Anomea o Sauniuniga mo le Faiaoga mo Suesuega i le Fale
Aotelega o Lesona mo Suesuega i le Fale i Aso Taitasi
O le aotelega lenei o mea na tutupu, aoaoga faavae, ma mataupu faavae na aoaoina e tagata aoga a’o latou suesueina le “O Le Nofoaga Tutotonu o Siona” ma le Mataupu Faavae ma Feagaiga 57–59 (iunite 13) e le o faamoemoe e aoao atu o se vaega o lau lesona. O le lesona e te aoaoina atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tamaiti aoga.
Aso 1 (O Le Nofoaga Tutotonu o Siona)
I lenei lesona na maua ai e tagata aoga se vaaiga aoao o le manatu faavae e uiga ia Siona. Na latou iloaina ai o Siona e faatatau i se laueleele ma se aai ma i se vaega o tagata o e e loto mama. Na aoao tagata aoga e uiga i le nofoaga o le aai o Siona, ma o Siona e tatau ona fausia i mataupu faavae o le amiotonu. Sa aoao foi tagata aoga e uiga i tauiviga na oo i le Au Paia a o latou taumafai e faatu Siona i le Itumalo o Jackson, Misuri.
O se vaega o lenei lesona, sa aoaoina e tagata aoga o le aai o Siona o le a faatuina i Initipene, Itumalo o Jackson, Misuri, ma o le a faapea ona fausia ai iina se malumalu. Na tuuina mai e le Alii ia faatonuga i ni tagata o e na valaauina e fesoasoani e faatuina Siona. A o aoao tagata aoga e uiga i nei tagata, na latou iloa ai, e tatau ona tatou faaaogaina o tatou malosiaga taitoatasi e fesoasoani ai e fausia le malo o le Alii, a o Ia valaau mai ia i tatou e faia lena mea.
E ala i le suesueina o le fautuaga na tuuina mai e le Alii i toeaina o e na feagai ma le galuega tele o le fausiaina o Siona, na faapea ona iloa ai e tagata aoga ia mataupu faavae nei: O le a faamanuiaina i tatou pe afai tatou te tausia poloaiga a le Alii, o le a sili atu lo tatou taui e faavavau pe afai tatou te tumau faamaoni i puapuaga, ma afai e faaaoga lo tatou faitalia e fai ai mea e aumaia ai le amiotonu, o le a tauia i tatou. Sa manatunatu foi tagata aoga i le folafolaga a le Alii, afai tatou te salamo i a tatou agasala, o le a Ia faamagaloina i tatou ma le toe manatuaina a tatou agasala.
E ala i le suesueina o faatonuga a le Alii i le Au Paia o e sa malaga atu i Misuri, na faapea ona aoao ai e tagata aoga, e tatau ona tatou alolofa i le Atua ma o tatou loto, manatu, mafaufau, ma le malosi atoa, ma afai tatou te tausia le aso Sapati ia paia, o le a fesoasoani ia i tatou e tetee atu i faaosoosoga ma faatoilalo ai agasala. Na latou aoaoina foi, tatou te faatiga i le Atua pe a tatou le faailoa atu lo tatou agaga faafetai ia te Ia ma tausi Ana poloaiga. Na faailoa mai foi e tagata aoga faamanuiaga e mafai ona latou maua pe afai latou te tausia poloaiga a le Alii.
Folasaga
O lenei lesona e mafai ona fesoasoani i tagata aoga ia malamalama atili i mataupu faavae o le salamo. A o aoao e tagata aoga nei mataupu faavae, e mafai ona latou mafaufau i mea e tatau ona latou faia e salamo ai, ma auala e mafai ai e le folafolaga a le Alii o le faamagaloga ona faamanuia ai o latou olaga. E ui o nisi o nei mea sa ta’ua i lesona i aso taitasi, ae o lenei lesona e te maua ai se avanoa e fesoasoani ai i tagata aoga ia malamalama lelei i mataupu faavae o le salamo, ma le auala e faaaoga ai i o latou olaga.
Ua tuuina mai e le Alii ia faatonuga e faatatau ia Siona ma ua aoao mai mataupu faavae o le salamo
A o lei amataina le vasega, tusi fesili nei i luga o le laupapa: O le a le uiga o le ia salamo? E mafai faapefea ona ou iloa pe ua ou salamo atoatoa? I le amataga o le vasega, fesili atu i tagata aoga pe faapefea ona latou taliina ia fesili.
Tusi igoa nei i luga o le laupapa: Matini Harisi, Viliamu W. Phelps, ma Ziba Peterson.
Valaaulia se tagata aoga e faitau leotele le Mataupu Faavae ma Feagaiga 58:38–41, 60. Fai atu i le vasega e mulimuli i le faitauga, ma vaavaai mo le fautuaga na tuuina mai e le Alii i na alii a’o latou sauni e fausia Siona. A o tali mai tagata aoga i fesili nei, ia tusi a latou tali i lalo o le igoa talafeagai i luga o le laupapa.
