Anomea o Sauniuniga mo le Faiaoga mo Suesuega i le Fale
Aotelega o Lesona mo Suesuega i le Fale i Aso Taitasi
O le aotelega lenei o mea na tutupu, aoaoga faavae, ma mataupu faavae na aoaoina e tagata aoga a’o latou suesueina le Mataupu Faavae ma Feagaiga 24–29:30 (iunite 7) e le o faamoemoe e aoao atu o se vaega o lau lesona. O le lesona e te aoaoina atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tamaiti aoga.
E ala mai i le fautuaga a le Alii ia Iosefa Samita ma Oliva Kaotui e uiga i le tali atu i tofotofoga, sa aoaoina e tagata aoga e tatau ona tatou onosai ma onosaia o tatou puapuaga aua o loo faatasi le Alii ma i tatou. A o suesueina e tagata aoga le fautuaga a le Alii ia Ema Samita e uiga i lana matafaioi i le Ekalesia, sa latou faailoa mai ai ni nai mataupu faavae ma filifilia se tasi e taulai i ai, lea latou te lagona o le a talafeagai i o latou lava olaga. Ma le mea mulimuli, na suesueina e tagata aoga le folafolaga a le Alii e faapea, e tatau ona faia mea uma i le Ekalesia i le finagalo autasi, ma mafaufau po o a ni auala e mafai ona latou faataunuu lelei ai a latou tautinoga e lagolago i latou ua filifilia ma lagolagoina e auauna atu i o latou uarota po o paranesi.
A o suesueina e tagata aoga le Mataupu Faavae ma Feagaiga 27, na latou aoaoina ai, a o tatou fetagofi atu i le faamanatuga, e tatau ona tatou manatua le taulaga togiola a Iesu Keriso. Na latou aoaoina foi o loo tatou ola i le tisipenisione o le atoaga o taimi, lea e aumaia faatasi uma ai ki o le talalelei, sauniga, ma upumoni o tisipenisione ua mavae. Ina ia mafai ona tetee atu ai i mea leaga i o tatou aso, sa fautuaina tagata aoga e tauave i o latou luga le ofutau atoa o le Atua.
Mai le fautuaga a le Faaola ia Oliva Kaotui, sa aoaoina ai e tagata aoga e faapea, i le Ekalesia a Iesu Keriso, e le maua e tagata taitoatasi ni faaaliga e taitai ai se tasi o loo pulefaamalumalu ia i latou, ma e na o le Peresitene o le Ekalesia o le a mauaina faaaliga mo le Ekalesia atoa. Ae peitai, e mafai ona tatou maua faaaliga mo lo tatou manuia, ma fesoasoani ia i tatou i valaauga ma tofiga ua tuuina mai ia i tatou. Na aoaoina foi e tagata aoga, ua i ai i taitai o le Ekalesia le tiutetauave e faasa’o ai i latou o e o loo taitaiseseina isi, ma i le Ekalesia a Iesu Keriso, e tatau ona faia mea uma i le faatulagaga sa’o.
Mai aoaoga a le Faaola e uiga i le Afio Mai Faalua ma mea e tutupu pe a mavae le Meleniuma, na aoaoina e tagata aoga o i latou o e o mai i le Faaola o le a saunia mo tofotofoga ma faigata o aso e gata ai, ma o le a maua le ola e faavavau. Na fesoasoani foi lenei lesona i tagata aoga e malamalama ai, ona sa togiola Iesu Keriso mo a tatou agasala ma o lo tatou fautua i le Tama, o lea e mafai ai ona siia’e o tatou loto ma ia fiafia.
Folasaga
O lenei lesona e tuuina atu ai i tagata aoga se avanoa e faateleina ai lo latou malamalama i le taua o le ofu i le ofutau atoa o le Atua. A o aoao tagata aoga e uiga i vaega taitasi o le ofutau o le Atua, o le a latou maua se avanoa e iloilo ai le malosi o a latou ofutau ma faia ni suiga pe a uunaia ai e le Agaga Paia.
Ua poloaiina e le Alii Lona nuu e oofu i le ofutau atoa o le Atua
Aumai i le vasega ni mea mo le puipuiga, e pei o ni mea mo le puipuiga i taaloga, matatioata mo le saogalemu, totinilima a le falema’i, o se pulou malo mo galuega kamuta, po o se ofu mo le puipuiga. Fai atu i tagata aoga e faamalamalama mai le faamoemoega o mea taitasi ma pe faapefea ona faaaoga e puipui ai le tagata e faaaogaina. Faamalamalama atu e ui o nei mea e puipuia ai i tatou faaletino, ae na tuuina mai e le Alii se fautuaga e fesoasoani e puipui ai i tatou faaleagaga.
