O le Mataupu Faavae ma Feagaiga 127 o loo i ai se tusi mai le Perofeta o Iosefa Samita, na tusia i le aso 1 o Setema, 1842, na poloaiina ai le Au Paia e tausia faamaumauga o papatisoga na latou faia mo e ua maliliu. Pe a ma se vaiaso mulimuli ane, na tusia ai e Iosefa se isi tusi e uiga i le mataupu o le papatisoga mo e ua maliliu. O le Mataupu Faavae ma Feagaiga 128 o loo i ai lenei tusi, o loo aoao mai ai le pogai tatou te tausia ai faamaumauga o sauniga faaola e faataunuuina.
Amata le vasega e ala i le faaali atu o se koneteina tele ma manino, ua faaigoaina olaga faitino ma se sioki vai ua faaigoaina puapuaga. Fesili atu i tagata aoga po o a ni puapuaga na latou oo i ai pe na vaai o oo i isi. Mo puapuaga latou te ta‘ua, sasaa ni vai mai le sioki i totonu o le koneteina manino.
Valaaulia se tagata aoga e faitau leotele le Mataupu Faavae ma Feagaiga 127:1. Fai atu i le vasega e mulimuli i le faitauga, ma vaavaai mo le puapuaga sa oo ia Iosefa Samita i Navu i le 1842. Valaaulia tagata aoga e lipoti mai mea ua latou mauaina.
Faamalamalama atu e faapea, ia Me 1842, na faamanualia ai e se tagata faaoosala e le’i mailoa ia Lilburn W. Boggs, o le sa avea muamua ma kovana o Misuri ma o le sa tuuina atu se poloaiga e fasiotia le Au Paia. Sa tuuaia e taitai o Misuri le Perofeta o Iosefa Samita i le faatonuina o se tasi e fasioti ia Boggs ma taumafai e toe aumai le Perofeta i Misuri mo le faamasinoina. Sa tuua e le Perofeta ia Misuri i ni tausaga ua mavae ma sa nofo i le eria o Navu, Ilinoi, i lena taimi. O le iloaina afai e toe foi mai o ia i Misuri, o le a fasiotia o ia, o lea na sola ai le Perofeta mai taitai o Misuri mo se taimi, e aloese ai mai le molia sese o ia. Ia Ianuari 1843 na iloa ai le iuga o taualumaga e pu’e ma tuulima atu Iosefa Samita i Misuri sa o se faiga faasolitulafono.
Faamalamalama atu e faapea, o le Mataupu Faavae ma Feagaiga 127 o se tusi na tusia e Iosefa Samita i tagata o le Ekalesia a o fesolaa’i solo o ia e aloese mai le pu’e sese e taitai o le [setete] o Misuri. O lenei tusi sa faitau i le Au Paia i Navu i ni nai aso mulimuli ane.
Faaali atu i tagata aoga ni polo se lua e tutusa le tetele, o le isi e opeopea ae o le isi e le mafai ona opeopea. (Mo se faataitaiga, e mafai ona e faaaogaina se polo tapolo uga ō’ō, ma se polo tapolo masani.) Tuu uma polo e lua i totonu o le koneteina vai, ma fai atu le fesili lenei:
E faapefea ona faatusa polo nei e lua i auala eseese e tali atu ai tagata i puapuaga?
Valaaulia se tagata aoga e faitau leotele le Mataupu Faavae ma Feagaiga 127:2. Fai atu i le vasega e vaavaai mo auala na tali atu ai Iosefa i puapuaga.
O le fea o polo e sili ona faatusa i ai le tali atu a Iosefa Samita i puapuaga? Aisea?
Na faapefea ona iloa e Iosefa o le a manumalo o ia i ona puapuaga ma faigata?
E tusa ai ma mea na tusi atu ai Iosefa i le Au Paia, o le a le mea e mafai ona fesoasoani ia i tatou e onosaia ai puapuaga? (A uma ona tali mai tagata o le vasega, aotele a latou faamatalaga i le tusia o le mataupu faavae lenei i luga o le laupapa: O le faalagolago i le Tama Faalelagi e mafai ona fesoasoani ia i tatou e onosaia ai puapuaga.)
