Anomea o Sauniuniga mo le Faiaoga mo Suesuega i le Fale
Aotelega o Lesona mo Suesuega i le Fale i Aso Taitasi
O le aotelega lenei o mea na tutupu, aoaoga faavae, ma mataupu faavae na aoaoina e tagata aoga a’o latou suesueina le Iosefa Samita—Talafaasolopito 1:1–65 ma le Mataupu Faavae ma Feagaiga 2 (iunite 2) e le o faamoemoe e aoao atu o se vaega o lau lesona. O le lesona e te aoaoina atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tamaiti aoga.
Sa aoaoina e tagata aoga mai le aafiaga a Iosefa Samita i le taumafai e iloa po o le fea o lotu e moni, afai tatou te ole atu i le Atua i le faatuatua, o le a tali mai o Ia i a tatou tatalo. Sa latou taulai atu i le upumoni e faapea, na vaai Iosefa Samita i le Atua le Tama ma Lona Alo o Iesu Keriso. Mai le aafiaga o Iosefa Samita, na aoaoina foi e tagata aoga o loo soifua le Atua le Tama ma Iesu Keriso ma o le Tama Faalelagi ma Iesu Keriso o ni tagata mavaevae se toalua. E le gata i lea, na iloa foi e tagata aoga, afai tatou te saili atu ma le faamaoni i le fesoasoani a le Atua pe a taumafai Satani e faalotovaivai i tatou, e mafai ona laveai i tatou e le Atua.
Mai le aafiaga o Iosefa Samita na aoao ai e tagata aoga e faapea, pe a oo i taimi faigata, e mafai ona tatou maua mai le malosi mai faataitaiga a tagata faamaoni i tusitusiga paia. O le suesueina o le auala na taulima ai e Iosefa Samita sauaga na fetaia‘i ma ia ina ua mavae le Uluai Faaaliga, na aoao ai tagata aoga i aoaoga faavae ma mataupu faavae e mafai ona fesoasoani ia i latou pe a latou feagai ma faiga tetee ona o a latou molimau. E le gata i lea, na aoaoina e tagata aoga e faapea, o le faatinoina o mataupu faavae na aoaoina i tusitusiga paia, e mafai ona tatou maua ai se molimau i lo latou moni.
Sa fia iloa e Iosefa Samita lona tulaga i luma o le Atua. Sa ia iloaina ana mea sese ma vaivaiga ma lagona ai le faanoanoa. E faapei o Iosefa Samita, pe a tatou iloa a tatou agasala ma lagona ai le faanoanoa, e mafai ona tatou tatalo i le Tama Faalelagi mo le faamagaloga. Na suesueina e tagata aoga le asiasiga a Moronae ia Iosefa Samita ma iloa ai, sa i ai i le Atua se galuega mo Iosefa Samita e fai lea o le a salalau atu i le lalolagi atoa. O lenei galuega na aofia ai le toefuatai mai e Elia o le mana o faamauga i le lalolagi a’o lumanai le Afio Mai Faalua o Iesu Keriso.
Sa mafaufau loloto tagata aoga i le folafolaga a Moronae ia Iosefa Samita e faapea, o le a puipuia papatusi, ma sa latou aoaoina, a o faia la tatou tiutetauave ma faasaoina mea ua tuuina mai e le Alii ia i tatou, o le a Ia tuuina mai Lana puipuiga ma le fesoasoani. A o suesueina e tagata aoga le tala ia Matini Harisi lea na aveina atu kopi o tusiga i papatusi auro ma le faaliliuga ia Polofesa Anthon ma Dr. Mitchell, sa latou aoaoina ai, o valoaga a auauna a le Alii o le a faataunuuina lava.
Folasaga
O lenei lesona e mafai ona fesoasoani i tagata aoga e faalolotoina lo latou malamalama e uiga i le Uluai Faaaliga a Iosefa Samita. E tuuina atu ai foi ia i latou se avanoa e aoao ai e uiga i le taumafaiga e manaomia e saili ai tali i fesili ma ia talisapaia lo latou matafaioi i le aoaoina o le talalelei. O le a aoao ai e tagata aoga ni auala e faamalolosia ai o latou faatuatua e faasaga i sauaga ma le tetee latou te ono oo i ai.
