O le vaega faaiu o le Mataupu Faavae ma Feagaiga 42 o se faaauauga o le mea ua tatou iloa o le tulafono o le Ekalesia. O loo aofia ai aoaoga a le Alii e faatatau i le oti ma le faamalologa. O loo i ai foi le fautuaga a le Alii i le Au Paia e uiga i le ala e taulima ai agasala ma solitulafono matuia, ma le auala e taulimaina ai ma le talafeagai ni tulaga sa faatiga mai ai [nisi ia i] tatou, pe ua tuuina mai [ua tatou] solitulafono.
Ua tuuina mai e le Alii le fautuaga e faatatau i maliu ma faamalologa
I se lima e tasi, uu i luga se fagu po o se koneteina laitiiti o le suauu olive paia mo le faamanuiaina o e mamai; i le isi ou lima, uu ai i luga se fagu o se vai mai le fomai.
O a mea e faaaoga i ai aitema nei? O le fea o nei mea e tatau ona tatou faalagolago i ai i taimi pe a mama‘i?
A uma ona faasoa puupuu mai e tagata aoga o latou manatu, valaaulia se tagata aoga e faitau leotele le Mataupu Faavae ma Feagaiga 42:43–44. Fai atu i le vasega e vaavaai mo faatonuga a le Alii e faatatau i mea e tatau ona tatou faalagolago i ai i taimi e mama’i ai. Ina ia fesoasoani i tagata o le vasega ia malamalama i nei fuaiupu, atonu e fesoasoani le faamalamalama atu, o le laau-afu ma meaai vaivai o loo ta‘ua i le fuaiupu e 43 e faatatau i togafitiga faafomai sa masani ona faataunuuina i le vaitaimi na tuuina mai ai lenei faaaliga.
Valaaulia se tagata o le vasega e faitau leotele mai le faamatalaga lenei mai ia Elder Dallin H. Oaks o le Korama a Aposetolo e Toasefululua. Fai atu i le vasega e faalogologo mo auala e mafai ona oo mai ai le faamalologa e ala i le faatuatua ma togafitiga faafomai.
Ata
Elder Dallin H. Oaks
“E talitonu le Au Paia o Aso e Gata Ai i le faaaogaina o le atamai ma auala faasaienisi e sili ona lelei ua maua. Tatou te faaaogaina taumafa paleni, faamalositino, ma isi gaoioiga e faaumiumi ai le ola maloloina ma tatou te sailia fesoasoani a fomai faamalolo, e pei o fomai lautele ma fomai tipitipi, e toe maua ai le ola maloloina.
“O le faaaogaina o saienisi faafomai e le o feteenai ma a tatou tatalo o le faatuatua ma lo tatou faalagolago i faamanuiaga faaleperisitua. …
“Ioe, tatou te le faatali seia oo ina le aoga isi auala uma ona faatoa tatou tatalo lea ma le faatuatua pe tuu atu faamanuiaga faaleperisitua mo le faamalologa. I faalavelave faafuasei, e muamua lava tatalo ma faamanuiaga. O le tele o taimi tatou te faia ai i le taimi e tasi ia taumafaiga uma” (“Faamaloloina o e Mama’i,” Ensign po o le Liahona, Me 2010, 47)
Aisea e te manatu e taua ai ona tatou faaaoga le tatalo ma faamanuiaga faaleperisitua, faapea foi ma togafitiga faafomai mo le faamalologa i taimi e mama’i ai?
E tusa ai ma le fuaiupu e 44, pe o le a faamaloloina tagata uma e maua se faamanuiaga faaleperisitua?
Tau atu i tagata o le vasega, na faamalamalama mai e le Alii le pogai e ono le toe malolosi ai nisi o e maua ni faamanuiaga faaleperisitua. Valaaulia se tagata aoga e faitau leotele le Mataupu Faavae ma Feagaiga 42:48. Fai atu i le vasega e mulimuli i le faitauga, ma vaavaai mo mataupu faavae e pulea ai pe o le a faamaloloina se tasi, o se taunuuga o se faamanuiaga faaleperisitua.
