I le faaiuga o Me 1829, na onosaia ai e Iosefa Samita ma Oliva Kaotui taufaamatau mai tagata faatupu vevesi a o faamaeaina le faaliliuga o le Tusi a Mamona. Sa fesoasoani Tavita Uitimera ia i latou e siitia mai Haramoni, Penisilevania, i le fale o le aiga o Uitimera i Feiete, Niu Ioka, ina ia latou sao mai sauaga ma ia mafai ona latou aoao atu le talalelei toefuataiina i le aiga o Uitimera ma o latou tuaoi. Na matuai fiafia le aiga o Uitimera i le faaalia o mea na tutupu o le Toefuataiga. Na faamatalaina e Iosefa Samita ia Tavita Uitimera, ma Ioane Uitimera, ma Peter Uitimera le Itiiti, o ni “uo finafinau ma o ni fesoasoani i le galuega; ma …sa naunau e iloa o latou lava tiute” (History of the Church, 1:48–49). Sa tatalo le Perofeta ma maua ai faaaliga mo Tavita Uitimera ma ona uso o Ioane ma Peteru. Sa aoao nei uso e uiga i a latou matafaioi i le aumaia i luma o le galuega a le Alii.
Ua valaauina e le Alii ia Tavita Uitimera e fesoasoani i le galuega o aso e gata ai
Ina ia fesoasoani i tagata o le vasega ia malamalama i le talaaga faasolopito o faaaliga o le a latou suesueina nei, fai se aotelega o faamatalaga i le folasaga o le lesona lenei. E le gata i lea, atonu e te manao e fai atu i se tagata o le vasega e faitau le tala lenei. A’o lei faitau le tagata o le vasega, faamalamalama atu sa tatau ia Tavita Uitimera ona togi faasalalau le pauta, lea sa faaaoga o se faalelei eleele. Sa ia lagona le musuia e tatau ona fesoasoani ia Iosefa ma Oliva pe a uma ona ia faamaeaina na galuega. Valaaulia le vasega e faalogologo mo vavega na mafai ai e Tavita Uitimera ona fesoasoani ia Oliva Kaotui ma Iosefa Samita e sosola ese mai o laua faaoosala:
Ata
Lusi Maka Samita
“Sa alu atu Tavita i le fanua, ma iloa ai e lua ni aso o galuega mamafa na taatia mai i ona luma. … Sa ia faapipiiina ana solofanua i le palau, ma nai lo le vaevaeina o le fanua i vaega, sa masani ona ta’ua ai e le au faifaatoaga, o laueleele, ma sua atoa loa, ma faaauau ai lava seia oo i le aoauli, ina, ua malolo mo le taumafataga o le afiafi, sa tilotilo solo o ia, ma na faateia i lona iloaina, e afa lelei lava le saito na ia suaina. Ina ua uma le meaai o le afiafi sa toe alu foi ma fai e pei o le taimi muamua, ma e oo ane i le afiafi po, ua uma lelei le galuega o ni aso se lua.
‘Ina ua alu atu lona tama i le fanua i lena lava afiafi, sa ia vaaia ai le mea na faia, ma sa ia alaga atu, ’E i ai se mana malosi atu ua mafai ai lenei mea, ma ou te manatu e sili ai lou alu ifo i Penisilevania i le taimi lava e uma ai ona togi le pauta faalelei eleele.’
“O le taeao na sosoo ai, na ave ai e Tavita i lalo o lona ogalima se fua laupapa ma alu atu loa e togi le pauta, lea na ia tuua i le lua o aso na muamua atu, i ni faaputuga i talane o le fale o lona tuafafine, ae, e oo atu i le nofoaga, sa ia iloa ai ua leai se mea! Ona tamoe atu lea i lona tuafafine, ma fesili i ai pe na ia iloa le mea ua tupu ai. O lona te’i sa fai mai ai o ia, ‘Aisea ua e fesili mai ai ia te a’u? e te le’i togiina uma ananafi?’
“’Ou te le’i iloa, na tali atu ai Tavita.
“’Ou te maofa i lena mea,’ o le tali lea a lona tuafafine, ‘aua na o mai tamaiti ia te au a’o le’i oo i le aoauli, ma augani mai ou te sau i fafo e vaai i tamaloloa o loo togiina le pauta i le fanua, ma fai mai, latou te le’i vaai lava i o latou olaga i se tagata ua vave faapea le togiina o le pauta. O lea na ou alu atu ai, ma vaaia ai ni tamaloloa se toatolu o galulue i le fanua, e pei ona fai mai ai tamaiti, ae, sa ou faapea na e faafaigaluegaina ni tagata e fesoasoani atu, ona o lou fia natinati, sa ou toe foi vave atu i totonu o le fale, ma ou te le’i toe mafaufau lava i lea tulaga.’
“Sa fesilisili solo Tavita e uiga i le mea na tupu, i ona aiga ma tuaoi, ae sa le mafai ona iloa po o ai sa faia” (Lucy Mack Smith, History of Joseph Smith by His Mother, ed. Preston Nibley [1958], 148–49).