Valaaulia tagata aoga e mafaufau e uiga i se tagata latou te iloa (pe na latou aoao e uiga i ai) o le na mafai ona onosaia puapuaga ona sa faalagolago o ia i le Tama Faalelagi. Fai atu i ni nai tagata aoga e faamatala mai po o ai na latou mafaufau i ai, ma pe na faapefea ona fesoasoani le faalagolago i le Tama Faalelagi i lenei tagata ia onosai i puapuaga.
Valaaulia se tagata aoga e faitau leotele le Mataupu Faavae ma Feagaiga 127:3–4. Fai atu i le vasega e mulimuli i le faitauga, ma vaavaai mo mea na tau atu e le Perofeta i le Au Paia. Valaaulia tagata aoga e faailoa ma faasoa mai ni fuaitau e anoa ia i latou.
E tusa ai ma le fuaiupu e 3, aisea e tatau ai i le Au Paia ona fiafia i le taimi o puapuaga?
I le fuaiupu e 4, o le a le folafolaga a le Alii ia i latou o e onosaia sauaga?
O faapefea ona fesoasoani le faalagolago i le Tama Faalelagi e te onosaia ai taimi faigata i lou olaga?
Ua fautuaina e le Perofeta o Iosefa Samita le Au Paia e tausia faamaumauga o papatisoga latou te faia mo e ua maliliu
Faamanatu atu i tagata aoga e faapea, pe a ma se tausaga ma le afa a’o le’i tusia e Iosefa le tusi lenei, na fofoga mai ai e le Alii i le Au Paia, o le sauniga o le papatisoga mo e ua maliliu e tatau ona faatinoina i totonu o le malumalu (tagai i le MF&F 124:30). Ae ui i lea, na faatagaina e le Alii le Au Paia e faataunuu papatisoga mo e ua maliliu i le vaitafe ma auvai lata ane, mo se taimi puupuu. Sa ta‘u mai e le Alii ia i latou, o le taimi lava e saunia ai le malumalu, na pau lava le taimi o le a taliaina ai le sauniga o le papatisoga mo e ua maliliu pe a faia lea i le malumalu. Sa amata ona faia e le Au Paia ia papatisoga mo e ua maliliu i le Malumalu o Navu ia Novema 1841.
Fai atu i tagata aoga e mafaufau i le taimi mulimuli na latou auai ai i papatisoga mo e ua maliliu. Valaaulia i latou e faamatala mai le aafiaga, e aofia ai pe na i ai se tasi sa nofo latalata i le faatanoa i le taimi o papatisoga.
Valaaulia se tagata aoga e faitau leotele le Mataupu Faavae ma Feagaiga 127:5-9. Fai atu i le vasega e mulimuli i le faitauga, ma vaavaai po o ai e tatau ona i ai i le taimi e faia ai papatisoga mo e ua maliliu. Valaaulia tagata aoga e lipoti mai mea sa latou aoaoina.
E tusa ai ma le fuaiupu e 7, aisea e taua ai le avea o se tusi talafaamaumau ma se molimau e vaaitino i papatisoga?
Tusi le faamatalaga le uma lenei i luga o le laupapa: O sauniga o le malumalu tatou te faia i le lalolagi e …
Valaaulia tagata aoga e faauma le faamatalaga e faavae i luga o fuaiupu 5–9. (E tatau ona faauma e tagata aoga lenei faamatalaga ina ia tutusa ma le upumoni lenei: O sauniga o le malumalu tatou te faia i le lalolagi e fusifusia i le lagi.)
O le a sou manatu i le uiga, o sauniga o le malumalu o le a fusifusia i le lagi?
E faapefea ona fesoasoani le iloaina o lenei upumoni e te faataunuuina ai lou tiutetauave o le faia o sauniga o le malumalu mo “outou tagata ua maliliu”?
Aotele le Mataupu Faavae ma Feagaiga 127:10–12 i le faamatala atu e faapea, sa manao Iosefa Samita e aoao atili le Au Paia e uiga i le papatisoga mo e ua maliliu, ae ona sa lafilafi solo o ia, o lea sa le mafai ai ona ia faia o lena mea. Sa ia folafola atu e tusi atu i le Au Paia ni tusi faaopoopo e uiga i le papatisoga mo e ua maliliu ma isi mataupu taua.
