Ia Tesema 1830, na faaali mai ai e le Alii i le Perofeta o Iosefa Samita se poloaiga mo le Ekalesia e faapotopoto i Ohaio (tagai i le MF&F 37). I le 1831 na tuuina mai ai e le Alii le faaaliga ua faamaumauina nei i le Mataupu Faavae ma Feagaiga 38, lea na faamalamalama mai ai nisi o mafuaaga pe aisea e tatau ai ona faapotopoto le Au Paia i Ohaio. Sa Ia tuuina mai foi poloaiga e taiala ai i latou i le faapotopotoina. O lenei lesona o loo aofia ai fuaiupu muamua e 16 o le vaega e 38. I le faaaliga lenei, sa ta‘u mai ai e Iesu Keriso i tagata o le Ekalesia, sa i ai o Ia i lo latou lotolotoi. Na Ia faamalmalamaina mai foi po o ai o le a i ai i Lona Afio Mai Faalua, lapataiina le Au Paia i mea matautia, ma tuuina mai i le Au Paia faamalosiauga.
Ua ta’u mai e Iesu Keriso i tagata o Lana Ekalesia, o loo i ai o Ia i lo latou lotolotoi
Valaaulia tagata o le vasega e lisi i a latou api o le vasega po o api talaaga mo le suesueina o tusitusiga paia, ni poloaiga latou te manatu e faigofie ona latou usitaia. Ona valaaulia lea o i latou e mafaufau po o le fea poloaiga e faigata ona latou usitaia ma pe aisea. (Atonu foi e tusi i lalo e tagata o le vasega nei manatu pe a latou lagona le lagolelei e fai ai.)
Aisea atonu e faigata ai ona tatou usitai i nisi o poloaiga?
O le a se mea na faaosofiaina oe e tausia poloaiga ia e faigata ona e usitaia?
Faamanatu atu i tagata o le vasega, ia Tesema 1830, na poloaiina ai e le Alii le Au Paia i Niu Ioka e faapotopoto i Ohaio (tagai i le MF&F 37). Mo nisi o nei tagata o le Ekalesia, sa faigata tele ona usitai i lenei poloaiga. I le aso 2 o Ianuari, 1831, na feiloai ai le Au Paia mai paranesi eseese i Niu Ioka i le maota o Pita Uitimera le Matua, mo le konafesi lona tolu a le Ekalesia. I le taimi o le konafesi, sa fesili ai nisi o tagata o le Ekalesia e uiga i le poloaiga e siitia atu i Ohaio.
Aisea e te manatu, atonu na faigata ai mo nisi o le Au Paia ona usitai i le poloaiga e tuua Niu Ioka ae faapotopoto at i Ohaio?
Atonu e manaomia ona e faamalamalama atu, e le o tagata uma sa i ai i le konafesi na malamalama i le atamai o lenei poloaiga. Sa le taliaina e nisi o se afioga a le Alii, ae o isi sa mumusu e tuua a latou faatoaga faamanuiaina ma tulaga lagolelei mo tulaga le mautonu o se nofoaga fou. Sa i ai moni se avanoa o le a gau ai tupe a le toatele i o latou fanua, ma o nisi e ono le mafai ona faatau atu o latou fanua.
Faamalamalama atu e faapea, i le taimi o le konafesi ia Ianuari 1831, sa tatalo ai Iosefa Samita i le Alii ina ia iloa atili e uiga i le poloaiga e faapotopoto i Ohaio. Sa tali mai le Alii i le faaaliga ua faamaumauina nei i le Mataupu Faavae ma Feagaiga 38. Faailoa atu i tagata o le vasega, a o latou suesue i lenei faaaliga, o le a latou aoao ai i upumoni e mafai ona fesoasoani ia i latou a o latou faia filifiliga e uiga i poloaiga e faigata ona latou usitaia.
Valaaulia se tagata o le vasega e faitau leotele le Mataupu Faavae ma Feagaiga 38:1–3 . Fai atu i le vasega e mulimuli i le faitauga, ma vaavaai mo upumoni e mafai ona tatou aoaoina e uiga ia Iesu Keriso. A o tali mai tagata o le vasega, atonu e te manao e fautua atu ia latou faailogaina upu ma fuaitau e fesootai ma a latou tali.
O a ni upumoni e mafai ona tatou aoaoina e uiga ia Iesu Keriso mai nei fuaiupu? (A o tali mai tagata o le vasega, fesoasoani ia latou iloa le aoaoga faavae lenei: E silafia e Iesu Keriso mea uma.)
E ono mafai faapefea e le malamalama e silafia e Iesu Keriso mea uma, ona fesoasoani i le Au Paia o e sa poloaiina e siitia atu i Ohaio?
E mafai faapefea ona fesoasoani lenei upumoni ia i tatou i taimi tatou te tauivi ai e usitai i poloaiga a le Alii?
