Ua faamanuiaina tagata o Le Ekalesia a Iesu Keriso o le Au Paia o Aso e Gata Ai i le taitaiina e se perofeta soifua, tagatavaai, ma talifaaaliga. I aso anamua, sa filifilia e le Alii ia perofeta ma faatagaina e saunoa mo Ia. E faapena foi i o tatou aso, o saunoaga a perofeta soifua ua fai ma sui o le siufofoga o le Alii ia te i tatou ma i le lalolagi (tagai i le MF&F 1:37–38). I le lesona lenei, o le a suesue ai e tagata aoga fautuaga lata mai nei mai le Peresitene o le Ekalesia, o le perofeta filifilia a le Alii.
Fautuaga mo le Aoaoina Atu
O faaaliga faifai pea e ala mai i se perofeta soifua
Tusi le fesili lenei i luga o le laupapa: O ai le perofeta e sili ona taua ia te oe?
Valaaulia le vasega e mafaufau loloto i lenei fesili ma faalogologo mo le tali a o e faitau atu le saunoaga lenei a Peresitene Ezra Taft Benson.
Ata
Peresitene Ezra Taft Benson
“O le perofeta e sili ona taua, e tusa ai ma lo tatou manatu, o le o loo soifua i o tatou aso ma vaitaimi” (“Jesus Christ—Gifts and Expectations,” New Era, Me 1975, 17).
Aisea e te manatu ai o le perofeta soifua o le perofeta sili lea ona taua mo i tatou?
A uma ona tali mai tagata aoga, toe faaauau le faitauga o le saunoaga a Peresitene Benson:
Ata
Peresitene Ezra Taft Benson
“O le perofeta lenei o loo i ai faatonuga o aso nei mai le Atua ia i tatou. … E manaomia e augatupulaga uma ia tusitusiga paia anamua, faapea ma tusitusiga paia o loo i ai nei mai le perofeta soifua. O le mea lea, o faitauga ma mafaufauga loloto e aupito sili ona taua e tatau ona e faia, o afioga musuia aupito lata mai ia mai le fofoga taumomoli o le Alii. O le pogai lena e taua ai lou maua o, ma faitau ma le totoa ana afioga i lomiga a le Ekalesia” (“Jesus Christ—Gifts and Expectations,” 17).
Faamatala atu, tatou te lagolagoina uso uma o le Au Peresitene Sili ma le Korama a Aposetolo e Toasefululua o ni perofeta, tagatavaai, ma talifaaaliga. Ae peitai, o le Peresitene o le Ekalesia e na o le pau lea o le tagata ua faatagaina e faaaogaina ki uma o le perisitua i luga o le lalolagi, ma e na o le tagata foi lea ua faatagaina e maua ma folafola atu faaaliga mo le Ekalesia atoa.
E tusa ai ma mea ua e aoaoina i ni lesona talu ai nei, o anafea na folafola mai ai e le Peresitene o le Ekalesia ni faaaliga mo le Ekalesia aoao pe fofogaina mai ai ni suiga taua i le ala e faagaoioia ai le Ekalesia? (O tali e mafai ona aofia ai le taimi na tuuina mai ai e Peresitene Uilifoti Uitilafi le Manifeso e faatatau i faaipoipoga autaunonofo [tagai i le Folafolaga Aloaia 1], i le taimi na folafola mai ai e Peresitene Iosefa F. Samita ia upumoni sa le’i mailoa e uiga i lalolagi o agaga pe a mavae le olaga nei [tagai i le MF&F 138], ma i le taimi na folafola mai ai e Peresitene Spencer W. Kimball o faamanuiaga o le perisitua na tatau ona avanoa mo tagata agavaa uma o le Ekalesia [tagai i le Folafolaga Aloaia 2].)
Valaaulia se tagata aoga e faitau leotele le saunoaga lenei a Peresitene Dieter F. Uchtdorf. Valaaulia le vasega e faalogologo mo se upumoni e uiga i faaaliga i o tatou aso.
Ata
Peresitene Dieter F. Uchtdorf
“O se tasi o savali mamana o le Toefuataiga o le Ekalesia a Iesu Keriso e faapea, o loo faaauau pea ona fetalai mai le Atua i Lana fanau! E le o natia o Ia i le lagi ae o loo fetalai mai i le asō e pei ona sa Ia faia i aso anamua. …
“O loo maua i le Tusi Paia, le Tusi a Mamona, le Mataupu Faavae ma Feagaiga, ma le Penina Tau Tele ia aoaoga e leai se tau a le Atua i tagata uma. E faaopoopo atu i ai, o loo fetalai mai le Alii ia i tatou e ala mai i Ana auauna, ma o le a Ia toe fetalai mai foi i le konafesi aoao” (“Aisea Tatou te Manaomia ai Perofeta?” Liahona, Mati 2012, 4).