Aotele le Mataupu Faavae ma Feagaiga 128:1–5 i le faamatala atu, na aoao mai Iosefa e faapea, e tatau ona tofia ni tusi talafaamaumau i le lotoifale e molimau ma faamaumau le sauniga o le papatisoga mo e ua maliliu. Sa ia aoao mai foi, e tatau ona tofia se tusi talafaamaumau aoao e tuufaatasia faamaumauga i le lotoifale i totonu o se talafaamaumau aoao o le ekalesia.
Faaali atu se tusifolau (po o se ata o se tusifolau). Fesili atu po o a ituaiga avanoa e agavaa i ai le tagata e anaina le tusifolau.
Aisea o le a le mafai ai ona e agavaa e te ulu atu i se isi atunuu i le tusifolau a se isi tagata?
O le a se mea e mafai ona tupu pe afai e te taumafai e ulu atu i se isi atunuu, ae sa le atoatoa faamatalaga i totonu o lou tusifolau?
Valaaulia se tagata aoga e faitau leotele le Mataupu Faavae ma Feagaiga 128:6-7. Fesili atu i le vasega e vaavaai po o a faamaumauga o le a faaaogaina e iloilo ai pe tatou te agavaa e taliaina i le afioaga o le Atua. Valaaulia i latou e lipoti mai mea na latou mauaina. Faailoa atu na ta’ua e Ioane ma Iosefa Samita ni faamaumauga: “ma sa fofola tusi” ma … “se tasi tusi, o le tusi lea o le ola.”
E tusa ai ma le fuaiupu e 7, o a tusi muamua sa tautala i ai Ioane? (O faamaumauga na tausia i le lalolagi.)
O le a le tusi o le ola? (O le faamaumauga na tausia i le lagi.)
O a mea na faamaumauina i nei tusi? (O a tatou galuega.)
O a galuega e tatau ona faamaumauina i tusi ina ia mafai ona taliaina i le afioaga o le Atua?
A uma ona faasoa mai e tagata aoga o latou manatu e uiga i lenei fesili, valaaulia i latou e faitau leotele le saunoaga lenei mai ia Peresitene Boyd K. Packer o le Korama a Aposetolo e Toasefululua:
Ata
Peresitene Boyd K. Packer
“O sauniga ma feagaiga e avea ma o tatou agavaa mo le taliaina i le afioaga [o le Atua]” (“Covenants,” Ensign, Me 1987, 24).
E tusa ai ma le saunoaga a Peresitene Packer, o le a le mea o le a tupu i le aso o le faamasinoga, pe afai e faaali mai e faamaumauga a se tagata, na te le’i mauaina le sauniga o le papatisoga?
Tusi le fuaitau lenei i luga o le laupapa: O soo se mea e te fusifusia i le lalolagi, o le a fusifusia foi lea i le lagi. Valaaulia se tagata aoga e faitau leotele le Mataupu Faavae ma Feagaiga 128:8. Fai atu i le vasega e mulimuli i le faitauga, ma vaavaai mo auala na faamalamalama atu ai e le Perofeta o Iosefa Samita lenei faamatalaga i le Au Paia. A o lipoti mai e tagata aoga mea latou te maua, sui le upu fusifusia i le upu faamaumauina ma le noatia i le faamaumauina i luga o le laupapa.
O le a se mea ua tatou aoao mai i le fuaiupu e 8 e uiga i le faamaumauina o sauniga tatou te maua? (Atonu e te manao e faamalamalama atu o le fuaitau “propria persona [tagata patino]” e faatatau i tagata e papatisoina mo i latou lava, ae o le fuaitau “o latou lava sui,” e faatatau ia i latou o e e papatisoina e fai ma sui.)
Tusi le faamatalaga lenei i luga o le laupapa: Pe a faatinoina se sauniga e ala ma tausia lelei se , ua fusifusia le sauniga i le lalolagi ma i le lagi.