E tusa ai ma le fuaiupu e 48, o le a le vaega autu e iloa ai le taunuuga o se faamanuiaga faaleperisitua? (A o tali mai tagata o le vasega, e mafai ona e faamatala atu o le “ua lē tofia e oti” e faatatau i le mea moni e faapea, o le oti po o le faamalologa o le a tupu e tusa ai ma le taimi, poto, ma le finagalo a le Alii.)
Aisea o le a le faamaloloina ai tagata uma o e e faatuatua ia Iesu Keriso?
Aisea e taua ai le i ai o le faatuatua i le finagalo ma le taimi a le Atua mo i tatou taitoatasi?
Valaaulia tagata o le vasega e faailoa mai se mataupu faavae e mafai ona tatou aoaoina mai le Mataupu Faavae ma Feagaiga 42:48 e uiga i le faamaloloina mai o tatou le atoatoa. O tali a tagata o le vasega e tatau ona atagia ai le mataupu faavae lenei: Afai tatou te faatuatua ia Iesu Keriso, e mafai ona faamaloloina i tatou e tusa ai ma Lona finagalo. Atonu e te manao e fautua atu i tagata o le vasega, e faailoga upu po o soafuaiupu i le fuaiupu e 48 o loo aoao mai ai lenei mataupu faavae.
Ina ia fesoasoani i tagata aoga ia malamalama, e tatau ona totonugalemu o tatou faatuatua ia Iesu Keriso, nai lo o taunuuga faapitoa tatou te mananao i ai, fai atu i se tagata aoga e faitau leotele le saunoaga lenei mai ia Elder Dallin H. Oaks o le Korama a Aposetolo e Toasefululua. Valaaulia le vasega e faalogologo mo se mafuaaga pe aisea e taua ai ona faatotonugalemu o tatou faatuatua ia Iesu Keriso.
Ata
Elder Dallin H. Oaks
“I le avea ai ma fanau a le Atua, o le iloa o Lona alofa tele ma Lona silafia uma o le mea e sili ona lelei mo lo tatou manuia e faavavau, tatou te faatuatua ai ia te Ia. O le uluai mataupu faavae o le talalelei o le faatuatua i le Alii o Iesu Keriso, ma o le faatuatua o lona uiga o le talitonuina. Sa ou lagonaina lena talitonuina i se lauga na tuuina atu e lo’u tausoga i le falelauasiga o se tamaitai talavou o le na maliu i se gasegase tigaina. Sa ia tautalagia upu nei na muamua ou te’i ai ona faatoa ou malamalalma ai lea: ‘Ou te iloa o le finagalo lea o le Alii e maliu o ia. Sa lelei lona tausiga faafomai. Sa tuuina atu ia te ia ni faamanuiaga faaleperisitua. Sa tusia lona igoa i lisi tatalo i le malumalu. O ia o le autu o le faitau selau o talosaga mo le toe faafoisia mai o lona malosi. Ma ou te iloa ua lava ma totoe le faatuatua o lenei aiga e faamaloloina ai o ia, vagana ai o le finagalo o le Alii e foi atu o ia i le taimi nei.’ Na ou lagonaina foi lena talitonuina i upu a se tama o se isi teineitiiti lelei na maliu i lona talavou, ona o le kanesa. Sa ia tautino mai, ‘O le faatuatua o lo matou aiga o loo ia Iesu Keriso, ae e le faalagolago i taunuuga.’ E tatagi pea le moni o na aoaoga ia te a’u. Tatou te faia mea uma tatou te mafaia mo le faamaloloina o se pele, ona tatou faalagolago lea i le Alii mo le taunuuga” (“Faamaloloina o e Mama’i,” 50).
Na faapefea ona faaali le faatuatua o tagata sa saunoa e uiga i ai Elder Oaks ia Iesu Keriso?
O nisi taimi e manaomia ai se faatuatua sili atu e vaai ai i le maliu o se tasi e pele ia i tatou, pe onosaia ai se gasegase faaumiumi nai lo le vaaia o i latou o soifua pe faamaloloina. Aisea e te manatu e faapea ai?
Aisea e te manatu e taua ai le faaali o le faatuatua ia Iesu Keriso, e ui lava atonu tatou te le maua le taunuuga tatou te mananao i ai?