Faamalamalama atu e faapea, a o lumanai le mauaina o lenei faaaliga, sa galue ai Iosefa Samita i le faafouga musuia o le Tusi Paia, ma na faapea ona maua ai le mea ua ta’ua nei o le Mose 6–7 i le Penina Tau Tele. O nei mataupu o loo ta’u mai ai se tala e uiga i se perofeta na igoa ia Enoka ma lona nuu. Ona o lo latou amiotonu ma le lotogatasi, na ta’ua ai e le Alii nei tagata o Siona. Valaaulia tagata o le vasega e faitau filemu le Mataupu Faavae ma Feagaiga 38:4 ma vaavaai mo le mea na faia e le Alii mo Enoka ma lona nuu. Valaaulia tagata o le vasega e lipoti mai mea ua latou mauaina. Atonu e manaomia ona e faamalamalama atu, a faaaogaina e le Alii le fasifuaitau “loʼu lava loto”, sa Ia faatatau i Lona afioaga.
E tusa ai ma le fuaiupu e 4, o le a le mea e tasi sa fai e le nuu o Enoka na mafua ai ona ave i latou e le Alii i luga i le lagi? (Sa latou talitonu i Lona suafa.)
O le a le mea na fetalai mai le Faaola sa Ia faia mo i latou o e na talitonu i Lona suafa? O a ni ou lagona e uiga i le Faaola ona o lena mea?
Valaaulia se tagata o le vasega e faitau leotele le Mataupu Faavae ma Feagaiga 38:5-7 . Fai atu i le vasega e mulimuli i le faitauga, ma vaavaai po o le a le fetalaiga a Keriso e uiga i le mea o loo i ai o Ia.
O fea na fetalai mai Iesu Keriso o loo i ai o Ia?
O le a se taimi na e lagonaina ai sa latalata atu le Faaola e ui lava e le mafai ona e vaaia o Ia i ou mata?
Ua faamatala mai e le Alii e o le a i ai i Lona Afio Mai Faalua
Faaali atu le ata O Le Afio Mai Faalua (Tusi Ata o le Talalelei [2009], nu. 66; tagai foi i le LDS.org). Faamalamalama atu, a’o fesoasoani le Faaola i le Au Paia i Niu Ioka ia malamalama i le taua o le faapotopoto i Ohaio, sa Ia fetalai foi e uiga i Lona Afio Mai Faalua.
Ata
O Le Afio Mai Faalua
Valaaulia ni nai tagata o le vasega e feauauai i le faitauina leotele o le Mataupu Faavae ma Feagaiga 38:8–10. Valaaulia le vasega e mulimuli i le faitauga, ma vaavaai mo le mea na faaali mai e le Faaola e uiga i Lona Afio Mai Faalua Atonu e fesoasoani le faamalamalama atu o i latou o e “gafatiaina le aso” (MF&F 38:8) o le Afio Mai Faalua, o i latou o e, nai lo le faaumatiaina, o le a mafai ona i ai pea i le lalolagi ma le Faaola pe a afio mai o Ia.
E faapefea ona fesoasoani nei fuaiupu ia tatou malamalama i le taua o le faamamaina ma le mama a’o lei oo i le Afio Mai Faalua?
Valaaulia tagata o le vasega e faitau filemu le Mataupu Faavae ma Feagaiga 38:11–12 ma vaavaai mo le faamatalaina e le Alii o tulaga o le a tutupu i le lalolagi a o lumanai le Afio Mai Faalua. Ona fai atu lea i tagata o le vasega e lipoti mai mea ua latou aoaoina. (Ina ia fesoasoani i tagata o le vasega ia malamalama i nei fuaiupu, atonu e te manao e faamalamalama atu o le faamalamalamaga o agelu o loo faatali e o loo faatalitali e “sele i lalo le lalolagi” o se faatatauga i le faataoto i le Feagaiga Fou o le saito ma le titania [tagai i le Mataio 13:24–30; MF&F 86:1–7], lea e faapotopoto ai le saito [o i latou o e ua amiotonu] a’o lei susunuina le titania [o i latou o e amioleaga].)
O a ni faamaoniga o loo e vaaia o loo i ai tulaga e pei ona faamatalaina i le fuaiupu e 11 i aso nei?
O a ni mea e mafai ona tatou faia ina ia tumau ai le mama i le lotolotoi o nei tulaga?
Ua lapatai e le Alii le Au Paia i mea matautia ma tuuina mai ia i latou faamalosiauga
Faamalamalama atu e faapea, e le gata i le fetalai mai e uiga i Lona Afio Mai Faalua, na tuu mai foi e le Alii se lapataiga e faatatau i tulaga matautia sa feagai ma le Au Paia. Faasino atu tagata o le vasega i le Mataupu Faavae ma Feagaiga 38:12 ma fai atu le fesili lenei:
I le faaiuga o le fuaiupu e 12, o a mea na aoao mai e le Alii e uiga i le fili o le Au Paia?
Fesoasoani i tagata o le vasega ia malamalama o le fuaitau “ua ʼau faatasi le fili” e mafai lava ona faatatau i le mea moni e faapea, ua tuufaatasia Satani ma ana autau e faasaga i le Au Paia i aso e gata ai. E mafai foi ona faatatau i tagata o e na fai ma fili o le Au Paia i le taimi na tuuina mai ai lenei faaaliga. Fai atu i se tagata o le vasega e faitau leotele le Mataupu Faavae ma Feagaiga 38:13 , ma valaaulia tagata o le vasega e vaavaai po o a faamoemoega o lenei fili tuufaatasi. Valaaulia tagata o le vasega e lipoti mai mea ua latou mauaina.
