I le aso 1 o Aokuso, 1831, i le itiiti ifo ma le lua vaiaso talu ona atofaina e le Alii ia Initipene, Misuri, e avea ma nofoaga tutotonu o Siona, na maua ai e Iosefa Samita le faaaliga o loo i ai i le Mataupu Faavae ma Feagaiga 58. O lenei faaaliga na tuuina mai o le tali ia i latou o e na fia iloa le finagalo o le Atua e faatatau ia i latou i lenei laueleele fou. I le faaaliga lenei na fautuaina ai e le Alii le Au Paia ina ia faamaoni i o latou puapuaga ma faamalamalama mai le mafuaaga na Ia auina mai ai le Au Paia i Siona. Na uunaia foi e le Alii le Au Paia e faaaoga o latou faitalia e faia ai le amiotonu.
Ua fautuaina e le Alii le Au Paia ina ia faamaoni i o latou puapuaga
A o lei amataina le vasega, tusi upu Taimi Nei ma le Lumanai i luga o le laupapa.
Amata le lesona i le fai i tagata o le vasega e mafaufau i le luitau aupito faigata o loo latou feagai i le taimi nei i o latou olaga.
E mafai faapefea e le mafaufau i lou lumanai, i lenei olaga ma i le olaga a sau, ona fesoasoani i lou taulimaina o luitau o loo feagai nei ma oe?
Fai atu i se tagata o le vasega e faitau leotele le palakalafa lenei. Fai atu i le vasega e faalogologo mo luitau na oo i le Au Paia i Misuri i le 1831, lea atonu na mafua ai ona lotovaivai nisi o i latou.
Ia Ianuari 1831, na maua ai e faifeautalai se vaega o tagata Initia Delaware o nonofo i le Teritori o Initia i tua atu o le tuaoi i sisifo o Misuri. Sa fiafia tagata Initia Delaware i le aoaoina o le talalelei o loo i ai i le Tusi a Mamona. Ae ui i lea, ona sa le’i maua e faifeautalai ni pemita manaomia e ulufale ai i le Teritori a Initia ma talai atu le talalelei, ma talu ai ona o le tetee mai sui o Initia ma faifeau i le lotoifale, sa faamalosia ai ona tuua e faifeautalai mai le Ekalesia le teritori. Ona taumafai lea o faifeautalai e aoao tagata papae na nonofo i Initipene, Misuri, ma eria lata ane, ae e oo ane ia Iulai, 1831 e itiiti ifo ma le toasefulu tagata liliu mai na auai i le Ekalesia. Ina ua amata ona taunuu atu i Misuri ia toeaina o le Ekalesia mai Ohaio ia Iulai 1831, sa le fiafia nisi o i latou i mea na latou tau atu ai. Sa faamoemoe nisi o i latou e vaai i se faatoateleina vave o tagata talitonu, ma se nofoaga ua saunia e faanonofo ai tagata fai mai o le Ekalesia. O nisi na faaalia le popole ona sa le’i faato’aina le laueleele i Initipene. E le gata i lea, o nisi o le usoga sa uunaia e nonofo i Misuri ma faatau mai fanua e saunia ai Siona mo le Au Paia o le a oo mai i se taimi mulimuli ane.
Aisea e te manatu ai, atonu o lenei tulaga na faavaivai loto mo nisi tagata o le Ekalesia?
Valaaulia se tagata o le vasega e faitau leotele le Mataupu Faavae ma Feagaiga 58:1–2. Fai atu i le vasega e mulimuli i le faitauga, ma vaavaai mo le mea na ta’u mai e le Alii i toeaina lea atonu na fesoasoani ia i latou e taulima ai luitau na latou feagai.
O le a le mea na ta‘u mai e le Alii i toeaina?
E faapefea ona e aoteleina upumoni o loo i le fuaiupu e 2? (E tatau ona faailoa mai e tagata o le vasega mataupu faavae nei: O le a faamanuiaina i tatou pe afai tatou te tausia poloaiga a le Alii. O le a sili atu lo tatou taui e favavau pe afai tatou te tumau faamaoni i puapuaga. Atonu e te manao e fautua atu i tagata o le vasega e faailoga fuaitau o loo aoao mai i nei mataupu faavae i le fuaiupu e 2.)
Tagai atu i upu Taimi Nei ma le Lumanai o loo i luga o le laupapa. Valaaulia se tagata o le vasega e faitau leotele le Mataupu Faavae ma Feagaiga 58:3-5. Fai atu i le vasega e mulimuli i le faitauga, ma vaavaai mo mea na ta‘u mai e le Alii i toeaina e faatatau i le taimi nei ma le lumanai o Lona nuu. Fai atu i tagata o le vasega e faasoa mai mea na latou mauaina.