Fesili atu i tagata aoga pe latou te iloa se tagata na maliu e ui lava ina sa mulimuli i fautuaga sa’o faafomai, ma saili mo le faamalologa e ala i le tatalo ma faamanuiaga faaleperisitua. (Ia nofouta faapitoa i lagona o i latou o e atonu na oo i ai lenei tulaga.) Valaaulia se tagata aoga e faitau leotele le Mataupu Faavae ma Feagaiga 42:45–47. Fai atu i le vasega e mulimuli i le faitauga, ma vaavaai mo upu po o fasifuaitau e ono aumai ai le faamafanafanaga i se tagata ua i ai se aafiaga i le maliu o se tasi e pele ia te ia.
O le fuaiupu e 45 o loo ta’u mai ai ia i tatou, o le a tatou faavauvau e pei ona faamoemoeina, i le maliu o i latou tatou te alolofa i ai. O a aoaoga faavae na aoao mai i le fuaiupu e 46 e ono mafai ona aumai ai le faamafanafanaga ia i latou o e o faavauvau i le maliu o se tasi e pele ia te i latou? (E mafai ona faaaoga e tagata o le vasega ni upu eseese, ae e tatau ona latou faailoa mai le mataupu faavae lenei: O le oti e suamalie ia te i latou o e oti i le Alii.)
O le a sou manatu i le uiga o le oti i le Alii?
O le a sou manatu i le uiga o le oti o le a “suamalie” ia i latou o e oti i le Alii? (Atonu e manaomia lou faamalamalama atu e faapea, e ui lava ina mafatia se tagata faamaoni ua maliu i tiga faaletino, ae o lenei folafolaga e faatatau i le filemu ma le malologa o le a ia oo i ai i le lalolagi o agaga.)
Valaaulia tagata aoga e mafaufau loloto pe o loo latou ola i ni olaga o le a faapea ona “suamalie” ai le oti ia i latou pe ana faapea e oo ia i latou i le aso. (Atonu e te manao e valaaulia tagata o le vasega e tusi o latou manatu i a latou api o le vasega po o api talaaga mo le suesueina o tusitusiga paia.)
Ua folafola mai e le Alii e faaali mai tusitusiga paia faaopoopo ma le malamalama ia i latou o e ole atu
Aotele le Mataupu Faavae ma Feagaiga 42:56–58 i le faamatala atu, o nei fuaiupu e faatatau i le Faaliliuga a Iosefa Samita o le Tusi Paia. Sa fetalai mai le Alii i le Au Paia, e tatau ona aoao atu i tagata uma le Faaliliuga a Iosefa Samita. Aotele le Mataupu Faavae ma Feagaiga 42:59–69 i le faamatala atu, o nei fuaiupu o loo i ai faatonuga mai le Alii ia Iosefa Samita ma isi taitai o le Ekalesia e uiga i le taimi ma po o ai e tatau ona latou talai atu i ai le talalelei. Na apoapoai mai le Alii ia i latou ia ola i tulafono ua tuuina mai ia i latou, ma sa Ia faamalamalama mai o le a latou maua se taitaiga atili o le a fesoasoani ia i latou e faatuina ai le Ekalesia, ma saunia ai le Au Paia e ola i le Ierusalema Fou i le lumanai. E le gata i lea, na aoao mai e le Alii ia i latou mataupu faavae e faatatau i le auala e mafai ona faaauau ai pea ona latou maua faaaliga faalelagi. Aotele le Mataupu Faavae ma Feagaiga 42:70–73 i le faamatala atu, i lalo o le tulafono o le faapaiaga, o i latou o e na tuuina atu ni auaunaga tumau pe le tumau i le Ekalesia, na tuuina i ai ni fesoasoani tautupe.
Valaaulia tagata o le vasega e faitau filemu le Mataupu Faavae ma Feagaiga 42:61, 68, ma vaavaai mo mataupu faavae e uiga i le mauaina o faaaliga. O tali a tagata o le vasega e mafai ona aofia ai vaega nei:
Afai tatou te ole atu, o le a tuuina mai e le Alii ia i tatou le malamalama lea o le a aumai ai ia i tatou le filemu, olioli ma le ola e faavavau.