Ua faaali mai le Atua le Tama ma Lona Alo o Iesu Keriso, ia Iosefa Samita
Fai atu i tagata aoga e mafaufau i se taimi na latou mananao ai i se tali i se fesili faaleagaga pe faatatau i le talalelei. Ona fai atu lea o le fesili lenei:
O le a se mea na e faia e maua ai le tali i lau fesili?
Faamanatu atu i tagata aoga o Iosefa Samita sa pei lona matua o le toatele o tagata aoga seminare i le taimi na popole ai e uiga i se fesili taua, ma amata ona saili mo se tali. E ui o le aafiaga a Iosefa sa tulaga ese, ae o mea na tutupu na tau atu i ai o se mamanu lea e mafai e i tatou taitoatasi ona mulimuli i ai ina ia maua ai le fesoasoani ma tali mai le Atua.
Vaevae tagata aoga i ni vaega taitoalua pe taitoatolu. Fai atu i vaega taitasi e faitau le Iosefa Samita—Talafaasolopito 1:8, 11–12, 14–15, e vaai ai po o le a le mea na faia e Iosefa Samita e maua ai le tali i lana fesili. Valaaulia vaega taitasi e auina atu se sui i le laupapa e tusi ai se elemene taua se tasi na maua e le latou vaega. Ta‘u atu i le vasega e aua le tusia faalua se aitema i luga o le laupapa. Afai e faigata ona maua e tagata aoga se mea na faia e Iosefa, atonu e te fesoasoani atu i ai i le fautuaina atu o nisi o mea nei: Sa manatunatu (mafaufau) loloto Iosefa, auai i sauniga lotu, suesue i aoaoga a aulotu eseese, suesue i tusitusiga paia, tatalo ma le naunautai.
Fai atu fesili nei:
O le a se mataupu faavae e mafai ona e aoao mai ia Iosefa Samita e uiga i le mea e fai ina ia malamalama ai i mea faaleagaga? (E ui e mafai ona faaaoga e tagata aoga ni upu eseese, ae e tatau ona latou faailoa mai le mataupu faavae lenei: O le aoaoina o mea faaleagaga e manaomia ai le taumafaiga i la tatou vaega. Atonu e te manao e tusi le mataupu faavae lenei i luga o le laupapa.)
Aisea e te manatu e tatau ai mo i tatou ona faia taumafaiga e aoao ai upumoni faaleagaga?
E mafai faapefea e le faaaogaina o lenei mataupu faavae ona fesoasoani ia te oe i au suesuega faaletagata lava ia o le Mataupu Faavae ma Feagaiga i le tausaga lenei?
Valaaulia se tagata aoga e faitau leotele le Iosefa Samita—Talafaasolopito 1:16-17, ma fai atu i le vasega e mulimuli i le faitauga i a latou tusitusiga paia ma vaavaai mo le mea na oo ia Iosefa a’o ia faia se taumafaiga ina ia maua ai le malamalama.
E tusa ai ma le fuaiupu e 17, o ai na vaai i ai Iosefa Samita? (Ia mautinoa e manino, na vaai Iosefa Samita i le Atua le Tama ma Lona Alo o Iesu Keriso.)
O le a le mea na ia aoaoina i le taimi o lenei faaaliga e uiga i nei tagata e toalua?
Fai atu i se tagata aoga e faitau leotele le faamatalaga lenei mai ia Peresitene Iosefa F. Samita, o le na faamalamalamaina mai le taua o le Uluai Faaaliga:
Ata
Peresitene Iosefa F. Samita
“O le mea aupito maoae ua tupu i le lalolagi, talu le toetu mai o le Alo o le Atua mai le tuugamau, ma lona afio a’e i luga, o le afio mai lea o le Tama ma le Alo i lena taulealea o Iosefa Samita” (Gospel Doctrine, 5th ed. [1939], 495).
Aisea e te manatu e taua ai le i ai o se molimau na faaali moni mai le Tama Faalelagi ma Iesu Keriso ia Iosefa Samita?
Valaaulia se tagata aoga e faitau leotele le Iosefa Samita—Talafaasolopito 1:18–20, ma fai atu i tagata aoga e su’e le mea na iloa e Iosefa mo ia lava ona o lana taumafaiga e galue i le faatuatua. Ona fai atu lea o fesili nei:
O le a le mea na iloa e Iosefa mo ia lava?
