O le Mataupu Faavae ma Feagaiga 121–123 o loo i ai ni vaega filifilia o se tusi mai le Perofeta o Iosefa Samita i le Ekalesia, na tusia i le aso 20 o Mati, 1839. Na fofogaina atu e Iosefa Samita le tusi a o faafalepuipuiina o ia ma nai isi o [ana] soa i le Falepuipui o Liperate I le tusi, sa faaaofiaina ai e le Perofeta nisi o ana tatalo, na ole atu ai i le Atua e faamanuia o ia ma ana soa, ma le Au Paia uma o e sa mafatia ona o amioga a o latou fili. Sa ia faaaofiaina ai foi ni tali na ia mauaina i na tatalo.
Valaaulia tagata aoga e vaai faalemafaufau i se uo po o se tagata e pele ia te ia, o loo feagai ma se aafiaga faigata. Ua ia ta’u atu ia te oe, e le malamalama pe aisea ua oo atu ai ia puapuaga ia te ia, ma ua manatu e pei ua tuulafoaiina o ia e le Atua.
O le a se mea o le a e ta’u atu i lau uo? O le a se mea e te faia pe afai o oe lea e oo i ai nei puapuaga?
Faamalamalama atu e faapea, sa fautuaina ma faamafanafanaina e le Alii ia Iosefa Samita i le taimi o se aafiaga sili ona faigata. Uunaia tagata aoga e vaavaai mo auala e mafai ai e upu o fautuaga ma faamafanafanaga a le Alii o loo i le Mataupu Faavae ma Feagaiga 121–123 ona fesoasoani ia i latou i o latou lava tofotofoga.
Faamatala atu e faapea, i le aso 31 o Oketopa, 1838, na faalataina ai Iosefa Samita e George Hinkle, o se tasi o le Ekalesia ma o se taitai i le vaegaau o le setete. Sa ta‘u atu e Hinkle ia Iosefa e faapea, na mananao fitafita a Misuri, o e sa osofaia le Au Paia i Sisifo Mamao, Misuri, e feiloai mo se faatalanoaga e foia ai ma le filemu ia feeseeseaiga. Ina ua taunuu atu Iosefa ma isi taitai o le Ekalesia mo le faatalanoaga, sa faapea ona ave faamalosi i latou e le vaegaau o ni pagota o le taua. Mo le masina na sosoo ai, sa faapea ona sauaina ma faalumaina ai Iosefa Samita ma e na faatasi ma ia a’o faafalepuipuiina i latou e o latou fili i Initipene, Misuri, ma Richmond, Misuri. A’o faatalitali ai mo le faamasinoga, lea sa faavae i ni tuuaiga sese ma lea sa faia e aunoa ma le faagaoioiga e tatau ai, sa faapea ona aveina atu Iosefa Samita ma isi taitai o le Ekalesia i se falepuipui i Liperate, Misuri, i le aso 1 o Tesema.
I le isi fa masina na sosoo ai, sa taofia ai le Perofeta, o lona uso o Ailama, Alexander McRae, Laimani Uaite, ma Caleb Baldwin i le ana pito i lalo o le Falepuipui o Liperate i le taimi o le maatiati o le taumalulu. Sa i ai foi ma Sini Rikitone faatasi ma i latou mo se taimi, ae sa faataga e se faamasino lona faasaolotoina i le faaiuga o Ianuari 1839. O le matatau i taufaamata’u mai le fili, sa le’i tuua ai e Uso Rikitone le falepuipui seia oo i le amataga o Fepuari.
Ina ia fesoasoani i tagata aoga ia maua se lagona o le tulaga faigata na feagai ma le Perofeta ma ana uo i le Falepuipui o Liperate, atonu e te manao e faaaoga se mea faapipii po o se isi auala e faailoga ai se faatafafa i luga o le fola lea e 14 futu i le 14 futu le tele (4.3 mita i le 4.3 mita). Faamalamalama atu o le tele tonu lea o le fola o le falepuipui. O le taualuga sa i le va o le 6 ma le 6.5 futu le maualuga (i le va o le 1.8 ma le 2 mita).
