Lesona mo Suesuega i le Fale: O Le Ata o le Faaolataga–Suesueina o Tusitusiga Paia (Iunite 1)
Lesona mo Suesuega i le Fale
O Le Ata o le Faaolataga–Suesueina o Tusitusiga Paia (Iunite 1)
Anomea o Sauniuniga mo le Faiaoga mo Suesuega i le Fale
Aotelega o Lesona mo Suesuega i le Fale i Aso Taitasi
O le aotelega lenei o mea na tutupu, aoaoga faavae, ma mataupu faavae na aoaoina e tagata aoga a’o latou faamaeaina ia lesona e fa a le tagata aoga mo suesuega i le fale mo le iunite 1. O le iloaina o mea na suesue e tagata aoga, o le a fesoasoani e te saunia ai mo le vasega. O le aotelega e le o se vaega o le lesona, ma e le’i fuafuaina e faasoa atu i tagata aoga. Ona o le lesona o le a e aoaoina atu mo le iunite 1 e taulai atu i na o ni nai aoaoga faavae ma mataupu faavae nei, e i ai taimi atonu e musuia ai oe e toe faamanatu pe talanoa i isi [aoaoga ma mataupu faavae] e tusa ai ma uunaiga a le Agaga ma manaoga o au tagata aoga.
Aso 1 (O Le Ata o le Faaolataga)
O le suesueina o le ata o le faaolataga a le Tama Faalelagi sa fesoasoani i tagata aoga e iloa ai le faamoemoega o le ata, o le saunia lea o se ala mo i tatou ina ia maua ai le tino ola pea ma le ola e faavavau. Na aoaoina e tagata aoga, na auina mai i tatou e le Tama Faalelagi i le lalolagi ina ia maua ni tino, ma ia maua le poto masani ma le tuputupu ae. O le Togiola a Iesu Keriso e mafai ai ona tatou faatoilaloina aafiaga o le agasala ma le oti.
Aso 2 (O Le Liliuese Tele)
A o aoao e uiga i le Liliuese Tele, sa iloa ai e tagata aoga o perofeta ma aposetolo ua fausia ai le faavae o le Ekalesia a Iesu Keriso, ma fesoasoani e faatumau le mama o le Ekalesia e ala i le aoao atu o aoaoga faavae sa‘o. E le gata i lea, o le pule ma ki o le perisitua e manaomia ia maua ai feagaiga ma sauniga o le faaolataga, o ia mea uma e mauaina i le Ekalesia a Iesu Keriso. O le liliuese e tupu pe a o ese tagata mai upumoni o le talalelei ma teena auauna faamaonia a le Alii. Sa alagātatau ai se toefuataiga o le upumoni ma le pule ma ki o le perisitua e faatoilalo ai aafiaga o le Liliuese Tele.
I la latou suesuega o le faatomuaga a le Alii i le Mataupu Faavae ma Feagaiga, na aoaoina ai e tagata aoga e faapea, e fetalai mai e le Alii Ana lapataiga i tagata uma e ala mai i Ona soo filifilia, ma o Le Ekalesia a Iesu Keriso o le Au Paia o Aso e Gata Ai o le ekalesia moni e tasi ma ola i le lalolagi. Na faailoa mai e tagata aoga e tatau ona tatou suesue i poloaiga ua tuuina mai e le Alii, o le a faataunuuina afioga uma a le Alii, ma o afioga a le Alii e moni e tusa lava pe fetalaia mai e Ia po o Ana auauna.