E tusa ai ma le fuaiupu e 8, o le a le mea e tatau ona tupu ina ia mafai ona fusifusia sauniga i le lalolagi ma i le lagi? (A o tali mai tagata o le vasega, valaaulia se tagata o le vasega e faauma le upumoni i luga o le laupapa faapenei: Pe a faatinoina se sauniga e ala i le pule o le perisitua ma tausia lelei se talafaamaumau, ua fusifusia le sauniga i le lalolagi ma i le lagi.)
O le a le faamoemoe e mafai ona tuu atu e lenei mataupu faavae ia i latou o e ua maliliu e aunoa ma se malamalamaaga o le talalelei?
O le a le tiutetauave ua ia i tatou e faataunuu ai lenei mataupu faavae?
Valaaulia se tagata aoga e faitau leotele le Mataupu Faavae ma Feagaiga 128:9. Fai atu i le vasega e vaavaai mo le mea na saunoa mai ai Iosefa Samita e faatatau i lenei mataupu faavae.
O le a le mea ua faia e le Alii i tisipenisione uma o le perisitua? (Ua faatagaina e le Alii, e le itiiti ifo ma se toatasi o Ana auauna e umia ma faaaoga ki o le perisitua mo le faamauga.)
E tusa ai ma le fuaiupu e 9, o le a le mea e tupu pe a faatinoina se sauniga e ala i le pule o le perisitua ma tausia lelei se faamaumauga? (E avea ma se tulafono i le lalolagi ma i le lagi ma e le mafai ona solofuaina sei vagana ai ua le agavaa le tagata e mauaina.)
Aotele le Mataupu Faavae ma Feagaiga 128:10–11 i le faamatala atu e faapea, e pei ona sa tuuina mai e le Faaola ki o le perisitua mo le faamauga ia Peteru, ua Ia toe tuuina mai ia ki i o tatou aso.
Ina ia faaiu le lesona lenei, tusi fesili nei i luga o le laupapa ma valaaulia tagata aoga e tali i ai i a latou api o le vasega po o api talaaga mo le suesueina o tusitusiga paia:
E faapefea ona fesootai papatisoga mo e ua maliliu ma ki o le faamauga i le tasi ma le isi?
O le a se mea ua musuia oe e fai ona o mea ua e aoaoina i le aso?
Valaaulia ni nai tagata aoga e faasoa mai a latou tali i le vasega. Atonu foi e te manao e faasoa atu lau molimau e uiga i le faia o papatisoga mo e ua maliliu.
Tala ma Faamatalaga o Talaaga
O le auai o taitai o le Ekalesia anamua faatasi ma le au Mason
E ui lava ina sa tuua e le Perofeta o Iosefa Samita ma le toatele o tagata o le Ekalesia ia Misuri i le 1839, ae sa faaauau pea ona mulimuli atu sauaga mai tagata Misuri i le Perofeta a’o ia galue ai e atiina ae le aai o Navu, Ilinoi. I le amataga o le 1842, na auai Iosefa Samita ma nisi o tagatanuu o Navu i se faalapotopotoga faaleusoga na ta’ua o le au Mason. Atonu na latou faia lenei mea ina ia faatuina ai ma faamalosia ai sootaga ma taitai o le setete ma le malo, o e mai i le au Mason, ma o e e mafai ona fesoasoani e puipui le Au Paia e faasaga i faamata’uga faifai pea mai o latou faaoosala i Misuri. (Tagai i le Church History in the Fulness of Times Student Manual, 2nd ed. [Church Educational System manual, 2003], 264.)
Na faamalamalama mai e Elder W. Grant Bangerter o le Fitugafulu e faapea, tatou te faia papatisoga mo i latou o e ua maliliu faaletino ae o loo feola pea i le agaga:
Ata
Elder W. Grant Bangerter
“Ma ia tatou manatua pea, tatou te faia sauniga o le malumalu mo tagata ae e le mo ni igoa. O i latou ua tatou ta’ua ‘o e ua maliliu’ o loo soifua i la le agaga ma e i ai i latou i le malumalu” (“O Le Aoga o Malumalu Sa,” Liahona, Iulai 1982, 116).