I le vaitaimi o le seneturi lona 20, sa salalau atu ai le galuega faafaifeautalai i le lalolagi atoa. Sa tatalo taitai o le Ekalesia mo le taitaiga e uiga i vaega e faatapulaa i le faauuina i le perisitua ma sauniga o le malumalu mo tagata o le Ekalesia e tupuga mai i Aferika. Sa oo mai se faaaliga mulimuli i le Peresitene o le Ekalesia o Spencer W. Kimball ma sa faailoa atu i ona fesoasoani i le Au Peresitene Sili ma sui o le Korama a Aposetolo e Toasefululua i le Malumalu o Sate Leki i le aso 1 o Iuni, 1978. I se tusi na tusia i le aso 8 o Iuni, 1978, sa latou faasilasilaina atu ai le faaaliga.
Ua faaali mai e le Alii e faapea, o le perisitua ma faamanuiaga o le malumalu e mafai ona faasafua atu i tagata agavaa uma o le Ekalesia
Valaaulia le vasega e vaai faalemafaufau o loo i ai sa latou uo o se tagata o le Au Paia o Aso e Gata Ai, ma o loo tauivi ma nisi o fesili e uiga i le Ekalesia.
O le a se mea e te uunaia lau uo e fai?
A uma ona tali mai tagata aoga, faitau leotele le saunoaga lenei mai ia Peresitene Dieter F. Uchtdorf o le Au Peresitene Sili:
Ata
Peresitene Dieter F. Uchtdorf
“Au uo talavou pele, o i tatou o ni tagata fai fesili aua ua tatou iloa o le fesili e taitaiina atu ai i le mea moni. …
“… O le fesili o le amataga lea o se molimau. E ono lagona e nisi le matamuli po o le le agavaa ona o loo i ai ni a latou fesili sailiili e uiga i le talalelei, ae e le tatau ona latou manatu faapena. O le faia o fesili e le o se faailoga lea o le vaivai; ae o se teuteuala mo le tuputupu a’e.
“Ua poloaiina i tatou e le Atua e saili i tali i a tatou fesili (tagai i le Iakopo1:5-6) ma na pau le mea o loo fai mai ai, ia tatou saili atu ‘ma le loto faamaoni, ma le manatu moni i ai, ma le faatuatua ia Keriso’ (Moronae 10:4). A tatou faia faapea, o le a mafai ona faaali mai ia i tatou le moni o mea uma ‘i le mana o le Agaga Paia’ (Moronae 10:5).
“Aua le fefefe; ia fesili atu. Ia fia iloa, ae aua le masalosalo! Ae ia uumau pea e le aunoa i le faatuatua ma le malamalama ua uma ona e maua” (“O Le Ataata i totonu o le Vai” [faigalotu a le Ofisa o Aoga a le Ekalesia, 1 Nov., 2009], LDS.org)
O le a le mea na aoao mai e Peresitene Uchtdorf e mafai ona fesoasoani i se tasi o loo i ai ni fesili e uiga i le Ekalesia?
Fai atu i se tagata aoga e faitau leotele le faamatalaga lenei e uiga i ni tagata taitoatasi e toalua, o Helvécio ma Rudá Martins, o e sa saili ia maua ma malamalama i le upumoni e ala i le faia o fesili:
Ata
Elder Helvécio Martins
Elder Helvécio Martins
“I se po lagilelei o Aperila i le 1972 … sa mafaufau ai Helvécio Martins i le sailiga a lona aiga mo le upumoni. E tele ni lotu sa la sailiili i ai ma lona toalua o Rudá, ae e leai se tasi na foliga mai e faamalieina o latou manaoga faaleagaga. ‘Sa ma talanoa ma le Atua i lena po, ma ole atu mo se fesoasoani,’ o lana tala mai lea” (“Elder Helvécio Martins o le Fitugafulu,” Ensign, Me 1990, 106).
I ni nai aso mulimuli ane, na oo atu ai faifeautalai i lo latou aiga i Rio de Janeiro, Pasila Na faamatalaina e Elder Martins, “O le taimi lava na tuvae ai na alii talavou e toalua i totonu o le matou falemautotogi, sa vave lava ona mou ese uma lo’u pogisa ma le le mautonu faaleagaga, ae sa suia i se toafimalie ma le toafilemu lea ua ou iloa nei na oo mai i le uunaiga a le Agaga Paia” (i le Mark Grover, The Autobiography of Elder Helvécio Martins [1994], 43).
