I le aso 8 o Mati, 1832, sa valaauina ai e le Alii ia Jesse Gause ma Sini Rikitone e avea ma fesoasoani o Iosefa Samita. E tasi le vaiaso mulimuli ane, i le aso 15 o Mati, 1832, na tuuina mai ai e le Alii le faaaliga ua faamaumauina i le Mataupu Faavae ma Feagaiga 81. O lenei faaaliga, na Ia faamalamalama mai ai le matafaioi o fesoasoani i le Peresitene o le Ekalesia, ma faataoto mai faamanuiaga mo i latou o e faamaoni i a latou auaunaga. Sa le’i tumau faamaoni Jesse Gause, ma na valaauina ai e le Alii ia Frederick G. Williams, o lona igoa lea ua faaalia nei i le Mataupu Faavae ma Feagaiga 81, e suia le tulaga o Uso Gause ai i le Au Peresitene. I le taimi o lenei faaaliga, sa ta’ua le Peresitene o le Ekalesia ma ona fesoasoani o le Au Peresitene o le Perisitua Maualuga. Na amata i le 1834, ona ta’ua ai i faaaliga ia le Peresitene ma ona fesoasoani o le Au Peresitene Sili (tagai i le MF&F 102:26–28).
Ua faamatala mai e le Alii le matafaioi o fesoasoani i le Au Peresitene Sili
A’o le’i amataina le vasega, tusi fesili nei i luga o le laupapa:
Aisea e tuu mai ai e le Alii ia i tatou ia valaauga i Lana Ekalesia?
O a ni faamanuiaga o le faataunuuina ma le faamaoni o se valaauga?
Ae faapefea pe a filifili se tagata ia le faamaoni i le faataunuuina o lona valaauga?
Amata le vasega i le valaauliaina o tagata aoga e tali i fesili o loo i luga o le laupapa. O se vaega o le talanoaga, atonu e te faamalamalama atu, e ui lava e mafai ona maua e se taitai o le Ekalesia se musumusuga e valaau se tagata o le Ekalesia i se tofiga faapitoa, ae e tuu atu lava i le tagata e mauaina le valaauga e tali atu ma le faamaoni i ai.
Valaaulia se tagata aoga e faitau leotele le folasaga o le vaega o le Mataupu Faavae ma Feagaiga 81. Fai atu i le vasega e mulimuli i le faitauga, ma vaavaai mo se faataitaiga o se tasi na valaauina e le Alii, ae sa le faamaoni i lona valaauga.
O ai na valaauina muamua e le Alii e avea ma se fesoasoani ia Iosefa Samita i le Au Peresitene o le Perisitua Maualuga?
Aisea na aveesea ai le valaauga o Jesse Gause?
Faamalamalama atu faapea, o Jesse Gause na valaauina e avea ma se fesoasoani i le Au Peresitene o le Perisitua Maualuga ia Mati 1832. I le aso 1 o Aokuso, 1832, sa alu ai o ia i se misiona faatasi ma Zebedee Coltrin. Ao i ai i lenei misiona, sa asiasi ai Uso Gause i lana ava ma taumafai e tauanau o ia e uiga i le upumoni, ae sa musu o ia e auai i le Ekalesia. O se taimi puupuu mulimuli ane, sa faapea ona ma’i tigaina ai Uso Coltrin ma toe foi atu i Katelani. Ae paga lea, sa le’i faamaeaina e Uso Gause lana misiona ma sa lei tumau faamaoni i le Ekalesia.
E tusa ai ma le folasaga o le vaega, o ai na valaauina e le Alii e suitulaga ia Jesse Gause?
Atonu e te manao e fautua atu i tagata aoga e faailoga le fuaitau lenei i le folasaga o le vaega: “O le faaaliga … e tatau ona manatu i ai o se laasaga agai i le faatulagaga aloaia o le Au Peresitene Sili.” Faamalamalama atu o le Peresitene o le Ekalesia ma ona fesoasoani (o le Au Peresitene o le Perisitua Maualuga) o le a le ta‘ua “o le Au Peresitene Sili” seia oo i le 1834 (tagai i le MF&F 102:26–28). Sa le’i faaalia mai e le Alii le faatulagaga atoa o Lana Ekalesia i le Perofeta i le taimi e tasi. Sa Ia faaalia mai vaega eseese o le faatulagaga pe a manaomia, ma ina ua saunia le Au Paia e maua ia mea.