Afai tatou te ole atu mo le poto, o le a foai tele mai e le Alii ia i tatou.
O a ni faamanuiaga o le ole atu ma le filiga i le Alii mo se faaaliga?
Faasoa atu lau molimau, o loo taitai i tatou e o tatou taitai o le Ekalesia e ala i le mataupu faavae o faaaliga faifaipea.
Ua maua e taitai perisitua ni faatonuga i le taulimaina o tagata o le ekalesia o e faia ni agasala matuia
Faamalamalama atu faapea, i le Mataupu Faavae ma Feagaiga 42:74–87, na faamatala mai ai e le Alii nisi o tulafono e pulea ai aoaiga faale-Ekalesia. Na faapitoa ona Ia tuuina mai le taitaiga i taitai perisitua e uiga i auala e auauna atu ai ia i latou o e ua solia agasala matuia, e aofia ai agasala o feusuaiga, gaoi, pepelo, po o “soo se ituaiga o amioletonu” (MF&F 42:87).
Ua faatonu e le Alii le Au Paia i le auala e foia ai le le fiafia [ita] o le tagata lava ia
O anafea na e vaaia ai se tasi ua le fiafia i upu po o amioga a se isi tagata? Pe na e lagonaina le tiga po o le le fiafia ona o upu po o amioga a se isi tagata?
Valaaulia se tagata o le vasega e faitau leotele le Mataupu Faavae ma Feagaiga 42:88-89. Fai atu i le vasega e mulimuli i le faitauga, ma vaavaai mo faatonuga a le Alii mo le mea e fai pe a faatiga mai se tagata ia i tatou.
O le a le mea e tatau ona tatou faia i se tasi na faatiga ia i tatou? (Faalelei ma ia faalilolilo. Atonu e te manao e faamalamalama atu, o le upu faalelei o lona uiga ia foia ni eseesega ma toefuatai mai le nofo lelei.)
Aisea e te manatu ai, o lenei auala atonu e aoga?
Tusi le faamatalaga le uma lenei i le tasi itu o le laupapa:
O faatausuaiga e faia faalilolilo e tatau ona …
O faatausuaiga e faia faaaliali e tatau ona …
I le isi itu o le laupapa, tusi ai faaiuga o faamatalaga taitasi na taua muamua:
… na foia faaaliali.
… na foia faalilolilo.
Valaaulia tagata o le vasega e faitau filemu le Mataupu Faavae ma Feagaiga 42:90–93, ma faatonu i latou e faafetaui faamatalaga taitasi e le’i uma i faaiuga talafeagai. (O faatausuaiga e faia faalilolilo e tatau ona foia faalilolilo. O faatausuaiga e faia faaaliali e tatau ona foia faaaliali.)
Aisea e le talafeagai ai ona foia faaaliali ni faatausuaiga faalilolilo?
Aisea atonu e i ai taimi e talafeagai ai le foia faaaliali o faatausuaiga faaaliali?
Fai atu i tagata o le vasega e mafaufau i tulaga e faaalia ai le faaaogaina sa’o ma le le sa’o o nei upumoni. Valaaulia ni nai tagata o le vasega e faasoa mai a latou tali. (A o faasoa mai tagata o le vasega, faamamafa atu o le foia o faatausuaiga i le ala a le Alii, e aafia ai le salamo ma le faamagaloga.)
O a ni auala e te manatu o le foia ma le talafeagai o faatausuaiga e ono faamanuiaina ai se aiga? Se uarota po o se paranesi? Se vaega o tagata o le vasega?
Atonu e te manao e faailoa atu faapea, e manaomia le lototele ina ia tatou oo atu ai i se tasi na faatausuai ia i tatou. Valaaulia tagata o le vasega e tatalo mo se fesoasoani mai le Tama Faalelagi, a o latou saili e foia ma le talafeagai ni eseesega ma isi.
