Ina ua uma ona maua e le Perofeta o Iosefa Samita le faaaliga na faatonuina ai o ia e aoao atu le mataupu faavae o faaipoipoga autaunonofo, sa amata ona fai e nisi o tagata o le Ekalesia faaipoipoga autaunonofo i lalo o lana taitaiga i le amataga o le vaitau o le 1840. I le fia sefulu tausaga na sosoo ai, na oo ai le Ekalesia i le tetee o tagata lautele ona o lenei faiga. “Ina ua mavae le mauaina o le faaaliga, tuuina mai ai e Peresitene Uilifoti Uitilafi le … Manefeso [Folafolaga Aloaia 1], lea na taliaina e le Ekalesia o se poloaiga ma faamauina i le aso 6 o Oketopa, 1890. O lenei mea na iu ai i le faamutalia o le faiga o faaipoipoga autaunonofo i le Ekalesia”(Folafolaga Aloaia 1, folasaga). E ui lava ina oo le Au Paia i le tetee atu o tagata, ae sa latou galulue ma le filiga e fausia malumalu, lea na latou maua ai sauniga faaola mo i latou lava ma mo e ua maliliu. Sa latou fausia ma faapaiaina ni malumalu se lima i le va o le 1846 ma 1893.
Fautuaga mo le Aoaoina Atu
Ua faaali mai e le Alii ua tatau i le Au Paia o Aso e Gata Ai ona taofia le faiga o faaipoipoga autaunonofo
Fai atu i tagata aoga e ta’u mai ni tagata amiotonu i tusitusiga paia o e na molia pe faafalepuipuiina mo le faia o le mea na poloaiina i latou e le Atua e fai. (O e ono aofia ai Tanielu, Apinati, Peteru, Iosefa Samita, ma le Faaola.)
Faamalamalama atu, e toatele alii o le Au Paia o Aso e Gata Ai, sa taofia ma faafalepuipuiina ona sa faaauau pea ona latou usitai i le poloaiga e fai faaipoipoga autaunonofo ina ua uma ona pasia e le malo o le Iunaite Setete ia tulafono e le faatagaina ai faaletulafono lea faiga. Sa faapea foi ona taofia ai nisi o tamaitai, na matele lava ona latou te le’i faailoaina nofoaga sa i ai a latou tane, o e na lalafi e aloese ai ma le taofia.
Fai atu i tagata aoga e aotele le ala na amataina ai le faiga o faaipoipoga autaunonofo i tagata o Le Ekalesia a Iesu Keriso o le Au Paia o Aso e Gata Ai. (Na maua e le Perofeta o Iosefa Samita le faaaliga e uiga i le mataupu faavae o faaipoipoga autaunonofo, ma sa faia faaipoipoga autaunonofo e tagata o le Ekalesia i le amataga o le vaitaimi o le 1840 e tali atu ai i le poloaiga a le Alii [tagai MF&F 132].)
Valaaulia se tagata aoga e faitau leotele le palakalafa lenei. Fai atu i le vasega e faalogologo mo nisi o faafitauli na oo i tagata o le Ekalesia a o latou usiusitai i le poloaiga a le Alii e faia faaipoipoga autaunonofo.
