ហេសេគា
ជាស្ដេចដ៏សុចរិតម្នាក់នៃសាសន៍យូដា នៅក្នុងព្រះគម្ពីរសញ្ញាចាស់។ ទ្រង់បានសោយរាជ្យអស់រយៈពេល ២៩ ឆ្នាំ គឺនៅសម័យអេសាយ ជាព្យាការីនៅស្រុកយូដា (២ ពង្សាវ. ១៨–២០; ២ របា. ២៩–៣២; អេសាយ ៣៦–៣៩)។ អេសាយបានជួយទ្រង់ក្នុងការកែតម្រង់ ទាំងខាងសាសនា និងខាងរដ្ឋាភិបាល។ ទ្រង់បានបង្ក្រាបការថ្វាយបង្គំរូបព្រះ ហើយបានបង្កើតពិធីបរិសុទ្ធខាងវិហារឡើងវិញ។ ហេសេគាមានជន្មាយុ ១៥ ឆ្នាំទៀត តាមរយៈការអធិស្ឋាន និងសេចក្ដីជំនឿ (២ ពង្សាវ. ២០:១–៧)។ គ្រាដំបូងនៃរជ្ជកាលរបស់ទ្រង់ខ្លះបានលូតលាស់ ប៉ុន្តែការបះបោររបស់ទ្រង់ទាស់នឹងស្ដេចនៃស្រុកអាសស៊ើរ (២ ពង្សាវ. ១៨:៧) បានផ្ដល់នូវការ លុកលុយពីសាសន៍អាសស៊ើរពីរដង ៖ ទីមួយ បានអធិប្បាយប្រាប់នៅក្នុងគម្ពីរអេសាយ ១០:២៤–៣២, រីឯទីពីរ នៅក្នុង ២ ពង្សាវ. ១៨:១៣–១៩:៧។ នៅក្នុងការលុកលុយទីពីរ នោះក្រុងយេរូសាឡិមត្រូវបានសង្គ្រោះដោយទេវតានៃព្រះអម្ចាស់ (២ ពង្សាវ. ១៩:៣៥)។