O le lona lua lea o ni lesona se fa i le Mataupu Faavae ma Feagaiga 88. O le vaega o le faaaliga e talanoaina i lenei lesona sa tuuina mai i se konafesi o faitaulaga sili i Katelani, Ohaio, i le aso 27 ma le 28 o Tesema, 1832. O loo aofia ai le faamalamalamaga a Iesu Keriso o le auala e pulea ai e le Atua Ana foafoaga ma se valaaulia mo i tatou e faalatalata atili atu ia te Ia.
Ua faaali mai e le Faaola o mea uma o loo pulea e ala i le tulafono paia
Faaali atu se ata o ni fetu, e pei o le O Le Alii na Foafoaina Mea Uma (Tusi Ata o le Talalelei [2009], nu. 2; tagai foi i le LDS.org), po o le tusi o ni fetu i luga o le laupapa.
Ata
fetu i le atulaulau
Pe na i ai se taimi na e tilotilo atu ai i fetu ma mafaufau i le Atua ma Ana foafoaga? O a ni fesili po o ni manatu na e mafaufau loloto i ai a’o e vaai atu i le lagi?
Faamanino atu faapea, pe a mafaufau tagata i le anoano o foafoaga a le Atua, o nisi taimi latou te lagona ai le faatauvaa ma le faalētaua. Atonu latou te mafaufau pe o silafia i latou e le Atua. Tau atu i tagata aoga faapea, a o latou talanoaina fuaiupu i le lesona o le aso, o le a latou iloa ai, e ui lava ina pulea e le Atua le anoano o foafoaga i le lagi atoa, o loo Ia silafia i tatou uma taitoatasi ma finagalo e faalatalata mai ia i tatou.
Valaaulia se tagata aoga e faitau leotele le Mataupu Faavae ma Feagaiga 88:41. Fai atu i le vasega e mulimuli i le faitauga, ma vaavaai pe o faapefea ona faaalia e lenei fuaiupu, o loo i ai i le Atua le mana e pulea ai Ana foafoaga uma, ae o loo ia silafia foi i tatou uma taitoatasi.
O faapefea ona faaalia i lenei fuaiupu o loo i ai i le Atua le mana e silafia ai i tatou taitoatasi ma o tatou manaoga?
Valaaulia se tagata aoga e faitau leotele le Mataupu Faavae ma Feagaiga 88:42–45. Fai atu i le vasega e faailoa mai pe faapefea ona pulea e le Atua Ana foafoaga.
E faapefea ona pulea e le Atua Ana foafoaga? (E ala i Ana tulafono.)
Valaaulia tagata aoga e mafaufau i se tasi o foafoaga a le Atua latou te maofa ai. Valaaulia ni nai tagata aoga e faasoa mai o latou manatu. O se faataitaiga, e mafai ona e faaali atu se mea faitino po o se ata e faatusa i ai se tasi o foafoaga a le Atua ma faamatala le mafuaaga e te maofa ai i lena foafoaga.
Valaaulia tagata aoga e faitau filemu le Mataupu Faavae ma Feagaiga 88:46–47 ma vaavaai mo le mea tatou te iloa atu pe a tatou vaai i foafoaga a le Atua.
O le a le mea tatou te iloa atu pe a tatou vaai e oo lava i foafoaga aupito faatauvaa a le Atua? (E mafai ona faaaoga e tagata aoga ni upu eseese, ae o a latou tali e tatau ona ta’u mai ai le mataupu faavae lenei: A tatou vaavaai i foafoaga a le Atua, tatou te vaaia ai Lona mamalu ma lona mana. Tusi le mataupu faavae lenei i le laupapa.)
E faapefea ona i ai se aafiaga i lau molimau e uiga i le Atua i foafoga e te vaaia i le lagi ma luga o le fogaeleele?
Valaaulia tagata aoga e faitau filemu le Mataupu Faavae ma Feagaiga 88:48–50. A uma se taimi talafeagai, fai atu i se tasi o i latou e aotele ia fuaiupu i a latou lava upu.
Na faamatala e le Alii se faataoto o ni allii sa galulue i se fanua ma sa auauai ona asiasia i latou e lo latou matai
Faamalamalama atu faapea, o le Mataupu Faavae ma Feagaiga 88:51–60 o loo i ai se faataoto e fesoasoani ia i tatou ia tatou malamalama i fegalegaleaiga a le Atua ma malo, po o lalolagi, ua Ia foafoaina. Valaaulia se tagata aoga e faitau leotele le Mataupu Faavae ma Feagaiga 88:51–55. Fai atu i le vasega e mulimuli i le faitauga, ma vaavaai po o le a le mea na poloaiina e le tagata i le faataoto ia ana auauna e fai, ma mea na ia folafola atu i ana auauna taitoatasi.