O a agasala na fetalai mai le Alii sa tausalaina ai Matini Harisi? O le a le mea na fetalai mai le Alii ia te ia e fai?
O a agasala na fetalai mai le Alii sa tausalaina ai Viliamu W. Phelps? O le a le mea na fetalai mai le Alii ia te ia e fai? (Atonu e te manao e faamalamalama atu o le fuaitau “saili ia matua tulaga ese” [i lefuaiupu e 41] e le o lona uiga o le tatou faia o le mea sili po o le taumafai ia alualu i luma. Ae, o lenei fuaitau e faatatau i se manaoga amioletonu, faamaualuga, ia foliga ia sili atu po o le ia taua atu nai lo isi tagata.)
O le a le mea na taumafai Ziba Peterson e fai i ana agasala?
Ia faailoa atu, o agasala a nei alii, sa foliga mai e taofia ai i latou mai le fesoasoani atu e fausia Siona.
O a nisi o auala e ono faatapulaa ai e agasala o tatou gafatia e auauna atu i le Alii?
Valaaulia se tagata aoga e faitau leotele le Mataupu Faavae ma Feagaiga 58:42. Fai atu i le vasega e mulimuli i le faitauga, ma vaavaai mo le aoaoga na aoao mai e le Alii e uiga i le salamo.
E tusa ai ma lenei fuaiupu, o le a le folafolaga a le Alii ia i tatou pe afai tatou te salamo i a tatou agasala? (E tatau ona faailoa mai e tagata aoga le mataupu faavae lenei: Afai tatou te salamo i a tatou agasala, o le a faamagalo i tatou e le Alii ma le toe manatuaina a tatou agasala. Tusi lenei mataupu faavae i luga o le laupapa. Atonu e te manao e fautua atu i tagata aoga e faailoga upu o loo aoao mai ai lenei mataupu faavae i le fuaiupu e 42.)
O le fea o a tatou agasala e faatatau i ai lenei folafolaga? (O agasala uma lava.)
Valaaulia se tagata aoga e faitau leotele le saunoaga lenei mai ia Peresitene Boyd K. Packer o le Korama a Aposetolo e Toasefululua. Fai atu i le vasega e faalogologo mo upu po o fuaitau e faatatau i le mataupu faavae ua tusiaina i luga o le laupapa.
Ata
Peresitene Boyd K. Packer
“Po o a lava a tatou soligatulafono, po o le a foi se tele e faamanualia ai e a tatou amioga isi tagata, o lena tausalaina e mafai lava ona tafiesea atoa. Ia te au, masalo o le fasifuaitau aupito sili ona matagofie i tusitusiga paia o le mau lea ina ua fetalai le Alii, ‘Faauta, o ia o le ua salamo i ana agasala, o ia lava lea ua faamagaloina, ma o Au, o le Alii, e le toe manatuaina lava i latou.’ [MF&F 58:42.]
“O le folafolaga lena o le talalelei a Iesu Keriso ma le Togiola” (“O Le Togiola,” Ensign po o le Liahona, Nov. 2012, 77).
E faapefea ona faamanuiaina lou olaga i le iloa e mafai ona faamagaloina au agasala uma?
Faamalamalama atu e faapea, o nisi tagata ua manatu sese e faapea, afai latou te manatuaina lava a latou agasala, e le’i atoatoa ona latou salamo. Faamautinoa atu ia te i latou, o le manatua o a latou agasala e mafai ona fesoasoani e aloese ai mai le toe faia o na lava mea sese e tasi.
Valaaulia se tagata aoga e faitau le saunoaga lenei mai ia Peresitene Harold B. Lee. Fai atu i le vasega e faalogologo mo mea na ia aoao atu e uiga i le filemu o le mafaufau lea e mafai ona oo mai e ala i le salamo.
Ata
Peresitene Harold B. Lee
“Afai e oo mai le taimi ua e faia ai mea uma e mafai ona e faia e salamo ai i au agasala, po o ai lava oe, po o fea foi o e i ai, ma ua faia ni faasaoga ma se faaleleiga i le lelei e te mafaia ai; pe afai o se mea o le a aafia ai lou tulaga i le Ekalesia ma ua e oo atu i taitai e tatau ai, o le a faapea ona e manao i lena tali mautinoa pe ua taliaina oe e le Alii pe leai. I lau sailiga loloto, afai e te saili atu mo, ma e maua ai lena filemu o le mafaufau, o lena faailoga e mafai ona e iloa ai ua talia e le Alii lou salamo” (Stand Ye in Holy Places [1974], 185).
Faamanino atu o le folafolaga o loo tusia i luga o le laupapa e i ai ona tuutuuga. Na pau le ala tatou te maua ai le faamagaloga a le Alii, o le faia lea o mea uma e mafai ona tatou salamo atoatoa ai i a tatou agasala.