Valaaulia se tagata aoga e faitau leotele le Mataupu Faavae ma Feagaiga 81:1–2. Fai atu i le vasega e mulimuli i le faitauga, ma vaavaai mo mea na aoaoina e le Alii ia Feterika G. Viliamu e uiga i le Au Peresitene o le Perisitua Maualuga.
E tusa ai ma le fuaiupu e 2, o le a le mea e umia e le Au Peresitene? (E tatau ona faailoa mai e tagata o le vasega i le upumoni lenei: O le Au Peresitene o le Perisitua Maualuga e umia ki o le malo o le Atua i le lalolagi. Atonu e te manao e fautua atu i tagata aoga e faailoga upu ma fuaitau o loo aoao mai ai lenei upumoni.)
Ina ia fesoasoani i tagata aoga ia malamalama i lenei aoaoga faavae, faamanatu atu ia i latou o “ki o le perisitua o le pule lea ua tuuina mai e le Atua i taitai perisitua e faatonu ai, faafoe ai, ma pulea ai, le faaaogaina o Lana perisitua i luga o le fogaeleele. O le faaaogaina o le pule o le perisitua e pulea e i latou o e umia ona ki (tagai i le MF&F 65:2; 81:2; 124:123). O i latou e umia ki o le perisitua ua i ai le aia tatau e pulefaamalumalu ai ma taitaia le Ekalesia i totonu o se puleaga.
“O Iesu Keriso o loo umia ki uma o le perisitua e faatatau i Lana Ekalesia. Na Ia faaee atu i luga o Ana Aposetolo taitasi ki uma e faatatau i le malo o le Atua i le fogaeleele. O le Aposetolo sinia o loo soifua, o le Peresitene o le Ekalesia, ua na o le pau lea o le tagata i luga o le fogaeleele ua faatagaina e faaaogaina ki uma o le perisitua” (Tusitaulima 2: Taitaiina o le Ekalesia [2010], 2.1.1).
O a mea e mafai ona faia e le Au Peresitene i ki o le perisitua? (Taitai ai le galuega a le Alii i luga o le lalolagi.)
Faaali atu se ata o le Au Peresitene Sili o loo i ai nei po o ni ata eseese o ona sui. Fai atu i tagata aoga pe afai e mafai ona latou ta‘u mai suafa o le Au Peresitene Sili.
Tusi le ulutala lenei i luga o le laupapa: O Se Fesoasoani i le Au Peresitene Sili.
Ata
Au Peresitene Sili
Mai lou malamalama, o a tiute ma matafaioi o le fesoasoani i le Au Peresitene Sili?
Valaaulia se tagata aoga e faitau leotele le Mataupu Faavae ma Feagaiga 81:3. Fai atu i le vasega e mulimuli i le faitauga, ma vaavaai mo aoaoga na tuuina mai e le Alii ia Feterika G. Viliamu e uiga i lona valaauga o se fesoasoani i le Au Peresitene Sili.
E tusa ai ma le fuaiupu e 3, o a mea sa tatau ona fai e Feterika G. Viliamu i le avea ai ma se fesoasoani i le Au Peresitene Sili? (Valaaulia se tagata aoga e lisi tali i luga o le laupapa i lalo o ulutala. (Atonu e te manao e faamalamalama atu, o fesoasoani i se au peresitene e lagolago ma faamalosiau i le peresitene.)
O le a sou manatu i le uiga o le, mo se fesoasoani ina ia “faamaoni i le fautuaina” o le peresitene?
Ina ia fesoasoani i tagata aoga ia malamalama atili i le uiga o le faamaoni i le fautuaga, valaaulia se tagata aoga e faitau leotele le saunoaga lenei a Peresitene Gordon B. Hinckley. Fai atu i le vasega e faalogologo pe faapefea e se fesoasoani i le au peresitene ona fautua faatasi ma le peresitene.
Ata
Peresitene Gordon B. Hinckley
“[O se fesoasoani] o se lagolago i lona peresitene. …
“O le avea o se lagolagosua, o le fesoasoani e le o le peresitene. Na te le tauaveina le tiute ma fai ana lava fuafuaga e aunoa ma lona peresitene.