Aso 4 (O le Suesueina o Tusitusiga Paia)
I lenei lesona sa aoaoina ai e tagata aoga, o tusitusiga paia ua tusia e faasaosao ai upumoni e faavavau ua ta’ua o aoaoga faavae ma mataupu faavae. Sa latou aoaoina ina ia maua nei upumoni e faavavau, o le a fesoasoani le malamalama muamua i le talaaga ma anotusi o tusitusiga paia. Na aoaoina e tagata aoga e faapea, o le taimi lava e malamalama ai i nei elemene, o le a fesoasoani le faailoa atu o aoaoga faavae ma mataupu faavae latou te mauaina i ni faamatalaga o upumoni manino ma faigofie. Ma le mea mulimuli, na aoaoina e tagata aoga, o le taua moni o le suesueina o tusitusiga paia, e oo mai i le faaaogaina o aoaoga faavae ma mataupu faavae latou te maua i tusitusiga paia i o latou lava olaga.
Folasaga
O lenei lesona o le a faailoa atu ai tagata aoga i le Mataupu Faavae ma Feagaiga, ma le faaaogaina o le folasaga i le Mataupu Faavae ma Feagaiga ma le vaega 1. O le a iloa ai e tagata aoga, o le Mataupu Faavae ma Feagaiga o loo i ai “faaaliga paia ma folafolaga musuia na tuuina mai mo le faatuina ma le faatonutonuga o le malo o le Atua i luga o le lalolagi i aso e gata ai” (faatomuaga i le Mataupu Faavae ma Feagaiga). O le suesueina o le Mataupu Faavae ma Feagaiga ma le Talafaasolopito o le Ekalesia e mafai ona faamalolosia ai molimau a tagata aoga e uiga ia Iesu Keriso.
Manatua: E masalo o le lesona muamua lenei faatasi a tagata aoga, ma atonu e te manao e valaaulia i latou e fai mai ni a latou fesili o i ai e uiga i le faagasologa o suesuega e faia i le aiga, ma auala e mataalia ai a latou lava suesuega o tusitusiga paia.
Fautuaga mo le Aoaoina Atu
Folasaga i le Mataupu Faavae ma Feagaiga ma le Talafaasolopito o le Ekalesia
O le Mataupu Faavae ma Feagaiga o loo i ai faaaliga na maua e le Perofeta o Iosefa Samita ma [perofeta] na suitulaga ia te ia
Atonu e te manao e amata le lesona i le fesili atu i tagata aoga, po o a tusi latou te manatu o le a manuia ai le lalolagi atoa mai le faitauina ma aisea. (Mafaufau e aumai ni nai tusi o le a e fautuaina atu.) A uma ona tali mai tagata aoga, fai atu i se tagata aoga e faitau le saunoaga lenei a le Perofeta o Iosefa Samita, ma valaaulia le vasega e faalogologo mo mea na aoao mai e le Perofeta e uiga i le Mataupu Faavae ma Feagaiga:
Ata
Perofeta o Iosefa Samita
“[O faaaliga i le Mataupu Faavae ma Feagaiga] “o le faavae lea o le Ekalesia i nei aso mulimuli, ma o se manuia i le lalolagi, e faaalia ai o ki o mea lilo o le malo o lo tatou Faaola ua toe tuuina mai i tagata” (Aoaoga a Peresitene o le Ekalesia: Iosefa Samita [2007], 206).
Uunai tagata aoga e vaavaai i le aluga o le lesona i le aso, mo ni auala e mafai ona manuia ai le lalolagi, ma mafai ona manuia ai o latou lava olaga, i le suesueina o le Mataupu Faavae ma Feagaiga.
Fai atu i tagata aoga e sue i le itulau autu o le Mataupu Faavae ma Feagaiga. Faamatala atu e faapea, ina ia mafai ona aoga le Mataupu Faavae ma Feagaiga, e ao lava ona muamua ona tatou malamalama po o a aoaoga faavae ma feagaiga. Fai atu i se tagata aoga e faitau leotele le itulau o le autu. Ona fai atu lea o fesili nei i tagata aoga:
E faapefea ona e faamatalaina le upu aoaoga faavae?
O le a le feagaiga?
O le a le faaaliga?