A o talanoa Helvécio ma Rudá, o e e tupuga mai i Aferika, ma faifeautalai, na fesili ai Helvécio e uiga i le matafaioi a tagata uli i le Ekalesia. Na aoaoina e le au Martins e faapea, i lena vaitaimi, o aiaiga faavae o le Ekalesia na faatapulaaina ai alii uli e tupuga mai Aferika mai le faauuina i le perisitua. O lenei mea na oo ai ina laua fai atu nisi fesili i faifeautalai.
Afai sa e i ai i le tulaga o le aiga o le au Martins, o a ni fesili atonu sa i ai ia te oe ina ua e iloa e uiga i le faatapulaa o le perisitua?
Faaali atu le faamatalaga lenei, o se vaega o le folasaga i le Folafolaga Aloaia 2. (Atonu e te manao e fai ni kopi o lenei folasaga mo tagata aoga pe afai e le o i ai ni a latou lomiga o le 2013 o tusitusiga paia.) Valaaulia se tagata aoga e faitau leotele le faamatalaga, ma fai atu i le vasega e vaavaai mo tali i fesili o ono i ai a tagata taitoatasi e uiga i le faatapulaa o le perisitua.
“O loo aoao mai le Tusi a Mamona, ‘ua tutusa tagata uma i le Atua,’ e aofia ai le ‘uliuli pe paʼepaʼe, e pologa pe saoloto, o tane ma fafine’ (2 Nifae 26:33). I le talafaasolopito o le Ekalesia, ua papatisoina ai tagata o ituaiga uma, ma tagatanuu i le tele o atunuu, ma ua ola o ni tagata faamaoni o le Ekalesia. I le taimi o le soifuaga atoa o Iosefa Samita, e toalaiti lava ni alii uli o le Ekalesia sa faauuina i le perisitua. I le amataga o lona talafaasolopito, sa taofia ai e taitai o le Ekalesia le toe tuuina atu o le perisitua i luga o alii e tupuga mai i Aferika. E leai ni faamaumauga a le Ekalesia o tuuina mai ai ni malamalamaaga sa’o ma loloto e uiga i le amataga o lenei faiga.”
O a ni fesili e uiga i le faatapulaa o le perisitua e mafai ona taliina e ala mai i lenei faamatalaga?
Faailoa atu le laina o loo fai mai, “E leai ni faamaumauga a le Ekalesia o tuuina mai ai ni malamalamaaga sa’o ma loloto e uiga i le amataga o lenei faiga.” Ia mautinoa ua malamalama tagata aoga, e ui o nisi o tagata e ono fautua mai ni mafuaaga sa le faauuina ai alii e tupuga mai i Aferika i le perisitua mo se taimi, ae o na mafuaaga e ono le sa’o. O le faamatalaga na faatoa faitauina atu ua fai ma tulaga aloaia o le Ekalesia.
Valaaulia se isi tagata aoga e faitau le parakalafa lenei e faamatalaina ai mea na faia e le aiga o Martins ina ua uma ona latou aoao e uiga i le talalelei toefuataiina:
Sa papatisoina le aiga o Martins i le aso 2 o Iulai, 1972, ma sa auauna ma le faamaoni i le Ekalesia. Ina ua maua e lo la atalii matua, o Marcus, lona faamanuiaga faapeteriaka, sa folafola mai ai o le a ia talai atu le talalelei. E ui lava o le faatapulaa o le perisitua i lena vaitaimi na taofia ai Marcus mai le auauna atu i se misiona talai, ae sa amataina e ona matua se teugatupe mo faifeautalai. I le 1975 sa faasilasila mai ai e le Ekalesia, o le a fausia se malumalu i São Paulo, Pasila. Ina ia fesoasoani i le sailiga tupe, sa faatau atu ai e Sister Martins ana asoa, mama, ma teuga. Sa auauna faamaoni Uso Martins o se tasi o le komiti faalauiloa mo le malumalu. Sa faia e le aiga o Martins nei osigataulaga e ui lava ina latou talitonu latou te le maua le avanoa e maua ai sauniga o le perisitua i le malumalu.
Aisea e te manatu sa naunau ai le aiga o Martins ina ia papatisoina ma auauna atu ma le faamaoni i le Ekalesia, e ui lava sa latou aafia i le faatapulaa o le perisitua i le taimi lena?