Valaaulia se tagata aoga e faitau leotele le Mataupu Faavae ma Feagaiga 27:15. Fai atu i le vasega e mulimuli i le faitauga, ma vaavaai mo mea na fetalai mai le Alii e tatau ona tatou faia ina ia puipuia ai faaleagaga.
O le a le mea e tatau ona tatou faia ina ia puipuia ai faaleagaga?
E tusa ai ma lenei fuaiupu, o le a le mea na folafola mai e le Alii ia i latou o e oofu i le ofutau atoa o le Atua?
Tusi le mataupu faavae lenei i luga o le laupapa: Afai tatou te ave i o tatou lava luga le ofutau atoa o le Atua, o le a mafai ona tatou tetee atu i le tiapolo.
Aisea e te manatu e taua ai le oofu i le ofutau atoa o le Atua ae le na o sona vaega?
Valaaulia se tagata aoga e faitau leotele le Mataupu Faavae ma Feagaiga 27:16–18. Fai atu i le vasega e mulimuli i le faitauga ma faailoa mai vaega taitasi o le ofutau faaleagaga e manaomia ona tatou ofuina ina ia mafai ona tetee atu ai i mea leaga. Valaaulia se tagata aoga e avea ma tusiupu ma lisi (po o le tusi o ata) o vaega o le ofutau i luga o le laupapa, a’o faailoa mai e le vasega. (Atonu e te manao e faailoa atu, sa aoao mai foi le Aposetolo o Paulo e uiga i le ofutau atoa o le Atua [tagai Efeso 6:11–17].)
Ina ia fesoasoani i tagata aoga ia malamalama i le taua o le puipuiga faaleagaga o loo faamatalaina i nei fuaiupu, vaevae le vasega i ni vaega laiti ma atofa atu i vaega taitasi se tasi o vaega o le ofutau. Tuu atu i vaega taitasi se kopi o le saunoaga lenei a Peresitene Harold B. Lee ma faamatalaga ma fesili nei e faatatau i a latou vaega ua atofaina atu o le ofutau. Valaaulia tagata aoga e galulue i totonu o a latou vaega e tali fesili mo vaega o le ofutau na atofa atu ia i latou, ma ia saunia e faasoa mai a latou tali i le vasega.
Ata
Peresitene Harold B. Lee
“Ua ia i tatou vaega e fa o le tino lea na fai mai le Aposetolo o Paulo [e] sili ona afaina i mana o le pogisa. O sulugatiti, e faatusa i le mama, ola mama. O le loto e faatusa i a tatou amio. O o tatou vae, o a tatou sini po o faamoemoega i le olaga ma le mulimuli, o lo tatou ulu, o o tatou manatu” (Harold B. Lee, Feet Shod with the Preparation of the Gospel of Peace, Brigham Young University Speeches of the Year [Nov. 9, 1954], 2).
“Fusi faataamilo outou sulugatiti i le upumoni” (tagai i le MF&F 27:15-16):
Na saunoa Peresitene Lee, “O sulugatiti o le vaega lena o le tino e i le va o ivi asoaso pito i lalo ma le puimanava lea e te matauina o loo i ai totoga taua lea e i ai lo latou matafaioi i le foafoaga” (Feet Shod,2). O le ia fusi e faaataata mai ai e nonoa mau i se fusipa‘u.
Aisea e te manatu e osofaia ai e Satani lo tatou mama a‘ia’i, mama, ma le ola mama?
O a ni auala e te manatu e mafai ona fesoasoani ai le iloa o tulaga faatonuina a le Atua e uiga i amioga mama, ina ia tatou tumau ai i le mama a’ia’i, mama, ma le nofomama?
O le suesue i tusitusiga paia e fesoasoani e fusi mau i tatou i upumoni ma fesoasoani e puipuia le mea moni ma le ola mama.
E tusa ai ma le saunoaga a Peresitene Lee, o le a le mea e puipuia e le ufifatafata?
O a ni auala e te manatu, o le amiotonu o o tatou loto (o tatou manaoga) e uunaia ai lo tatou gafatia ona tauina a tatou taua faaleagaga?
“Faasee o outou vae i le sauniuniga o le talalelei o le filemu” (MF&F 27:16):
O le uiga o le “faasee” o outou vae, o le faia o seevae po o le puipuiga o o outou vae.
