I le aso 27 o Aokuso, 1831, sa le’i leva ona toe foi atu le Perofeta o Iosefa Samita ma se vaega o toeaiina i Ohaio mai la latou malaga e faapaia le laueleele ma le tulaga o le malumalu i Siona, po o Initipene, Misuri. I le taimi o le malaga atu ma le toe foi mai Misuri, sa faapea ona i ai ni feeseeseaiga a nisi o toeaiina i le tasi ma le isi, ma oo atu i ni lagona faafinau, peitai o le toatele sa mafai ona toe faalelei i le tasi ma le isi. I le aso 11 o Setema, na maua ai e le Perofeta le faaaliga ua faamaumauina i le Mataupu Faavae ma Feagaiga 64. O lenei lesona e aofia ai le Mataupu Faavae ma Feagaiga 64:1–19, lea na fetalai mai ai le Alii i Lona naunautaiga e faamagalo i Ana auauna. Ua Ia poloaiina foi tagata o le Ekalesia ia faamagalo atu le tasi i le isi.
Manatua: O le lesona 70 e maua ai se avanoa mo ni tagata se toalua o le vasega e aoao atu. Afai e te le’i faia, atonu e te manao e filifili ni tagata se toalua o le vasega i le taimi nei ma tuuina atu ia te i laua ni kopi o vaega atofaina o le lesona 70 ina ia mafai ona laua saunia ai.
Ua faamautinoa mai e le Alii i toeaina Lona naunautaiga e faamagalo atu
A’o le’i amataina le vasega, tusi fesili nei i luga o le laupapa:
O le a se taimi na e lagona ai le tiga ona o upu po o amioga a se isi tagata?
Na faapefea ona e tali atu i lena tulaga?
Amata le vasega i le valaaulia o tagata o le vasega e mafaufau loloto i fesili o loo i luga o le laupapa.
Faamalamalama atu e faapea i le Mataupu Faavae ma Feagaiga 64, ua aoaoina i tatou e le Alii i auala e tali atu ai pe afai ua faatiga mai isi ia i tatou. Na maua e Iosefa Samita le faaaliga ua faamaumauina i le Mataupu Faavae ma Feagaiga 64 i le aso 11 o Setema, 1831, pe a ma le lua vaiaso talu ona toe foi mai o ia ma se vaega o toeaiina i Ohaio mai Initipene, Misuri. O nei toeaiina ma isi tagata o le Ekalesia na oo i faigata ona o feeseeseaiga ma lagona o finauga sa i ai i totonu o nisi o tagata o le vaega. I le faaaliga lenei, na fetalai mai le Alii, “E i ai ni isi o i latou o e o i totonu o outou ua agasala” (MF&F 64:3).
Valaaulia se tagata o le vasega e faitau leotele le Mataupu Faavae ma Feagaiga 64:1–4, ma fai atu i le vasega e vaavaai mo fasifuaitau o loo faamatala mai ai le ala o le a tali mai ai le Alii ia i latou o e na agasala. Atonu e te manao e fautua atu i tagata o le vasega e faailoga fuaitau latou te maua.
O le a le auala na fetalai mai le Alii o le a Ia tali mai ai i tagata o le Ekalesia o e na agasala?
O le a se mea o aoao mai e nei tali ia i tatou e uiga i le Alii? (E mafai ona faaaoga e tagata o le vasega ni upu eseese, ae e tatau ona latou faailoa mai le mataupu faavae lenei: O le Alii e agaalofa, loto faamagalo, ma alofa mutimutivale. Tusi le mataupu faavae lenei i le laupapa.)
Aisea atonu na taua ai lenei upumoni i tagata o le Ekalesia o e sa aafia i faigata ona o feeseeseaiga ma lagona le lelei? Aisea e taua ai lenei upumoni e uiga i le Faaola ia te oe?
Faamalamalama atu e faapea, i le taimi lea, o nisi tagata o le Ekalesia, e aofia ai nisi o toeaina o e sa malaga faatasi ma Iosefa Samita, sa oo ina faitio ia Iosefa Samita. Valaaulia se tagata o le vasega e faitau leotele le Mataupu Faavae ma Feagaiga 64:5–6. Fai atu i le vasega e mulimuli i le faitauga, ma vaavaai mo le fetalaiga a le Alii e uiga ia Iosefa Samita. A o lei faitau tagata o le vasega, faamalamalama atu o le saili o ni mea e faasaga i se tagata, e pei ona ta’ua mai i le fuaiupu e 6, o le saili masei i se tasi.
