O lenei lesona e talanoaina ai le vaega lona lua o le faaaliga ua faamaumauina i le Mataupu Faavae ma Feagaiga 133. Na maua e Iosefa Samita lenei faaaliga i le aso 3 o Novema, 1831. Ua tali ai fesili sa i ai a faifeautalai e uiga i le talaiga o le talalelei ma le faapotopotoina o Isaraelu. O loo faamatala mai ai foi le Afio Mai Faalua o le Alii ma mea e tatau ona tatou faia e saunia ai.
Ua tautino mai e le Alii e faapea, o le a talaiina atu le talalelei i le lalolagi atoa
Amata le lesona i le fai atu o le fesili lenei:
O le a se taimi na e matuai fiafia ai lava e vaai i se tasi? (Valaaulia ni nai tagata aoga e faasoa mai o latou aafiaga. Atonu e te manao foi e faasoa atu se aafiaga.)
Ata
O Le Afio Mai Faalua
Faaali le ata O Le Afio Mai Faalua (Tusi Ata o le Talalelei [2009], nu. 66; tagai foi i le LDS.org).
O e fiafia e vaai i le Faaola i Lona Afio Mai Faalua? Aisea?
Faamalamalama atu, o le Afio Mai Faalua o Iesu Keriso, o le a avea o se aafiaga manaia ma matagofie mo nisi, ae o se aafiaga matautia mo isi. Molimau atu e finagalo le Faaola i tagata uma ina ia saunia mo Lona afio mai.
Valaaulia se tagata aoga e faitau leotele le Mataupu Faavae ma Feagaiga 133:36–39. Fai atu i le vasega e mulimuli i le faitauga, ma vaavaai mo faamaoniga e faapea, e finagalo le Faaola i tagata uma ia saunia mo Lona Afio Mai Faalua.
O a ni faamaoniga ua e vaaia i nei fuaiupu e finagalo le Faaola i tagata uma ia saunia mo Lona Afio Mai Faalua? (Na Ia auina mai se agelu [po o agelu] e toefuatai mai le talalelei i le lalolagi. O loo Ia auina atu foi Ana auauna e talai atu le talalelei i tagata uma.)
O ai auauna a le Atua o le a talaiina atu le savali o le talalelei toefuataina? (O tagata uma o le Ekalesia o auauna a le Atua ua i ai le tiutetauave e faasoa atu le talalelei i isi. Atonu e te manao e fautua atu i tagata aoga e tusi le mataupu faavae lenei i a latou tusitusiga paia: I le avea ai ma auauna a le Atua, e mafai ona tatou fesoasoani i isi e saunia mo le Afio Mai Faalua e ala i le faasoa atu o le talalelei ia i latou.)
E tusa ai ma le fuaiupu e 38, e faapefea ona tatou folafola atu le talalelei? O le a sou manatu i le uiga o le faasoa atu o le talalelei “ma le leo tele”? (O tali e mafai ona aofia ai, e tatau ona tatou faasoa atu le talalelei ma le lototele ma le talitonu maumaututu.)
Valaaulia tagata aoga e faitau filemu le Mataupu Faavae ma Feagaiga 133:40 ma vaavaai mo se isi mea o le a faia e auauna a le Atua a o lei oo i le Afio Mai Faalua o Iesu Keriso.
E tusa ai ma le fuaiupu e 40, o a mea o le a fai e auauna a le Atua a’o lei oo i le Afio Mai Faalua? (O le a latou tatalo mo le toe foi mai o le Faaola.)
Ua faamatala mai e Iesu Keriso Lona Afio Mai Faalua
Valaaulia se tagata aoga e faitau leotele le Mataupu Faavae ma Feagaiga 133:41-45. Fai atu i le vasega e mulimuli i le faitauga, ma vaavaai mo faamanuiaga o le a oo mai ia i latou e tatalo ma faatalitali i le Afio Mai Faalua o Iesu Keriso.
E tusa ai ma le fuaiupu e 45, o le a le mea na folafola mai e le Alii ia i latou o e o le a faatalitali ia te Ia? (A uma ona tali mai tagata o le vasega, tusi le upumoni lenei i luga o le laupapa: Ua saunia e le Alii ni faamanuiaga silisili mo i latou o e faatalitali mo Ia.
O le a sou manatu, o le a le uiga o le faatalitali i le Alii? (Fesoasoani i tagata aoga ia malamalama o le fuaitau “faatalitali i le Alii” e loloto atu lona uiga nai lo na o le faapasi o le taimi seia oo ina afio mai o Ia. O lona uiga ia vaavaai ma ia saunia ma ia auai i Lana galuega.)
