Mataupu Faavae ma Feagaiga 84–87 (Iunite 18)

Anomea o Sauniuniga mo le Faiaoga mo Suesuega i le Fale

Aotelega o Lesona mo Suesuega i le Fale i Aso Taitasi

O le aotelega lenei o mea na tutupu, aoaoga faavae, ma mataupu faavae na aoaoina e tagata aoga a’o latou suesueina le Mataupu Faavae ma Feagaiga 84–87 (iunite 18) e le o faamoemoe e aoao atu o se vaega o lau lesona. O le lesona e te aoaoina atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tamaiti aoga.

Aso 1 (Mataupu Faavae ma Feagaiga 84:1–42)

Sa suesueina e tagata aoga se faaaliga e uiga i le malumalu e fausia i le Ierusalema Fou, ma sa latou faitau foi e uiga i taumafaiga a Mose e saunia ai lona nuu e ulu atu i le afioaga o le Atua. Na aoaoina e tagata aoga ia mataupu faavae nei: Ina ia avea e faapei o le Atua ma nonofo i Lona afioaga, e tatau ona tatou maua sauniga o le Perisitua Mekisateko; ma afai e faalautele e i latou o e mauaina le perisitua ia o latou valaauga, o le a faapaia i latou e le Atua ma tuu atu ia i latou mea uma ua ia te Ia.

Aso 2 (Mataupu Faavae ma Feagaiga 84:43-120)

I lenei lesona na aoaoina ai e tagata aoga ni mataupu faavae se lua, e mafai ona fesoasoani ia i latou e toe foi atu ai i le afioaga o le Atua: Afai tatou te gauai ma le filiga i le afioga a le Atua, o le a faapea ona faamalamalamaina i tatou e ala i le Agaga o Keriso; ma afai tatou te faalogo ma usitai i le Agaga o Iesu Keriso, o le a tatou o atu i le Tama. Na aoaoina foi e tagata aoga e faapea, o le a faapogisaina o tatou mafaufau, ma o le a aumai ai i tatou i lalo o le ta’usalaga pe afai tatou te taulimaina ma le manatu mama le afioga a le Atua. Sa toe ta‘u mai foi i lenei lesona le fautuaga ina ia suesue ma le faamaoni i tusitusiga paia ma ola i mea o loo aoao mai ai. E le gata i lea, na aoaoina e tagata aoga e faapea, ua i ai uma i le Au Paia o Aso e Gata Ai se tiutetauave ia faia la latou vaega e fesoasoani ai ia oo atu le talalelei i le lalolagi atoa.

Aso 3 (Mataupu Faavae ma Feagaiga 85–86)

I lenei lesona sa manatunatu ai tagata aoga i le taua o faamaumauga a le Ekalesia. Na latou aoaoina, afai tatou te ola i tulafono a le Atua, o le a tusia o tatou igoa i faamaumauga a le Ekalesia o ni tagata faamaoni. Sa maua foi e tagata aoga se malamalamaaga atili i le faataoto i saito ma titania, ma iloa ai o le a faapotopoto e le Alii e e amiotonu i aso e gata ai ona faaumatia ai lea o e amioleaga i Lona Afio Mai Faalua. E le gata i lea, na aoaoina e tagata aoga e faapea, e mafai ona tatou aumaia le faaolataga i isi e ala i le fesoasoani ia i latou ia maua faamanuiaga o le talalelei.

Aso 4 (Mataupu Faavae ma Feagaiga 87)

Sa suesueina e tagata aoga le valoaga a le Perofeta o Iosefa Samita e uiga i le taua i aso e gata ai ma aoao ai, e mafai e le Alii ona faaali mai le lumanai ia i tatou e ala i Ana perofeta. Sa aoaoina foi e tagata aoga, o afioga a le Alii na ala mai i le Perofeta o Iosefa Samita na faataunuuina, faapea ma auala na faataunuuina ai. Sa latou mafaufau foi i le taua o le tutu i nofoaga paia ma ia le masii ese seia oo ina afio mai le Alii.

Folasaga

O lenei lesona o le a fesoasoani i tagata aoga ia malamalama atili ai ma faamatala atu le aoaoga faavae o le perisitua. E maua ai foi e tagata aoga se avanoa e faasoa mai ai mea na latou aoaoina mai a latou suesuega i auala e mafai ona faaleleia atili ai ona tatou galulue o ni meafaigaluega a le Atua ma faalautele ai le perisitua.

