo izany: “Fa Anao ny haja, ny hery ary ny voninahitra, mandrakizay. Amena” (F&F65:6; jereo koa ny Matio 6:13).
Na dia kely dia kely tokoa aza ny Fiangonana taorian’ny taona vitsivitsy nanorenana azy dia nanana fahatsapana faminaniana momba ny fiafarany lehibe i Joseph Smith. Nilaza momba ny fanambarana izay nataon’ny Mpaminany nandritra ny fivorian’ny fisoronana natao tao Kirtland, Ohio, ny volana Aprily 1834, i Wilford Woodruff:
Sary
Ny filoha Wilford Woodruff
“Nanao antso avo tamin’ ny olona rehetra izay nihazona Fisoronana ny Mpaminany mba hivondrona tao anatin’ ilay trano fianarana vita tamin’ ny vatan-kazo izay nisy teo. Trano kely izy io, angamba teo amin’ ny 4 metatra mahery kely teo ny lafiny. Kanefa dia nisy ny fisoronan’ny Fiangonan’i Jesoa Kristy ho an’ny Olomasin’ny Andro Farany tao amin’ny tanànan’i Kirtland. … Rehefa tafangona izahay dia nanao antso avo tamin’ ireo Loholon’ i Isiraely miaraka aminy ny Mpaminany mba hijoro ho vavolombelona mikasika ity asa ity. … Rehefa nahavita izy ireo dia nilaza ny Mpaminany hoe ‘Ry Rahalahy, tena nanome hery ahy sy nianarako zavatra betsaka ny fijoroanareo ho vavolombelona teto androany hariva, fa tiako ny hilaza aminareo eo anatrehan’ ny Tompo fa tsy mahafantatra mihoatra noho ny tsy fahafantaran’ ny zazakely eo ampofoan-dreniny ny hoaviny ianareo raha ny mikasika ny hiafaran’ ity Fiangonana sy fanjakana ity. Tsy takatrareo izany.’ Somary gaga ihany aho. Hoy izy hoe: ‘Mpihazona ny fisoronana vitsy monja no hitanareo eto anio hariva, kanefa hanenika an’i Amerika Avaratra sy Atsimo ity Fiangonana ity—hanenika ny tany izany’” (ao amin’ny Teachings of Presidents of the Church: Joseph Smith [2007], 137).