E tusa ai ma le fuaiupu e 3, o le a le mea e masani ona tatou le iloa pe malamalama i ai a’o tatou feagai ma ni puapuaga?
Faailoa atu o nei fuaiupu e foliga mai o loo faapea mai, na finagalo le Atua ia tagai atu toeaina i tua atu o tofotofoga sa latou onosaia, ae ia taulai atu i le lumanai mamalu o le a latou oo i ai pe afai latou te faamaoni. O le savali a le Alii i le Au Paia i Misuri, e mafai ona fesoasoani tatou te onosaia ai luitau e ala i le faatumauina o lo tatou taulai atu i faamanuiaga ua folafola mai ia i latou o e onosai ma le faamaoni i puapuaga.
E mafai faapefea e le talitonu o le a faamanuia oe e le Alii, ona fesoasoani e te tumau ai ma le faamaoni i puapuaga?
O le a se taimi na e lagona ai sa faamanuiaina oe ona o le faamaoni i taimi o puapuaga?
Valaaulia tagata o le vasega e toe mafaufau i le luitau aupito maoae o loo latou aafia ai i le taimi nei. Uunaia i latou e tumau i le faatuatua i le talalelei e ui lava i o latou luitau, ina ia mafai ona latou maua taui ua teuina e le Alii mo i latou i le taimi nei ma i le faavavau.
Na faamalamalama mai e le Faaola le mafuaaga na Ia auina mai ai le Au Paia i Siona
Fai atu i tagata o le vasega fesili nei:
Pe na i ai se taimi na talosagaina ai oe e fai se mea, ae e te le’i malamalama pe aisea na talosagaina ai oe e fai? O a ni ou lagona i ai?
I le isi itu, pe na fai atu se tagata ia te oe e te faia se mea ma fesoasoani atu foi ia te oe ia e malamalama i mafuaaga o le faia o lena mea? O a le se eseesega na faia e le iloaina o mafuaaga e fai ai se mea?
Faamalamalama atu na faaalia mai e le Alii nisi o Ana mafuaaga mo le auina mai o tagata e faataatia le faavae o Siona. Valaaulia se tagata o le vasega e faitau leotele le Mataupu Faavae ma Feagaiga 58:6-8. Fai atu i le vasega e mulimuli i le faitauga, ma vaavaai mo mafuaaga na tuuina mai e le Alii mo le auina mai o tagata e faataatia le faavae o Siona. Valaaulia tagata o le vasega e lipoti mai mea ua latou aoaoina.
Otooto le Mataupu Faavae ma Feagaiga 58:9–13 i le faamatala atu o se tasi o mafuaaga na auina mai ai e le Alii tagata e faataatia le faavae o Siona, ina ia saunia ai le lalolagi mo le Afio Mai Faalua o Iesu Keriso. I nei fuaiupu, na faatatau atu ai le Alii i se faataoto o le Feagaiga Fou o loo aoao mai, o le a valaaulia tagata i atunuu uma e auai i faamanuiaga o le talalelei.
Na ono mafai faapefea e le iloaina sa latou saunia le lalolagi mo le Afio Mai Faalua o Iesu Keriso, ona fesoasoani i toeaina ina ia faamaoni i o latou puapuaga?
Ua faamatala mai e le Alii ia tiutetauave o se epikopo ma poloaiina le Au Paia e tausi tulafono o le laueleele
Ata
Eteuati Paterika
Faamanatu atu i tagata o le vasega na valaauina e le Alii ia Epikopo Eteuati Paterika e taitai taumafaiga e fausia le aai o Siona. Sa faatonuina e le Alii ia Epikopo Paterika ma Sidney Gilbert e nonofo i Misuri e pulea meatotino a le Ekalesia ma faatau mai fanua i totonu ma faataamilo i Initipene, Misuri (tagai i le MF&F 57:7–8). Faamalamalama atu e faapea, a o sauni le Au Paia e faatau mai fanua, sa finau Epikopo Paterika ma Iosefa Samita e uiga i le tulaga lelei o fanua sa filifilia. Sa ia manatu sa tatau ona faatau mai ni vaega eseese o fanua. O lenei feeseeseaiga sa oo atu ai i se aoaiga mai le Alii.