“I fonotaga a le au peresitene, e saoloto fesoasoani taitasi e faaali ona manatu i mataupu uma ua oo mai i luma o le au peresitene. Peitai, o le aia tatau a le peresitene le faia o le faaiuga, a o le tiute o fesoasoani o le lagolagoina o ia i lena faaiuga. Ona avea ai lea o lana faaiuga ma a latou faaiuga, e tusa lava po o a nisi manatu sa i ai muamua” (“O Loo I Ai i Fesoasoani le Saogalemu,” Liahona, Ian. 1991, 53).
E tusa ai ma le saunoaga a Peresitene Hinckley, e faapefea e se fesoasoani i se au peresitene ona fefautuaai ma le peresitene?
O a ni auala e ono fesoasoani ai le malamalama i auala e tatau ona faamaoni ai i le fautuaina, ia se tasi o loo auauna o se fesoasoani i soo se au peresitene i le Ekalesia?
Valaaulia tagata aoga e mafaufau e uiga i ni taimi na latou auauna ai (pe na vaaia isi o auauna) i se au peresitene o le Ekalesia. (Atonu e te manao e faailoa atu o se au epikopo e galulue o se au peresitene o le uarota.) Fai atu ia te i latou e mafaufau i mea na latou faia pe na faia e isi ina ia mataalia ai le tuuina atu o le lagolago i au peresitene i a latou korama o le perisitua po o vasega a Tamaitai Talavou. Valaaulia ni nai tagata aoga e faasoa mai o latou manatu i le vasega.
Valaaulia tagata aoga e faitau filemu le Mataupu Faavae ma Feagaiga 81:4, ma vaavaai mo mea na folafola mai e le Alii ia Feterika G. Viliamu, pe afai o le a faamaoni o ia i lona valaauga. Atonu e te manao e faamalamalama atu o le fuaitau “uunai lautele ai le mamalu o … lou Alii” i le anotusi lea e faaalia ai e faapea, o le faamaoni i o tatou valaauga, e mafai ona tatou fesoasoani ai e taitai tagata e ava ma tapuai i le Alii.
E tusa ai ma le fuaiupu e 4, o le a se mea e mafai ona tatou faia pe afai tatou te faamaoni i o tatou valaauga? (E ui atonu e faaaoga e tagata aoga isi upu, ae o a latou tali e tatau ona atagia mai ai le mataupu faavae lenei: Afai tatou te faamaoni i o tatou valaauga, e mafai ona tatou faia se mea lelei silisili atu mo isi ma faateleina ai le mamalu o le Atua. I le faaaogaina o upu a tagata aoga, tusi lenei mataupu faavae i luga o le laupapa.)
E mafai faapefea e le auauna faamaoni i o tatou valaauga o le Ekalesia ona fesoasoani tatou te faia ai se mea lelei silisili atu mo isi tagata?
E mafai faapefea e le auauna faamaoni i o tatou valaauga o le Ekalesia ona fesoasoani e lagolago le mamalu o le Atua?
Valaaulia tagata aoga e mafaufau i se taimi na latou vaaia ai se tagata o faia mea lelei silisili atu mo isi e ala i le auauna faamaoni i lona valaauga. Valaaulia ni nai tagata aoga e faasoa mai mea na latou matauina i le vasega.
Valaaulia se tagata aoga e faitau leotele le Mataupu Faavae ma Feagaiga 81:5. Fai atu i le vasega e mulimuli i le faitauga, ma vaavaai mo ni fautuaga faaopoopo na tuuina mai e le Alii ia Feterika G. Viliamu.
E faavae i mea na fetalai mai e le Alii ia Feterika G. Viliamu i le fuaiupu e 5, o le a se mea e mafai ona tatou aoao ai e uiga i le faamaoni i o tatou valaauga o le Ekalesia po o le avea ma tagata faamaoni o le Ekalesia?
O le a lo outou manatu i le uiga o le “fesoasoani i e vaivai, sii i luga lima ua tautau i lalo, ma faamalosi tulivae ua vaivai”?
Valaaulia se tagata aoga e faitau leotele le saunoaga a Marvin J. Ashton o le Korama a Aposetolo e Toasefululua. Fai atu i le vasega e faalogologo mo malamalamaaga i le uiga o nei fasifuaitau.
Ata
Elder Marvin J. Ashton
“I le Mataupu Faavae ma Feagaiga 81:5, e ono mafai ona faauigaina le fuaiupu e pei ona fautuaina ai Feterika G. Viliamu e le Alii ia faamalosi atu i e ua vaivai (‘fesoasoani i e vaivai’), faalototele atu i e ua faavaivai (‘sii i luga lima ua tautau i lalo’) ma tuu atu le faalaeiau ma le faamalosi i e ua maua i tulivae vaivai ma loto matatau” (“Faamalosia Tulivae Vaivai,” Liahona, Ian. 1992, 83).