A uma ona talanoaina e tagata aoga lenei fesili, faitau leotele le tali a Uso Martins:
Ata
Elder Helvécio Martins
“’Na matou mauaina le upumoni, ma e leai se mea o le a taofia i matou mai le ola ai.’ … ‘A ta’u atu e le Agaga ia te oe e moni le talalelei, e mafai faapefea ona e teenaina?” (i le “Elder Helvécio Martins o le Fitugafulu,” 106).
Faailoa atu, ona na maua e le aiga o Martins se molimau e ala i le Agaga Paia, sa faapea ona mafai ona latou agai i luma, faalagolago i le Alii, e ui lava i mea sa latou le malamalama i ai.
E mafai faapefea ona avea le aiga o Martins o se faataitaiga mo oe pe a i ai ni au fesili? (E mafai ona tatou pipii mau i mea ua uma ona tatou iloa ma tutu malosi seia oo ina oo mai le malamalama faaopoopo.)
Faamalamalama atu e faapea, e faaopoopo atu i le aiga o Martins, e faitau afe tagata e tupuga mai i Aferika i atunuu eseese, na latou iloa le moni o le talalelei toefuataiina i le tele o tausaga a’o lumanai le faaaliga i le 1978. Na maua e taitai o le Ekalesia i le Aai o Sate Leki le anoanoai o tusi mai tagata liliu mai sa le’i papatisoina i Nigeria ma Ghana na talosagaina ina ia auina atu faifeautalai i Aferika. Mo le tele o tausaga, sa mafaufau ai ma le agaga tatalo ia taitai o le Ekalesia i le mataupu, ae sa lagonaina sa le’i oo i le taimi e auina atu ai faifeautalai i Aferika, lea sa le mafai ai e tagata o le ekalesia i le lotoifale ona pulefaamalumalu pe faatino ia sauniga.
Ata
Peresitene Spencer W. Kimball
Faailoa atu i tagata aoga o le Folafolaga Aloaia 2 o loo i ai le faasilasilaga aloaia o se faaaliga na maua e Peresitene Spencer W. Kimball i le aso 1 o Iuni, 1978. Valaaulia se tagata aoga e faitau leotele le palakalafa muamua o loo i lalo o le fuaitau “Uso Pele e.” Valaaulia le vasega e mulimuli i le faitauga, ma vaavaai mo mea na fai mai taitai o le Ekalesia na latou molimauina.
O a mea na molimauina e taitai o le Ekalesia i le lalolagi atoa?
O a mea na musuia ai taitai o le Ekalesia a o latou molimauina le faateleina o le galuega a le Alii? (O se manao e faasafua atu faamanuiaga uma o le talalelei i tagata agavaa uma o le ekalesia.)
Valaaulia se tagata aoga e faitau leotele le palakalafa e sosoo ai (amata i le “I le matou iloa lelei o folafolaga”). Valaaulia le vasega e vaavaai mo auala na galulue ai taitai o le Ekalesia i manaoga sa musuia ai i latou.
Na faapefea ona galulue Peresitene Kimball ma isi taitai o le Ekalesia i o latou manaoga musuia?
O le a se mea ua aoao mai e lenei mea ia i tatou e uiga i perofeta? (A uma ona tali mai tagata aoga, atonu e te manao e tusi le upumoni lenei i luga o le laupapa: E saili e Perofeta le taitaiga a le Alii i le faatonutonuina o le Ekalesia.)
Faasino atu le fuaitau “I le matou iloa lelei o folafolaga na faia e perofeta.”
O le a le mea ua aoao mai ia i tatou e lenei fuaitau ma le fuaiupu o loo faalauiloa mai ai, e uiga i mea na silafia e taitai o le Ekalesia e faatatau i le faatapulaa o le perisitua? (Na latou silafia e i ai se taimi o le a maua ai e alii agavaa uma le avanoa e maua ai le perisitua.)
Faamalamalama atu, mo le tele o tausaga a o lei oo i le 1978, sa soalaupuleina ma tatalo ai le Au Peresitene Sili ma le Korama a Aposetolo e Toasefululua, e uiga i le faatapulaa o le perisitua. Na lagona e taitai o le Ekalesia, sa manaomia se faaaliga ina ia mafai ona sui ai le faatauplaaina, lea sa faavaeina mo le silia ma se seneturi. Sa mo se taimi o mamafa lenei fesili i le mafaufau o Peresitene Kimball, ma sa masani ona alu na o ia i le malumalu e tatalo e uiga i ai.