Ia Aokuso 1852, o se vaega o se konafesi i le Aai o Sate Leki, na faasilasila faalauaitele ai e Elder Orson Pratt e faapea, o le usiusitai ai i se poloaiga mai le Atua, sa faia ai e nisi o tagata o le Ekalesia ia faaipoipoga autaunonofo. Sa faia e Elder Pratt lenei faasilasilaga i lalo o le taitaiga a Peresitene Polika Iaga. E toatele taitai faalelotu ma faaupufai i le Iunaite Setete na tetee i lenei ituaiga faaipoipoga, lea sa latou manatu i ai e le mama ma e le talafeagai. Sa tauemuina le Au Paia o Aso e Gata Ai i lauga faalauaitele, tusi, mekasini ma nusipepa. Sa pasia e le Konakeresi a le Iunaite Setete ia tulafono e taofia ai le saolotoga a tagata o le Ekalseia ma afaina ai le tamaoaiga o le Ekalesia e ala i le faatapulaaina o le aofai o fanua e mafai ona anaina e le Ekalesia. O nei tulafono na iu ina oo ai i le taofia ma le faafalepuipuiina o alii, o e sa sili atu i le tasi le ava. Sa teena foi i nei alii “le aia tatau e palota ai, le aia tatau o le le faalauaiteleina i o latou aiga, ma le olioli i isi mea e saoloto ai faalemalo” ((O Lo Tatou Tupuaga: O Se Talafaasolopito Otooto O Le Ekalesia a Iesu Keriso o le Au Paia o Aso e Gata Ai [1996], 97). E oo ane i le 1890, ua faitau selau tagata faamaoni o le Au Paia o Aso e Gata Ai sa tuli faasalaga i le falepuipui. O isi sa lalafi ina ia aloese ai mai le taofia ma le faafalepuipuiina. I nei tulaga, e toatele aiga sa mafatia mai le popolevale, faanoanoa, mativa, ma le fia aai.
Ina ua mavae le faasilasilaga i le 1852, sa faapea ona atili salalau atu ai faaipoipoga autaunonofo, ma e faitau afe alii ma tamaitai sa faamauina i faaipoipoga autaunonofo i lalo o le taitaiga a taitai perisitua. E ui lava ina sa tauemuina i latou e le lalolagi mo le faia o faaipoipoga autaunonofo, e toatele tagata faamaoni o le Au Paia o Aso e Gata Ai, sa puipuia le gaoioiga ma molimau atu na latou iloa sa faaali mai e le Atua e ala i le Perofeta o Iosefa Samita.
E faapefea ona e aoteleina faafitauli na feagai ma le uluai Au Paia o Aso e Gata Ai ona sa latou usiusitai i le faatonuga e faia faaipoipoga autaunonofo?
Ata
Peresitene Wilford Woodruff
Faamalamalama atu o nei tulaga faigata na taitai atu ai Peresitene Uilifoti Uitilafi e saili atu ma le agaga tatalo i le taitaiga a le Alii e faatatau i le faiga e le Au Paia o faaipoipoga autaunonofo. I le 1889, na faatonuina ai e Peresitene Uitilafi ia taitai o le Ekalesia e faamuta le aoaoina atu o le mataupu faavae o faaipoipoga autaunonofo. E oo ane i le 1890, ua itiiti lava ni faaipoipoga autaunonofo sa faia, ma sa faia ma le tetee atu i le fautuaga a Peresitene Uitilafi. Ae peitai, sa lomia e nisi o tagata ia lipoti e faapea, sa faaauau lava ona faalauiloa e le Ekalesia le faiga o faaipoipoga autaunonofo. O nei lipoti na atili aumai ai le tetee e faasaga i le Ekalesia. Ia Setema 1890, na tuuina mai ai e Peresitene Uitilafi se Manefeso, lea ua ta‘ua nei o le Folafolaga Aloaia 1 i le Mataupu Faavae ma Feagaiga.
Fai se aotelega o palakalafa muamua e tolu o le Folafolaga Aloaia 1 e ala i le faamatala atu, sa tautino atu e Peresitene Uitilafi o lipoti na faapea mai sa faalauiloa lava e le Ekalesia le faiga o faaipoipoga autaunonofo sa le sa’o lea. Ona valaaulia lea o ni tagata aoga se toatolu e auauai i le faitauina leotele o palakalafa lona fa ma le lona lima o le Folafolaga Aloaia 1 (amata i le “Talu ai ona ua faia”) ma le faamatalaga o loo sosoo mai ai a Peresitene Lorenzo Snow, o lē sa avea i lena taimi ma Peresitene o le Korama a Aposetolo e Toasefululua. Fai atu i le vasega e mulimuli i le faitauga ma vaavaai mo mea na faatonuina e Peresitene Woodruff le Au Paia e fai.
O a mea na faatonuina le Au Paia e fai? (Ia ‘alo’aloese mai le toe faia po o le faatinoina o ni isi lava faaipoipoga autaunonofo.)
