Lesona mo Suesuega i le Fale: Taua a Iuta ma le Fasiotiga Tagata i Mountain Meadows, o le O’o Mai o le Penina Tau Tele, Folafolaga Aloaia 1, ma le Mataupu Faavae ma Feagaiga 138 (Iunite 31)
Sauniuniga o Anomea mo le Faiaoga o Suesuega e Fai i le Fale
Aotelega o Lesona o Suesuega e Fai i le Fale i Aso Taitasi
O le aotelega lenei o aoaoga faavae ma mataupu faavae na aoaoina e tagata aoga a’o latou suesueina le iunite 31. O lenei aotelega e le o faamoemoe e aoao atu o se vaega o lau lesona. O le lesona e te aoaoina atu mo le iunite 31 e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tagata aoga.
Aso 1 (O le Taua a Iuta ma le Fasiotiga Tagata i Mountain Meadows)
A o aoao tagata aoga e uiga i se mea matautia na tupu i le talafaasolopito o le Ekalesia, sa latou mafaufau i le mataupu faavae e faapea, afai tatou te foia feeseeseaiga ma isi i le ala a le Alii, o le a mafai ona tatou aloese mai aafiaga leaga o finauga. Na aoaoina foi e tagata aoga afai tatou te lē amana‘iaina fautuaga e fai le mea sa’o, o le a faapea ona tatou atili oo ai i le faia o filifiliga le lelei. Sa iloa e tagata aoga o le filifili e nana a tatou agasala e mafai ona taitai atu ai i tatou i le faia o isi agasala ma e mafai ona aumaia ai le faanoanoa ma puapuaga. Ma le mea mulimuli, na aoaoina e tagata aoga e mafai ona tatou atiina ae ni molimau malolosi e ala i le fausia o o tatou faatuatua i le faavae o Iesu Keriso.
Aso 2 (O Le Oo Mai o le Penina Tau Tele)
Ua iloa e tagata aoga o le Penina Tau Tele o le faamaoniga o Iosefa Samita o se perofeta, tagatavaai, ma talifaaaliga. Sa latou aoao i le oo mai o le tusi a Mose ma le tusi a Aperaamo. Sa latou faailoaina mai foi se vaega o aoaoga faavae ma mataupu faavae i Mataupu Faavae o le Faatuatua.
A o suesueina e tagata aoga le Manefeso e faatatau i le le toe faaauauina o le faiga o faaipoipoga autaunonofo, na latou aoao ai, e taitaia e le Alii Lana Ekalesia e ala i faaaliga i le Peresitene o le Ekalesia, ma o le a le faatagaina e le Alii le Peresitene o le Ekalesia e taitai ese le Ekalesia. A o aoao ai e uiga i le alualu i luma o le galuega o le malumalu i le 1890, na iloa ai foi e tagata aoga, e mafai ona faamauina i tatou i tagata o o tatou aiga, e aofia ai i latou o e na muamua mai ia i tatou ma i latou o e mulimuli mai ia i tatou, e ala i le sauniga o le faamauga.
E ala i le suesueina o le aafiaga a Peresitene Iosefa F. Samita i le mauaina o le faaaliga, na iloa ai e tagata aoga e faapea, a o tatou faitau ma mafaufau loloto i tusitusiga paia, ua tatou saunia i tatou lava ia maua faaaliga. E le gata i lea, sa latou aoaoina, e faaolaina tagata uma lava e ala i le Togiola a Iesu Keriso ma le usiusitai i mataupu faavae o le talalelei. Sa aoaoina foi e tagata aoga, o le alofa tunoa o le Atua le Tama ma Iesu Keriso, o le a laveaiina ai i tatou mai noataga o le oti, ma e mafai ona tatou maua le atoatoaga o le olioli e ala i le toetu.
Folasaga
O lenei lesona e mafai ona fesoasoani i tagata aoga ia malamalama i le ala o loo aoaoina atu ai le talalelei i agaga o loo i le falepuipui o agaga. E mafai foi ona fesoasoani i tagata aoga ia malamalama i auala e mafai ona latou avea ai ma se vaega o le galuega tele o le faaolataga mo e ua maliliu.
Fautuaga mo le Aoaoina Atu
A o lei aoaoina atu le lesona lenei e faatatau i le Mataupu Faavae ma Feagaiga 138, atonu e te manao e fesili atu i tagata aoga pe i ai ni fesili e uiga i soo se mea sa latou suesueina i le aluga o le vaiaso. Mo se faataitaiga, atonu e i ai ni a latou fesili e uiga i le Fasiotiga Tagata i Mountain Meadows po o le Folafolaga Aloaia 1.