Atonu foi e te manao e fautua atu ia tilotilo tagata aoga i le ata o le Falepuipui o Liperate i a latou tusitusiga paia (tagai i Ata o Talafaasolopito o le Ekalesia, Ata 12, “Falepuipui o Liperate”). Valaaulia tagata aoga e vaai faalemafaufau pe faapei le faafalepuipuiina i se nofoaga laitiiti faatasi ma nisi alii e toa 4 pe toa 5 i le 4 masina o le taumalulu. E lua ni faamalama laiti sa puipui i pa, sa maua mai ai sina malamalama itiiti, ma mai i fafo o nei faamalama, sa tauemu ma faalumaluma mai ai e tagata ia pagota. Sa momoe pagota i vaovao palapala i luga o le fola. O a latou meaafale itiiti na aofia ai se pakete o otatoa o tagata. Mo se taimi umi, sa le’i i ai se palanikeke a Iosefa, lea sa na o le pau lea o le puipuiga na i ai a pagota mai le malulu. O meaai sa i ai taimi na faaoona ai, ae o isi taimi sa matuai leaga lava lea na pau le taimi latou te aiina ai o le taimi na matuai galala ai i le fiaaai. Sa seasea ona faatagaina ni tagata e asiasi atu ia i latou ma sa matuai tiga i le mafatia i le faalogo atu i mafatiaga o le Au Paia o e sa tutuli ese mai Misuri i le ogatotonu o le taumalulu.
O a ni lagona ma ni manatu atonu e te maua pe ana e i ai i le tulaga o Iosefa?
Faamalamalama atu, o le Mataupu Faavae ma Feagaiga 121–123 o loo i ai ni vaega filifilia o se tusi mai le Perofeta i le Au Paia, lea na tusia i le taufaaiuiuga o lona faafalepuipuiina i le Falepuipui o Liperate. O le tusi na aofia ai nisi o aioiga ma le agaga tatalo a Iosefa i le Alii.
Valaaulia ni nai tagata aoga e auauai e faitau leotele mai le Mataupu Faavae ma Feagaiga 121:1–6. Fai atu i le vasega e vaavaai mo fesili ma aioiga na faailoa atu e le Perofeta i le Alii. (Ina ia fesoasoani i tagata aoga ia malamalama i le fuaiupu 1 ma le 4, atonu e te manao e faamalamalama atu o se faapaologa, o se fale po o se isi mea na te aumaia le faamalumaluga.)
O a ni fesili ma ni aioiga na e maua? O a nisi mea na faagaeetia ai oe e uiga i nei fuaiupu?
Faamalamalama atu faapea, o nisi o tali a le Alii i talosaga a Iosefa Samita o loo maua i le Mataupu Faavae ma Feagaiga 121:7-25 ma le 122:1–9. Valaaulia se tagata aoga e faitau leotele le Mataupu Faavae ma Feagaiga 121:7–10. Fai atu i le vasega e mulimuli i le faitauga, ma vaavaai mo mataupu faavae na ono fesoasoani ia Iosefa Samita ma ana soa i le taimi sa latou i ai i le Falepuipui o Liperate. Valaaulia tagata aoga e tusi aoaoga faavae ma mataupu faavae latou te aoaoina mai nei fuaiupu i a latou api o le vasega po o api talaaga mo le suesueina o tusitusiga paia.
A mavae se taimi, fai atu i tagata aoga e faasoa mai aoaoga faavae ma mataupu faavae ua latou faailoaina. Tusi a latou tali i luga o le laupapa. O le mataupu faavae nei o le tolu lea latou te ono faailoa mai:
Pe a tatou valaau atu i le Alii i taimi o faigata ma puapuaga, e mafai ona tatou maua Lona filemu.
Afai tatou te onosaia lelei tofotofoga i le olaga nei, o le a faamanuiaina i tatou e le Atua i le taimi nei ma i le faavavau.
I taimi o tofotofoga, e mafai ona tatou maua le mafanafana i le lagolago a uo moni.
Vaevae tagata aoga i ni paga, ma valaaulia i latou e talanoaina fesili nei. Fai atu taitasi fesili i le taimi, ia lava se taimi mo talanoaga.
O le a le eseesega i le va o le onosai i se tofotofoga ma le onosai lelei i se tofotofoga?
O ai e te iloa o se faataitaiga o le onosaia lelei o se tofotofoga?
Fautua atu i ni nai tagata aoga e faasoa mai i le vasega atoa mea sa latou talanoaina ma a latou paga.
Na fetalai mai le Alii o tiga ma puapuaga o Iosefa Samita “o le a nao sina minute laitiiti” (MF&F 121:7). O le a lou manatu i le uiga o lenei fetalaiga? E mafai faapefea ona fesoasoani lenei vaaiga tatou te onosaia lelei ai o tatou tofotofoga?
Tuu atu i tagata aoga le avanoa e faasoa mai ni aafiaga na latou maua i se taimi na latou maua ai le filemu o le Faaola i taimi o faigata.