O a nisi o auala e mafai ona tatou “fesoasoani i e vaivai, sii i luga lima ua tautau i lalo, ma faamalosi tulivae ua vaivai”? (Tusi tali a tagata o le vasega i luga o le laupapa.)
O le a se taimi na siitia pe na faamalosia ai oe e se isi tagata?
Lu’i tagata aoga e filifili se aitema mai le lisi o tali o loo i luga o le laupapa ma saili ni avanoa e fesoasoani ai ia i latou o siomia ai i latou.
Valaaulia se tagata aoga e faitau leotele le Mataupu Faavae ma Feagaiga 81:6-7. Fai atu i le vasega e mulimuli i le faitauga, ma vaavaai mo faamanuiaga na folafola mai e le Alii ia Feterika G. Viliamu, pe afai o le a faamaoni o ia seia oo i le iuga. Fai atu i tagata aoga e lipoti mai mea ua latou mauaina.
Molimau atu i le taua o le faamaoni i o tatou valaauga ma fesoasoani ia i latou o siomia i tatou, ina ia mafai foi ona latou agavaa mo le ola e faavavau.
Na faamalamalama mai e Peresitene Harold B. Lee le matafaioi taua o fesoasoani i le Au Peresitene Sili:
Ata
Peresitene Harold B. Lee
“A o ou mafaufau i le matafaioi a Peresitene Tanner ma a’u lava ia o ni fesoasoani o [Peresitene Iosefa Filitia Samita], ou te mafaufau i se tulaga i le olaga o Mose, a’o faapei uma lava fili o le ekalesia i na aso o nei foi aso. Sa latou taufaamatau e faatoilalo ma toso i lalo ma taofia le galuega a le ekalesia. A o nofo Mose i luga o se mauga ma sii i luga lona tootoo o lana pule, po o ki o lona perisitua, sa manumalo Isaraelu i o latou fili; ae ao faagasolo pea le aso, sa oo ina mamafa ona lima ma amata ona tautau i ona autafa.
“O lea sa sii ai i luga e [Arona ma Huro] ona lima ina ia le vaivai ma le pau ai i lalo le tootoo. E lagolagoina o ia ina ia le mafai ona manumalo fili o le ekalesia i le au paia a le Atua Silisili Ese. (Tagai i le Esoto 17:8–12.)
“Ou te manatu o le tiute lena e tatau ona ma faataunuuina ma Peresitene Tanner. E mafai ona faasolosolo vaivai aao o Peresitene Samita. Atonu e iu ina faatautau i nisi o taimi ona o le mamafa o ona tiutetauave; ae a maua uuina ona aao, ma a’o ma taitai i lalo o lana taitaiga, i ona tafatafa, o le a le manumalo faitotoa o seoli e faasaga ia te oe ma faasaga ia Isaraelu” (i le Conference Report, Oke. 1970, 153).
I le konafesi aoao o le Ekalesia ia Aperila 1994, na faailoa mai ai e Peresitene Gordon B. Hinckley, o le sa avea ma Fesoasoani Muamua i le Au Peresitene Sili, e faapea, o Peresitene Ezra Taft Benson, le Peresitene o le Ekalesia i lena taimi, sa “mafatia tele mai aafiaga o le soifua matua ma gasegase ma [sa] le’i mafai ona faataunuu ai tiute taua o lona tofi paia.” Ona faamalamalama mai lea e Peresitene Hinckley:
Ata
Peresitene Gordon B. Hinckley
“A gasegase le Peresitene pe ua le mafai ona ia galue atoatoa i tiute uma o lona tofi, o ona fesoasoani faatasi e toalua, o le Korama lena a le Au Peresitene Sili. O i la’ua e faia galuega o aso taitasi a le Au Peresitene Sili. I tulaga faapitoa ese lava, a na o se toatasi ua mafai ona galue pea, e mafai ona ia galue i le pule o le tofiga o le Au Peresitene Sili e pei ona faatuia mai i le Mataupu Faavae ma Feagaiga, vaega e 102, fuaiupu 10–11” (“O Le Atua o loo i le Ao o Lenei Ekalesia,” Liahona, Iulai 1994, 71).