O le a se mea e mafai ona fai e le Alii pe a tatou i ai i se tulaga matautia? (E mafai ona tuuina mai e tagata o le vasega ni tali eseese. Ia mautinoa e faamamafa atu le mataupu faavae lenei, ma tusi i luga o le laupapa: E mafai ona lapatai i tatou e le Alii e uiga i se mea matautia.)
Tuu atu i tagata o le vasega ni nai minute e mafaufau loloto ai i savali ua tuuina mai ia i tatou e perofeta a le Alii, i le konafesi aoao ma e ala i lomiga a le Ekalesia.
O a ni auala e avea ai nei savali o ni lapataiga mai le Alii, e uiga i tulaga matautia faaleagaga pe faaletino tatou te fetaia’i?
O a ni isi o auala na lapataiaina ai oe i mea matautia faaleagaga pe faaletino?
Valaaulia tagata o le vasega e faitau filemu le Mataupu Faavae ma Feagaiga 38:14–15 ma vaavaai mo auala na faamalosiauina ai e le Alii le Au Paia i lenei vaitaimi o le tulaga matautia ma le le mautonu. Valaaulia tagata o le vasega e lipoti mai mea ua latou mauaina.
Valaaulia se tagata o le vasega e faitau leotele le Mataupu Faavae ma Feagaiga 38:16 . Fai atu i le vasega e mulimuli i le faitauga, ma vaavaai mo mea na tuuina mai e le Alii i le Au Paia mo lo latou faaolataga. Fesoasoani i tagata o le vasega ia malamalama o le poloaiga e faatatau i ai o le poloaiga e siitia ese Niu Ioka i Ohaio.
Na mafai faapefea ona avea le poloaiga e siitia ese mai Niu Ioka o se faaolataga faaletino mo le Au Paia?
Na mafai faapefea e le poloaiga e faapotopoto i Ohaio ona avea ma o latou faaolataga faaleagaga?
Faaopoopo atu i le mataupu faavae o loo i luga o le laupapa ina ia faitauina faapenei: E mafai ona lapataia i tatou e le Alii e uiga i tulaga matautia, ma tuu mai ia i tatou poloaiga mo lo tatou puipuiga.
E mafai faapefea e le tausia o poloaiga a le Alii ona puipuia i tatou?
O le a se taimi na e lagonaina ai sa puipuia oe e ala i le tausia o se poloaiga? (Atonu e te manao e tuu atu i tagata o le vasega se taimi e mafaufau loloto ai i a latou tali a o lei fai atu i ai e tali mai.)
Valaaulia tagata o le vasega e toe manatunatu i le gaoioiga i le amataga o le vasega, lea sa latou mafaufau ai i ni poloaiga e faigata ona latou usitaia. Fai atu i ai e mafaufau pe mafai faapefea ona avea nei poloaiga ma ni faamanuiaga mai le Alii, e puipuia ai i latou mai tulaga matautia faaleagaga pe faaletino.
E mafai faapefea e le malamalama i le upumoni ua tusia i luga o le laupapa, ona uunaia oe e usitai i poloaiga a le Alii, aemaise lava pe a foliga mai o na poloaiga e faigata ona usitaia?
Faaiu i le valaaulia o tagata o le vasega e faasoa mai a latou molimau e uiga i le gafatia e le Alii ona lapatai i tatou i faigata, ma tuuina mai poloaiga ia, afai e usitaia, o le a tatou maua ai le puipuiga. Atonu foi e te manao e molimau atu e uiga i lenei upumoni.
“A o ou tamaitiiti, sa ou iloaina pe ou te manatu foi sa ou iloa, o poloaiga a le Alii o Ana tulafono ia ma aiaiga e taiala ai au. Sa ou manatu na ou iloaina i le le usitaia o na tulafono, o le a mulimuli mai ai le faasalaga. … A a’o agai ina ou matua, sa ou aoaoina le lesona mai le vaai atu i se isi itu, o lea la ia te a’u lava ia o tulafono a le Alii, … o se musika malie lea o le siufofoga o lo tatou Tama i le lagi i Lona alofa mutimutivale mo i tatou. O ni fautuaga ma apoapoaiga a se matua alofa, o Lē ua sili atu ona popole mo lo tatou soifua manuia nai lo le mea e mafai ona manatu ai matua faalelalolagi, ma o le taunuuga o na fautuaga sa foliga mai ia te au i nisi taimi o se tulafono matuia, ua avea nei ma fautuaga alofa ma le agalelei a se Tama Faalelagi e tumu i le poto. Ma o lea la ou te fai atu ai, e le faigata ia te au ona talitonu e sili ia te au le tausia o poloaiga a le Atua” (Aoaoga a Peresitene o le Ekalesia: Siaosi Alapti Samita [2011], 198–99).