O le a le mea na poloaiina e le tagata ia ana auauna e fai? O le a le mea na ia folafola atu i ana auauna? (Sa ia poloaiina i latou e galulue i lona fanua. Sa ia folafola atu o le a ia asiasi faasolosolo atu ia i latou taitoatasi.)
Otooto le Mataupu Faavae ma Feagaiga 88:56–60 i le faamalamalama atu e faapea, i le faataoto, sa asiasi atu le alii o le fanua i ana auauna taitoatasi, ina ua oo i lo latou taimi. O auauna taitoatasi na “maua uma le susulu o fofoga o lo latou alii, o tagata taitoatasi i lona itula” (MF&F 88:58).
Valaaulia se tagata aoga e faitau leotele le Mataupu Faavae ma Feagaiga 88:61. Fai atu i le vasega e mulimuli i le faitauga, ma vaavaai mo le mea o loo aoao mai e lenei faataoto ia i tatou i le ala e fegalegaleai ai le Atua ma malo sa Ia foafoaina.
O le a le mea o aoao mai e lenei faataoto e uiga i le auala e fegalegaleai ai le Atua ma malo sa Ia foafoaina? (Fesoasoani i tagata aoga e faailoa atu le aoaoga faavae lenei: O le a asiasi e le Atua ia Ona malo taitasi ma latou o nonofo ai i Lana taimi. Tusi lenei mataupu faavae i luga o le laupapa.)
Ua folafola mai le Atua e faalatalata mai ia i tatou a’o tatou faalatalata atu ia te Ia
Faailoa atu ua afio mai le Alii i Lona malo i lenei lalolagi, ma o le a toe afio mai o Ia ma nofotupu iinei i le taimi o le Meleniuma. I le Mataupu Faavae ma Feagaiga 88:62–69, o loo aoao mai ai le Alii mea e mafai ona tatou faia ina ia mafai ona faalatalata mai o Ia ia i tatou i le taimi nei. Valaaulia tagata aoga e mafaufau loloto i fesili nei:
O le a lou latalata e te manatu o i ai i le Alii? E te manao e lagona le latalata atili atu ia te Ia?
Valaaulia tagata aoga e faitau filemu le Mataupu Faavae ma Feagaiga 88:62–63, ma vaavaai mo mea e mafai ona tatou faia e valaaulia ai le Alii ia faalatalata mai ia i tatou.
O a mataupu faavae o loo aoao mai e nei fuaiupu e uiga i le faalatalata atu i le Alii? (A o tali mai tagata aoga, tusi le mataupu faavae lenei i luga o le laupapa: Afai tatou te faalatalata atu i le Alii, o le a faapea ona Ia faalatalata mai ia i tatou.)
O a upu i le fuaiupu e 63 ua aoao mai i le auala e mafai ona tatou faalatalata atu ai i le Alii? (Saili, ole, ma le tu‘itu’i.)
Faamanino atu faapea o upu saili, ole, ma le tu‘itu’i o ni upu galue [faatino].
O a nisi o faatinoga na fesoasoani ia te outou e saili, ole, ma tu‘itu’i ina ia mafai ona faalatalata atili atu i le Alii?
Ina ia fesoasoani i tagata aoga ia malamalama i se tasi o auala e mafai ona latou faalatalata atu ai i le Alii, ia valaaulia se tagata aoga e faitau leotele le saunoaga lenei mai ia Peresitene Spencer W. Kimball:
Ata
Peresitene Spencer W. Kimball
“Ua ou iloaina a ou manatu faatalale i le ma fesootaiga ma le e paia, ma a oo ina foliga mai e le o faafofoga mai le Atua ma leai se siufofoga paia o fetalai mai, o lona uiga ua ou matua mamao, mamao ese lava. Afai ou te faatofuina au lava i tusitusiga paia, ona vaapiapi ai lea o le va ma toe foi mai le faaleagaga” (Aoaoga a Peresitene o le Ekalesia: Spencer W. Kimball [2006], 77).
Ina ia fesoasoani i tagata aoga ia faateleina lo latou malamalama i le auala e tali ai e le Tama Faalelagi a latou tatalo, faitau leotele le Mataupu Faavae ma Feagaiga 88:64–65. Valaaulia tagata aoga e mulimuli i le faitauga, ma vaavaai mo le folafolaga a le Faaola ia i tatou pe afai tatou te tatalo atu i le Tama i Lona suafa.
I lenei fuaiupu, o le a se mea ua aoao mai e le Faaola e uiga i le ala e tali mai ai e le Tama Faalelagi a tatou tatalo? (Fesoasoani i tagata aoga e faailoa mai le mataupu faavae lenei: E tali mai e le Tama Faalelagi a tatou tatalo i auala Na te silafia e sili ona lelei mo i tatou. Tusi lenei mataupu faavae i luga o le laupapa.)