Fautuaga mo le Aoaoina Atu

Manatua: I tapenaga mo lenei lesona, valaaulia se tagata aoga e aumai i le vasega se kopi o se faasologa o le tuuina mai o le pule o le perisitua (a se tagata o le aiga pe o sa latou lava foi). E mafai ona maua mai se kopi patino o le faasologa o le tuuina mai o le Perisitua Mekisateko mai le [Matagaluega] o Faamaumauga Faafuainumera ma Tagata o le Ekalesia e ala i le imeli o se talosaga i le lineofauthority@ldschurch.org ae tusi le PLA i le laina o le mataupu. O le a auina mai e le tali otometi se fomu e faatumu ma toe faafoi atu.

Mataupu Faavae ma Feagaiga 84

Ua faailoa mai e le Alii le tupuaga o le perisitua o Mose

Fesoasoani i tagata aoga e toe faamanatu nisi o upu na latou aoaoina i lenei vaiaso e ala i le vaevaeina o tagata aoga i ni paga. I paga taitasi, fai atu i se tagata aoga se toatasi e faasaga ese mai le laupapa, ina ia ona le vaai atu i ai. Faamatala atu, o le a e tusia i luga o le laupapa se upu autu po o se fasifuaitau e faatatau i se aoaoga faavae autu o le talalelei. O tagata aoga o loo vaai atu i le laupapa o le a faamatalaina filemu atu lena upu autu po o le fasifuaitau i a latou paga, ae o le a taumafai a latou paga e mate mai le upu po o le fasifuaitau. Ona fesuia’i lea o matafaioi a tagata aoga, ae o le a e faaauauina le gaoioiga i le tusia o se upu po o se fasifuaitau fou i luga o le laupapa.

Amata le gaoioiga, ma tusi le upu perisitua i luga o le laupapa. A uma ona faailoa mai e tagata aoga le upu lenei, faaauau le gaoioiga e faaaoga ai upu ma fasifuaitau nei: sauniga, Perisitua Arona, feagaiga, Perisitua Mekisateko, sauniga faaola. (Afai e te manatu o le a aoga, atonu e te manao e taofi pe a maua ia upu autu taitasi pe faailoaina foi faaupuga, ma toe faamanatu puupuu lona uiga o se vasega. O loo maua faauigaga pupuu mo nisi o ia upu i le gaoioiga faafetaui i le Iunite 18: Aso 1 i le taiala suesue mo suesuega e faia i le aiga mo tagata aoga seminare. Mo nisi faamalamalamaga loloto, tagai i le “Perisitua ma Ki o le Perisitua” po o “Sauniga ma Feagaiga” i le vaega O Aoaoga Faavae Autu o le faaopoopoga i le faaiuga o lenei tusi lesona.) A uma loa le gaoioiga, fai atu le fesili lenei:

O le fea o sauniga o le talalelei o sauniga faaola? (A o tali mai tagata aoga, tusi sauniga nei i luga o le laupapa: papatisoga, faamauga, faaeeina atu o le Perisitua Mekisateko [mo le alii], o le faaeega paia o le malumalu, ma le faamauga i le malumalu.)

Faamatala atu, o le Mataupu Faavae ma Feagaiga 84 o loo aoao mai ai sa manao Mose e fesoasoani i isi tagata e faalatalata atili atu i le Atua e ala i sauniga faaola o le perisitua. Valaaulia tagata aoga e vaavaai vave i le Mataupu Faavae ma Feagaiga 84:6–17 e iloa ai pe e mafai faapefea e Mose ona su’e [le afuaga] o le pule o lona perisitua ia Atamu, o le na mauaina mai i le Atua.

O a ni mea ua e aoaoina e uiga i le perisitua mai i nei fuaiupu? (Atonu e faailoa mai e tagata aoga ni mataupu faavae eseese, ae ia mautinoa e faamamafa atu le mataupu faavae lenei: O le perisitua e mai i le Atua ma e tuuina mai e ala i le faaee mai o lima o i latou ua i ai le pule.)

I le taimi lea i le lesona, valaaulia le tagata aoga e faaali atu le faataitaiga o se faasologa o le pule, a le o le faitau pe tusi foi i luga o le laupapa. Fesoasoani i tagata aoga ia malamalama o le faasologa o le pule o le perisitua, e faaalia ai le auala na tuuina mai ai le pule o le perisitua mai le tasi tagata e umia le perisitua i le isi, mai ia Iesu Keriso i sē ua umia le perisitua i le taimi nei.

Aisea e te manatu e taua ai le mafai e e umia le perisitua ona su’e atu i tua o latou pule o le perisitua i le Atua? (Tagai Eperu 5:4.)
O a ni aafiaga na e maua ua faamalosia ai lau molimau i le perisitua?

