I le aso 23 o Iulai, 1837, na maua ai e le Perofeta o Iosefa Samita se faaaliga mo Thomas B. Marsh, o le sa avea ma Peresitene o le Korama a Aposetolo e Toasefululua. I le faaaliga lenei, ua faamaumauina i le Mataupu Faavae ma Feagaiga 112, na tuuina mai ai e le Alii le fautuaga e tusa ai ma tiutetauave o le Korama a Aposetolo e Toasefululua.
Ua tuuina mai e le Alii se fautuaga ma ni folafolaga ia Thomas B. Marsh
Tusi upu nei i luga o le laupapa: ita, loto vaivai, tiga, lotoleaga. Valaaulia tagata aoga e mafaufau i ni taimi na oo ai ia i latou nei lagona.
Valaaulia se tagata aoga e faitau leotele le faamatalaga lenei. Fai atu i le vasega e faalogologo mo se tulaga na feagai ma Thomas B. Marsh atonu na taitai atu ai o ia i le mauaina o nei lagona ua tusia i luga o le laupapa.
E lei umi talu ona valaauina Thomas B. Marsh e avea ma se Aposetolo i le 1835, ae tofia o ia o le Peresitene o le Korama a Aposetolo e Toasefululua. I le tautotogo o le 1837, na iloa ai e Peresitene Marsh o se tasi o le au Aposetolo e Toasefululua, o Pale P. Palate, sa fuafua e alu i se misiona i Egelani e aunoa ma le taitaiga a Peresitene Marsh. Sa tusi mai Peresitene Marsh, o le sa i Misuri, ia Elder Palate ma isi sui o le Toasefululua, ma valaaulia i latou ia latou feiloai i Katelani, Ohaio, i le aso 24 o Iulai, 1837, ina ia mafai ona latou autasi i a latou fuafuaga mo ni misiona. Ae peitai, i le masina a o lei faia lena fonotaga, na malaga ai isi sui e toalua o le Toasefululua, o Heber C. Kimball ma Orson Hyde, i Egelani ina ua uma ona maua ni valaauga o misiona mai le Perofeta o Iosefa Samita. Na le fiafia lava Peresitene Marsh ina ua amata ona talai le talalelei e tagata o le Toasefululua i Egelani e aunoa ma lona aafia ai.
I lenei tulaga, o le a se mea e mafai ona fai e Peresitene Marsh e aloese ai mai i lagona o loo lisiina i luga o le laupapa? O a nisi o tulaga matautia o le faatagaina o lagona faapena e pulea o tatou mafaufauga ma amioga?
Faamalamalama atu, sa faasoa atu e Peresitene Marsh ona atugaluga i le Perofeta o Iosefa Samita ma saili atu i lana fautuaga. I le tali mai, na tuuina mai ai e le Alii le faaaliga ua faamaumauina i le Mataupu Faavae ma Feagaiga 112.
Valaaulia se tagata aoga e faitau leotele le Mataupu Faavae ma Feagaiga 112:1–3. Fai atu i le afa o le vasega e vaavaai mo lapataiga na tuuina mai e le Alii ia Peresitene Thomas B. Marsh. Fai atu i le isi afa e vaai mo mea lelei na fetalai mai le Alii na faia e Peresitene Marsh. (A o lei faitauina e tagata aoga, atonu e te manao e faamalamalama atu o le upu faamaualaloina i le fuaiupu e 3 ua faailoa mai ai na faalotomaualaloina e Peresitene Marsh o ia lava.)
O a ni lapataiga na tuuina mai e le Alii ia Thomas B. Marsh?
O a ni mea lelei na fetalai mai le Alii na faia e Peresitene Marsh?
Faamalamalama atu, na tuuina mai e le Alii nisi o fautuaga ia Peresitene Marsh ma faaali mai nisi o faamanuiaga e mafai ona maua e Peresitene Marsh mo lona faamaoni. Valaaulia ni nai tagata aoga e feauauai i le faitauina leotele o le Mataupu Faavae ma Feagaiga 112:4–10. Fai atu i le vasega e mulimuli i le faitauga ma vaavaai mo poloaiga na tuuina mai e le Alii ia Thomas B. Marsh. Mafaufau e valaaulia se tagata aoga e tusi nei folafolaga i le laupapa a o maua e tagata aoga.
E faapefea ona e toe faaupuina aoaoga a le Alii i le fuaiupu e 10 i au lava upu? (E mafai ona faaaoga e tagata aoga ni upu eseese, ae e tatau ona latou faailoa mai le mataupu faavae lenei: Afai tatou te lotomaualalo, o le a taitai i tatou e le Alii ma tuuina mai tali i a tatou tatalo.)