Valaaulia se tagata aoga e faitau leotele le faamatalaga lenei mai le tamaitusi Mo le Malosi o le Autalavou. Fai atu i le vasega e faalogologo mo mea e mafai ona latou aoao i ai e faatatau i le uiga o le salamo.
“O le salamo e sili atu nai lo le na o le faailoaina o mea sese. O se suiga o le mafaufau ma le loto. E aofia ai le fulitua i le agasala ma liliu atu i le Atua mo le faamagaloga. E faaosofia e ala i le alofa mo le Atua ma le naunau faamaoni e usitai i Ana poloaiga” (Mo le Malosi o le Autalavou [tamaitusi, 2001], 28).
Valaaulia se tagata aoga e faitau leotele le Mataupu Faavae ma Feagaiga 58:43. Fai atu i le vasega e mulimuli i le faitauga, ma vaavaai mo ni mea se lua e tatau ona tatou faia e salamo atoatoa ai i a tatou agasala.
E tusa ai ma lenei fuaiupu, o a mea e lua e tatau ona tatou faia e salamo atoatoa ai i a tatou agasala? (Tusi le aoaoga faavae lenei i luga o le laupapa: Ina ia salamo, e tatau ona ta‘uta’u atu ma lafoai a tatou agasala.)
O a auala e fesoasoani ai lenei aoaoga faavae ia i tatou e tali le fesili “E mafai faapefea ona ou iloa ua ou salamo atoatoa?” (Fesoasoani i tagata aoga ia malamalama o le ta‘uta’u atu ma le lafoaia o agasala e taua i le salamo atoatoa.)
O le a le uiga o le ta’uta’u atu o a tatou agasala?
Ina ia fesoasoani i tagata aoga ia malamalama lelei i le uiga o le ta’uta’u atu o a tatou agasala, valaaulia se tagata aoga e faitau leotele le saunoaga lenei mai ia Elder D. Todd Christofferson o le Korama a Aposetolo e Toasefululua:
Ata
Elder D. Todd Christofferson
“O le ta’uta’u atu ma le lafoai o ni manatu faavae mamana. E matua tele atu nai lo le na o se fai atu faasamasamanoa ‘ou te ioe i ai; ou te faamalie atu.’ O le ta‘uta’u atu o se faailoaga loloto, o nisi taimi e tiga, o mea sese ma solitulafono i le Atua ma le tagata” (“O Le Meaalofa Paia o le Salamo,” Ensign po o le Liahona, Nov. 2011, 40).
O a auala e fesoasoani ai le ta’uta’u atu o a tatou agasala, tatou te o ese ai mai le agasala ma liliu atu i le Atua mo le faamagaloga?
O se vaega o lenei talanoaga, atonu e tuufesili ai tagata aoga po o a agasala e ta’uta’u atu ma ia te ai. Faamalamalama atu e tatau ona ta‘uta’u atu a tatou agasala uma i le Tama Faalelagi. O agasala matuia, e pei o le agasala o feusuaiga (e aofia ai le faaaogaina o ponokalafi), e tatau foi ona ta’uta’u atu i le epikopo po o le peresitene o le paranesi.
Faasino atu i tagata aoga le aoaoga faavae mulimuli na e tusia i luga o le laupapa.
O le a le uiga o le lafoai o a tatou agasala? (O le liliuese atoa mai a tatou agasala ma ia le toe faia.)
Molimau atu i le Togiola a le Faaola ma mataupu faavae o le salamo ma le faamagaloga sa outou talanoaina. Valaaulia tagata aoga e mafaufau loloto pe o i ai ni agasala e manaomia ona latou salamo ai, ma uunaia i latou e salamo e ala i le faatinoina o upumoni na latou aoaoina.
Faamanatu atu i tagata aoga o le Mataupu Faavae ma Feagaiga 58:42–43 o se fuaitau o mau tauloto. Valaaulia i latou e lipoti mai pe o faapefea mai a latou taumafaiga i le taulotoina.
Ina ia saunia tagata aoga mo la latou suesuega o le Mataupu Faavae ma Feagaiga 60–64, atonu e te manao e valaaulia i latou e mafaufau i le mea lenei: Afai e le faamagaloina e se tagata se isi tagata mo se sese sa ia faia, o ai ua ta’usalaina i le agasala sili atu? Valaaulia tagata aoga e mafaufau pe faapefea ona latou tali atu pe a latou [lagona] le tiga i amioga po o faamatalaga a se isi tagata. E oo lava i tulaga aupito sili ona tiga, o ai e tatau ona tatou faamagaloina? Faamatala atu o le iunite e sosoo ai, o le a aoao ai e tagata aoga le mea na aoao mai e le Alii e uiga i lenei mataupu ma le auala e tali atu ai i solitulafono a isi.