Valaaulia se tagata o le vasega e faitau leotele le Mataupu Faavae ma Feagaiga 58:14-15. Fai atu i le vasega e mulimuli i le faitauga, ma vaavaai mo le mea na ta’u mai e le Alii ia Epikopo Paterika. Fai atu i tagata o le vasega e lipoti mai mea ua latou mauaina.
Faasino atu tagata o le vasega i tua i le Mataupu Faavae ma Feagaiga 58:3. E mafai faapefea e upumoni ua faaalia mai i lena fuaiupu ona fesoasoani ia Epikopo Paterika e filifili ai e salamo mo le finau ma le Perofeta i le po o le fea o fasi fanua e tatau ona faatauina mai?
Faamalamalama atu i le vasega o Epikopo Paterika sa taliaina le aoaiga a le Alii ma le lotomaualalo ma sa faamagaloina i ana agasala.
E mafai faapefea e upumoni ua faaalia mai i le Mataupu Faavae ma Feagaiga 58:3 ona fesoasoani ia i tatou e tali atu i poloaiga a le Alii ma le faatuatua nai lo o le lē talitonu ma le tauaso o le loto?
Valaaulia se tagata o le vasega e faitau leotele le Mataupu Faavae ma Feagaiga 58:16-20. Fai atu i le vasega e mulimuli i le faitauga, ma vaavaai mo le mea na ta’u mai e le Alii ia Epikopo Paterika e uiga i lana matafaioi o le fesoasoani e fausia Siona.
E tusa ai ma nei fuaiupu, o le a le tiutetauave o se epikopo?
O a ni isi o auala e faamasino ai e epikopo tagata o le Alii i aso nei?
Otooto le Mataupu Faavae ma Feagaiga 58:21–23 i le faamatala atu e faapea, o loo faamoemoe mai le Alii ia tatou tausia tulafono o le laueleele seia oo ina afio mai o Ia e nofotupu i le taimi o le Meleniuma.
Ua fautuaina e le Alii le Au Paia e faaaoga o latou faitalia e fai ai mea lelei
Faamatala atu le tulaga lenei i le vasega:
Vaai faalemafaufau e faapea, a’o e savali i le auala na e iloa atu se tagata matua ua pa’ū. O lē fea o mea nei e tatau ona e faia?
Faatali mo le Agaga e uunaia oe e fesoasoani atu.
Faatali mo se isi tagata e ta‘u atu ia te oe le mea e fai.
Faatali sei vaai pe e i ai se isi tagata o le a fesoasoani i ai.
Fesoasoani vave atu i le tagata na pau.
A uma ona tali mai tagata o le vasega, fai atu le fesili lenei:
Aisea e taua ai le fesoasoani i le tagata e aunoa ma le faatalitali mo ni faatonuga mai se isi tagata?
Valaaulia se tagata o le vasega e faitau leotele le Mataupu Faavae ma Feagaiga 58:26–28 . Fai atu i le vasega e mulimuli i le faitauga, ma vaavaai mo mataupu faavae na aoao mai e le Alii i le Au Paia a o latou feagai ma le luitau o le fausiaina o le aai o Siona. (Atonu e te manao e faamalamalama atu o le fuaitau “o ia o le e tau faamalosia i mea uma” [MF&F 58:26] e faatatau i se tasi e le gaoioi seiiloga e manaomia ona ia faia o lena mea.)
O a ni upumoni sa e mauaina i fuaiupu e 26–28? (E mafai ona tali mai tagata o le vasega i upumoni e pei o lenei: O loo ia i tatou le mana e filifili ai e galulue mo i tatou lava. Afai tatou te faatalitali mo le Alii e ta‘u mai ia i tatou mea uma e tatau ona tatou faia, o le a aveesea lo tatou taui. Afai tatou te faaaogaina lo tatou faitalia e fai ai mea e aumaia ai le amiotonu, o le a tauia i tatou. I le faaaogaina o upu a tagata o le vasega, tusi upumoni nei i luga o le laupapa.)
O a “taui” o loo faatatau i ai nei fuaiupu? E mafai faapefea i le faia o mea lelei e tele i o tatou lava loto malie ona aafia ai pe tatou te maua le ola e faavavau?
O a ni isi o auala e mafai ona e galue punouai ai i le faia o mea lelei i le fale? I le aoga? I lau uarota po o le paranesi?
Valaaulia tagata o le vasega e faasoa mai ni aafiaga na latou maua i se taimi na faamanuiaina ai i latou ona o le faaaoga o o latou faitalia e fai ai mea lelei.