Ina ia fesoasoani i tagata aoga ia malamalama atili i auala e mafai ona latou faatalitali ai ma le faamaoni mo le Alii ma Lona afio mai, valaaulia se tagata aoga e faitau leotele le saunoaga lenei a Elder Jeffrey R. Holland o le Korama a Aposetolo e Toasefululua. Fai atu i tagata aoga e faalogologo mo ni gaoioiga e tatau ona tatou faia a o tatou faatalitali mo le Afio Mai Faalua.
Ata
Elder Jeffrey R. Holland
“I soo se tasi o outou o loo popole e uiga i le lumanai …
“O loo faamoemoe mai le Atua ia lava lou faatuatua ma le naunautai ma lava le talitonuina o Ia e faaauau ai pea ona e agai i luma, faaauau ai pea ona ola, ma faaauau ai pea ona olioli. O le mea moni, o loo faamoemoe mai o Ia ia le gata ina e faafetauia le lumanai (e fai si faalemanaia ma le faigata o lena mea); o loo faamoemoe mai o Ia e te talia ma mamanu le lumanai—ia alofa i ai ma fiafia i ai, ma olioli i ou avanoa.
“O loo faatalitali mai ma le naunautai le Atua mo le avanoa e tali ai i au tatalo ma faataunuu au miti, e pei lava ona Ia faia ai i taimi uma. Ae e le mafai ona Ia faia pe afai e te le tatalo, ma e le mafai pe afai e te le moemiti. I se faapuupuuga, e le mafai ona Ia faia pe afai e te le talitonu” (“Terror, Triumph, and a Wedding Feast” [Faigalotu a le Ofisa o Aoga a le Ekalesia, Sete. 12, 2004], 3, speeches.byu.edu).
O le a le saunoaga a Elder Holland i le mea e tatau ona tatou faia a’o tatou faatalitali mo le Afio Mai Faalua o le Faaola?
Valaaulia tagata aoga e faitau filemu le Mataupu Faavae ma Feagaiga 133:46–47 ma lipoti mai mea ua latou aoaoina e uiga i nisi o tagata o le a i ai i le lalolagi i le taimi o le Afio Mai Faalua. E tatau ona iloa e tagata aoga, e le o tagata uma o le a iloa o ai Iesu Keriso i le taimi o Lona Afio Mai Faalua.
Valaaulia se tagata aoga e faitau leotele le Mataupu Faavae ma Feagaiga 133:48-49. Fai atu i le vasega e mulimuli i le faitauga, ma vaavaai mo se faamatalaga pe o le a faapei foliga vaaia o Iesu Keriso i le taimi o Lona Afio Mai Faalua.
O le a se mea o le a tulaga ese i foliga vaaia o le Faaola i le taimi o Lona Afio Mai Faalua? (O le a ofu o ia i laei lanu mumu, ma o le a afio mai o Ia i le mamalu tele.)
Ata
tanoa vine
Ina ia fesoasoani i tagata aoga ia malamalama i le faafaatusa o ofu mumu o le Faaola, faailoa atu le faaupuga tanoa-vine i le fuaiupu e 48. Faaali atu le ata o loo [i le tusi lesona] o se tanoa-vine (e ta’ua foi o se soliga-vine) pe tusi se ata i luga o le laupapa. Faamalamalama atu faapea i aso anamua, o se soliga-vine o se pesini tele e faaaoga e aveese mai ai le sua mai vine. E faatumu le pesini i vine, ona o lea o ni tagata i totonu o le pesini ma soli ia vine, e faasau ai i fafo le sua. A o soli e tagata vine lanumumu ma viole, e pisipisia o latou vae ma lavalava i le sua lanu mumu paauli.
E mafai faapefea e nei fuaiupu ona fesoasoani ia tatou malamalama i le faamasinoga tonu a le Alii? (Atonu e te manao e faamanatu i tagata aoga, o tagata amioleaga e mumusu e salamo, e tatau ona tigaina i manaoga o le faamasinoga tonu ma o le a le mafai ona onosaia le aso o le Afio Mai Faalua [tagai MF&F 38:8]. O le lanu mumu o laei o le Alii ua faatusa i le toto o e amioleaga o e o le a faaumatiaina pe a liligi ifo le faamasinogatonu i o latou luga i le Afio Mai Faalua.)