Ua silafia e Peresitene Iosefa F. Samita le auala na talaiina atu ai le talalelei i le lalolagi o agaga
Ta‘u atu i tagata aoga e faapea, e i ai talitonuga eseese o tagata i le lalolagi atoa e uiga i le mea e tupu ia i tatou pe a tatou oti. Fesili atu i tagata aoga pe na latou feiloai i se tasi e i ai ni talitonuga e ese mai e uiga i le mea e tupu ia i tatou pe a tatou oti. Valaaulia ni nai tagata aoga e faasoa mai o latou aafiaga. (Ia faaeteete e aua le talanoa le lelei e uiga pe ta’u faatauvaaina talitonuga o isi ekalesia.)
E mafai faapefea ona tatou iloa po o le fea o talitonuga e sa’o e uiga i le olaga pe a mavae le oti? (Atonu e te manao e faamatala atu, e oo lava foi i nisi o le Au Paia o Aso e Gata Ai, e ono i ai ni talitonuga le sa’o e uiga i le olaga pe a mavae le oti.)
Valaaulia se tagata aoga e faitau le saunoaga lenei a Elder D. Todd Christofferson o le Korama a Aposetolo e Toasefululua:
Faamautu atu e mafai ona tatou iloa le sa‘o o talitonuga eseese e uiga i le olaga pe a mavae le oti e ala i le faatusatusaina o na talitonuga i upumoni ua faaalia mai e le Alii i tusitusiga paia, e pei o le Mataupu Faavae ma Feagaiga 138.
Tusi le ata o loo i ai i le tusi lesona i luga o le laupapa. Atonu e te manao e faamalamalama puupuu atu e faapea, i nisi o itu, o le lalolagi atoa o agaga e mafai ona faapea o le falepuipui o agaga aua e oo lava foi i e amiotonu e vaai atu i le tuueseeseina mai o latou tino o se noatiaga (tagai i le MF&F 138:49–50).
Ata
ata o le parataiso o agaga ma le falepuipui o agaga
Ina ia fesoasoani i tagata aoga e toe faamanatu vave mea na latou suesueina i le vaega e 138, atofa le afa o le vasega e su’e i le Mataupu Faavae ma Feagaiga 138:12–15, 22 mo faamatalaga auiliili e faatatau ia i latou o e o le a o atu i le parataiso o agaga pe a oti, ma tulaga o le a latou oo i ai iina. Atofa le isi afa o le vasega e su’e le Mataupu Faavae ma Feagaiga 138:20–22 mo faamatalaga e uiga ia i latou o e o le a o i le falepuipui o agaga pe a oti ma tulaga o le a latou oo i ai iina. Fai atu i tagata aoga e lipoti mai mea ua latou mauaina.
Faailoa atu e le gata o e amioleaga ma fouvale e o i le falepuipui o agaga i le taimi e oti ai, ae o i latou foi o e oti i a latou agasala e aunoa ma se malamalama o le talalelei (tagai i le MF&F 138:32). Faamanatu i tagata aoga a’o mafaufau loloto ia Peresitene Iosefa F. Samita i fuaitau i le 1 Peteru, sa faaali mai e le Alii ia te ia le ala o le a maua ai e tagata i le falepuipui o agaga le avanoa e maua ai faamanuiaga o le talalelei.
Valaaulia se tagata aoga e faitau leotele le Mataupu Faavae ma Feagaiga 138:29–32, ma fai atu i le vasega e vaavaai mo auala o loo aoao atu ai le talalelei i le lalolagi o agaga. Fai atu i tagata aoga e lipoti mai mea ua latou mauaina. E tatau ona latou faailoa mai se mea e talitutusa ma le upumoni lenei: I lalo o le taitaiga a Iesu Keriso, o loo aoao atu ai e avefeau amiotonu le talalelei ia i latou i le falepuipui o agaga.
I le ata o loo i luga o le laupapa, tusi se aū mai le parataiso o agaga agai i le falepuipui o agaga e faatusa i avefeau amiotonu a le Alii o loo talai atu le talalelei i le falepuipui o agaga.
Aotele le Mataupu Faavae ma Feagaiga 138:33–37 e ala i le faamatala atu, o le a maua e fanau uma a le Tama Faalelagi le avanoa e talia ai mataupu faavae ma sauniga o le talalelei a Iesu Keriso, e tusa po o le fogaeleele po o le lalolagi o agaga.
Ina ia fesoasoani i tagata aoga ia malamalama i le auala o le a faalogo ai tagata uma i le talalelei, faamatala atu, e ui lava sa asiasi atu le Faaola i le lalolagi o agaga mo se taimi puupuu ina ua maliu o Ia, sa Ia faatulagaina agaga amiotonu e talai atu le talalelei ia i latou i le falepuipui o agaga. O lenei taumafaiga o loo faaauau pea i le taimi nei. Pe a feoti tagata o o tatou vaitaimi o e e le’i faalogo pe taliaina le talalelei, o le a latou maua foi se avanoa e faalogo ma talia ai le talalelei i le lalolagi o agaga.