E tusa ai ma le saunoaga a Peresitene Lee, o a mea e faatusa i ai o tatou vae?
E faapefea ona osofaia e Satani a tatou sini ma faamoemoega i le olaga?
O le a le mea ua tuuina mai e le Atua ia i tatou e “pipii mau i ai” ina ia mafai ona fesoasoani ia savavali pea o tatou vae i le ala o le olaga e agai atu i a tatou sini? (Tagai i le 1 Nifae 8:24.)
E mafai faapefea e le taulai atu i sini ma faamoemoega amiotonu ona fesoasoani ia i tatou e faatoilalo ai faaosoosoga?
E mafai faapefea ona fesoasoani le Agaga ia i tatou e faatoilalo osofaiga a Satani?
O a ni mea e lelei ai lo tatou mauaina o le Agaga i la tatou taua faasaga i le leaga?
E faapefea ona fesoasoani le afioga a le Atua ia i tatou e faaaoga le pelu a le Agaga?
O a ni mea e mafai ona e faia e valaaulia atili ai le Agaga i lou olaga?
A uma ona lipoti mai e tagata aoga a latou tali, faitau le saunoaga lenei mai ia Elder M. Russell Ballard o le Korama a Aposetolo e Toasefululua, ma fai atu i tagata aoga e faalogologo mo auala tatou te ofuina ai ma faamalosia ai le ofutau o le Atua:
Ata
Elder M. Russell Ballard
“Ou te fiafia e mafaufau o lenei ofutau faaleagaga, e le o se fasi uamea malo ua mamanuina ina ia fetaui i le tino ae e matele lava ina pei o se filifili sosoo. O filifili sosoo e aofia ai ni vaega uamea itiiti se tele e faamau faatasi ina ia mafai e le tagata e faaaogaina ona fetuutuunai e aunoa ma le aveesea o le puipuiga. Ua ou fai atu i lena mea ona e tusa ai ma lou aafiaga, e leai se mea e sili ona lelei ma maoae e mafai ona tatou faia e faaauupegaina ai i tatou lava faaleagaga. O le malosi moni faaleagaga, e i totonu o gaoioiga laiti e tele ua milo faatasi i se ie o puipuiga faaleagaga, lea e puipuia ma talitalia ai mai mea leaga uma” (“Ia Lototetele i le Alii,” Ensign, Iulai 2004, 8).
O a nisi o faatinoga laiti lea, a tuufaatasi lo latou malosiaga, o le a fesoasoani e puipuia i tatou mai faaosoosoga ma mea leaga?
O le a le uiga faaalia e tatau ona ia i tatou pe a tatou ofuina le ofutau o le Atua? (E tatau ona “sii aʼe i luga o [tatou] loto ma olioli.”) Aisea e tatau ona tatou maua ai lenei uiga faaalia?
O a ni fuaitau o mau tauloto sa e aoao e uiga i ai i lenei vaiaso, o loo fautuaina mai ai foi i tatou e sii a’e o tatou loto ma olioli? (MF&F 25:13. Mafaufau e valaaulia tagata aoga e fai faatasi pe tauloto mai le mafaufau.)
E mafai faapefea e le mulimuli i le poloaiga i le Mataupu Faavae ma Feagaiga 25:13 o le pipii i a tatou feagaiga ma le Tama Faalelagi e puipuia ai i tatou mai ia Satani?
Fai atu i tagata aoga e mafaufau i mea ua latou aoaoina i le lesona o le aso, ma valaaulia i latou e filifili se mea faapitoa se tasi e mafai ona latou faia, ia lelei ai lo latou ofuina o le ofutau o le Atua. Uunaia i latou e tusi i luga o se fasi pepa se mea o le a latou faia e mafai ona latou vaavaai i ai i taimi uma, e avea o se faamanatu o la latou tautinoga.
Ina ia faaiu lenei lesona, valaaulia ni nai tagata aoga e faasoa mai a latou molimau i upumoni na aoaoina i le lesona.
E toafia fanau a le Tama Faalelagi na tutuliese mai le lagi i le muai olaga? Aisea na tutuliese ai i latou i fafo? O le a le uiga o le “soli [solia] atunuu”? I le iunite e sosoo ai, o le a aoao ai e tagata aoga le tali i fesili nei. O le a latou aoao ai foi e uiga i tagata anamua o le Ekalesia sa tofia e “soli [solia] atunuu i le mana o [le] Agaga” (MF&F 35:13).