Valaaulia se tagata aoga e faitau leotele le Mataupu Faavae ma Feagaiga 133:52-53. Fai atu i le vasega e mulimuli i le faitauga, ma vaavaai mo mea o le a manatua ma ta’uta’u e e amiotonu i le taimi o le Afio Mai Faalua. Valaaulia tamaiti e lipoti mai mea latou te mauaina.
O le a se mea ua aoao mai e nei fuaiupu e uiga i le alofa agalelei o le Alii?
Valaaulia se tagata aoga e faitau leotele le Mataupu Faavae ma Feagaiga 133:54-56. Fai atu i le vasega e mulimuli i le faitauga ma faailoa mai po o ai o le a faaali mai ma le Faaola i le Afio Mai Faalua.
O ai o le a faaali mai ma le Faaola i le Afio Mai Faalua? (O e amiotonu sa soifua muamua ia Iesu Keriso ma ua uma ona toetutu, o le a o mai faatasi ma Ia i Lona mamalu. E le gata i lea, o e amiotonu na soifua ma maliliu na mulimuli mai ia Iesu Keriso, o le a toetutu ma o mai e au faatasi ma le Faaola ma i latou e faatasi ma Ia. Atonu e te manao e ta‘u atu i ai, e aofia ai foi ma tagata amiotonu o o tatou aiga ua maliliu. O e amiotonu o e ola pea i le lalolagi o le a “aveina ae” ia fetaiai ma le Faaola [tagai 1 Tesalonia 4:17; MF&F 109:75].)
Ua auina atu le talalelei e saunia ai le lalolagi mo le Afio Mai Faalua o Iesu Keriso
Vaevae tagata aoga i ni paga. Valaaulia tagata aoga e talanoa ma a latou paga i fesili nei:
O a ni mea ua e aoaoina mai i le Mataupu Faavae ma Feagaiga 133 e uiga i le Afio Mai Faalua o le Faaola? O a ni ou lagona pe a e mafaufau e uiga i nei mea o le a tutupu?
A uma ona talanoaina e tagata nei fesili, valaaulia i latou e suesue ma a latou paga i le Mataupu Faavae ma Feagaiga 133:57–62 ma vaavaai mo ni upumoni e uiga i le pogai e alu atu ai i luma le talalelei a’o lei oo i le Afio Mai Faalua o le Alii. A ua lava loa le taimi, valaaulia ni nai tagata aoga e lipoti mai ni mea ua latou aoaoina.
Molimau atu a o tatou aoao i le talalelei ma ola ai, o le a tatou saunia mo le Afio Mai Faalua.
E tusa ai ma le fuaiupu e 62, o le a le faamanuiaga mulimuli o le a tatou maua? (A uma ona tali mai tagata o le vasega, tusi le upumoni lenei i luga o le laupapa: O i latou o e salamo ma faapaiaina i latou lava o le a maua le ola e faavavau.)
Ina ia fesoasoani i tagata aoga e faafesootai atu lenei mataupu faavae i se mataupu faavae na latou faailoaina mai muamua atu, fai atu le fesili lenei:
O le a le fesootaiga o le mataupu faavae i le fuaiupu e 62 i le mataupu faavae na tatou faailoaina i le Mataupu Faavae ma Feagaiga 133:45, lea e faapea mai, “ua saunia e le Alii faamanuiaga silisili mo i latou o e faatalitali ia te Ia”?
Aotele le Mataupu Faavae ma Feagaiga 133:63–74 i le faamalamalama atu, o nei fuaiupu o loo faailoa mai ai e le Alii nisi o taunuuga mo i latou o e o le a le salamo ma saunia mo le Afio Mai Faalua. O nisi o nei taunuuga e aofia ai le vavae ese mai le Alii ma Lona nuu amiotonu (tagai i le MF&F 133:63) ma le “tuu atu i le pouliuli” (MF&F 133:72), o lona uiga o e amioleaga e maliliu i le Afio Mai Faalua o le a ulu atu i se nofoaga e ta‘ua i le falepuipui o agaga po o seoli (tagai i le Taiala i Tusitusiga Paia, “Seoli,” scriptures.lds.org).
Ina ia faaiu lenei lesona, valaaulia tagata aoga e tusi i a latou api o le vasega po o api talaaga mo le suesueina o tusitusiga paia mea ua latou aoaoina i le Mataupu Faavae ma Feagaiga 133 ua faamalosia ai o latou malamalamaaga ma molimau i le Afio Mai Faalua o Iesu Keriso. Mafaufau e valaaulia ni nai tagata aoga e faasoa mai nei mafaufauga i le vasega. Molimau atu e uiga i upumoni sa outou talanoaina.