I le tautotogo o le 1834, sa i ai faafitauli tautupe a le Ekalesia, ma sa toilalo taumafaiga e ao mai ni tupe mo lona toomaga. Ia Mati 1832, na faatulaga ai e taitai o le Ekalesia se faalapotopotoga na ta’ua o le Kamupani Tuufaatasi e taulimaina taumafaiga faaletupe, fefaatauaiga ma pisinisi i se ala ina ia fesoasoani ai i le faatuina o Siona ma tausia ai e matitiva (tagai i le MF&F 78). Ia Aperila 1832, sa fono ai Iosefa Samita ma isi faatasi ma taitai o le Ekalesia i Misuri ma faatulaga ai se lala o le Kamupani Tuufaatasi i le Itumalo o Jackson (tagai i le MF&F 82). O nei lala e lua—e tasi i Ohaio ma le tasi i Misuri— sa faaauauina mo le lua tausaga. I se fonotaga na faia i le aso 10 o Aperila, 1834, na filifili ai sui o le kamupani e soloia le faalapotopotoga. Ae peitai, na maua e Iosefa Samita se faaaliga pe a ma le lua vaiaso mulimuli ane, “e toe faatulaga le faatulagaga [kamupani]” ma “ia vaevaeina ana meatotino i sui o le kamupani ia avea ai ma tausimea” (faatomuaga i le MF&F 104). I lalo o le taitaiga a Iosefa Samita, na toe suia ai le faaupuga, “Kamupani Tuufaatasi” i le “Faatulagaga Autasi” i le faaaliga lenei. Na fautuaina foi e le Alii ia taitai o le Ekalesia e uiga ia latou aitalafu ma faatonuina tagata uma o le Ekalesia i le ala sa tatau ona latou tausia ai e matitiva.
Ua tuuina mai e le Alii ia faatonuga e faatatau i le Faatulagaga Autasi
Tuu se mea faitino mamafa (e pei o se tusi tele po o se ma’a) i le pito i luma o le potuaoga. Valaaulia se tagata aoga e sii le mea faitino e faaaoga ai le tamatamailima e tasi. E faigata pe le mafai foi ona fai lenei mea, ae tuu pea i le tagata aoga e taumafai. Ona faataga lea o le tagata aoga e valaaulia isi tagata aoga e fesoasoani e sii le mea faitino. E tatau ona folafola atu tagata aoga e fesoasoani i ai seia oo ina masii a’e le mea faitino, ma e tatau foi ona latou faaaogaina na o le tamatamailima e tasi. Faataga le tagata aoga muamua e faaauau pea ona valaaulia isi tagata aoga seia oo ina mafai ona latou siia le mea faitino.
O le a le mea sa manaomia e sii ai le mea faitino mamafa? (O tali e mafai ona aofia ai le galulue faatasi, lotogatasi, ma isi lava mea.)
Faamalamalama atu e faapea, i aso popofou o le Ekalesia, o faafitauli tautupe sa o ni avega mamafa mo le Ekalesia. Ia Mati ma Aperila 1832, na faatonuina ai e le Alii ia taitai o le Ekalesia e faatulaga le Kamupani Tuufaatasi, lea na osifeagaiga ai ona sui auai e galulue faatasi ma ia nafa ma le vaaiga o le faagaoioiga o fefaatauaiga ma le lolomiga o [tusi ma mea e faaaoga] a le Ekalesia, ina ia faaitiiti ai aitalafu a le Ekalesia, tausia ai e matitiva, ma faalautele ai le galuega a le Alii. O lenei faalapotopotoga sa muai taua o le Kamupani Tuufaatasi (tagai i le folasaga o le vaega 78, 82, ma le 104 i le lomiga o le 2013 o le Mataupu Faavae ma Feagaiga). E oo ane i le tautotogo o le 1834, ua mafaufau taitai o le Ekalesia e faataape le kamupani ona o aitalafu. I le aso 23 o Aperila, 1834, na maua ai e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 104, lea na faaali mai ai e le Alii mea na tatau ona fai i le Kamupani Tuufaatasi ma ana meatotino.
Valaaulia se tagata aoga e faitau leotele le folasaga o le Mataupu Faavae ma Feagaiga 104. Fai atu i le vasega e mulimuli i le faitauga, ma vaavaai mo le mea na finagalo le Alii i taitai o le Ekalesia e fai i le Kamupani Tuufaatasi. (A o lei faitau tagata aoga, faamalamalama atu faapea, na faatonuina mulimuli ane e Iosefa Samita e sui le faaupuga “Kamupani Tuufaatasi” i le “Faatulagaga Autasi” i le faaaliga ua lomiaina.) Fai atu i tagata aoga e lipoti mai mea ua latou mauaina.