O le a sou manatu, na mafai faapefea e nei aafiaga ona uunaia Tavita Uitimera?
Otooto le Mataupu Faavae ma Feagaiga 14:1-5 i le faamatala atu e faapea, na fofogaina mai e le Alii le oo mai o Lana galuega ma faamanuiaga folafolaina ia i latou o e auai i ai. Valaaulia se tagata o le vasega e faitau le Mataupu Faavae ma Feagaiga 14:6–7 Fai atu i le vasega e mulimuli i le faitauga, ma vaavaai mo le taitaiga a le Alii ia Tavita ma faamanuiaga o le a maua e Tavita o se taunuuga o le usitai i faatonuga a le Alii.
O le a le mea na folafola mai e le Alii ia Tavita Uitimera? O le a le mea na manaomia ona fai e Tavita ina ia mafai ona faataunuuina lenei folafolaga?
Fai atu i tagata o le vasega e toe tau mai le mataupu faavae o loo i le Mataupu Faavae ma Feagaiga 14:7 i a latou lava upu. A o tali mai tagata o le vasega, tusi le mataupu faavae lenei i luga o le laupapa: Afai tatou te tausia poloaiga a le Atua ma tumau e oo i le iuga, o le a tatou maua le ola e faavavau.
O le a le uiga o le maua o le ola e faavavau? (O le maua o le ola e faavavau o le nonofo lea e faavavau ma o tatou aiga i le afioaga o le Atua. O le ola e faavavau o le ituaiga olaga o loo soifua ai le Atua.)
E mafai faapefea e folafolaga o le ola e faavavau ona faaosofia i tatou e tausi poloaiga a le Atua ma tumau e oo i le iuga?
Valaaulia se tagata o le vasega e faitau leotele le Mataupu Faavae ma Feagaiga 14:8. Fai atu i le vasega e mulimuli i le faitauga, ma vaavaai mo isi faamanuiaga e mafai ona maua e Tavita Uitimera pe afai sa usiusitai o ia. A uma ona lipoti mai e tagata o le vasega mea na latou mauaina, ia faamalamalama atu faapea, e lei leva ona maua e Iosefa Samita le faaaliga lenei mo Tavita, ae avea Tavita ma se tasi o Molimau e Toatolu o le Tusi a Mamona. Sa ia vaai i le agelu o Moronae ma papatusi auro, ma sa ia faalogoina le siufofoga o le Atua o molimau mai i le moni o faamaumauga.
Faamalamalama atu na tuuina mai e le Alii ia Tavita Uitimera se isi folafolaga e faavae lea i le faamaoni o Tavita. Ina ia saunia tagata o le vasega e faailoa mai se mataupu faavae i le afioga a le Alii ia Tavita, tusi le faamatalaga lenei i luga o le laupapa: Afai tatou te , o le Alii o le a .
Valaaulia se tagata o le vasega e faitau le leoa le Mataupu Faavae ma Feagaiga 14:9–11. Fai atu ia i latou e faailoa mai se mataupu faavae e fetaui lelei i le ata i luga o le laupapa. Tuu atu i ni nai tagata o le vasega e faasoa mai ni mea ua latou maua. E mafai ona fautua mai e tagata o le vasega ni mataupu faavae eseese, ae ia mautinoa o loo manino mai afai tatou te fesoasoani ma le faamaoni i le Alii i Lana galuega, o le a faamanuia i tatou e le Alii i le faaleagaga ma le faaletino.
O a ni auala ua poloai mai ai le Alii ia te oe e fesoasoani i Lana galuega? O a ni faamanuiaga ua oo mai i lou olaga, a o e fesoasoani atu i le galuega a le Alii?
Ua aoao e Iesu Keriso ia Ioane Uitimera ma Pita Uitimera le Itiiti i le mea e aupito sili ona taua ia i laua
Valaaulia ni tagata se toalua o le vasega e o mai i luma o le potu. Fai atu i se tasi o i laua e faitau leotele le Mataupu Faavae ma Feagaiga 15:1, ona fai atu lea i le isi tagata o le vasega e faitau leotele le Mataupu Faavae ma Feagaiga 16:1. Fai atu i nei tagata o le vasega e faitau fuaiupu e 2-6 o vaega nei i le ala lava e tasi.
O le a le mea na tau fai mananao uma i ai Ioane Uitimera ma Pita Uitimera le Itiiti? (Ina ia iloa mea e mafai ona la faia o le a aupito sili ona taua ia i laua.)
Valaaulia tagata o le vasega e faitau le leoa le Mataupu Faavae ma Feagaiga 15:6 ma le 16:6. Fai atu ia te i latou e faailoa mai le tali na tuuina mai e le Alii i nei alii.
Na faapefea ona tali mai le Alii i la la’ua fesili? O le a se mataupu faavae e mafai ona tatou aoao mai i le tali a le Alii? (E ui lava atonu e faaaoga e tagata o le vasega isi upu, ia mautinoa ua latou malamalama o a tatou taumafaiga e aumai isi ia Iesu Keriso e taua tele ia i tatou.)