Tusi le fesili lenei i luga o le laupapa: O ai e tatau ona saili atu i se fautuaga ma faamanuiaga e ala i le Perofeta o Iosefa Samita?
Valaaulia tagata aoga e vaavaai mo tali i lenei fesili a o latou faitau filemu i le Mataupu Faavae ma Feagaiga 122:1–4. A maea se taimi, valaaulia i latou e mafaufau loloto pe o faamatala mai i latou i fuaiupu e 2-3 .
O a ni auala o faaauau ai pea ona tatou maua mai ni fautuaga mai ia Iosefa Samita? O a ni auala tatou te maua ai le pule ma faamanuiaga ona o ia?
O a folafolaga na tuuina atu e le Alii ia Iosefa Samita?
Valaaulia ni tagata aoga se toatolu e auauai e faitau leotele mai le Mataupu Faavae ma Feagaiga 122:5–7. Fai atu i le vasega e mulimuli i le faitauga, ma vaavaai mo se mataupu faavae na aoao mai e le Alii ia Iosefa Samita e uiga i faigata na oo i ai o ia ma isi.
E tusa ai ma le fuaiupu e 7, o a ni taunuuga lelei e mafai ona oo mai mai le faigata ma puapuaga? (A o tali mai tagata o le vasega i lenei fesili, tusi le mataupu faavae lenei i luga o le laupapa: O puapuaga, e mafai ona tatou maua ai le potomasani ma e mo lo tatou lava lelei.)
Valaaulia se tagata aoga e faitau le saunoaga lenei mai ia Elder Joseph B. Wirthlin o le Korama a Aposetolo e Toasefululua. Fai atu i le vasega e faalogologo mo auala e mafai ona avea ai puapuaga ma o tatou lelei.
Ata
Elder Joseph B. Wirthlin
“Atonu e te lagona le tulituliaupuina o oe pe a oo mai faigata i lou olaga. E lulu lou ao ma e faapea, ‘Aisea ua tupu ai ia te au?’
“Ae o le nila o le uili o le faavauvau e iu lava ina faasaga mai ia i tatou taitoatasi. Soo se taimi lava, o tagata uma e o’o i le faanoanoa. E leai se tasi e tuusaunoa ai. …
“O le aoao e onosaia taimi o faanoanoaga, mafatiaga, ma le faavauvau o se vaega o lo tatou aotauina i mea moni o le olaga. O nei aafiaga, e ui ina e masani ona faigata ona onosaia i le taimi e tupu ai, ae o ituaiga aafiaga moni ia e faalauteleina ai o tatou malamalamaaga, fausia o tatou tagata, ma faateleina lo tatou agalelei mo isi” (“Ia Tuu Po o le A Lava se Mea e Tupu, Ia Fiafia Pea,” Ensign po o le Liahona, Nov. 2008, 27).
O le a le saunoaga a Elder Wirthlin na fai mai, i mea e mafai ona faia e o tatou aafiaga faigata mo i tatou?
Valaaulia tagata aoga e tusi i a latou api o le vasega po o api talaaga mo le suesueina o tusitusiga paia, e uiga i se ala na tuuina atu ai e se tofotofoga ia i latou le potomasani ma sa mo lo latou lelei. A mavae se taimi, atonu e te fai atu i ni nai tagata aoga e faasoa mai mea na latou tusia.
Valaaulia se tagata aoga e sau i le laupapa e avea ma tusiupu. Fai atu ia te ia e tusi se laina faalava pe tasi vae tolu le mamao mai le pito i lalo o le laupapa. Ona fai atu lea i tagata aoga e lisi ni tulaga luitauina e oo i tagata. Fai atu i le failautusi e tusi a latou tali i luga a’e o le laina.
A mavae se taimi na fai ai se tagata aoga se lisi, fai atu ia i latou pe na latou faalogo i se tasi o fai mai, “E leai se isi e malamalama i tofotofoga o loo feagai ma a’u.” Valaaulia i latou e faitau filemu le Mataupu Faavae ma Feagaiga 122:8, ma vaavaai po o le a se fetalaiga a le Alii e ono tali mai ai i lenei faamatalaga. A o latou lipoti mai a latou tali, fai atu i le failautusi e tusi Iesu Keriso i lalo o le laina o loo i luga o le laupapa.
O le a sou manatu i le uiga o le “na afio ifo [le Faaola] i lalo ia i latou uma”? (A o lei tali mai tagata aoga, atonu e te manao e valaaulia i latou e faitau le 2 Nifae 9:20–21, Alema 7:11, ma le Mataupu Faavae ma Feagaiga 88:5–6. E mafai ona faaaoga e tagata aoga ni upu eseese, ae e tatau ona latou faailoa mai le mataupu faavae lenei: Sa puapuagatia le Faaola i mea tiga ma puapuaga o tagata uma.)