Valaaulia ni nai tagata aoga e auauai i le faitauina leotele o le tautoga ma le feagaiga o le perisitua i le Mataupu Faavae ma Feagaiga 84:33–44.

O le a le folafolaga a le Alii ia i latou o e maua le perisitua ma faalautele o latou valaauga? (E tatau ona faailoa mai e tagata aoga le mataupu faavae lenei: Afai e faalautele e i latou o e maua le perisitua o latou valaauga, o le a faapaia i latou e le Atua ma tuu atu ia i latou mea uma ua ia te Ia.)
O a nisi o auala e faalautele ai e e umia le Perisitua Arona o latou valaauga i le perisitua?
O le a se taimi na faamanuiaina ai oe ona o le faalauteleina e se tasi o loo umia le perisitua ia lona valaauga?

Ina ia fesoasoani i tagata aoga e faasoa mai nisi o malamalamaaga na latou maua i le aluga o a latou suesuega i le vaiaso lenei, atonu e te manao e fai atu nisi po o fesili uma nei. (Manatua: A o e saunia mo le vaega lenei o le lesona, atonu e te manao e toe faamanatu le aso 2 o le iunite lenei i le taiala o suesuega mo tagata aoga seminare i suesuega e faia i le aiga.)

O le a se mea na e aoaoina e uiga i le taua o le gauai ma le filiga i le afioga a le Atua? (Tagai i le MF&F 84: 43–45, 54–58.)
O a ni eseesega ua faia i lou olaga e le suesue ma le faamaoni ma le faaaogaina o le afioga a le Atua?
O le a lo tatou tiutetauave ua i ai i tagata o le lalolagi? (Tagai i le MF&F 84: 61-62, 85-88.)
E mafai faapefea ona e fesoasoani e faataunuu le matafaioi o le aveina atu o le talalelei i le lalolagi atoa?

Mataupu Faavae ma Feagaiga 87

Ua valoia e Iosefa Samita o le a sasaa mai taua i luga o atunuu uma

Fai atu i tagata aoga e aotele mai mea na latou aoaoina e uiga i le valoaga o loo i ai i le Mataupu Faavae ma Feagaiga 87.

O a auala ua faamalosia ai e au suesuega o lenei faaaliga lou faatuatua e mafai ona faaali mai e le Alii mea e tutupu i le lumanai e ala i Ana perofeta?
E faapefea ona faamalosia e le Mataupu Faavae ma Feagaiga 87 lau molimau o Iosefa Samita o se perofeta moni?

Faamautu atu e faapea, o valoaga uma i le Mataupu Faavae ma Feagaiga 87 ua faataunuuina pe o le a faataunuuina lava. Valaaulia tagata aoga e faitau le Mataupu Faavae ma Feagaiga 87:8 e iloa ai le mea ua faatonuina i tatou e le Alii e fai, ina ia tatou saunia ai mo taua ma faalavelave o le a i ai i luga o le fogaeleele i aso e gata ai.

O le a le mea ua poloaiina i tatou e le Alii e fai? (Fesoasoani ia i latou e faailoa mai le mataupu faavae lenei: E tatau ona tatou tutu i nofoaga paia ma ia aua ne’i masii ese seia oo ina afio mai le Alii.)
O a nisi o nofoaga paia e mafai ona tuuina mai ia i tatou le filemu ma le saogalemu?
Na faapefea ona e lagonaina le faamanuiaina i le filemu ma le saogalemu e ala i le tu ai i se tasi o nei nofoaga paia?

Faaiu le lesona lenei i le molimau atu e uiga i upumoni sa outou talanoaina.

Iunite e Sosoo Ai (Mataupu Faavae ma Feagaiga 88–89)

Ina ia saunia tagata aoga mo la latou suesuega o le Mataupu Faavae ma Feagaiga 88–89, atonu e te manao e valaaulia i latou e mafaufau i le mea lenei: Pe na i ai se taimi sa e lagona ai le tuua toatasi po o le popole e faapea, sa le’i silafia e le Tama Faalelagi ou tulaga po o manaoga patino? A o e suesue i le Mataupu Faavae ma Feagaiga 88, vaavaai mo le tali a le Alii i lagona faapena. O a ni “mea leaga ma fuafuaga ua i ai … i loto o tagata faufau leaga” (MF&F 89:4) i aso e gata ai? A o e suesue i le Mataupu Faavae ma Feagaiga 89, vaavaai mo fautuaga na tuuina mai e le Alii, e mafai ona puipuia ai oe mai na mea leaga ma fuafuaga [leaga].