O le a le aoaoga faavae e faatatau i faaaliga na aoao mai e Peresitene Uchtdorf? (E mafai ona faaaoga e tagata aoga ni upu eseese, ae e tatau ona latou faailoa mai se mea e tutusa lava ma le faamatalaga faale-aoaoga faavae lenei: E faaauau pea ona fetalai mai le Alii ia i tatou i aso nei e ala i Lana perofeta soifua. Atonu e te manao e tusi le aoaoga faavae lenei i luga o le laupapa.)
O fea e mafai ona tatou maua ai saunoaga a perofeta soifua? (O tali atonu e aofia ai le konafesi aoao, mekasini a le Ekalesia, LDS.org, ma le mormonchannel.org.)
Ina ia fesoasoani i tagata aoga ia malamalama i le taua o le faaauau pea ona fetalai mai o le Alii e ala i Lana perofeta soifua, valaaulia se tagata aoga e faitau leotele le saunoaga lenei mai ia Peresitene Ioane Teila. Fai atu i le vasega e faalogologo mo mafuaaga e taua ai faaaliga faifai pea e ala mai i perofeta.
Ata
Peresitene Ioane Teila
“Tatou te manaomia se laau ola—se punavai ola—atamai ola, e amata mai i le perisitua ola i le lagi, e oo mai i le perisitua ola i le lalolagi. Ma mai lava i le taimi na maua muamua ai e Atamu se fesootaiga mai le Atua, … na manaomia ai lava i taimi uma ni faaaliga fou, ua fetuunaiina i tulaga uiga ese ia na tuuina i ai ekalesia po o tagata taitoatasi. O le faaaliga a Atamu sa le’i faatonuina ai Noa e fau lana vaa; po o le faaaliga foi a Noa na ta’u atu ai ia Lota e lafoai Sotoma; pe na talanoa foi nei vaega i le o ese mai o le fanauga a Isaraelu mai Aikupito” (i le The Gospel Kingdom, sel. G. Homer Durham [1987], 34).
E tusa ai ma le saunoaga a Peresitene Teila, aisea tatou te manaomia ai se perofeta soifua? (E ala mai i le perofeta soifua, e tuu mai ai e le Atua le taitaiga e fitoitonu i manaoga ma tulaga o le taimi.)
E mafai faapefea e le malamalama i le manaomia o faaaliga faifaipea ona aafia ai le ala e te faalogo atu ai, pe faitau ai i saunoaga a perofeta soifua?
O le mulimuli i fautuaga a le perofeta soifua
Ina ia fesoasoani i tagata aoga i le talanoaina o le fautuaga a le perofeta soifua, filifili se lauga se tasi pe sili atu o le konafesi aoao na tuuina mai e le Peresitene o le Ekalesia i le tausaga ua mavae. Tuuina atu se kopi o se lauga mo tagata aoga taitasi o le vasega. Tuu atu i tagata aoga se taimi e vaavaai ai mo aoaoga ma mataupu faavae o loo aoao mai i le taimi nei e le perofeta soifua.
Ina ua lava se taimi mo tagata aoga e faitau ai, fai atu ia i latou e lisi ia aoaoga ma mataupu faavae o loo aoao mai e le Peresitene o le Ekalesia. Mafaufau e valaaulia se tagata aoga e tusi a latou tali i luga o le laupapa.
Ina ia fesoasoani i tagata aoga ia malamalama ma lagona le taua o aoaoga faavae ma mataupu faavae ua latou faailoaina mai, fai atu nisi o, po o fesili uma nei:
O le fea o nei mataupu faavae po o aoaoga faavae e te manatu e faapitoa le talafeagai ia te oe? Aisea?
O a ni auala o loo outou taumafai ai ma lou aiga e mulimuli i le fautuaga a le perofeta?
Aisea e te manatu e taua ai lo tatou suesue ma faaaoga mea o loo aoao mai e le Peresitene o le Ekalesia o loo i ai nei?
Tusi fesili nei i luga o le laupapa, ma valaaulia tagata aoga e tali i ai i totonu o a latou api o le vasega, po o api talaaga mo le suesueina o tusitusiga paia:
Mai saunoaga a le perofeta soifua ia na faatoa uma atu ona e suesueina, o a ni savali e te manatu o loo finagalo le Alii e te mauaina?
O le a se mea o le a e faia ona o le fautuaga lata mai nei a le perofeta?
Valaaulia tagata aoga e faatino ia mea ua latou tusiaina. Molimau atu a o latou faia ia mea, e mafai ona latou maua le talitonuga o le a faamanuia i latou e le Tama Faalelagi. Uunaia tagata aoga ia suesue ma faaaoga pea lava pea ia aoaoga a perofeta soifua.
Valaaulia tagata aoga e faasoa mai a latou molimau e uiga i perofeta soifua.