O a ni auala e te manatu atonu na fesoasoani ai lenei upumoni ia Iosefa Samita ma ana soa i le Falepuipui o Liperate?
Ina ia fesoasoani i tagata aoga ia malamalama i lenei aoaoga faavae, valaaulia se tagata aoga e faitau leotele le saunoaga lenei a Elder Wirthlin:
Ata
Elder Joseph B. Wirthlin
“Talu ai ona sa matuai ogaoga puapuaga o Iesu Keriso, o lea e malamalama ai o Ia i o tatou mafatiaga. E malamalama o Ia i o tatou tiga. Tatou te oo i mea faigata ina ia tatou maua foi le faateleina o lo tatou agalelei ma le malamalama i isi.
“Manatua le fetalaiga faagaeetia a le Faaola i le Perofeta o Iosefa Samita ina o puapuagatia o ia ma ana soa i le lofituina o le pogisa o le Falepuipui o Liperate. …
O a ni auala ua faateleina ai e ou aafiaga i “mea faigata” lou agaalofa ma lou malamalama mo isi?
Valaaulia tagata aoga e faitau filemu le Mataupu Faavae ma Feagaiga 122:9 ma mafaufau loloto pe faapefea ona fesootai lenei fuaiupu i le soifuaga ma le auaunaga a le Perofeta o Iosefa Samita.
O a ni auala e te manatu e faatatau ai le Mataupu Faavae ma Feagaiga 122:9 ia te oe? E mafai faapefea e lenei fuaiupu ona faamalosia oe i taimi o aafiaga faigata?
Faamalamalama atu, e lei umi ona uma ona tusia lenei tusi, ae tatala e le Alii se auala mo Iosefa ma ana soa e toe faatasia ai ma le Au Paia i Ilinoi. Molimau atu, sa faatasi le Atua ma Lana auauna o Iosefa Samita i le soifuaga atoa o Iosefa. Fesoasoani i tagata aoga ia malamalama, afai e tumau lo tatou faamaoni i taimi o tofotofoga, o le a faatasi foi le Atua ma i tatou. I le faaiuga, faasoa atu le molimau lenei, lea na tuuina mai e Iosefa Samita i le taufaaiuiuga o lona soifuaga: “O le Atua Silisili Ese o lo’u talipupuni lea; ma o le a se mea e mafai ona fai e le tagata pe afai o la’u uo le Atua?” (i le History of the Church, 5:259).
“Sa matuai puapuagatia tele le Perofeta o Iosefa Samita ma ana soa (Ailama Samita, Laimani Uaite, Caleb Baldwin, Alexander McRae ma, mo se vaega o le taimi, Sini Rikitone) a o taofia i latou i le falepuipui e faatalitali ai le faamasinoina i ni moliaga sese: ‘E tele ni mea faalealofa sa faafaulai atu i o latou luga a’o latou i ai iina. O le le lava ma le leaga o meaai sa latou tausasami ai i aso uma; i nisi o taimi sa na o le musumusuga a le Alii sa faasaoina ai i latou mai le taumafaina o ni meaai na faaoonaina, lea sa le’i sao ai i latou uma. [Na fai mai Alexander McRae, “Sa le mafai ona matou aiina vagana ai sa faaosofia i matou e le galala i le fiaaai” (B. H. Roberts, Comprehensive History of the Church, 1:521).]
“‘Sa leai ni pito e momoe ai i le falepuipui, o lea sa faamalosia ai i latou e sue ni mea e malolo ma maua ai se faasiligamalosi i moega vaovao sa tuu i luga o laupapa malo ma fola maa. Sa laitiiti ni fesootaiga sa [faatagaina] i latou e fai ma le lalolagi i fafo, ae maise lava i le masina muamua pe a o le latou faafalepuipuiina. Ma o lenei mea, i se taimi taua tele a’o feagai ai le Au Paia ma le faateteleina o sauaga i Misuri, ma le matuai manaomia lava o lo latou taitai-perofeta’ [Alvin R. Dyer, The Refiner’s Fire, 2nd ed. [1968], 276].