O le a se mea e mafai ona tatou faia e fesoasoani ai i isi tagata ia o mai ia Keriso?
Aisea e taua tele ai nei taumafaiga ia i tatou?
Valaaulia tagata o le vasega e toe faamanatu le Mataupu Faavae ma Feagaiga 15 ma le 16, ma vaai po o le a le eseesega o nei faaaliga e lua mai le tasi ma le isi. (Na pau lava le eseesega, e tasi o loo faatatau ia Ioane ae o le isi e faatatau ia Pita.)
Ia faamalamalama atu e i ai taimi, e faaali mai ai e le Alii se savali e tasi i ni tagata eseese ona atonu e tutusa ni o latou manaoga, tulaga, po o manao. Ae peitai, e mafai ona tatou mautinoa e Na te silafia i tatou taitoatasi. I le faataitaiga lenei, sa Ia ta’ua Ioane Uitimera ma Pita Uitimera le Itiiti i o la’ua igoa ma faaali mai Lona finagalo ia i laua e taitoatasi i le taimi.
E mafai faapefea e se faamanuiaga faaleperisitua po o le valaauga o le misiona ona faaalia ai e silafia taitoatasi i tatou e le Atua, e tusa lava po o le faamanuiaga po o le valaauga o le misiona e tutusa lava faaupuga o i ai ma faaupuga o loo tuuina atu i isi?
Ina ia tuuina atu se isi faataitaiga o le silafia e le Atua o i tatou taitoatasi, fai atu i se tagata o le vasega e faitau le faamatalaga lenei a Elder David A. Bednar o le Korama a Aposetolo e Toasefululua:
Ata
Elder David A. Bednar
“I se taimi ua mavae, sa ma talanoa ai ma se taitai perisitua sa musuia na te taulotoina igoa uma o le autalavou mai le 13 i le 21 tausaga i lana siteki. Sa ia faaaogaina ni ata o alii ma tamaitai talavou, e faapipii i ni kata e aoao ai pe a faimalaga faapisinisi po o nisi foi taimi. Sa vave ona iloa e le taitai perisitua igoa o le autalavou uma.
“I se tasi po sa fai ai se miti a le taitai perisitua e uiga i se tasi o alii talavou, lea sa na o le ata na te iloa ai o ia. I le miti sa ia vaai ai i le alii talavou o ofu sona ofutino paepae ma o loo i ai ma se pine o lona igoa faafaifeautalai. O loo aoao e ia se aiga, a o nofo ai sana soa i ona tafatafa. Sa uu e le alii talavou le Tusi a Mamona, ma e foliga mai o loo molimau atu i le moni o le tusi. Ona ala ai lea o le taitai perisitua mai lana miti.
“I se faapotopotoga a le perisitua na sosoo ai, sa savali atu le taitai i le taulealea sa ia vaai i ai i lana miti, ma fai atu i ai la te talanoa mo sina minute. Ina ua la feiloai, sa ta’u atu e le taitai le igoa o le taulealea ma faapea atu, “E le o a’u o se faimiti. E lei i ai lava sa’u miti e uiga i se tagata e toatasi o lenei siteki, sei vagana ai oe. O le a ou faamatala atu ia te oe la’u miti, a uma ou te manao e te fesoasoani mai ia ou malamalama i lona uiga.”
“Sa faamatala atu e le taitai perisitua le miti ma sa fesili atu i le taulealea i lona uiga. Sa tau mole i le tagi le taulealea ma sa na ona ia faapea atu, “O lona uiga e silafia e le Atua lo’u tagata.’ Sa sili ona ‘anoa le talanoaga na totoe a lenei taulealea ma lona taitai perisitua, ma sa tonu ai o le a la feiloai mai lea taimi i lea taimi i masina na sosoo ai, la te talatalanoa” (“O Le Alofa Mutimutivale o le Alii,” Ensign po o le Liahona, Me 2005, 100).
Aisea e mafai ai ona aoga mo i tatou le iloa e silafia e le Atua i tatou taitoatasi?
Valaaulia ni nai tagata o le vasega e faasoa mai pe faapefea ona latou iloa e silafia e le Atua i latou lava. (Atonu e manaomia ona e faamalamalama atu, o ni faataitaiga a tagata o le vasega e le faapea e tatau lava ona tulaga ese. Faamanatu i tagata o le vasega e le tatau ona latou faasoaina ni aafiaga e patino tele ma e le faalauaiteleina.)
E mafai faapefea e le malamalama e silafia patino oe e le Atua ona uunaia ai faaiuga e te faia i aso taitasi? Na faapefea ona uunaia au faaiuga i lenei malamalama?
Atonu e te manao e faaiuina lenei lesona e ala i le molimau atu e uiga i upumoni sa outou talanoaina ma valaaulia tagata o le vasega e galulue loa i nei upumoni.