O le a le fetalaiga a le Alii e uiga ia Iosefa Samita? (Na umia e Iosefa Samita ki o le malo o le Alii ma o le auauna a le Alii. O nisi tagata sa saili masei ia Iosefa.)
Valaaulia tagata o le vasega e faitau filemu le Mataupu Faavae ma Feagaiga 64:7, ma vaavaai mo se isi mea na fetalai mai ai le Alii e uiga ia Iosefa Samita.
O le a se mea e mafai ona tatou aoao mai i lenei fuaiupu e uiga ia Iosefa Samita? (Sa agasala Iosefa Samita, ae sa naunau le Alii e faamagalo o ia. Ina ia fesoasoani i tagata o le vasega ia malamalama i lenei fuaitau, atonu e te manao e faailoa atu, e faapei foi o tagata uma lava, sa i ai foi vaivaiga o Iosefa Samita ma sa manaomia ona saili le faamagaloga a le Alii mo ana agasala. Ae peitai, sa le’i tausalaina o ia i ni agasala matuia.)
O le a se mea e mafai ona tatou aoao mai i lenei fuaiupu e uiga i le mea e tatau ona tatou faia e maua ai le faamagaloga a le Alii?
Ua poloaiina e le Alii Ana auauna e faamagalo atu i le tasi ma le isi
Afai e mafai, faaali atu se ata o se gata uogo e maua i le tou eria po o se ata o se manua na mafua mai i se u a se gata uogo.
E faaopoopo atu i le tiga faaletino, o a ni lagona e te manatu o le a e lagona pe afai e u oe e se gata uogo?
Faamalamalama atu o se tasi e oo i lenei tulaga e (1) taumafai e tuli le gata e fasimate ona o le ita po o le fefe, po o le (2) fai taumafaiga faavavave e aveese ai le ‘ona mai lona tino.
O le fea o nei faatinoga e lua e te manatu e sili atu ona atamai? Aisea?
Faamalamalama atu o filifiliga a se tagata pe a uma ona utia e se gata uogo, e mafai ona faatusalia i a tatou filifiliga pe a tatou lagona le tiga ona o upu po o amioga a se isi tagata. Valaaulia se tagata o le vasega e faitau leotele le Mataupu Faavae ma Feagaiga 64:8. Fai atu i le vasega e mulimuli i le faitauga, ma vaavaai mo taunuuga na feagai ma nisi o soo o le Alii ona sa latou le mananao e faamagalo atu i le tasi ma le isi. Valaaulia tamaiti e lipoti mai mea latou te mauaina.
O le a le mataupu faavae e mafai ona tatou aoao mai i le fuaiupu e 8? (E mafai ona faaaoga e tagata o le vasega ni upu eseese, ae e tatau ona latou faailoa mai le mataupu faavae lenei: A tatou mumusu e faamagalo atu i isi, tatou te aumaia puapuaga i o tatou lava luga. Mafaufau e valaaulia tagata o le vasega e tusi lenei mataupu faavae i a latou lava upu i a latou tusitusiga paia.)
E mafai faapefea ona puapuagatia (pe tiga) se tagata ona o le le faamagalo atu i isi? E faapefea ona pei lenei mea o taunuuga o se tagata e tulitulia le gata uogo lea na faatoa uma lava ona uina o ia?
Valaaulia se tagata o le vasega e faitau leotele le Mataupu Faavae ma Feagaiga 64:9 . Valaaulia le vasega e faailoa mai se isi taunuuga o le le faamagalo atu i isi.
E tusa ai ma le fuaiupu e 9, o le a se isi taunuuga o le musu e faamagalo atu i isi? (Afai tatou te le faamagalo atu i isi, tatou te tutu i le tausalaina i luma o le Alii. Tusi lenei mataupu faavae i le laupapa.)