O se faaiuga i lenei tausaga o le seminare, uunaia tagata aoga ia faaauau pea ona suesue i tusitusiga paia i aso uma. Afai o le a latou aooga i le kosi seminare o le a sosoo ai, atonu e te fautua atu ia i latou ia amata loa ona latou suesue i le Feagaiga Tuai. Atonu e te manao e valaaulia se tagata aoga e molimau atu e uiga i faamanuiaga ua ia mauaina e ala i le faaauau pea ona faitau i tusitusiga paia i aso uma e tusa lava pe a o le’i faia le seminare.
Tala ma Faamatalaga o Talaaga
O le taua o le mulimuli i perofeta soifua
Na aoao mai Peresitene Ezra Taft Benson:
Ata
Peresitene Ezra Taft Benson
“Mai tagata uma o le olaga nei, e tatau ona taulai atu la tatou vaai i le kapeteni, o le perofeta, tagatavaai ma talifaaaliga, ma o le peresitene o Le Ekalesia a Iesu Keriso o le Au Paia o Aso e Gata Ai. O le tagata lenei e sili ona tu latalata atu i le punavai o le vai ola. O loo i ai nisi o faatonuga faalelagi mo i tatou, e na o le perofeta lava e mafai ona tatou maua mai ai. O se auala lelei e fua ai lou tulaga ma le Alii, o le vaai po o a ou lagona e uiga i le, ma le galue ai, i saunoaga musuia a lona sui i le lalolagi, o le perofeta-peresitene. O saunoaga musuia a le peresitene e le tatau ona manatu mama i ai. E agavaa tagata uma i musumusuga, ma e i ai ni tamalii e agavaa i faaaliga mo o latou tofiga faapitoa. Ae e na o le tasi lava le tamalii e tu e avea ma fofoga taumomoli o le Alii i le Ekalesia ma le lalolagi, o ia lea o le peresitene o le Ekalesia. I upu a isi tagata uma e tatau ona fuaina i ana saunoaga musuia.
“E ui o lana perofeta e la le tino, ae o le a le faatagaina e le Atua o ia e taitai ese lana ekalesia. (Tagai i le Discourses of Wilford Woodruff, i. 212–13.) Ua silafia e le Atua mea uma, o le iuga mai le amataga, ma e leai se tagata e faafuasei ona avea ma peresitene o le ekalesia a Iesu Keriso, pe tumau ai iina ona o se mea e tupufua, pe maliu e ala i se tulaga e le’i mafaufauina.
“O le perofeta e aupito sili ona taua, e tusa ai ma o tatou tulaga, o le perofeta lea o loo soifua i o tatou aso ma vaitaimi. O le perofeta lenei o loo i ai faatonuga i aso nei mai le Atua ia i tatou. O faaaliga a le Atua ia Atamu sa le’i faatonuina ai Noa i le auala e fau ai le vaa. E manaomia e augatupulaga uma ia tusitusiga paia anamua, faapea ma tusitusiga paia o loo i ai nei mai le perofeta soifua. O le mea lea, o faitauga ma mafaufauga loloto e aupito sili ona taua e tatau ona e faia, o afioga musuia aupito lata mai ia mai le fofoga taumomoli o le Alii. O le pogai lena e taua ai lou mafai ona maua o, ma faitau ma le totoa i ana saunoaga i lomiga a le Ekalesia” (“Jesus Christ—Gifts and Expectations,” New Era, Me 1975, 16–17).
Na faamamafa mai foi e Peresitene J. Reuben Clark Jr. le manaomia o le faalogo i perofeta soifua:
Ata
Peresitene J. Reuben Clark
“O se taimi ua mavae atu, na oo mai ai se tamaitusi i la’u kesi. … I le itulau i fafo sa faapea mai, ‘Tatou te manaomia se perofeta’, ma a’o ou faitauina i lena aso, ma a’o ou mafaufau i ai i le taimi nei, ou te mafaufau e ese ma le tauaso o le lalolagi. …
“… Tatou te le oge i se perofeta; ae o le mea tatou te le o mauaina o se taliga faalogo o tagata ma se naunau e ola e pei ona poloaiina ai e le Atua” (i le Conference Report, Oke. 1948, 79–80).
Sa saunoa mai Peresitene Wilford Woodruff:
Ata
Peresitene Wilford Woodruff
“O le a le faatagaina lava e le Alii a’u po o soo se tasi tagata e tu e avea ma peresitene o le Ekalesia lenei ina ia taitai sese outou. Ua lē i ai lena mea i le polokalama. Ua lē o i ai i le mafaufau o le Atua. Afai ou te taumafai e fai lena mea, o le a aveesea a’u e le Alii mai lo’u tulaga, ma o le a faapea foi ona Ia faia i soo se isi lava tagata e taumafai e taitai sese le fanauga a tagata mai faaaliga a le Atua ma mai i lo latou tiute” (Folafolaga Aloaia 1).