Afai e manaomia, faamatala atu o aoaoga faavae o se upumoni autu, e lē masuia o le talalelei a Iesu Keriso; o se feagaiga o se maliega paia i le va o le Atua ma Lana fanau lea e faatulaga ai e le Atua tuutuuga uma o folafolaga na faia; ma o le faaaliga o fesootaiga mai le Atua i Ana fanau. Atonu e te manao e fautua atu i tagata aoga e tusi nei faauigaga i le itulau autu.
Fai atu i tagata aoga e sue i le palakalafa lona valu o le folasaga o le Mataupu Faavae ma Feagaiga (e amata i le “Ua tuuina mai i nei faaaliga …”). Faamatala atu, o lenei palakalafa o loo lisiina ai faataitaiga o nisi o autu faaleaoaoga faavae o loo maua i le Mataupu Faavae ma Feagaiga. Fai atu i tagata aoga e faitau filemu le fuaiupu muamua, ma faailoa mai se tasi pe sili atu o ni autu o aoaoga faavae latou te fia aoao atili e uiga i ai. Ona fai atu lea o fesili nei:
O le fea o autu faaleaoaoga faavae e sili ona e fia aoao atili e uiga i ai?
O a ni auala o le a e manuia ai mai le iloaina ma malamalama lelei i na aoaoga faavae?
Fai atu i se tagata aoga e faitau leotele le fuaiupu mulimuli o le palakalafa lona valu (e amata i le “Mulimuli lava, o le molimau ua tuuina mai …”), ma valaaulia le vasega e vaavaai mo mea ua matua taua ai le Mataupu Faavae ma Feagaiga. Ona fai atu lea o fesili nei:
O le a le mea “ua matua taua” ai le Mataupu Faavae ma Feagaiga?
Aisea e matua taua ai se molimau e uiga i le Faaola?
O le a sou manatu i le mea o le a tupu i lau molimau ia Iesu Keriso a o e suesue i le Mataupu Faavae ma Feagaiga?
Tusi le mataupu faavae lenei i luga o le laupapa: E ala i le suesueina o faaaliga i le Mataupu Faavae ma Feagaiga, e mafai ona e faamalosia ai lau molimau ia Iesu Keriso. Valaaulia tagata aoga e mafaufau pe faapefea ona aafia o latou olaga i se molimau malosi e uiga i le Faaola. Mafaufau e faasoa atu auala ua faamalosia ai lau molimau ia Iesu Keriso ona o le suesueina o le Mataupu Faavae ma Feagaiga.
Fai atu i se tagata aoga e faitau leotele le palakalafa muamua o le folasaga i le Mataupu Faavae ma Feagaiga, a o mulimuli isi tagata uma o le vasega i le faitauga. Ona fesili atu lea: A o tatou suesue i le Mataupu Faavae ma Feagaiga, o le siufofoga o ai o le a tatou faalogoina?
Tusi le mataupu faavae lenei i luga o le laupapa: A o tatou suesue i le Mataupu Faavae ma Feagaiga, e mafai ona tatou lagonaina le siufofoga o le Faaola. Ona faitau atu lea o le Mataupu Faavae ma Feagaiga 18:34–36 i tagata aoga.
Fai atu i se tagata aoga e faitau leotele le parakalafa lona tolu o le folasaga o le Mataupu Faavae ma Feagaiga. Valaaulia le vasega e mulimuli i le faitauga, ma vaavaai mo upu o loo faamatala ai le siufofoga o le Faaola. (Atonu e te manao e fautua atu e faailoga mea latou te mauaina.) Ona fai atu lea o fesili nei:
O a ni upu o loo faaaogaina e faamatala ai le siufofoga o le Faaola?
O a ni faamanuiaga e mafai ona oo mai i lou olaga mai le faalogo atu ma le iloaina o Lona siufofoga?