O se vaega o lenei talanoaga, atonu e te manao e fai atu i se tagata o le vasega e faitau le saunoaga lenei a Elder David E. Sorensen o le Fitugafulu:
Ata
Elder David E. Sorensen
E mafai ona faigata tele ona faamagalo atu i se tagata se mea leaga na latou faia ia i tatou, peitai, a tatou faamagalo atu, o lona uiga ua tatou savalia le ala mo se lumanai e sili atu. E le toe pulea lo tatou ala i se sese e fai mai e se isi tagata. A tatou faamagalo atu i isi, ona faasaolotoina lea o i tatou e filifili pe faapefea ona tatou ola. O le faamagalo atu o lona uiga, e le toe faatonuina o tatou taunuuga e faafitauli ua te’a, ma ua mafai ona tatou tulimatai atu i le lumanai, ma le alofa o le Atua i o tatou loto” (“O Le Loto Faamagalo E Suia ai le Oona Matuitui i le Alofa,” Ensign po o le Liahona, Me 2003, 12).
Ina ia fesoasoani i tagata o le vasega e faailoa ma faaaoga le poloaiga a le Alii e faamagalo atu i tagata uma, faitau faataitaiga nei ma fai atu fesili o loo sosoo mai ai:
Ua tiga ma maasiasi se tamaitai talavou ina ua ona iloaina na faasalalau e nisi o lana tupulaga ni tala e uiga ia te ia. Mulimuli ane, sa faatoese atu nisi o nei tupulaga, ao o isi sa le’i faatoese atu. Ua faamagalo e le tamaitai talavou i latou o e na faatoese atu, ae sa i ai pea lava ni ona lagona le fiafia faasaga i isi.
Valaaulia tagata o le vasega e faitau le Mataupu Faavae ma Feagaiga 64:10–11. Fai atu ia te i latou e mafaufau pe faapefea ona fesootai nei fuaiupu i le faataitaiga na e faitauina atu.
O a poloaiga ua tuuina mai e le Alii i le fuaiupu e 10? (Fesoasoani i tagata o le vasega e faailoa mai le poloaiga lenei: Ua poloaiina i tatou e le Alii e faamagalo atu i tagata uma.)
E faapefea ona fesootai lenei poloaiga i le tamaitai talavou i le faataitaiga? Aisea e te manatu e taua ai le faamagalo atu i tagata uma, e tusa lava pe latou te faatoese mai mo a latou mea sese?
Ua le usitaia e se alii talavou se poloaiga. Ua ia tatalo mo le faamagaloga, ma ua talanoa atu i lona epikopo i le faafitauli. Ae peitai, e ui lava ina faamautinoa atu e le epikopo i le alii talavou e faapea ua salamo atoatoa o ia, ae sa faaauau pea ona lagona e le alii talavou le le agavaa ona o lenei agasala ua tuanai.
E faapefea ona fesootai le poloaiga ia faamagalo atu i tagata uma, i le alii talavou o loo i le faataitaiga lenei? Aisea e tatau ai ona tatou faamagalo ia i tatou lava?
Ua lagona e se tamaitai talavou le faanoanoa ma le le mautonu ona o amioga a lona tama. Ua ia tuulafoaiina lona aiga. A o le‘i aluese o ia, sa seasea ona ia faaalia le alofa mo le aiga ma sa masani ona agaleaga. Sa le malamalama o ia pe aisea sa faapea ai lona tama, ma sa ia tauaveina ni lagona o le ita i [lona tama]. Ua ia iloa e tatau ona ia taumafai e faamagalo o ia, ae e leai sona manatu e mafai ona ia faia.
E mafai faapefea ona fesoasoani le fautuaga a le Alii i le fuaiupu e 11 i lenei tamaitai talavou e faamagalo atu i lona tama? E faapefea ona fesoasoani ia i tatou ina ia tuu atu i le Atua e faamasino i latou o e na faatiga ia i tatou?
Fai atu i tagata o le vasega e mafaufau pe o i ai se tasi e tatau ona latou faamagalo i ai. Ia faailoa atu e i ai taimi e mafai ona matuai faigata lava ona faamagalo atu i se isi. Valaaulia se tagata o le vasega e faitau le saunoaga lenei mai ia Peresitene Gordon B. Hinckley. Fai atu i le vasega e faalogologo mo mea e mafai ona latou faia pe afai o latou tauivi e faamagalo atu i se tasi.