Faamanatu atu i tagata aoga, i le Mataupu Faavae ma Feagaiga 138:38–49, na lisi ai e Peresitene Iosefa F. Samita ia suafa o le toatele o agaga “ta’uta’ua ma malolosi” sa ia vaai i ai i le lalolagi o agaga, o e sa faatalitali mo le Faaola e faaali atu ia i latou ina ua mavae Lona maliu i luga o le satauro. O nisi o agaga sa asiasi atu i ai le Faaola o perofeta o le Feagaiga Tuai ma le Tusi a Mamona. E amata atu i le fuaiupu e 53, tatou te faitau ai, sa vaai foi Peresitene Samita i agaga filifilia o e o le a o mai i le tisipenisione mulimuli, e aofia ai le Perofeta o Iosefa Samita (le uso o lona tama) ma Ailama Samita (o lona tama).
Valaaulia se tagata aoga e faitau leotele le Mataupu Faavae ma Feagaiga 138:53–56. Fai atu i le vasega e mulimuli i le faitauga, ma vaavaai mo auala na saofaga ai nei tagata taitoatasi a’o latou i ai i le lalolagi i le faaolataga o i latou i le falepuipui o agaga.
O faapefea ona fesoasoani taitai o le Ekalesia o aso e gata ai i agaga i le falepuipui?
A iloa loa e tagata aoga e faapea, o perofeta o aso e gata ai e fesoasoani i le faaolaina o e ua maliliu e ala i le fausia o malumalu ma le taitaiina o sauniga o le malumalu mo e ua maliliu, tuu pe tusi se ata o se malumalu i talane o le ata o loo i luga o le laupapa.
Valaaulia se tagata aoga e faitau leotele le Mataupu Faavae ma Feagaiga 138:58-59. Fai atu i le vasega e mulimuli i le faitauga, ma vaavaai mo mea e tatau ona faia e tagata ua maliliu ina ia faaolaina ai. Fai atu i tamaiti aoga e lipoti mai mea latou te maua.
O le a le mea o le a tupu ia i latou o e salamo i le lalolagi o agaga? (E mafai ona faaaoga e tagata aoga ni upu eseese, ae e tatau ona latou faailoa mai le mataupu faavae lenei: O agaga o e salamo o le a togiolaina e ala i le usiusitai i sauniga o le malumalu, ma faamamaina e ala i le Togiola, ma maua o latou taui.)
E mafai faapefea ona tatou fesoasoani i le galuega o le faaolataga mo e ua maliliu a o tatou i ai i le lalolagi? (E ala i le faamaeaina o galuega o talafaasolopito o aiga ma auai i sauniga o le malumalu mo e ua maliliu.)
Faasino atu i le ata o le malumalu o loo i luga o le laupapa. Molimau atu a tatou o atu i le malumalu e faatino sauniga mo i latou o e ua maliliu, ua tatou fesoasoani ia i latou—pe afai latou te filifili e talia sauniga—ina ia laveaiina mai le falepuipui o agaga ma auai faatasi ma agaga o e amiotonu i le parataiso.
I le ata o loo i luga o le laupapa, tusi ai se aū mai le falepuipui o agaga agai i le parataiso o agaga e fai ma sui o le laveaiina o agaga ua salamo mai le falepuipui o agaga.
E mafai faapefea e lenei malamalama ona aafia ai ou aafiaga i galuega faalemalumalu ma talafaasolopito o aiga?
Ua faapefea ona faamanuiaina oe e ala i le auai i galuega o talafaasolopito o aiga ma le malumalu? (Atonu foi e faasoa atu sa oe lava aafiaga.)
Valaaulia se tagata aoga e faitau leotele le Mataupu Faavae ma Feagaiga 138:60. Fai atu i le vasega e mulimuli i le faitauga, ma vaavaai mo le molimau a Peresitene Iosefa F. Samita e uiga i upumoni sa ia faamaumauina.
Ia uunaia tagata aoga e faatulaga se taimi e fai ai ni galuega o talafaasolopito o aiga po o le malumalu i nai vaiaso o loo sosoo ai.
Faaiu i le faasoa atu o lau molimau e uiga i le Alii o Iesu Keriso ma faamanuiaga o le Togiola o loo avanoa mo e o soifua ma e ua maliliu.
Iunite e Sosoo Ai (Faalapotopotoga ma Polokalama a le Ekalesia, Folafolaga Aloaia 2, Faanatinatiina o le Galuega o le Faaolataga, o le Folafolaga i le Aiga, ma le Perofeta Soifua)
Fesili atu i tagata aoga pe faapefea ona latou iloa o loo taitaia e le Alii ia Lana Ekalesia i aso nei. Aisea e taua ai le i ai o se perofeta soifua? Aisea e taua ai aiga? Valaaulia tagata aoga e vaavaai mo tali i fesili nei a o latou suesueina lesona i le vaiaso a sau.