Faaali atu ni ata o nisi o tagata o loo, ma sa agai tonu atu i ai faaaliga i le Mataupu Faavae ma Feagaiga (tagai i le Tusi Ata o le Talalelei [2009], nu. 87, 88, 93, 94, 95; tagai foi i le LDS.org). A o e faaali atu nei ata, faamatala atu o le a aoao tagata aoga e uiga i nei tagata a o suesue i le Mataupu Faavae ma Feagaiga.
Fai atu i se tagata aoga e faitau leotele ia fuaiupu muamua e lua o le parakalafa lona ono o le folasaga o le Mataupu Faavae ma Feagaiga (e amata i le “O nei faaaliga paia …”). Valaaulia le vasega e mulimuli i le faitauga, ma vaavaai mo tulaga na faapea ona maua ai faaaliga. (Atonu e te manao e fautua atu e faailoga mea latou te mauaina.)
O a ni fasifuaitau i nei fuaiupu o loo faamatala ai tulaga sa faapea ona maua ai nei faaaliga?
Faaali atu i tagata aoga se fasi pepa ua tusia ai le upu Oe. Faailoa atu e faapea, e pei foi o tagata taitoatasi mai le talafaasolopito o le Ekalesia, tatou te oo foi i tulaga ia tatou te manaomia ai le taitaiga faalelagi.
Afai tatou te mulimuli i faataitaiga a nei Au Paia anamua, o a ni mea e tatau ona tatou faia e maua ai le taitaiga faalelagi? (Tatalo ma saili i ai.)
Faamatala atu, o le tasi o auala e saili ai le taitaiga faalelagi o le suesue lea i tusitusiga paia. Fai atu i tagata aoga e su’e i le Mataupu Faavae ma Feagaiga 1:37–38, lea o se mau tauloto. Faamanatu atu ia i latou, na tuuina mai e le Alii lenei faaaliga o Lana faatomuaga i le Mataupu Faavae ma Feagaiga.
Fai atu i se tagata aoga e faitau leotele le Mataupu Faavae ma Feagaiga 1:37–38, a o mulimuli le vasega i le faitauga, ma vaavaai mo le poloaiga a le Alii ia i tatou e uiga i le Mataupu Faavae ma Feagaiga.
O le a le mea ua poloaiina i tatou e le Alii e fai i le Mataupu Faavae ma Feagaiga? (E mafai ona faaaoga e tagata aoga ni upu eseese, ae e tatau ona latou faailoa mai le mataupu faavae lenei: E tatau ona tatou suesue i poloaiga ua tuuina mai e le Alii.)
Valaaulia tagata aoga e faasoa mai pe na faapefea ona faamanuiaina i latou i le suesueina o tusitusiga paia i le aluga o suesuega o lenei vaiaso. Tulitatao i tagata aoga a latou sini na faatutu e suesue i aso uma i le Mataupu Faavae ma Feagaiga i le aluga o le tausaga aoga. Fesili atu ia i latou e uiga i a latou fuafuaga e mulimuli i le poloaiga a le Alii e “suesue i nei poloaiga” (MF&F 1:37). Atonu e te manao e faaiu i le faasoa atu o lau molimau i le taua o le faalogo i siufofoga o le Alii, ma le mauaina o le taitaiga mai ia te Ia e ala i le suesueina o le Mataupu Faavae ma Feagaiga.
E faafofoga ma tali mai le Atua i tatalo. Na oo mai le Uluai Faaaliga o se taunuuga o le tatalo faamaualalo a Iosefa Samita. E lei leva, ae faatonuina e agelu le Perofeta o Iosefa Samita i le oo mai o le Tusi a Mamona ma le toefuataiga o le perisitua. Ina ua uma ona faaali mai Ioane le Papatiso ia Iosefa Samita ma Oliva Kaotui, na tusia e Oliva, “Toe mafaufau ifo i se taimi, i le olioli na faatumuina ai ma loto … ina ua ma mauaina mai lalo o lona aao le Perisitua Paia” (Iosefa Samita—Talafaasolopito 1:71, faamatalaga).