Ata
Peresitene Gordon B. Hinckley
“Ou te aioi atu ia te outou ia ole atu i le Alii mo le malosi e faamagalo atu ai. … Atonu o le a le faigofie, ma atonu foi o le a le vave ona oo mai. Peitai afai tou te sailia ma le faamaoni ma atiina ae lena uiga, o le a e maua” (“A o Outou e Ao Ina Outou Faamagalo Atu,” Liahona, Novema 1991, 5).
O le a le mea na fautua mai e Peresitene Hinckley ia i tatou e fai pe afai o loo tatou tauivi e faamagalo atu i se tasi? O le a lou manatu, e faapefea e le tatalo mo le malosi ona fesoasoani ia i tatou e faamagalo atu ai?
Otooto le Mataupu Faavae ma Feagaiga 64:12–14 i le faamatala atu, na aoao mai le Alii o la tatou filifiliga e faamagalo atu i isi e le aveesea ai mai ia i latou le tiutetauave mo a latou amioga. Latou te tali atu lava i le Alii mo mea sese na latou faia. I le Mataupu Faavae ma Feagaiga 64:15–17 tatou vaai ai sa faamagaloina faapitoa e le Alii ia Ana auauna e toalua o Isaako Morley ma Eteuati Paterika, aua sa laua salamo ia laua agasala.
Faaali atu se ata o Iesu Keriso. Faasino atu i le upumoni muamua na e tusia i luga o le laupapa i le amataga o le lesona: O le Alii e agaalofa, loto faamagalo, ma alofa mutimutivale. Molimau atu a tatou faamagalo atu, e avea atili i tatou faapei o le Faaola.
Valaaulia tagata o le vasega e mafaufau loloto i auala e mafai ona latou faaaogaina ai mataupu faavae o le faamagalo atu ua latou aoaoina i le aso. Tuu atu ia te i latou se taimi e tusi ai se mea o le a latou faia e faaaoga ai nei upumoni ma faamaumau ai soo se lagona latou te mauaina.
Sa faamatala e Elder David E. Sorensen o le Fitugafulu, e uiga i ni alii se toalua o e sa faatiga ia i laua lava ma le toatele o isi ona o lo laua le mananao e faamagalo atu:
Ata
Elder David E. Sorensen
“Sa ou ola ae i se nuu laitiiti e faifaatoaga ma sa avea le vai ma elemene aupito taua o le tamaoaiga solo lelei. Ou te manatuaina tagata o le matou nuu, latou te mataituina pea i taimi uma, latou te popole ma tatalo ia timu, ia latou maua aia tatau e faaaoga ai vai e fui ai faatoaga, ma le vai i lona tulaga aoao.
“Ona o toatuga ma le faigata o le tau, e i ai taimi e le faia ai e tagata amioga e tatau ona fai i taimi uma. E i ai taimi e tauaimisa ai tuaoi pe a tele le vai e faaaoga e le isi faifaatoaga. Na faapena foi isi alii e toalua sa nonofo latalata i le matou fanua i le mauga, ma o le a ou faaigoa ia Setu ma Uati. Sa amata ona tauupu tuaoi nei ona o le vai e fui ai faatoaga, lea sa la tau fai faaaogaina. O le taimi muamua, sa pei e le ano i ai, ae ua oo ina tele ma iu ina avea ai lo laua eseesega ma mea ua feitagai ai, ona tauaimisa ai lea—ma oo ai lava ina taufaamatau.
“I se tasi taeao i le masina o Iulai, sa toe manatu ai foi nei aualii ua le lava le vai. Sa taufai o i laua i le faatanoa vai e vaai po o le a le mea la ua tupu, ma sa mafaufau ifo lava le tagata ia, o la ua gaoi e le isi ana vai. Sa taunuu faatasi atu i laua i le faitotoa. Sa tauupu ai foi ma iu ai loa lava ina fepa’ia’i. O Uati o se alii lapoa ma e malosi tele. O Setu e faa’ause ma malosi ma finau mauai. I le vevela o a la fusuaga, na la faaaogaina ai loa suo sa ia te i laua e fai ma auupega. Sa tau le suo a Uati i le isi mata o Setu, ma sa po ai lona mata lena.