E tusa ai ma le saunoaga a Peresitene Lorenzo Snow, aisea na taua ai le ala mai i le Peresitene o le Ekalesia le faatonuga e taofia ai le toe faia o ni isi lava faaipoipoga autaunonofo? (Aua na o ia lava le tagata i le lalolagi ua umia ki o le mana o faamauga. Atonu e te manao e faamanatu atu i tagata aoga, o faaipoipoga autaunonofo e na o ki o le perisitua ua tuuina atu i le Peresitene o le Ekalesia, e mafai ona faatagaina ai [tagai MF&F 132:7, 48].)
Valaaulia se tagata aoga e faitau leotele le palakalafa muamua o “O ni Upusii mai ni Saunoaga se tolu a Peresitene Wilford Woodruff e Uiga i le Manefeso,” o loo sosoo ane i le tusiga o le Manefeso. Fai atu i le vasega e mulimuli i le faitauga, ma vaavaai mo se mataupu faavae na aoao mai e Peresitene Woodruff i le Au Paia.
O le a le mea na aoao mai e Peresitene Woodruff i le Au Paia? (A o tali mai tagata aoga, tusi le mataupu faavae lenei i luga o le laupapa: O le a lē faatagaina lava e le Alii le Peresitene o le Ekalesia e taitai ese le Ekalesia. (Atonu e te manao e valaaulia tagata aoga e faailoga upu po o fasifuaitau i a latou tusitusiga paia o loo aoao mai ai lenei aoaoga faavae.)
E mafai faapefea ona fesoasoani lenei mataupu faavae ia i tatou i aso nei?
Faamalamalama atu faapea, sa mafaufau nisi tagata o le Ekalesia pe aisea na faatonuina ai i latou e ola i le mataupu faavae o faaipoipoga autaunonofo ona toe faatonuina lea e tuu. Na faatonuina e le Alii ia Peresitene Woodruff e fai atu i le Au Paia se fesili. Valaaulia ni tagata aoga se toatolu e auauai i le faitauina leotele o palakalafa lona tolu, lona fa, ma le lima o “O ni Upusii mai ni Saunoaga se tolu a Peresitene Wilford Woodruff” (amata i le “Sa ou maua ni faaaliga”). Fai atu i le vasega e mulimuli i le faitauga, ma vaavaai mo le fesili na fesili atu ai Peresitene Woodruff i le Au Paia.
E faapefea ona e aotelea le fesili na musuia Peresitene Woodruff e fai atu i le Au Paia?
Faamalamalama atu, sa i ai le Au Paia i se tulaga lamatia o le aveesea o le Malumalu o St. George Iuta, o le Malumalu o Logan Iuta, o le Malumalu o Manti Iuta, ma le Malumalu o Sate Leki lea na toeitiiti maea. (Afai e mafai, e mafai ona e faaali atu ni ata o nei malumalu.)
O le a le galuega taua o le a taofia pe afai e faoa e le malo o le Iunaite Setete ia malumalu?
Fai atu i se tagata aoga e faitau leotele le palakalafa lona fitu o le “O ni Upusii mai ni Saunoaga se tolu a Peresitene Wilford Woodruff” (amata i le “Sa ou vaai tonu lava”). Valaaulia le vasega e mulimuli i le faitauga, ma vaavaai mo le mea na semanu e faia e Peresitene Woodruff pe a na lē poloaiina e le Atua o ia e faatonu taitai o le Ekalesia e faamutaina le faiga o le faatinoina o faaipoipoga autaunonofo.
O le a le mea na semanu e faia e Peresitene Woodruff?
O le a se mea e mafai ona tatou aoao mai i le saunoaga a Peresitene Woodruff, “sa ou tusia le mea na fetalai mai le Alii ia te aʼu ia tusia”? (A uma ona tali mai tagata aoga, atonu e te manao e tusi le aoaoga faavae lenei i luga o le laupapa: E faatonutonu mai e le Alii Lana Ekalesia e ala i faaaliga i le Peresitene o le Ekalesia.)