Aisea e te manatu ai o le lotomaualalo e fesoasoani tatou te maua ai le taitaiga a le Alii?
O le a se taimi na e lagonaina ai le taialaina e le Alii ina ua uma ona e faalotomaualaloina oe lava ia?
Faamalamalama atu e faapea, ia Iulai 1837, ina ua tuuina mai e le Alii le faaaliga lenei, sa faapea ona i ai le Ekalesia i le le lotogatasi, fefinauai, ma le liliuese. O le faamaualuga ma le faaloloto na taitai atu ai nisi o tagata o le Ekalesia e faaaliali lo latou faitioina o le Perofeta o Iosefa Samita ma fesiligia lana pule. O nisi tagata o le Ekalesia, e aofia ai nisi o le Korama a Aposetolo e Toasefululua, sa oo lava ina saili e aveese Iosefa Samita mai le avea ma Peresitene o le Ekalesia.
Valaaulia se tagata aoga e faitau leotele le Mataupu Faavae ma Feagaiga 112:11-13. Fai atu i le vasega e mulimuli i le faitauga, ma vaavaai mo mea na faatonuina e le Alii ia Peresitene Marsh e fai e fesoasoani ai i tagata o le Korama a le Toasefululua o e sa i ai ni faafitauli. Fai atu i tagata aoga e lipoti mai mea ua latou mauaina.
Ua aoao e le Alii ia Thomas B. Marsh e faatatau i tiute o le au Aposetolo e Toasefululua
Faailoa atu, na tuuina mai e le Alii ia Peresitene Thomas B. Marsh ni tiutetauave taua se tele. Tusi le fesili lenei i luga o le laupapa: O le a se mea e mafai ona fesoasoani ia te oe ina ia e lotomaualalo ai pe a e maua ni tiutetauave po o se aloaiaina taua? Valaaulia tagata aoga e mafaufau loloto i le fesili lenei.
Faamalamalama atu, sa fesoasoani le Alii ia Thomas B. Marsh ia iloa le taua o ona tiutetauave o se Peresitene o le Korama a Aposetolo e Toasefululua a o faaauau pea ona faamanatu atu ia te ia ina ia lotomaualalo. Kopi le siata lenei i luga o le laupapa po o le saunia o se pepa e tufa atu. Fai atu i tagata aoga e galulue o ni paga e faitau ia fuaiupu atofaina ma faatumu le siata (po o le faatumu o se vasega).
O fasifuaitau o loo faamamafaina ai le taua o tiutetauave o Peresitene Marsh ma le Korama a Aposetolo e Toasefululua
O fasifuaitau e faamanatu mai ai ia Peresitene Marsh ma le Korama a Aposetolo e Toasefululua o le manaomia o le lotomaualalo
A ua lava se taimi e faatumu ai e tagata aoga le siata, ia fai atu fesili nei:
O a ni fasifuaitau na e maua o loo faamamafa mai ai le taua o tiutetauave o Peresitene Marsh?
E tusa ai ma fuaiupu e 16-17, o a ki o loo umia e le Peresitene o le Korama a Aposetolo e Toasefululua? (E mafai ona faaaoga e tagata aoga ni upu eseese, ae e tatau ona latou faailoa mai le upumoni lenei: O le Peresitene o le Korama a Aposetolo e Toasefululua, e umia ki e taitai ai le galuega a le Toasefululua i le talaiga o le talalelei i atunuu uma.)
E tusa ai ma fuaiupu e 30–32, o le a le mea sa aoao mai e le Alii ia Thomas B. Marsh e uiga i ki o le perisitua sa ia umiaina? (E mafai ona faailoa mai e tagata aoga ni mataupu faavae eseese, ae ia mautinoa latou te faailoa mai le upumoni lenei: Ua toefuatai mai ki o le perisitua mo le taimi mulimuli i le tisipenisione o le atoaga o taimi. Atonu e te manao e toe faamanatu puupuu le uiga o le upu tisipenisione [tagai Bible Dictionary, “Dispensations”].)
O a ni fasifuaitau na e maua na faamanatu mai ai ia Thomas B. Marsh le manaomia ona lotomaualalo?
O a ni mea ua aoao mai i afioga a le Alii i fuaiupu e 15 ma le 30 e uiga i le va o tiutetauave o Thomas B. Marsh i le avea ma Peresitene o le Korama a le Toasefululua ma tiutetauave o Iosefa Samita i le avea ma Peresitene o le Ekalesia?