Sa mavae masina ma tausaga. Ae sa le mafai e Setu ona faagalo pe faamagalo foi. Sa pupuna pea le ita o lona loto ona o lona mata ua le toe aoga, ma sa matua faateleina lona inoino. Na oo i se tasi aso ona alu ai lea o Setu i lona fale e teu ai ana meafaigaluega, ma to mai i lalo lana fana mai lona faamoega, ona oso ai lea i lana solofanua, ma agai sao atu ai loa i le faitotoa o le faatanoa vai. Sa ia faia se poloka i le faatanoa vai e seu ese mai ai le vai mai le faatoaga a Uati, ma sa ia iloa lelei lava e le o toe mamao ae sau Uati e vaai po o le a le mea ua tupu. Sa lafi Setu i le pupuvao ma faatalitali ai. Ina ua taunuu ane Uati, sa fanaina loa e Setu. Ona oso ai lea i lana solofanua, ma foi i lona fale, ma telefoni le leoleo e tau i ai ua faatoa maea lava ona ia fanaina Uati.
“Sa talosagaina lo’u tama e avea o se tasi o faamasino fesoasoani o le faamasinoga na molia ai Setu i le fasioti tagata. Sa teena e lo’u tama aua o ia o se paaga ua loa a nei alii e toalua faapea foi o la’ua aiga. Sa faamasinoina Setu ma faamaonia le solitulafono o le fasioti tagata, ma faasalaina ai i le solo atoa i le falepuipui.
“Ina ua mavae le tele o tausaga, sa oo mai le toalua o Setu i lo’u tama ma talosaga i ai pe mafai ona ia sainia se talosaga i le kovana ina ia alofagia lona toalua ua matua afaina lona soifua maloloina ona o le umi tele o le taimi o falepuipui. Sa saini e lo’u tama le talosaga. Na mavae ni nai po, ae tutu mai atalii matutua e toalua o Uati i le matou fale. Sa matua tiga o la’ua loto ma ua le malilie. Fai mai talu ai ua saini e lo’u tama le talosaga, o le ala foi lea ua toatele ai tagata ua saini ai. Sa talosaga mai i la’ua i lo’u Tama e aveese lona igoa mai le talosaga. Sa ia fai atu leai. Sa ia lagonaina o Setu sa vaivai ma ua ma’i. Ua tele naua tausaga o mafatia i le falepuipui ona o lena solitulafono mataga o lagona malolosi o le inoino. Sa manao o ia ina ia falelauasi faalelei Setu i lona aiga.
“Sa vave ona tali mai atalii o Uati ma le ita tele, “Afai ae tatala mai o ia mai le falepuipui, o le a matou faatamaiaina o ia ma lona aiga.’
“Sa iu ina tatala mai Setu i tua ma ua mafai ona sau i lona aiga ma maliu ai lava. O le mea e laki ai, sa le toe i ai se isi taua i le va o aiga. E masani lava ona tagi talatala lo’u tama ona o le tulaga matautia ua oo i ai ana uo o Setu ma Uati, o ona tuaoi ma uo mai lo la talavou, ae ua la faatagaina le ita e pulea i la’ua, ma ua faatamaia ai o laua ola. Oka se matautia o le faatagaina o se lagona malosi na oso mai loa lava ona le toe taofiofia loa lea— na iu ai lava ina faaumatia le soifua o nei alii ona o le le mafai lava ona faamagalo e le tasi le isi i nai nei lava vai faatauvaa. …
“… Pe a faatiga e se tasi i tatou po o i latou foi tatou te alolofa i ai, e toetoe lava ina a lofituina i tatou i lena tiga. E mafai ona avea lena tiga po o le tonu o se mea e aupito sili ona taua i le lalolagi, ma ua leai ai se isi lava mea tatou te faia ae taumafai e taui masui. Peitai, ua aoao mai i tatou e Keriso, le Alii o le Filemu, se auala e sili atu. E mafai ona faigata tele ona faamagalo atu i se tagata se mea leaga na latou faia ia i tatou, peitai, a tatou faamagalo atu, o lona uiga ua tatou savalia le ala mo se lumanai e sili atu. E le toe pulea lo tatou ala i se sese e fai mai e se isi tagata. A tatou faamagalo atu i isi, ona faasaolotoina lea o i tatou e filifili pe faapefea ona tatou ola. O le faamagalo atu o lona uiga, e le toe faatonuina o tatou taunuuga e faafitauli ua te’a, ma ua mafai ona tatou tulimatai atu i le lumanai, ma le alofa o le Atua i o tatou loto” (“O Le Loto Faamagalo E Suia ai le Oona Matuitui i le Alofa,” Liahona, Me 2003, 10–11, 12).