Valaaulia se tagata o le vasega e faitau leotele le Mataupu Faavae ma Feagaiga 58:29-33. Fai atu i le vasega e mulimuli i le faitauga, ma vaavaai mo mea e tupu ia i latou o e e le faaaogaina o latou faitalia e fai ai mea lelei po o e e masalosalo i poloaiga a le Alii.
O le a le mea e tupu ia i latou o e le faaaogaina o latou faitalia e fai ai mea lelei po o e e masalosalo i poloaiga a le Alii?
E faapefea ona tali atu nisi o tagata pe a latou le maua faamanuiaga ona o lo latou faatamala po o le le usiusitai? O a ni lapataiga e aumai e le Alii i na tagata taitoatasi i le fuaiupu e 33?
Molimau atu i le taua o le faaaogaina o o tatou faitalia e fai ai mea lelei. Valaaulia tagata o le vasega e faaaoga o latou faitalia e fai ai se mea lelei, a’o le’i toe faia le vasega. Tau atu i tagata o le vasega e faapea, o le a latou maua se avanoa e faasoa mai ai mea sa latou faia o se vaega o le lesona e sosoo ai.
Na aoao mai e Peresitene Polika Iaga le mea lenei e uiga i le i ai o se vaaiga e faavavau ma e uiga i le mamalu lea e oo mai i e e faamaoni:
Ata
Peresitene Polika Iaga
“Tatou te talanoa e uiga i o tatou tofotofoga ma faafitauli iinei i lenei olaga; ae ana faapea e mafai ona outou vaai ia te outou lava i le afe ma miliona o tausaga pe a uma ona e faamaonia lou faamaoni i lau tapuaiga i le taimi o nai tausaga pupuu i lenei taimi, ma maua ai le faaolataga e faavavau o se pale o le mamalu i le afioaga o le Atua? Ona toe tepa lea i tua i o outou olaga iinei, ma vaai ai i toilaloga, mea sese, ma faanoanoaga; … o le a faaosofia oe e alaga atu, ‘ae faapefea na mea uma? O na mea sa mo na o sina taimi, ae ua tatou i ai nei iinei. Sa tatou faamaoni i nai taimi pupuu i lo tatou olaga faitino, ae o lenei ua tatou olioli i le ola e faavavau ma le mamalu‘“ (”Remarks,“ Deseret News, Nov. 9, 1859, 1). (Tagai foi i le Mataupu Faavae ma Feagaiga Tusi Lesona a le Tagata o le Vasega, 2nd ed. [Church Educational System manual, 2001], 119 – 20.)
Na faasoa mai e Elder Neal A. Maxwell se saunoaga mai ia C. S. Lewis, o le na faapea mai, e le o taimi uma tatou te malamalama ai i mea ua faapolopoloina e le Atua mo i tatou:
Ata
Elder Neal A. Maxwell
“Na faamatala e C. S. Lewis, i lana tusi Mere Christianity, lo tatou sootaga ma le Atua i se auala faapitoa lea e mafai ona fesoasoani tatou te talisapaia ai le ala e gauai atu ai i tatou lava i lona finagalo, ua na o le pau lea o le auala e mafai ona tupu ai le tuputupu a’e faaleagaga:
“‘Vaai faalemafaufau e faapea o oe o se fale e ola. Ua sau i totonu le Atua e toe fau lena fale. I le taimi muamua, atonu, e mafai ona e malamalama i mea o loo Ia faia. Ua ia faasa’osa’oina ia talivai ma taofi ia tutulu o le faaalo ma isi mea faapena: na e iloa o na galuega sa manaomia ona fai ma o lea e te le o te’i ai. Ae o le taimi nei ua amata ona ia taina solo le fale i se auala ua tiga tele ai ma e foliga mai e leai se uiga. O le a ea Ana mea o fai? O le faamalamalamaga o le, o loo Ia fausia se fale e fai si ese mai mai le fale na e mafaufau i ai—ua togi atu i ai se faalava fou ii, tuu se fola faaopoopoiina, faatutu olo, fai fanua i fafo. Na e manatu o le a faia oe ia avea oe ma se tamai fale manaia: ae o loo Ia fausia se fale tele. …” (New York: The Macmillan Company, 1952, p. 160.)” (“The Value of Home Life,” Ensign, Fep. 1972, 5).