Valaaulia se tagata aoga e faitau leotele le Mataupu Faavae ma Feagaiga 104:1–4. Fai atu i le vasega e mulimuli i le faitauga ma faailoa mai se tasi o mafuaaga mo faafitauli o le Faatulagaga Autasi. Atonu e manaomia lou faamalamalama atu faapea, i le fuaiupu e 4, o le upu matapeʼapeʼa e faatatau i se manao manatu faapito ia maua se mea, e masani lava o se mea e anaina e se isi tagata.
O a nisi o mea na solia e le usoga ona o le matape’ape’a po o le manaolasi?
Faamanatu i tagata aoga le lesona faatino i le amataga o le lesona. Fai atu ia te i latou e mafaufau i le mea na semanu e tupu pe ana faapea na folafola atu nisi o tagata aoga e fesoasoani ona toe sui lea o o latou mafaufau ma filifili e savavali ese a’o sii i luga le mea faitino.
Otooto le Mataupu Faavae ma Feagaiga 104:5–10 i le faamalamalama atu e faapea, na folafola mai le Alii o taunuuga o le solia o feagaiga e o faatasi ma le Faatulagaga Autasi, o le a aofia ai le fetuu, ma le vavae ese mai le Ekalesia (tagai foi i le MF&F 78:11–12; 82:11–21).
Valaaulia tagata aoga e faitau lemu le Mataupu Faavae ma Feagaiga 104:11–13, ma vaavaai mo le mea na fetalai mai le Alii e tatau ona maua e tagata taitoatasi o le Faatulagaga Autasi. Fai atu i tagata aoga e lipoti mai mea ua latou mauaina. Atonu e manaomia ona e faamalamalama atu o se tausimea o se tagata ua tuuina atu i ai le tiutetauave mo meatotino e ana e se isi tagata.
E tusa ai ma fuaiupu e 12-13, aisea na tofia ai e le Alii se mea e tausia e tagata taitasi o le Faatulagaga Autasi?
Valaaulia se tagata aoga e faitau leotele le Mataupu Faavae ma Feagaiga 104:14. Fai atu i le vasega e mulimuli i le faitauga, ma vaavaai po o ai na anaina le fanua lea na fesootai ma le Faatulagaga Autasi.
O ai na anaina le fanua lea sa tuuina atu i sui auai o le Faatulagaga Autasi? (A uma ona tali mai tagata aoga, tusi le upumoni lenei i luga o le laupapa: Na foafoaina e le Alii le lalolagi, ma o mea uma o loo i ai o a Ia lea.)
E mafai faapefea e lenei upumoni ona faatosinaina le auala e te tagai ma faaaoga ai au mea uma?
Valaaulia se tagata aoga e faitau filemu le Mataupu Faavae ma Feagaiga 104:15–18. Fai atu ia te i latou e faailoa mai po o a auala na faatonuina ai e le Alii ia Ana tausimea e faaaoga ai mea o le lalolagi.
O le a le auala e finagalo le Alii e tausia ai Lana Au Paia?
O le a sou manatu i le uiga o le “e faaea ai e matitiva, i le faamaulaloina o e mauʼoa”?
Ina ia fesoasoani i tagata aoga ia malamalama i le uiga o lenei faamatalaga, valaaulia se tagata aoga e faitau leotele le faamalamalamaaga lenei mai ia Elder Joseph B. Wirthlin o le Korama a Aposetolo e Toasefululua:
Ata
Elder Joseph B. Wirthlin
“O le auala a le Alii e aofia ai le fesoasoani i tagata ia fesoasoani ia i latou lava. E faaeaina e matitiva aua e galulue mo fesoasoani le tumau latou te maua, e aoaoina i latou i mataupu faavae tonu, ma latou mafai ona faaeaina i latou lava mai le tulaga matitiva, i le faalagolago ia i latou lava. E faamaulaloina e mauoa aua ua latou lotomaualalo e tufatufa atu ma le limafoai a latou mea uma i e ua le tagolima” (“Uelefea Musuia a le Ekalesia,” Liahona, Iulai 1999, 90).
O a ni mataupu faavae o loo aoao mai e fuaiupu e 17–18 e uiga i lo tatou tiutetauave e fesoasoani i isi? (E mafai ona faailoa mai e tagata aoga ni mataupu faavae eseese, e aofia ai mea nei: Tatou te tali atu i le faaaogaina o mea ua tuuina mai e le Alii ia i tatou e fesoasoani atu ai i isi. Tusi lenei mataupu faavae i luga o le laupapa.)
Valaaulia tagata aoga e mafaufau i “e matitiva ma e le tagolima” e le gata o i latou o e manaomia le fesoasoani tautupe ae o i latou foi o e manaomia le fesoasoani faaleagaga, faalelagona, faalemafaufau, ma faaleagafesootai. E faapena foi, e mafai ona tatou mafaufau i a tatou mea e tele e sili atu nai lo na o le tupe po o mea faaletino ua tatou maua. O a tatou mea e tele e aofia ai o tatou taimi, taleni, malamalama, molimau, ma tomai.