O le a se mea e mafai ona tatou aoao mai i le aafiaga a Iosefa Samita, e uiga i le mea e mafai ona tupu pe a tatou suesue i le afioga a le Atua ona tatou faia lea o mea na tatou faitau i ai? (O tali e mafai ona aofia ai le upumoni lenei: Afai tatou te filiga i le suesueina o le afioga a le Atua ma galue i ai i le faatuatua, o le a mafai ona tatou iloa upumoni o le talalelei mo i tatou lava. (Atonu e te manao e tusi lenei mataupu faavae i luga o le laupapa, ma valaaulia tagata aoga e tusi i autafa o a latou tusitusiga paia.)
E mafai faapefea e lenei upumoni ona fesoasoani i se uo po o se tagata o le aiga o loo i ai ni fesili e uiga i le talalelei?
E mafai faapefea ona fesoasoani lenei upumoni ia te oe i au fesili po o popolega?
Ua faaipoipo Iosefa Samita ia Ema Hale, maua papatusi auro, ma amata ona faaliliuina
Fai atu i tagata aoga e toe faamanatu mea na tutupu ia Iosefa Samita ina ua mavae lana Uluai Faaaliga. Ia mautinoa ua latou malamalama na oo i le Perofeta ni sauaga matuia ina ua uma ona ia ta‘u atu i isi e uiga i le faaaliga. Valaaulia i latou e faitau e le tagata lava ia le faaiuga o le Iosefa Samita—Talafaasolopito 1:20 e amata atu i le fuaitau “Sa foliga mai e peiseai. …” Ona fai atu lea o fesili nei i tagata aoga:
E tusa ai ma le faamatalaga a Iosefa Samita, aisea na oo ai sauaga tetele ia te ia a’o laitiiti lava? (O sauaga na oo mai i faatosinaga a Satani aua sa ia iloa o le a avea Iosefa Samita ma “faalavelave ma faasoesa i le malo [o Satani].”)
O a nisi o tulaga e te ono aafia ai pe ono aafia ai nisi e te iloa i sauaga i aso nei?
Valaaulia se tagata aoga e faitau leotele le Iosefa Samita—Talafaasolopito 1:24–25. Fai atu i le vasega e mulimuli i le faitauga ma faailoa mai mea e mafai ona tatou faia ina ia maua ai le malosi i taimi o faigata.
O a ni mea e mafai ona tatou faia i taimi o faigata e maua ai le malosi e faamaoni ai? (Atonu e tuuina mai e tagata aoga ni tali eseese. Ia mautinoa latou te faailoa mai le mataupu faavae lenei: I taimi o faigata, e mafai ona tatou maua mai le malosi mai faataitaiga a tagata faamaoni i tusitusiga paia. (Atonu e te manao e tusi lenei mataupu faavae i luga o le laupapa, ma valaaulia tagata aoga e tusi i autafa o a latou tusitusiga paia.)
Valaaulia tagata aoga e toe faamanatu le Iosefa Samita—Talafaasolopito 1:24-25, ma vaavaai mo upu po o fuaitau atonu e avatu ai ia i latou le lototele po o le malosi e fai ai le mea sa’o i taimi o sauaga. A uma ona lipoti mai e tagata aoga fasifuaitau latou te mauaina, atonu e te manao e fautua atu latou te faailoga le fuaitau “Sa ou vaai i se faaaliga vaaia; sa ou mautinoa lena mea, ma sa ou mautinoa sa silafia e le Atua lena mea, ma e lē mafai ona ou faafitia lena mea.”
Fai atu i tagata aoga fesili nei:
O le a le mea ua aoao mai e lenei fuaitau ia te oe i le molimau a Iosefa Samita e uiga i le Uluai Faaaliga?
E ono mafai faapefea e lenei fuaitau ona fesoasoani ia te oe pe a luiina e se tasi lau molimau pe sauaina oe ona o ou talitonuga?
Faaiu lenei lesona i le faasoa atu o lau molimau e uiga i mataupu faavae na talanoaina i lenei lesona. Valaaulia tagata aoga e faasoa mai o latou aafiaga po o lagona e uiga i nei upumoni.
Na faapefea ona leiloloa ma le’i toe maua mai ia itulau muamua e 116 o le Tusi a Mamona ia na faaliliuina e Iosefa Samita? A o suesueina e tagata aoga le iunite e sosoo ai, o le a latou aoao e uiga ia Matini Harisi ma itulau na leiloloa. O le a latou aoao foi e uiga i le fautuaga a le Alii ia i latou o e mananao e auauna atu i le Atua.