Na faapefea ona uunaia oe e lenei aoaoga faavae?
Valaaulia tagata aoga e faasoa mai a latou molimau e uiga i upumoni ua e tusia i luga o le laupapa. Atonu e te manao foi e faasoa atu lau molimau.
Ata
Peresitene Iosefa F. Samita
Faamalamalama atu, sa faaauau pea e se vaega toaitiiti o le Au Paia o Aso e Gata Ai ona faia faaipoipoga fou autaunonofo ina ua uma ona tuuina atu le Manefeso. I le 1904, sa faalauiloa atu ai e Peresitene Iosefa F. Samita se folafolaga aloaia, “e faapea ua faasaina ai faaipoipoga [autaunonofo] uma, ma afai o le a faaauau pea e se taitai [Perisitua] po o se tagata o le Ekalesia ona faatinoina pe ulu atu i soo se faaipoipoga faapena, o ia lena o le a … tape ai le igoa [mai le Ekalesia]” (i le Conference Report, Ape. 1904, 75). O lenei aiaiga faavae o loo faaauau pea i aso nei.
E faavae i mea ua e aoaoina, e faapefea ona e tali atu pe afai e fesili atu se tasi ia te oe, pe o fai e le Au Paia o Aso e Gata Ai ia faaipoipoga autaunonofo? (Fesoasoani i tagata aoga ia malamalama, sa fai e tagata o le Ekalesia i se taimi ia faaipoipoga autaunonofo, ona o le usiusitai i le poloaiga a le Alii, ae ua leva ona faamutaina lena faiga, e tusa ai foi ma le poloaiga a le Alii. O le faaipoipoga i le va o se alii e toatasi ma se tamaitai e toatasi o le tulaga faatonuina lea a le Atua mo faaipoipoga, vagana ai na te folafolaina mai se isi mea e ese ai [tagai Iakopo 2:27,30].)
Ua faaali mai e le Alii e tatau ona faamauina le Au Paia o Aso e Gata Ai i tagata o o latou aiga
Faamalamalama atu faapea, ina ua uma ona tuuina atu le Manefeso, sa muta ai foi ma le taufaamatau o le malo tele e avefaamalosi ia malumalu ma meatotino a le Ekalesia. Na aunoa ma lena faalavelave, na mafai ai e le Au Paia ona taulai malosi atu i le galuega o le malumalu. I le aso 6 o Aperila, 1893, ina ua mavae le 40 tausaga talu ona faataatitia maatulimanu o le Malumalu o Sate Leki, sa faapaiaina ai loa e Peresitene Wilford Woodruff lena malumalu, ma oo ai le aofaiga o malumalu na faaaogaina i le fa.
Ia Aperila 1894, i le tasi o le tausaga talu ona mae‘a le faapaiaga o le Malumalu o Sate Leki, na fofoga mai ai e Peresitene Woodruff e faapea, na ia mauaina se faaaliga. A o lei oo mai lenei faaaliga, sa masani ona faia ai e tagata o le Ekalesia, e tusa ai ma le malamalama sa ia i latou, le faamauina o i latou lava po o le “vaetamaina,” i taitai o le Ekalesia nai lo i o latou lava matua. Ae na silafia e Peresitene Woodruff e ala i se faaaliga, e tatau ona ia faatonuina le Au Paia “ia saili o latou gafa i le mamao e mafai ona latou faia ai, ma ia faamauina i o latou tama ma tina. Ia faamauina fanau i o latou matua, ma faasolo atu lenei fesootaiga ia oo atu i le mamao e mafai ona oo i ai. … O le finagalo lenei o le Alii i lona nuu” (i le James R. Clark, comp., Messages of the First Presidency of The Church of Jesus Christ of Latter-day Saints, 6 vols. [1965–75], 3: 256–257; tagai foi i le Aoaoga a Peresitene o le Ekalesia: Wilford Woodruff [2004], xxxiii - xxxv).