Aisea e te manatu e taua ai ona faasoa atu a tatou mea e tele ia i latou e manaomia le fesoasoani?
E mafai faapefea ona tatou fesoasoani atu i isi i le ala a le Alii?
Valaaulia tagata aoga e mafaufau loloto i a latou taumafaiga ina ia fesoasoani i e matitiva ma e le tagolima. Fai atu ia te i latou e tusi se sini pe o le a faapefea ona latou faaaogaina mea ua tuuina mai e le Alii ia i latou, e fesoasoani ai i se tasi o manaomia le fesoasoani.
Ua tuuina mai e le Alii ia faatonuga e faatatau i le Faatulagaga Autasi, tulaga faatausimea, ma le faleteuoloa
Otooto le Mataupu Faavae ma Feagaiga 104:19–53 i le faamatala atu e faapea, na tuuina mai e le Alii ni faatonuga patino e uiga i tulaga faatausimea na tofiaina atu i sui auai o le Faatulagaga Autasi. Tusi le faamatalaga lenei i luga o le laupapa: Mataupu Faavae ma Feagaiga104:23, 25, 31, 33, 35, 38, 42, 46. Fai atu i tagata aoga e faitau filemu nei fuaiupu, ma vaavaai mo se mamanu i folafolaga a le Alii i tagata taitasi o le faatulagaga. Valaaulia tagata aoga e lipoti mai mea ua latou maua.
Fai atu i tagata aoga po o le fea o upu po o fasifuaitau o loo ta’ua soo i nei fuaiupu. Faailoa atu o le fuaitau “o le tulaga e oo i ai” o lona uiga “a faapea” po o le “e tusa ai.”
O le a se mea e mafai ona aoao mai e lenei fuaitau ia i tatou i auala e faia ai e le usiusitai se eseesega i faamanuiaga tatou te maua?
Tusi i luga o le laupapa A faapea tatou te lotomaualalo ma faamaoni, o le a …e le Alii …
Fai atu i tagata aoga pe faapefea ona latou faaumaina le mataupu faavae lenei. (Faaaoga a latou upu e faauma ai le mataupu faavae le uma o loo i luga o le laupapa. Mo se faataitaiga: A faapea tatou te lotomaualalo ma faamaoni, o le a faateleina e le Alii o tatou faamanuiaga.)
O le a se taimi na e vaai ai na faamanuiaina se tasi ona o le faamaoni i o latou tiutetauave i le Alii?
Valaaulia tagata aoga e mafaufau pe mafai faapefea ona latou faamaoni i tiutetauave ua tuuina mai e le Alii ia i latou.
Otooto le Mataupu Faavae ma Feagaiga 104:54–77 i le faamalamalama atu e faapea, na tuuina mai e le Alii faatonuga mo le faatuina o ofisa o tupe e malupuipuia ai tupe o le a faaaogaina mo le manuia o le Ekalesia, e pei o le lolomiina o tusitusiga paia.
Ua faatonu e le Alii taitai o le Ekalesia e tusa ai ma aitalafu a le Faatulagaga Autasi
Fai atu i tagata aoga e mafaufau loloto pe sa i ai se taimi na talosagaina ai i latou e fai se mea na latou manatu sa faigata. Valaaulia ni nai tagata aoga e faasoa mai o latou aafiaga.
Faamalamalama atu faapea, i le faagasologa o le usiusitai i poloaiga a le Alii, na faapea ona oo ai le Faatulagaga Autasi i se aitalafu tele. O nisi o mea na tutupu sa taofia ai le faatulagaga mai le totogina o nonogatupe. Mo se faataitaiga, o le faatafunaga e le au faatupu faalavelave o le falelomitusi i le Itumalo o Jackson, Misuri, na saofaga i faafitauli faifaipea o le tamaoaiga, ma sa taofia e vaega faatupu faalavelave le Au Paia mai le faaaogaina o faleteuoloa i Initipene.
Valaaulia se tagata aoga e faitau leotele le Mataupu Faavae ma Feagaiga 104:78. Fai atu i le vasega e mulimuli i le faitauga, ma vaavaai mo faatonuga a le Alii e uiga i aitalafu a le Ekalesia.
O le a le mea na faatonu e le Alii ia sui auai o le Faatulagaga Autasi e fai?