“E i ai taimi sa faatagaina ai ni a latou asiga i le falepuipui mai uo, ma sa faataga ona auina atu ma maua mai ni [tusi] o fesootaiga. I le va o le aso 20 o Mati ma le 25 Mati, 1839, sa faalau atu ai e le Perofeta o Iosefa se fesootaiga umi lea na sainia e pagota uma (o le mea moni e lua ni tusi, e ui sa faailoa mai e le Perofeta, o le tusi lona lua o se faaauauga o le tusi muamua). Na tusia e Peresitene Iosefa Filitia Samita e faatatau i lenei fesootaiga: ‘O se tasi lenei o tusi aupito maoae sa tusia e le lima o se tagata. O le mea moni, o le taunuuga o se musumusuga faatauvaa. O se tatalo ma se valoaga ma se tali e ala i faaaliga mai le Alii. E leai se tasi ae nao se tagata tamalii na faatumulia i le agaga o le alofa o Keriso, e mafai ona tusia se tusi faapena. I le mafaufau atu [i o latou mafatiaga], e leitioa a alaga atu le Perofeta i le atuatuvale o lona agaga mo se toomaga. Peitai, i lana aioiga faatauanau, na manavaina mai ai se agaga o le faapalepale ma le alofa mo ona uso a tagata.’ (Church History and Modern Revelation, 2 vols. [1953], 2:176.)
“O Vaega 121-23 na aumaia mai lenei fesootaiga ma faaaofia ai i le lomiga i le 1876 o le Mataupu Faavae ma Feagaiga. O le lomiga o le Mataupu Faavae ma Feagaiga lea na aofia ai nei vaega e tolu, sa lagolagoina o ni tusitusiga paia i le konafesi a le Ekalesia ia Oketopa o le 1880” (Mataupu Faavae ma Feagaiga Tusi Lesona a le Tagata Aoga, 2nd ed. [Church Educational System manual, 2001], 295–96).
A o le’i faafalepuipuiina Iosefa Samita i le Falepuipui o Liperate, sa faafalepuipuiina le tonu i latou ma nai isi taitai o le Ekalesia, na aofia ai Pale P. Palate, i Richmond, Misuri. A o i ai i le falepuipui i Richmond, na latou faalogo ai i leoleo o le falepuipui o faamatala, ia faiga faatufanua o le faomea, faamalosi teine, ma le fasioti tagata na faia faasaga i le Au Paia o Aso e Gata Ai. Sa toe faamatalaina e Pale P. Palate e faapea, ina ua mavae se taimi o faalogo atu i nei faiga, sa tali atu i ai Iosefa:
Ata
Pale P. Palate
“Sa faafuasei ona tu o ia i luga, ma tautala atu i se leo o le faititili, po o le pei o le tagi o se leona, ma faapea atu, i le manino na mafai ona ou manatuaina ai, ia upu nei:
“’FILEMU, outou o tiapolo o le lua o seoli. I le suafa o Iesu Keriso ou te aoai ai outou, ma faatonu outou ia fifilemu; O le a ou le ola lava i se isi minute e faalogo atu i gagana faapena. Tuu nei lava na ituaiga tala, a leai, e oti outou po o au i le TAIMI NEI LAVA!’”
Sa “augani mai [leoleo] mo lana faamagaloga, ma tumau ai i le fifilemu seia oo ina sui mai leoleo.” Sa toe faamatala mulimuli ane e Pale lenei aafiaga e faapea: “Ua ou vaai i minisita o faamasinoga … , i Falefaamasino o Egelani; ua ou molimauina se Konekelesi o tauaofia i se fonotaga mamalu e tuuina atu ai ni tulafono i malo; … peitai na o le tasi, lava le taimi na ou vaai ai i le faaaloalogia ma le malualii, a’o tu i filifili, i le vaeluapo, i se ana o se falepuipui i se nuu e le iloa o Misuri” (Autobiography o Parley P. Pratt ed. Parley P. Pratt Jr. [1938], 211; tagai foi i le itulau e 210).
E faatatau i le Mataupu Faavae ma Feagaiga 121–122, na aoao mai ai Elder Orson F. Whitney o le Korama a Aposetolo e Toasefululua, e uiga i se tasi o mafuaaga tatou te fetaiai ai ma faigata:
Ata
Elder Orson F. Whitney
“E mo lo tatou atinaega, lo tatou faamamaina, lo tatou tuputupu a’e, lo tatou aoaoina ma le alualu i luma, ua tatou taia ai galu malolosi o le faanoanoa ma le faapaso galu malolosi o le faanoanoa ma faigata; ma e tatau ia i tatou uma na faateleina lo tatou malolosi ma le lelei pe a tatou aau i lologa ma tula’i ae i le pa’umatu mamao atu” (“A Lesson from the Book of Job,” Improvement Era, Nov. 1918, 6).