O ai e mafai ona tatou faamau i ai e ala i le sauniga o le faamauga? (A uma ona tali mai tagata aoga, tusi le upumoni lenei i luga o le laupapa: E mafai ona faamauina i tatou i tagata o o tatou aiga, e aofia ai latou o e na muamua mai ia i tatou ma i latou o e o le a mulimuli mai ia i tatou, e ala i le mana o le faamauga.)
O a ni ou lagona i le iloa e mafai ona faamauina oe i tagata o lou aiga?
Faaiu i le molimau atu e uiga i le mana o faamauga ma le taua o le sosooina o i tatou lava i augatupulaga o o tatou aiga e ala i sauniga o le malumalu.
Tala ma Faamatalaga o Talaaga
Folafolaga Aloaia 1. O talaaga o loo aofia i le lomiga o le 2013 o tusitusiga paia
O le faamatalaga lenei, ua avea ma folasaga i le Folafolaga Aloaia 1 i le lomiga o le 2013 o tusitusiga paia, e mafai ona fesoasoani i tagata aoga e tali ai fesili e uiga i le faiga e le Au Paia o aso e Gata Ai o faaipoipoga autaunonofo i le vaitau o le 1800. Atonu e te manao e lolomi ni kopi o lenei faamatalaga ma tufa atu i tagata aoga o e e leai ni lomiga o le 2013 o tusitusiga paia.
Ua aoao mai le Tusi Paia ma le Tusi a Mamona e faapea, o le tasi o le toalua [o le tagata] o le tulaga faatonuina lea a le Atua mo faaipoipoga sei vagana ai ua Ia fofogaina mai se isi tulaga e ese ai (tagai i le 2 Samuelu 12:7-8 ma le Iakopo 2:27, 30). I le mavae ai o se faaaliga ia Iosefa Samita, sa faapea ona amataina ai le faiga o faaipoipoga autaunonofo i tagata o le Ekalesia i le amataga o le vaitaimi o le 1840 (tagai i le vaega e 132). Mai le vaitaimi o le 1860 i le vaitaimi o le 1880, sa pasia ai e le malo o le Iunaite Setete ni tulafono e faasaina ai lenei faiga faalelotu. Na iu lava ina lagolagoina nei tulafono e le Faamasinoga Maualuga a le I.S. Ina ua mavae le mauaina o le faaaliga, sa faapea ona tuuina mai e Peresitene Wilford Woodruff le Manefeso lenei, lea sa taliaina e le Ekalesia o se poloaiga ma ua faamauina i le aso 6 o Oketopa, 1890. O lenei mea na oo atu ai i le faamutaina o faaipoipoga autaunonofo i le Ekalesia.”
Folafolaga Aloaia 1. Na faafuasei lava ona faamuta le faiga o faaipoipoga autaunonofo ina ua oo mai le Manefeso?
Sa faaauau pea e nisi o tagata o le Ekalesia ona ulu atu i faaipoipoga autaunonofo ina ua mavae le tuuina mai o le Manefeso i le 1890. Sa faamalamalama mai e Elder Dallin H. Oaks o le Korama a Aposetolo e Toasefululua:
Ata
Elder Dallin H. Oaks
“Sa le’i faafuasei ona uma autaunonofo i le Manefeso o le 1890. O mafutaga autaunonofo na faamauina a o lei fofogaina mai lena faaaliga, sa faaauau pea mo se augatupulaga. O le faatinoina foi o faaipoipoga autaunonofo sa faaauau foi mo se taimi i fafo atu o le Iunaite Setete, lea sa le mautinoa ai le faaaogaaga o le Manefeso mo se vaitaimi. E foliga mai sa faaauauina lava faaipoipoga autaunonofo mo le tusa ma le sefulu tausaga i nisi o eria e taitai ma tagata o le ekalesia, o e na tauamiotonuina lo latou faia ona o le le manino ma uunaiga na mafua mai i le maualuga o le fetoaiga i le va o tulafono latou te le fiafia i ai ma aoaoga faavae na faatauaina. …
“E momomo lo’u loto pe a ou faitau i tulaga na tuuina atu i ava ma fanau ona o le filifiliga faigata, o le pepelo e uiga i mea sa i ai po o le i ai o se tane po o se tama i le isi itu, po o le ta’uina o le mea moni ma le vaai atu ua alu o ia i le falepuipui i le isi itu. … O se tama e falepuipui, na aveesea ai meaai mai le laulau ma suauu e faamafanafana ai le aiga. O na filifiliga faigata na aofia ai le fetoai i le va o lagona taua ma manaoga o se tautinoga i le upumoni e faasaga i le manaomia o se mafutaga alofa ma le toomaga mai le malulu ma le fia aai.