Ina ia fesoasoani i tagata aoga ia iloa sa faafaigata ia Thomas B. Marsh ona mulimuli i le fautuaga na ia mauaina i le faaaliga lenei, valaaulia se tagata aoga e faitau le palakalafa lenei:
E lei leva ona uma ona tuuina mai le faaaliga i le Mataupu Faavae ma Feagaiga 112 ae ta’u atu e Thomas B. Marsh ia Vilate Kimball e faapea, o le a le manuia [taumafaiga] a lona toalua, o Elder Heber C. Kimball, i lana misiona i Egelani. Na manatu moni lava Peresitene Marsh e faapea, talu ai ona o lona tiutetauave le folafolaina atu o le talalelei i atunuu e mamao, o le a faapea ona le matala ai le faitotoa i le galuega faafaifeautalai i Egelani seiiloga na te auina atu se tasi pe alu atu foi i ai o ia lava.
E faapefea ona faaalia i lenei mea na tupu, atonu na faigata ia Peresitene Marsh ona tumau i le lotomaualalo?
Tagai i le fesili sa e tusia i luga o le laupapa. Valaaulia tagata aoga e tali i le fesili. O se vaega o lenei talanoaga, mafaufau e faaaoga le saunoaga lenei mai ia Peresitene Dieter F. Uchtdorf o le Au Peresitene Sili:
Ata
Peresitene Dieter F. Uchtdorf
“Tatou te le maua le lotomaualalo e ala i le mafaufau itiiti ia i tatou lava; tatou te maua le lotomaualalo e ala i le mafaufau itiiti e uiga i iai tatou lava. E oo mai a’o tatou faia a tatou galuega ma se uiga o le auauna atu i le Atua ma o tatou uso a tagata.
“… O le taimi lava e taofia ai lo tatou faamemelo ia i tatou lava ma tuu atu i tatou lava i auaunaga, o le taimi foi lena e faaitiitia ai le faamaualuga ma amata ai ona mate atu” (“O Le Faamaualuga ma le Perisitua,” Ensign po o le Liahona, Nov. 2010, 58).
Faamanatu atu i tagata aoga e uiga i faamanuiaga na folafola mai e le Alii ia Peresitene Marsh (tagai i le MF&F 112:4–10). Atonu sa e tuu atu i se tagata aoga e lisi nei faamanuiaga i luga o le laupapa i se taimi na muamua atu. Valaaulia se tagata aoga e faitau leotele le Mataupu Faavae ma Feagaiga 112:34. Fai atu i le vasega e mulimuli i le faitauga ma faailoa mai mea na manaomia ona faia e Peresitene Marsh ina ia maua ai nei faamanuiaga. Fai atu i tagata aoga e lipoti mai mea ua latou mauaina. Ona tusi lea o le mataupu faavae lenei i luga o le laupapa: E tatau ona tatou faamaoni ina ia mafai ona maua faamanuiaga folafolaina a le Alii.
Ina ia fesoasoani i tagata aoga ia malamalama i lenei mataupu faavae, faitau pe otooto le tala lenei i le liliu ese ma le toe foi mai o Thomas B. Marsh i le Ekalesia:
Mo se taimi, sa mulimuli ai Peresitene Marsh i le fautuaga na ia mauaina. Sa ia galue e faamalosia le Ekalesia ma lagolago Iosefa Samita. Ae ui i lea, e lei umi ae toe foi i ona lagona o le faafinau e uiga i le ala na taitaia ai le Ekalesia. O nei lagona faatasi ai ma le popole i feteenaiga i le va o tagata le usiusitai ma le lotomalolosi o le Ekalesia ma o latou tuaoi i Misuri. Ia Setema 1838, a’o lofituina o ia i lenei agaga o le liliuese, sa faapea ona aafia ai lona toalua o Elisapeta i se feeseeseaiga. Sa malilie i laua ma se isi tamaitai, o ni tagata uma o le Ekalesia, e faafesuiai e le aunoa ia susu ina ia lava mo le faia o ni sisi, ae sa tuuaia Tuafafine Marsh i le solia o lana maliega e ala i le tuuina o se vaega o le susu lea sa sili ona tele ai le kulimi. Sa silia i le faatasi ona aumai le mataupu i luma o taitai o le Ekalesia. Sa oo lava ina aumai i luma o le Au Peresitene Sili. O taimi uma lava, sa tonu ai o Tuafafine Marsh na sese. Sa ita ma le faamalieina Peresitene Marsh i nei faaiuga (tagai i le George A. Smith, “Discourse,” Deseret News, Ape. 16, 1856, 44). E ui o lenei tulaga sa le’i taitaiina ai o ia e tuua le Ekalesia, ae sa tuufaatasi ai ma isi ona le fiafia. Sa faapea ona faateteleina lona faitio i isi taitai o le Ekalesia, ma iu ai ina liliuese e faasaga i le Au Paia. Sa ia ta’ua mulimuli ane, “Sa oo ina ou lotovale i le Perofeta … ma le amanaiaina ai mea uma sa sa’o, ma faaaluina ai lo’u taimi atoa i le vaavaai mo mea leaga” (“Remarks,” Deseret News, 16 Sete., 1857, 220).