Ina ia fesoasoani i tagata aoga ia malamalama i lenei mataupu faavae, atonu e te manao e tuu atu ia te i latou se kopi o le saunoaga lenei a Elder Richard G. Scott o le Korama a Aposetolo e Toasefululua. Valaaulia se tagata aoga e faitau leotele le faamatalaga, ma fai atu i le vasega e mulimuli i le faitauga ma faailoa mai se mea e tatau ona tatou faia pe a tali mai e le Tama Faalelagi se tatalo i se auala e ese mai mea tatou te faamoemoe pe manatu i ai.
Ata
Elder Richard G. Scott
“E matua faigata lava pe afai e le tali maia se tatalo faamaoni mo se mea e te matuai manao lava i ai i le ala e te manao ai. E faigata ona malamalama pe aisea e le tuuina mai ai le tali manaomia o le faatinoina o lou faatuatua moni ma le faamaoni mai se olaga usiusitai. … E i ai taimi e faigata ona iloa le mea e sili ona lelei po o le tatau mo oe i ni taimi. O le a faigofie atu lou olaga pe a e taliaina faapea, o mea e faia e le Atua i lou olaga e mo lou lelei e faavavau“ (“Faaaogaina o le Meaalofa Faalelagi o le Tatalo,“ Ensign po o le Liahona, Me 2007, 9).
Mafaufau e valaaulia ni nai tagata aoga e faasoa mai se aafiaga na latou oo i ai ina ua tali mai e le Tama Faalelagi a latou tatalo i mea na sili ona lelei mo i latou. Atonu e te manao foi e faasoa atu se aafiaga.
Faamalamalama atu faapea i le Mataupu Faavae ma Feagaiga 88:66, tatou te aoao ai, o se tasi o auala e fesootai mai ai le Atua ia i tatou “e pei o le leo o lē ua alaga i le vao.” Valaaulia tagata aoga e faitau filemu le Mataupu Faavae ma Feagaiga 88:66, ma vaavaai mo auala e oo mai ai le siufofoga o le Atua ia i tatou.
E tusa ai ma lenei fuaiupu, e faapefea ona pei le siufofoga o le Atua “o le leo o lē ua alaga i le vao”?
O le a se taimi na e lagonaina ai sa latalata mai le Atua ia te oe e ui lava e te le’i vaai ia te Ia?
Valaaulia se tagata aoga e faitau leotele le Mataupu Faavae ma Feagaiga 88:67-69. Fai atu i le vasega e mulimuli i le faitauga, ma vaavaai mo ni auala faaopoopo e mafai ona tatou faalatalata atu ai i le Alii. Fai atu i tagata aoga e lipoti mai mea ua latou maua.
Tusi le faamatalaga le uma lenei i luga o le laupapa: Afai e tau-tasi la’u vaai i le mamalu o le Atua, o le a …
Valaaulia tagata aoga e faauma le faamatalaga e faaaoga ai mea ua latou aoaoina mai i le fuaiupu e 67. O le faamatalaga e mafai ona faitauina faapenei: Afai e tau-tasi la’u vaai i le mamalu o le Atua, o le a faapea ona faatumulia a’u i le malamalama. Atonu e te manao e fautua atu i tagata aoga e faailoga lenei mataupu faavae a o faaali mai i le Mataupu Faavae ma Feagaiga 88:67.
O le a sou manatu i le uiga, mo lou mata “ia tau-tasi i le mamalu [o le Alii]”? (A’o tali mai tagata aoga i lenei fesili, atonu latou te tauaina ni faataitaiga eseese faapitoa. Ia mautinoa ua latou malamalama i se tulaga lautele, o le uiga o le fuaitau,o le ia tuuto atoa atu i le galuega ma faamoemoega o le Atua.)
Mafaufau i tagata e te iloa o e foliga mai ua faatumulia i le malamalama o le Alii. O a ni auala e te vaaia ai lenei malamalama ia te i latou?
E tusa ai ma le fuaiupu e 68, o a ni mea e tatau ona tatou faia ina ia tau-tasi atu ai o tatou mafaufau i le Atua? (Atonu e te manao e faamalamalama atu faapea, o le fuaitau “faapaia outou lava” e faasino i lo tatou manaomia ina ia atoatoa ma faamamaina mai agasala. E faapaiaina i tatou e ala i le Togiola a Iesu Keriso ma le faatosinaga a le Agaga Paia, pe a tatou salamo i a tatou agasala, maua sauniga o le perisitua, ma tausia a tatou feagaiga.)