“Ou te lagona le faanoanoa alofa i taitai o le Ekalesia o e sa taomia i le va o lo latou tuuto i le upumoni ma lo latou tuuto i a latou ava ma fanau ma i le tasi ma le isi. O le ta’u atu o le mea moni o lona uiga o le faalataina o se talitonuina po o se faamoemoega po o le auina atu o se uso i le falepuipui. …
“Ou te le iloa po o le a se mafaufau i ai i lenei mea atoa, vagana ai, ou te fiafia ona ou te le’i feagai ma faigata na feagai ma na tagata lelei. Ou te lagona le faanoanoa alofa ia i latou uma mo lo latou lotototoa ma a latou osigataulaga, lea ua ou aeae tonu ai lava. O le a ou le faamasinoina i latou. O le faamasinoga e a le Alii, o le na te silafia tulaga uma ma loto o tagata na aafia ai, o se tulaga e oo lava i tusi talafaasolopito aupito sili ona atamamai e le’i oo i ai lo latou malamalama ma le atamai” (“Gospel Teachings about Lying,” Clark Memorandum [Brigham Young University J. Reuben Clark Law School periodical], Spring 1994, 16–17).
Talu mai le 1904, ua tape ai e le Ekalesia igoa o ona tagata auai o e e faatinoina pe ulu atu i faaipoipoga autaunonofo (tagai i le Conference Report, Ape. 1904, 75). I le 1998, na fofoga mai ai e Peresitene Gordon B. Hinckley le tulaga o le Ekalesia i le faia o faaipoipoga autaunonofo:
Ata
Peresitene Gordon B. Hinckley
“O lenei Ekalesia e leai sana mea o faia ia i latou e faia autaunonofo. … Afai e i ai nisi o o tatou tagata e maua o faia autaunonofo, e tape o latou igoa ma le ekalesia, o le faasalaga aupito matuia lea e mafai ona faia e le Ekalesia. E le gata o i latou ua aafia ai ua solia le tulafono faalemalo, ae ua latou solia foi le tulaga o lenei Ekalesia” (O A Mea o Tuufesili ai Tagata e Uiga ia i Tatou?” Liahona, Ian. 1999, 82).
Saunoaga mai ia Peresitene Wilford Woodruff. O le a lē faatagaina lava e le Alii le Peresitene o le Ekalesia e taitai ese i tatou
Na faamatala e Peresitene Marion G. Romney o le Au Peresitene Sili se aafiaga na ia maua ma Peresitene Heber J. Grant, o lē sa avea ma Peresitene o le Ekalesia i lea taimi:
Ata
Peresitene Marion G. Romney
“O le tu ai i o’u tafatafa, sa tuu mai ai lona lima i luga o lo’u tauau ma fai mai: ‘Lo’u atalii e, ia taulai atu lau vaai i le Peresitene o le Ekalesia, a i ai se taimi e fai atu ai ia te oe e fai soo se mea, ae e sese, ia e faia, o le a faamanuia oe e le Alii ona o lena mea.’ Ma faatasi ai ma se faaivi o lona mata, sa ia faapea mai, ‘Ae aua la e te popole. O le a le faatagaina lava e le Alii ia lona fofoga taumomoli e taitai ese tagata’” (i le Conference Report, Oke. 1960, 78).
Mo nisi faamatalaga e uiga i le Folafolaga Aloaia 1, alu i Autu o le Talalelei i luga o le LDS.org ma su’e i le “faaipoipoga autaunonofo” po o le “autaunonofo.”