Faailoa atu e faapea o le toe totogiina o le aitalafu na foliga mai sa faigata i le Au Paia, ae na tuuina mai e le Alii faatonuga e fesoasoani ai ia te i latou. Tusi le AFAI ma le ONA i le pito i luga o le koluma e lua i luga o le laupapa. Valaaulia se tagata aoga e faitau leotele le Mataupu Faavae ma Feagaiga 104:80-82. Fai atu i le afa o le vasega e mulimuli i le faitauga, ma vaavaai mo mea na poloai mai ai le Alii i tagata o le faatulagaga e fai ina ia mafai ona maua Lana fesoasoani i le totogiina o a latou aitalafu. Fai atu i le isi afa e mulimuli i le faitauga, ma vaavaai mo mea na folafola mai e le Alii Na te faia e fesoasoani ai i le Au Paia a o latou totogiina a latou aitalafu. Valaaulia le vaega muamua e tusi a latou tali i luga o le laupapa i lalo o le “AFAI”, ae tuu atu i le vaega lona lua e tusi a latou tali i lalo o le “ONA.”
O a ni mataupu faavae e mafai ona tatou aoaoina mai le Mataupu Faavae ma Feagaiga 104:80–82? (E mafai ona faaaoga e tagata aoga ni upu eseese, ae e tatau ona latou faailoa mai se mea e pei o le mataupu faavae lenei: Afai tatou te lotomaualalo ma faamaoni ma valaau atu i le suafa o le Alii, ona Ia fesoasoani mai lea ia i tatou e ausia mea ua Ia poloaiina i tatou e fai.)
O a ni mea ua fetalai mai le Alii ia fai e tagata o le Ekalesia i le asō e ono mafaufauina e faigata? O le a se matafaioi e te manatu e faia e le lotomaualalo, faamaoni, ma le tatalo i le faataunuuina o mea ua fetalai mai le Alii e te faia?
O ai se tagata mai tusitusiga paia o se faataitaiga o le mataupu faavae ua tatou faailoaina mai i fuaiupu e 80–82? O ai se tagata e te iloa i le taimi nei o se faataitaiga o lenei mataupu faavae?
Valaaulia tagata aoga e tusi i a latou api o le vasega po o api talaaga mo le suesueina o tusitusiga paia, se auala e mafai ai ona faateleina lo latou lotomaulalo, faamaoni, po o le agaga tatalo ina ia mafai ai e le Alii ona fesoasoani ia i latou e faataunuu mea ua Ia poloaiina i latou e fai.
Na saunoa Peresitene Marion G. Romney o le Au Peresitene Sili e uiga i faamanuiaga tatou te maua a o tatou tausia e matitiva ma e e le tagolima:
Ata
Peresitene Marion G. Romney
“E faigofie lava i le Alii ona faaali [i le Peresitene o le Ekalesia] le mea e maua ai le suauu ma oa o maa taua. Ona tatou totogi lea o se tagata na te eli maia a e tatou folau solo i le mauoa—ma tatou folau atu ai lava i oa i Seoli. E leai, e le tau manaomia e le Alii ona tatou tausia e matitiva, a e ua aoga mo i tatou lenei aafiaga; aua e nao lo tatou iloa ona tausi o le tasi ma le isi e mafai ai ona tatou maua le alofa ma amioga moni uma faa-Keriso, e manaomia ia tatou agavaa ai tatou toe foi atu ai i lona afioaga“ (“O Le Ola e Tusa ai ma Mataupu o le Uelefea,” Liahona, Ian. 1982, 178-79).
Na aoao mai Peresitene Dieter F. Uchtdorf o le Au Peresitene Sili, e uiga i le ala a le Alii o le tuuina atu mo le Au Paia:
Ata
Peresitene Dieter F. Uchtdorf
“E toatele tagata lelei ma faalapotopotoga i le lalolagi o loo taumafai e faafetaia’ia ia manaoga faavavave o e matitiva ma e le tagolima i soo se mea. Tatou te faafetai mo lea mea, ae o le ala a le Alii e tausia ai ē le tagolima e ese lava mai le ala a le lalolagi. Ua fetalai le Alii ‘E tatau ona faia i la’u lava ala’ [MF&F 104:16]. E le gata ina gauai mai o Ia i o tatou manaoga vave; ae o loo Ia popole foi mo lo tatou alualu i luma e faavavau. Mo lenei mafuaaga, ua i ai pea i le ala a le Alii le ola faalagolago o le tagata ia te ia lava ma o le auauna atu i o tatou tuaoi o se faaopoopoga lea i le tausia o e matitiva” (“O Le Faia i le Ala a le Alii,” Ensign po o le Liahona, Nov. 2011, 54).
Ata
Peresitene Marion G. Romney
Na aoao mai foi Peresitene Marion G. Romney o le Au Peresitene Sili, e uiga i le faamoemoega sili atu o le faia i le ala a le Alii: “O le tiute aupito taua o le fesoasoani i e matitiva e ala i le Ekalesia e le o le aumaia o le toomaga faaletino i o latou manaoga, ae o le faaolataga i o latou agaga” (“The Role of Bishops in Welfare Services,” Ensign, Nov. 1977, 81).