ព្រះគម្ពីរមរមន
ជាព្រះគម្ពីរមួយក្នុងព្រះគម្ពីរទាំងបួនក្បាល ដែលបានទទួលស្គាល់ដោយសាសនាចក្រនៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយ។ គឺជាការសង្ខេបដោយព្យាការីពីបុរាណម្នាក់ឈ្មោះមរមន អំពីបញ្ជីទាំងឡាយរបស់បណ្ដាជនជំនាន់ដើមនៅទ្វីបអាមេរិក។ គឺបានសរសេរទុក ដើម្បីធ្វើបន្ទាល់ថា ព្រះយេស៊ូវជាព្រះគ្រីស្ទ។ ស្ដីអំពីបញ្ជីនេះ ព្យាការីយ៉ូសែប ស៊្មីធ ដែលបានបកប្រែដោយអំណោយទាន និងព្រះចេស្ដានៃព្រះ ដោយមានប្រសាសន៍ថា ៖ « ខ្មុំបានប្រាប់បងប្អូនទាំងឡាយថា ព្រះគម្ពីរមរមន គឺជាគម្ពីរដ៏ត្រឹមត្រូវបំផុតជាងគម្ពីរនានាទាំងអស់នៅលើផែនដីនេះ ហើយជាមូលដ្ឋាននៃសាសនារបស់យើង ហើយបុគ្គលម្នាក់ៗអាចចូលទៅជិតព្រះបាន ដោយសារធ្វើតាមសិក្ខាបទទាំងឡាយនៃគម្ពីរនេះ ជាជាងគម្ពីរដទៃទាំងអស់ » (សូមមើល បុព្វកថា នៅខាងមុខព្រះគម្ពីរមរមន)។
ព្រះគម្ពីរមរមន គឺជាបញ្ជីខាងសាសនានៃប្រជាជនបីក្រុម ដែលបានមកពីពិភពចាស់មកកាន់ទ្វីបអាមេរិក។ ពួកក្រុមទាំងនេះបានត្រូវដឹកនាំដោយពួកព្យាការី ដែលបានកត់ប្រវត្តិខាងសាសនា និងខាងការរស់នៅ ទុកនៅលើផ្ទាំងលោហធាតុ។ ព្រះគម្ពីរមរមនកត់អំពីទស្សនកិច្ចនៃព្រះយេស៊ូវគ្រីស្ទ កាលទ្រង់មកជួបប្រជាជននៅទ្វីបអាមេរិក បន្ទាប់ពីទ្រង់មានព្រះជន្មរស់ឡើងវិញ។ បន្ទាប់ពីទស្សនកិច្ចរបស់ព្រះគ្រីស្ទ នោះមានរយៈពេល ២០០ ឆ្នាំ ដែលប្រកបទៅដោយសេចក្ដីសុខសាន្ត។
មរ៉ូណៃ ជាព្យាការី-ប្រវត្តិសាស្ត្រិនចុងក្រោយនៃពួកសាសន៍នីហ្វៃ លោកបានបិទបញ្ជីសង្ខេបនៃប្រជាជនទាំងនេះ ហើយបានលាក់ទុកនៅឆ្នាំ ៤២១ គ.ស.។ នៅឆ្នាំ ១៨២៣ មរ៉ូណៃដែលបានរស់ឡើងវិញ លោកបានមកជួបនឹងយ៉ូសែប ស៊្មីធ ហើយក្រោយមកបានប្រគល់បញ្ជីបុរាណ និងពិសិដ្ឋទាំងនេះដល់លោក ដើម្បីយកទៅបកប្រែ ហើយផ្សាយចេញដល់ពិភពលោក ទុកជាសក្ខីបទមួយទៀត អំពីព្រះយេស៊ូវគ្រីស្ទ។