Valaaulia se tagata aoga e faitau leotele palakalafa e lua o loo sosoo ai, amata i le “Ua faafofogaina e ia a matou talosaga.” Fai atu i le vasega e mulimuli i le faitauga, ma vaavaai mo le tali a le Alii i talosaga a Peresitene Kimball, o ona fesoasoani i le Au Peresitene Sili, ma sui o le Korama a Aposetolo e Toasefululua.
O le a le tali a le Alii i talosaga a Ana perofeta?
O le a se mea ua aoao mai e lenei mea ia i tatou e uiga i le ala e taitai ai e le Allii Lana Ekalesia? (A uma ona tali mai tagata aoga, tusi le aoaoga faavae lenei i luga o le laupapa: E faatonutonu e le Alii Lana Ekalesia e ala i faaaliga i Ana perofeta.)
Faamalamalama atu, sa i ai se aafiaga loloto o lenei faaaliga i tagata i le lalolagi atoa. Valaaulia se tagata aoga e faitau i le auala na tali mai ai Helvécio Martins ma lona faletua, o Rudá, ina ua laua faalogo e uiga i ai:
“Sa le mafai ona taofiofi o’u lagona. Sa ma o atu ma Rudá i lo ma potumoe, tootutuli i lalo, ma tatalo. Sa ma fetagisi a’o ma faafetai atu i lo tatou Tama oi le Lagi mo se mea na tupu lea sa na ona matou moemiti i ai. Na oo moni mai lava le aso, ma i o maua olaga i le tino” (Autobiography, 69–70). Sa faamauina le aiga o Martins i le malumalu. O le la atalii o Marcus o le uluai tagata o le Ekalesia e tupuga mai i Aferika ua faia se misiona, i le mavae ai o le faaaliga e faamuta ai le faatapulaaina o le perisitua. Sa avea Helvécio Martins ma se taitai perisitua i le lotoifale ma na iu lava ina valaauina o ia e auauna atu o se tasi o le Korama Lona Lua a Fitugafulu.
Faamalamalama atu faapea, e lei leva ona maua mai le faaaliga e faamutaina ai le faatapulaaina o le perisitua, ae auina atu loa faifeautalai i Aferika. Talu mai lena taimi ua fausia ai Malumalu i lena konetineta, ma ua faitau selau afe tagata iina ua mauaina sauniga o le talalelei mo i latou lava ma mo latou tuaa ua maliliu.
Faailoa atu, atonu e fesiliga tagata aoga pe aisea na le faauuina ai e le Ekalesia ia alii e tupuga mai i Aferika i le perisitua mo se taimi. Valaaulia i latou e mafaufau pe faapefea ona latou taliina lenei fesili.
Faamautu atu, e talafeagai le faamalamalama atu i isi, tatou te le iloa pe aisea na amata ai le faatapulaaina o le perisitua. E le gata i lea, e mafai ona e faasoa atu ma molimau atu e uiga i upumoni ua tatou iloa. (Atonu e te manao e faatatau atu i upumoni o loo tusia i luga o le laupapa.) Faaiu i le valaaulia o tagata aoga e faasoa mai o latou lagona ma molimau. Atonu foi e te manao e faasoa atu lau molimau.
Tala ma Faamatalaga o Talaaga
Folafolaga Aloaia 2. O faamanuiaga o le perisitua o loo avanoa i fanau uma a le Atua
Na faamalamalama mai e Elder M. Russell Ballard o le Korama a Aposetolo e Toasefululua e faapea, e ui lava o le pule o le perisitua e faaeeina i luga o alii, ae e mafai e fanau uma a le Tama Faalelagi—alii ma tamaitai—ona maua faamanuiaga o le perisitua:
Ata
Elder M. Russell Ballard
“I le fuafuaga sili ua faaeeina o le perisitua a lo tatou Tama Faalelagi, ua i ai i alii le tiutetauave tupito e taitai ai le perisitua, ae e le o i latou o le perisitua. E eseese matafaioi ae tutusa lava le taua ua i ai i alii ma tamaitai. E pei lava ona le mafai e se tamaitai ona fanauina se tamaitiiti e aunoa ma se alii, e faapena foi, e le mafai i se alii ona faaaogaina atoa le mana o le perisitua e faavae ai se aiga e faavavau e aunoa ma se tamaitai. I se isi faaupuga, i se vaaiga e faavavau, o le mana foafoa atoa ai ma le mana o le perisitua e faaaogaina uma e se tane ma se ava. Ma i le avea ai ma se tane ma se ava, e tatau lava i se alii ma se tamaitai ona taumafai e mulimuli i lo tatou Tama Faalelagi. O uiga mama faaKerisiano o le alofa, lotomaualalo, ma le onosai e tatau lava ona avea ma o la taulaiga a o la saili atu i faamanuiaga o le perisitua i o la olaga ma lo la aiga.