Ia Oketopa 1838, sa tauto ai Thomas B. Marsh i luma o se faamasinoga e faapea, sa tetee atu Iosefa Samita ma le Au Paia o Aso e Gata Ai i le setete o Misuri. O lenei tautoga na saofaga atu i le malo i le tuuina mai o se aveae mo le faateaga, lea na iu ai ina faate’a ese le silia ma le 15,000 o le Au Paia mai o latou fale i Misuri.
O le sefuluvalu tausaga talu ona tuua e Thomas B. Marsh le Ekalesia, sa ia tusia ai ma le faamaualalo se tusi ia Peresitene Heber C. Kimball, o le Au Peresitene Sili, ma talosagaina se faamagaloga ma se faatagaga e toe auai ai i le Ekalesia. Sa ia faamatalaina le mea sa ia aoaoina e ala i ana mea sese: “E mafai lelei lava ona faaauau le galueag a le Alii e aunoa ma a’u, ma e leai ma se mea na aveesea mai ia te Ia e ala i lo’u aluese mai le vaegaau; Ae paga lea, i le tele o mea ua aveesea mai ia te a’u?!” (Tusi a Thomas B. Marsh ia Heber C. Kimball, 5 Me, 1857, Brigham Young Collection, Church History Library, e pei ona siiina mai e Kay Darowski, “The Faith and Fall of Thomas Marsh,” Revelations in Context, history.lds.org).
Tagai i le mataupu faavae o loo i luga o le laupapa. Faamalamalama atu na toe taliaina Thomas B. Marsh i le faaaumeaina atoatoa i le Ekalesia. Ae ui i lea, ona sa le’i mulimuli o ia i le fautuaga a le Alii ina ia faamaulalo o ia lava ma ia faamaoni i le avea ai ma Peresitene o le Korama a le Toasefululua, na te le‘i maua ai faamanuiaga o loo lisiina i le Mataupu Faavae ma Feagaiga 112:4–10.
Fai atu i ni nai tagata aoga e aotele mea ua latou aoaoina i le aso. Valaaulia tagata aoga e filifili se auala se tasi e mafai ona faateleina ai lo latou lotomaulalo ma faamaoni, ma tusi se sini e ola ai.
Ua i ai i sui taitasi o le Au Peresitene Sili ma le Korama a Aposetolo e Toasefululua ia ki o le malo. Ua i ai foi i le Peresitene o le Korama a Aposetolo e Toasefululua ia ki, po o le pule e taitaia ai le galuega a le Toasefululua i le folafolaina atu o le talalelei i atunuu uma o le lalolagi (tagai i le MF&F 112:16). Ae peitai, o le Peresitene o le Korama a le Toasefululua ma Aposetolo taitoatasi, e na o lalo lava o le taitaiga a le Peresitene o le Ekalesia ma ona fesoasoani i le Au Peresitene Sili e mafai ona faaaoga ai a latou ki. O lea la, na apoapoaiina ai e le Alii ia Thomas B. Marsh ma isi sui o le Korama a Aposetolo e Toasefululua ina ia faamamalu i le pule a Iosefa Samita e pulefaamalumalu ai ia i latou (tagai i le MF&F 112:15–20). O lenei pule e pulefaamalumalu ai, na ala ai ona maua e Iosefa Samita, o le Peresitene o le Ekalesia, le pule e valaauina ai uso e toalua o le Korama a le Toasefululua, o Heber C. Kimball ma Orson Hyde, i se misiona i Egelani, e ui lava o Thomas B. Marsh, i le avea ai ma Peresitene o le Korama a Aposetolo e Toasefululua, na umia ki e taitai ai le galuega a le Toasefululua o le folafolaina atu o le talalelei.