Valaaulia tagata aoga e toe faitau aoaoga faavae ma mataupu faavae sa e tusia i luga o le laupapa. Ona fai atu lea ia i latou e mafaufau faapea, o loo latou vaavaai atu i fetu ma se uo, o le ua manatu e le o silafia o ia e le Alii. Valaaulia tagata aoga e tusi i a latou api o le vasega po o api talaaga mo le suesueina o tusitusiga paia, ni mea o le a latou fai atu i la latou uo, e faaaoga ai mataupu faavae o loo i luga o le laupapa. A uma se taimi talafeagai, valaaulia ni nai tagata aoga e faasoa mai ni mea ua latou tusia. Atonu e te manao e faaiu i le faitauina o le saunoaga lenei mai ia Peresitene Dieter F. Uchtdorf o le Au Peresitene Sili. E mafai foi ona faasoa atu lau molimau i le faatosinaga a le Atua i lou olaga, a o e faia ni taumafaiga e faalatalata atu ia te Ia.
Ata
Peresitene Dieter F. Uchtdorf
“Uso e ma tuafafine, … e i ai taimi tatou te lagona ai foi le faalētaua, le iloa, tuua toatasi, po o le faagaloina. Ae, ia e manatua i taimi uma, e taua oe ia te Ia! …
“E silasila mai le Atua ia te oe e le gata o se tagata soifua i luga o se paneta itiiti, ma o le e ola mo se taimi itiiti—E silasila mai o Ia ia te oe o Lona atalii/afafine. E silasila mai o Ia ia te oe o le tagata e gafatia ma faamoemoeina e avea ai oe. E finagalo o Ia ia e iloa e taua oe ia te Ia” (”E Taua Oe ia te Ia,” Ensign po o le Liahona, Nov. 2011, 22).
Na aoao mai e Peresitene Dieter F. Uchtdorf o le Au Peresitene Sili e faapea, a’o tatou faalatalata atu i le Atua, o le a faatumulia o tatou agaga i le malamalama:
Ata
Peresitene Dieter F. Uchtdorf
“A o tatou faalatalata atu i le Tama Faalelagi, tatou te avea ma ni tagata e sili atu ona paia. Ma a’o avea i tatou ma ni tagata sili atu ona paia, o le a tatou faatoilaloina le le talitonu ma o le a faatumulia o tatou agaga i Lona malamalama faamanuiaina. A o faaogatasi o tatou olaga ma lenei malamalama faalelagi, e taitai atu ai i tatou mai fafo o le pouliuli ae agai atu i le malamalama sili atu. O lenei malamalama sili atu e taitai atu ai i auaunaga e le mafaamatalaina a le Agaga Paia, ma mafai ai ona manifi le veli i le va o le lagi ma le lalolagi” (“O Le Alofa o le Atua,” Ensign po o le Liahona, Nov. 2009, 23-24).
Na faamalamalama mai e Elder J. Thomas Fyans, o le Fitugafulu le uiga o le faapaiaina o i tatou lava:
Ata
Elder J. Thomas Fyans
“Mai le suesueina o tusitusiga paia, tatou te maua ai se taitaiga atili e uiga i le auala e faalatalata atu ai i le Alii: ‘O lea, ia outoufaapaia outou lava ina ia tau-tasi o outou mafaufau i le Atua, ma e oo mai aso o le a outou vaai ai ia te ia; ona o le a afe ese e ia le veli mai ona fofoga ia te outou, ma o le a faia lena mea i lona lava taimi, ma i lana lava ala, ma e tusa ai ma lona lava finagalo.’ (MF&F 88:68; ua faaopoopo le faatusilima.) O lefaapaia o lona uiga e faia ia paia po o le mamalu—ia saoloto mai agasala, ia faamama. Tatou te faia lenei mea ina ia ogatusa ai ma lona Agaga.
“Ua tuuina mai ia i tatou se taiala, e faamanatu mai ia i tatou e le aunoa ia auala e mafai ona tatou saoloto ai mai agasala, ma maua lona Agaga e faatasi ma i tatou. Tatou te faalogo i ai i taimi taitasi tatou te aai ma feinu ai i le faamanatuga. Faalogo ma le totoa i upu: ‘Le Atua e, le Tamā Faavavau, matou te ole atu ia te oe i le suafa o lou Alo, o Iesu Keriso, ia e faamanuiaina ma faapaiaina lenei areto i agaga o i latou uma o e e fetagofi i ai; ina ia latou taumamafa i le faamanatuina o le tino o lou Alo, ma molimau atu ia te oe, le Atua e, le Tamā Faavavau, latou te loto ina ave i o latou luga le suafa o lou Alo, ma manatua pea o ia, ma tausi i ana poloaiga ua ia tuuina mai ia te i latou, ina ia latou maua pea lona Agaga e faatasi ma i latou’ (Moronae 4:3; faapea foi le MF&F 20:77; ua faaopoopo le faatusilima.)” (“Draw Near unto Me,” Ensign, Nov. 1985, 90).