Na faamalamalama mai e Peresitene Iosefa Filitia Samita, le uiga o le oti e suamalie ia i latou e oti i le Alii:
Ata
Peresitene Iosefa Filitia Samita
“I nisi o tagata o le Ekalesia, o le faaupuga e faapea, o i latou o e oti i le Alii o le a le tofo i le oti, o se faaupuga faigata lea. Ua latou vaai i alii ma tamaitai lelei ma faamaoni o puapuagatia i le tele o aso, ma o nisi taimi, e ta’i masina ona faatoa maliliu ai lea. Ae o i, e le o fetalai mai le Alii o le a latou le mafatia i tiga o le itno, ae o le a le i ai ia te i latou le ita ma le pologa o le loto lea o le a tofo i ai e amioleaga, ma e ui lava latou te ono puapuagatia i le tino, ae o le oti ia i latou o le a suamalie ma o le a latou iloa ai o loo latou agavaa i luma o le Alii“ (Church History and Modern Revelation, 2 vols. [1953], 1:186). (Tagai foi i le Mataupu Faavae ma Feagaiga Tusi Lesona a le Tagata o le Vasega, 2nd ed. [Church Educational System manual, 2001], 85.)
Na saunoa Peresitene Iosefa Filitia Samita, “E leai se tagata amiotonu e aveina atu a’e le’i oo i lona taimi” (i le “Funeral Services mo Elder Richard L. Evans,” Ensign, Tes. 1971, 10).
Na faamalamalama mai e Elder David A. Bednar o le Korama a Aposetolo e Toasefululua e faapea, e pei lava ona tatou manaomia le faatuatua ina ia faamaloloina ai, tatou te manaomia le faatuatua e talia ai le finagalo o le Alii o le a le faamaloloina i tatou:
Ata
Elder David A. Bednar
“[O loo i ai] se mataupu faavae e fetaui i soo tuuto uma: o le faatuatua malosi i le Faaola o le taliaina ma le usiusitai o Lona finagalo ma [Lana] taimi i o tatou olaga—e tusa lava pe o le tali e le o le mea lea sa tatou faamoemoe pe mananao i ai. …
“O le amiotonu ma le faatuatua ua mautinoa lava le aoga e fuliese ai mauga po o mea faalavefau—pe afai o le fulieseina o mauga e ausia ai faamoemoega o le Atua ma ua tusa ai ma Lona finagalo. O le amiotonu ma le faatuatua e mautinoa lava e aoga i le faamaloloina o e mamai, tutuli, pe pipili—pe afai o faamalologa faapena e ausia ai faamoemoega o le Atua ma ua tusa ai ma Lona finagalo. O le mea lea, e oo foi i le faatuatua malosi, e tele mauga o le a le aveesea ai. Ma e le o ma’i uma ma lē atoatoa o le a faamaloloina. Afai e faatapulaaina mea faafeagai uma, afai e aveesea uma ia faafitauli, o lona uiga o le a le faataunuuina faamoemoega autu o fuafuaga a le Tama.
“O le tele o lesona e tatau ona tatou aoaoina i le olaga nei, e pau le auala e mafai ona maua ai, e ala lea i mea tatou te oo i ai ma o nisi taimi e puapuagatia ai. Ma ua faamoemoe ma talitonu le Atua tatou te fetaiai ma faigata lē tumau o le olaga nei faatasi ai ma Lana fesoasoani ina ia mafai ona tatou aoaoina mea e tatau ona tatou iloa, ma avea ai ma tagata e tatau ona avea ai i tatou i le faavavau” (“Ina Ia Tatou ‘Le … Solomuli’ [MF&F 19:18]” [faigalotu a le OAE mo talavou matutua, 3 Mat., 2013], LDS.org). (Tagai foi i le Mataupu Faavae ma Feagaiga Tusi Lesona a le Tagata o le Vasega, 2nd ed. [Church Educational System manual, 2001], 85–86.)
I nei fuaiupu, o loo ta‘ua ai le maua e le epikopo ma ona fesoasoani o “se totogi tatau ai mo” a latou auaunaga. I o tatou aso, o lenei faaupuga e faasino tonu lava i le Au Pulega Aoao, peresitene o misiona, ma peresitene o malumalu o e o loo manaomia ona tuua mea uma o lo latou tausiga ina ia auauna atu tumau i le Ekalesia. O nei tagata taitoatasi e maua se alauni talafeagai e ola ai e lava mo le tausiga o i latou ma o latou aiga patino i le taimi o la latou auaunaga.