“E taua tele mo i tatou le malamalama ua uma ona saunia e le Tama Faalelagi se auala mo Ona atalii ma Ona afafine uma e maua ai faamanuiaga ma faamalosia ai e le mana o le perisitua” (“O La’u Galuega ma Lo’u Mamalu Lenei,” Ensign po o le Liahona, Me 2013, 19).
Folafolaga Aloaia 2. Aloese mai le faapipiina o mafuaaga e faia e le tagata i faaaliga a le Atua
“I lse faatalanoaga i le 1988 i le faamanatuga o le sefulu tausaga o le faaaliga e uiga i le perisitua, sa faamalamalama mai ai e [Elder Dallin H. Oaks o le Korama a Aposetolo e Toasefulua] ia [ona] uiga faaalia e faasaga i taumafaiga e aumai ni mafuaaga faaletino mo faaaliga faalelagi:
Ata
Elder Dallin H. Oaks
“‘Afai e te faitau i tusitusiga paia ma le fesili lenei i le mafaufau,”Aisea na poloaiina ai e le Alii le mea lenei po o le, aisea na ia poloaiina ai le mea lena,“ e te iloa ai e itiiti ifo ma le tasi mai le selau poloaiga sa i ai se mafuaaga na aumai ai. E le o le mamanu a le Alii le tuuina mai o ni mafuaaga. E mafai e i tatou [tagata] ona tuu ni mafuaaga i faaaliga. E mafai ona tatou tuu ni mafuaaga i poloaiga. A tatou faia, ua tatou i ai na o i tatou lava. O nisi o tagata e tuuina mafuaaga i le mea o loo tatou talanoa ai iinei, ma e iu ane e matuai sese lava i sini i latou. E i ai se lesona i lena mea. … Sa ou filifili i se taimi ua leva lava, ou te faatuatua i le poloaiga ma e leai so’u faatuatua i mafuaaga na fautuaina mai ai.’
“Ina ua fesiligia pe sa [ia] faatatau i mafuaaga na tuuina mai e le au Pulega Aoao, sa [ia] tali mai:
“’O lo’u o’u faatatau i mafuaaga e tuuina mai e le au pulega aoao ma mafuaaga e faalauteleina … e isi. O mafuaaga atoa e foliga mai ia te a’u o le faia o ni tulaga e le manaomia e lamatia ai. … Aua ne‘i o tatou faia le mea sese sa faia i le taimi ua tuanai, i le vaega lenei ma isi vaega, o le taumafai e faapipii ni mafuaaga i faaaliga. O mafuaaga e iu ane lava o mea e fai e tagata i se tulaga maoae. O faaaliga o mea ia tatou te lagolagoina o le finagalo o le Alii ma o iina o loo taoto ai le saogalemu’ [“Apostles Talk about Reasons for Lifting Ban,” Daily Herald, Provo, Utah, June 5, 1988, 21 (AP)]” (Dallin H. Oaks, Life’s Lessons Learned [2011], 68–69).
Folafolaga Aloaia 2. E le faapea e tatau lava ona tatou iloa ia tali uma, ae e tatau ona tatou iloa faamatalaga fou i mea ua tatou iloa
Na tuuina mai e Elder Paul V. Johnson o le Fitugafulu le fautuaga lenei i faiaoga o le talalelei:
Ata
Elder Paul V. Johnson
“E le o se mea leaga mo se tagata aoga le vaai atu e le iloa e le faiaoga le tali i mea uma, ae e iloa tali i fesili autu ma e i ai se molimau malosi. Ina ua fesili le agelu ia Nifae pe na ia iloa le faamaualalo o le Atua, sa tali Nifae, ‘Ua ou iloa e alofa o ia i ana fanau; e ui i lea, ou te le iloa le uiga o mea uma’ (1 Nifae 11:17). E tusa lava pe tatou te le iloa le tali i se fesili faapitoa, e mafai ona tatou faamanatu i a tatou tagata aoga ia mea tatou te iloa.