O aoaoga a le Alii i le Mataupu Faavae ma Feagaiga 64:12–14 ua faaali mai ai, o lo tatou faamagalo atu o isi e le aveesea mai ai ia i latou taunuuga o a latou amioga. Na aoao mai Elder Richard G. Scott o le Korama a Aposetolo e Toasefululua:
Ata
Elder Richard G. Scott
Afai o oe o se tagata mama ae ua matuai sese ona tuuaiina, aua e te taofiofi i lagona o le inoino, ma le ita i se mea e foliga mai e le sa’o. Ia faamagalo i le na sese e ui lava ina e mama. O le faia o lena mea e moomia ai se taumafaiga tele i lau vaega. O faamagaloga e faigata tele, ae e mautinoa lava o le ala lea i le filemu ma le faamalologa. Afai e moomia se aoaiga mo se soligatulafono matuia e faasaga ia te oe, ia taatia lena i le Ekalesia ma taitai o le malo. ‘Aua ne’i faamamafaina lou olaga i mafaufauga o le taui ma sui. O le faamasinoga tonu a le Alii e faifaimalie ae matuai aoga lava. I le fuafuaga a le Alii, e leai se tasi e solaese mai taunuuga o le solia o Ana tulafono e le foiaina. O le a moomia i Lana lava taimi ma Lona lava ala se totogi atoatoa mo gaoioiga leaga e le salamoina” (“Filemu o le Lotofuatiaifo ma le Filemu o le Mafaufau,” Ensign po o le Liahona, Nov. 2004, 16-17).
Na faapena foi ona faamatalaina e Elder David E. Sorensen o le Fitugafulu:
Ata
Elder David E. Sorensen
“Ou te fia faamanino atu, o le faamagaloga o agasala, e le tatau ona fenumiai ma le faapalepale i le leaga. O le mea moni, i le Faaliliuga a Iosefa Samita, na fetalai mai le Alii, “Ia faia le faamasinoga tonu.’ [Faaliliuga Iosefa Samita, Mataio 7:1 (i le Mataio 7:1, vaefaamatalaga a.] Ua poloaiina i tatou e le Faaola ina ia lafoai ma tetee atu i mea leaga uma, ma e ui lava e tatau ona tatou faamagalo atu i se tuaoi e faatiga mai ia te i tatou, ae e tatau lava ona tatou galulue i se auala lelei e puipuia mai ai lena tiga po o le manua mai le toe tupu mai. O se tamaitai e sauaina pe faia faatautala, e le tatau ona saili e taui ma sui atu i ai, ma e le tatau foi ona manatu faapea e le mafai ona ia faia se laasaga e puipuia mai ai mai le toe sauaina. O se tagata fai pisinisi foi sa tulai mai ai se faaletonu i taualumaga faapisinisi, e le tatau ona inoino i le tagata sa le faamaoni, ae e tatau ona ia uia laasaga e tatau ai ina ia foia ai le sese. O le faamagalo atu e le manaomia ai lo tatou taliaina po o le faapalepale i le leaga. E le manaomia ai ona tatou le amanaia le mea sese tatou te vaai i ai i le lalolagi o siomia i tatou po o i o tatou lava olaga. Peitai, a o tatou tetee atu i agasala, e le tatau ona tatou faatagaina le inoino po o le ita e puleaina o tatou mafaufauga po o taga” (“O Le Loto Faamagalo E Suia ai le Oona Matuitui i le Alofa,” Ensign po o le Liahona, Me 2003, 12).