“E lua faatusa o tausamaaga mai le Feagaiga Tuai e faatatau i le Talisuaga a le Alii: o le ‘aiga o mea lololo’, ma le ‘uaina ua i ai le ʼalu ua faamamaina lelei.’ O faailoga uma na o le tamaoaiga, e faailoa atu ai o le taumafataga o loo taua iinei e taua tele (tagai foi i le MF&F 57:5–14; 65:3; Mataio 22:1-14; Faaaliga 19:7-9)” (Mataupu Faavae ma Feagaiga Tusi Lesona a le Tagata o le Vasega [Church Education System manual, 2001], 120).
Sa finau Epikopo Paterika ma Iosefa Samita e uiga i le tulaga lelei o le fanua sa filifilia i Misuri. Sa ia manatu sa tatau ona faatau mai ni vaega eseese o fanua. Na aoai e le Alii ia Epikopo Paterika ona o lana amio.
Sa talia e Epikopo Paterika le aoaiga a le Alii i le Mataupu Faavae ma Feagaiga 58 ma le lotomaualalo. Na o ni nai aso talu ona tuuina mai lenei faaaliga, sa ia tusi atu ai i lona toalua: “E te iloa o loo ou tu i se tulaga taua ma a’o aoaia a’u i nisi o taimi, e i ai taimi ou te manatu ai e pei e tatau ona ou pau, ia ou le fiu i le faamoemoe, ae ou te popole o lo’u tulaga ua maualuga atu i mea e mafai ona ou faia ina ia talia ai e lo’u tama faalelagi” (tusi ia Lydia Paterika, Aok. 5–7, 1831, Church History Library, Salt Lake City). O minute o se fonotaga i Siona na talanoaina ai le finauga i le va o le Perofeta o Iosefa Samita ma Epikopo Paterika na faapea mai, sa fai mai Peterika, “ua ia ma sa salamo lava i taimi uma” mo le feeseeseaiga (Minute Book 2, 10 Mati, 1832, 23, Church History Library, Salt Lake Citu; tagai foi i le josephsmithpapers.org). O se faaaliga na tuuina mai i le aso 11 o Setema, 1831, na faaalia ai na faamagaloina ia Paterika mo ana amioga (Documents, Volume 2: July 1831–January 1833, vol. 2 of the Documents series of The Joseph Smith Papers [2013], 62).
O se faataitaiga lelei o le mulimuli i le fautuaga ina ia “auai ma le naunautai i se faamoemoega lelei” (MF&F 58:27) o loo maua i se aafiaga na faasoa mai e Elder Vaughn J. Featherstone o le Fitugafulu:
Ata
Elder Vaughn J. Featherstone
“Ina ua pe tusa o le sefulu po o le sefulutasi o o’u tausaga, sa toatele ni tagata o lo’u aiga sa o mai e asiasi mai. Sa pe a ma le 35 po o le 40. Sa valaaulia i latou uma e Tina mo le ‘aiga i le afiafi. Ina ua uma ona aai, sa o atu tagata uma i le isi potu e nofonofo ai ma eva. Sa paepae solo faaputuga o ipu ma sipuni palapala. Sa le’i teuina foi meaai, ma sa i ai ulo palapala ma falai mai le sauniuniga atoa.
“Ou te manatua lo’u mafaufau e faapea, mulimuli ane o le a o ese uma ai tagata, ma tuua ai lo’u tina ma se tapenaga tele e fai. Sa oo mai se manatu ia te a’u. Sa amata ona ou tapenaina. Sa o aso ia e le’i i ai ni masini fufulu ipu e alu i le eletise. O tina sa masani ona mama i taimi uma, ma sa ia aoaoina i matou i le auala sa’o e fufulu ma solo ai ipu. Sa amata ona ou faia lenei mauga o galuega. Mulimuli ane, pe tusa o le tolu itula mulimuli ane, na uma ai ona ou solomagoina le ipu mulimuli. Sa ou teuina ese uma meaai, faamama fata, ma faatanoa, ma le fola. Sa matuai mama lelei le umukuka.
“O le a le galo ia te a’u foliga o Tina i se taimi mulimuli ane o lena po, ina ua o ese uma malo na valaaulia, ma sau loa i le umukuka e tapena ma faamama. Sa ou susu mai i lo‘u fatafata i ou tulivae. Sa aoga ai vaega laiti uma o le taumafaiga na ou tuuina i ai, tau lava ina vaaia le vaaiga i foliga o Tina. Sa o se fefiloi o lagona ootia, toomaga, ma le mitamita. Sa ou faia se faaiuga i lena taimi o le a ou taumafai e toe tuu pea lena vaaiga i ona foliga” (“We Love Those We Serve,” New Era, Mat. 1988, 19).