“O se tasi o luitau tatou te feagai, ae maise lava pe afai ua fai si umi o tatou faiaoga, o le manao e taofimau i faila tuai ma faamalamalamaga tuai. E sili atu ona tatou i ai i se tulaga lelei pe a tatou o faatasi ma le tulaga o loo i ai nei le Ekalesia. O se tasi o auala sili ona lelei e faia ai lenei mea, o le faamasani lea i mea e faaaoga i le potu o tala fou i le LDS.org (mormonnewsroom.org). …
“Sa faafaigaluega a’u i le seminare ma inisitituti i le taumafanafana o le 1978. Ia Iuni o lena taumafanafana, sa faasilasila mai ai le faaaliga e faapea, ua avanoa le perisitua i alii agavaa uma. Ia Aokuso o le tausaga lava lena, na saunoa mai ai Elder Bruce R. McConkie, o se tasi o le Korama a le Toasefululua, i le aufaigaluega o le seminare ma inisitituti i se faapotopotoga e tai pei o lenei. Sa ia faamamafa mai le auala na suia ai e le faaaliga lo tatou malamalama i le faafitauli. Sa Ia saunoa mai:
“‘Faagalo i mea uma na ou fai atu ai, po o mea na fai mai ai Peresitene Polika Iaga po o Peresitene George Q. Cannon po o ai lava na fai mai ai i aso ua mavae, e feteenai ma le faaaliga i le taimi nei. Sa matou talanoa atu ma se malamalamaaga faatapulaaina ma e aunoa ma le malamalama ma le poto lea ua oo mai i le lalolagi i le taimi nei.
“‘Tatou te maua a tatou upumoni ma lo tatou malamalama i le upu ma lea upu ma le mataupu ma lea mataupu. O lenei ua tatou faaopoopoina se lologa fou o le poto ma le malamalama i lenei mataupu patino, ma ua solo ese ai le pogisa uma ma manatu uma ma mafaufauga uma ua tuanai. Ua le toe i ai so latou taua.
“’E leai ma sina eseesega itiiti o se faamatalaga na faia e soo se tagata e uiga i le … mataupu a’o le’i oo i le aso muamua o Iuni o lenei tausaga (1978)’ (“All Are Alike unto God” [CES symposium on the Book of Mormon, Aug. 18, 1978], 2; LDS.org).
“Ia tatou o faatasi ma le malamalama ua tuuina mai ia i tatou” (“A Pattern for Learning Spiritual Things” [address to CES religious educators, Aug. 7, 2012], LDS.org).
Na faamatalaina mulimuli ane e nisi o sui o le Korama a Aposetolo e Toasefululua, o latou aafiaga ina ua maua mai le faaaliga i le aso 1 o Iuni, 1978. Mo se faataitaiga, na molimau mai Peresitene Gordon B. Hinckley, o se tasi o le Korama a le Toasefululua i le 1978:
Ata
Peresitene Gordon B. Hinckley
“Na i ai se lagona o le paia ma le faamamaina i totonu o le potu. Ia te au, sa pei na matala mai se ala i le va o le nofoalii faalelagi ma le perofeta na tootuli, ma augani atu i le Atua o le sa auai faatasi atu i ai ma lana Usoga. … Na oo mai le mana o le Agaga Paia iina i lena perofeta o se faamautinoaga e faapea, o le mea sa ia tatalo atu ai, sa sa’o, ma na oo i le taimi, ma na tatau nei ona faasafua atu faamanuiaga matagofie o le perisitua i alii agavaa uma i soo se mea e tusa lava po o le a le gafa.
“O alii uma i lena li’o, e ala i le mana o le Agaga Paia, sa iloaina lea lava mea e tasi. …
“… E leai se tasi o i matou sa i ai i lena taimi, sa tumau ai ni lagona tuai ina ua mavae lena aafiaga. Na faapena foi i le Ekalesia ia” (“Priesthood Restoration,” Ensign, Oke. 1988, 70).
Na faamaonia mai foi faapena e Elder Bruce R. McConkie o le Korama a Aposetolo e Toasefululua:
Ata
Elder Bruce R. McConkie
“I lenei tulaga, [ina ua maua mai le faaaliga i le Folafolaga Aloaia 2 ], ona o le finafinau ma le faatuatua, ma ona na oo mai le itula ma le taimi, na liligi mai ai e le Alii i lona agalelei le Agaga Paia i luga o le Au Peresitene Sili ma le Toasefululua i se auala faavavega ma le ofoofogia, e sili atu i soo se mea na oo muamua i soo se tasi na auai i lena taimi. Na oo mai le faaaliga i le Peresitene o le Ekalesia; sa faapea foi ona oo mai i tagata taitoatasi sa auai” (“All Are Alike unto God” [address to CES religious educators, Aug. 18, 1978], 3, LDS.org).