I le faaaliga i le Perofeta o Iosefa Samita o loo maua i le Mataupu Faavae ma Feagaiga 20, na poloaiina ai e le Alii ina ia faatulagaina Lana Ekalesia toefuataiina i le aso 6 o Aperila, 1830. Na Ia tuuina mai foi faatonuga i le taitaiga o Lana Ekalesia, e aofia ai se faamalamalamaga o tofi eseese o le perisitua ma tiute o i latou o e o le a umia nei tofi. O le faatulagaina ai o nei tofi, ua mafai ai e fanau a le Tama Faalelagi ona maua sauniga o le perisitua ma osia feagaiga.
Tusi faaupuga nei i luga o le laupapa a o lei amataina le vasega: talai atu, aoao atu, faamalamalama, apoapoai atu, lapatai atu, valaaulia tagata uma e o mai ia Keriso
I le amataga o le vasega, ia fai atu fesili nei e faatatau i upu o loo i luga o le laupapa:
O ai e i ai nei tiutetauave? (Atonu e te manao e faamalamalama atu o le upu faamalamalama o lona uiga o le aoao atu auiliili, ae o le upu apoapoai o lona uiga ia uunaia malosi se tasi e faia se mea.)
E mafai ona ta’u mai e tagata o le vasega, o perofeta, aposetolo, isi taitai o le Ekalesia ma faifeautalai faamisiona e i ai nei tiutetauave. E mafai foi ona latou ta’u mai o tiute nei e mafai e i latou uma e umia le perisitua, e aofia ai Perisitua Arona, ona faataunuuina. Afai latou te le ta’ua mai i latou e umia le Perisitua Arona, ia ta’u atu e oe lava lenei upumoni. Ia faamamafa atu o le au Perisitua Arona i lau vasega ua faatuatuaina i avanoa taua e auauna atu ai.
Vaevae le vasega i ni vaega se tolu. Faamalamalama atu e faapea, e faatatau i le faatulagaga o le Ekalesia, na faaalia mai ai e le Alii ia Iosefa Samita le tele o tiute o e umia le perisitua. Fai atu i se tasi o vaega e suesue le Mataupu Faavae ma Feagaiga 20:38–45, ma vaavaai mo tiute o toeaina. Valaaulia le vaega lona lua e suesue i le Mataupu Faavae ma Feagaiga 20:46–52, ma vaavaai mo tiute o ositaulaga. Valaaulia le vaega lona tolu e suesue i le Mataupu Faavae ma Feagaiga 20:53–59, ma vaavaai mo tiute o aoao ma tiakono. A o latou suesue, tusi upu nei i le pito i luga o le laupapa:
A maea le taimi, valaaulia se sui se toatasi pe toalua mai vaega taitasi e o mai i le laupapa ma lisi tiute po o tofi na latou suesueina.
O a ni eseesega o e maitauina i le va o tiute o toeaina, ositaulaga, aoao, ma tiakono? O a ni mea e tutusa ai o e vaaia?
O le fea o tofi ua i ai le pule e tuuina atu ai le meaalofa o le Agaga Paia? (Toeaina; tagai i le fuaiupu e 41.) O le fea o tofi ua i ai le pule e faamanuia le faamanatuga? (Toeaina ma le ositaulaga; tagai i fuaiupu 40 ma le 46.) O le fea o tofi ua i ai le pule e faauu ai ositaulaga, aoao, ma tiakono? (Toeaina ma le ositaulaga; tagai i fuaiupu 39 ma le 48.) O le fea o tofi ua i ai le pule o le faamalamalama, apoapoai atu, ma aoao atu? (Toeaina, ositaulaga, aoao, ma le tiakono; tagai i fuaiupu 42, 46, ma le 59.)
O a upumoni e mafai ona tatou aoaoina e uiga i tofi o le perisitua e ala i le faatusatusaina ma le eseesega o o latou tiute?
E tatau i tagata o le vasega ona faailoa mai ni mataupu faavae eseese, ae ia mautinoa e faamamafa atu mea nei:
A o maua e atalii o le Tama Faalelagi tofi e maualuga atu o le perisitua, latou te maua nisi tiutetauave e tele atu ma avanoa e auauna atu ai i isi.
A faauuina se tasi e umia le perisitua i tofi faaopoopo o le perisitua, na te taofia tofi e maualalo ane faapea ma o latou tiutetauave e faatatau i ai.
Ua i ai i alii uma e umia le perisitua le tiutetauave e faataunuu ai sauniga ma leoleo i tagata o le Ekalesia ma auauna atu ia te i latou.
A uma ona e fesoasoani i tagata o le vasega e faailoa mai le upumoni mulimuli i le lisi muamua, ona tusi lea i luga o le laupapa i lalo o le lisi o tiutetauave o le perisitua. Atonu e te manao e faamanino atu faapea o le upu faifeau o lona uiga ina ia auauna atu.
Ina ia fesoasoani i tagata o le vasega ia malamalama i tiutetauave o le au perisitua, ia tata’i atu o latou mafaufau i le lisi oi luga o le laupapa ma fai atu fesili nei:
O a ni isi o auala e mafai ai e e o umia le Perisitua Arona ona “leoleo i luga o le ekalesia” ma “nonofo faatasi ma faamalolosia i latou”? (O faataitaiga atonu e aofia ai faiaoga o aiga, tausia o e matitiva ma lē tagolima, tausia o falelotu ma lotoa, ma faataunuu isi tofiga mai le epikopo ma taitai o korama.)
O a ni isi o auala e mafai e alii e umia le Perisitua Arona ona “valaaulia tagata uma ia o mai ia Keriso”?
A o talanoaina e tagata o le vasega lenei fesili, atonu e te manao e fai atu i se tagata o le vasega e faitau le fautuaga lenei:
“Afai o e umia le perisitua, ia manatua o le perisitua e tatau ona avea ma se vaega o oe i taimi uma ma soo se tulaga lava. E le pei o se ofu talaloa e te ofuina ma toe tatala ese pe a e loto i ai. O soo se faauuga lava i le tofi o le perisitua, o se valaauga o le auaunaga i le olaga, faatasi ai ma se folafolaga e faapea o le a faaagavaaina oe e le Alii e faia Lana galuega e tusa ai ma lou faatuatua.
“E tatau ona e agavaa ina ia mafai ai ona faaaogaina le mana o le perisitua. O upu e te tautala ai ma au amioga, e aafia ai le tulaga e te auauna atu ai. O lau amio i luma o tagata lautele e tatau ona leai se mea e pona ai. A o lau amio pe a na o oe lava, e sili atu lena ona taua” (Faamaoni i le Faatuatua: O Se Tusitaiala o le Talalelei [2004], 137).
Tusi i luga o le laupapa le saunoaga lenei a Elder Richard G. Scott o le Korama a Aposetolo e Toasefululua, ma valaaulia se tagata o le vasega na te faitauina leotele. (O lenei faamatalaga o loo maua i le “Faamamalu le Perisitua ma Ia Faaaoga Lelei,” Ensign po o le Liahona, Nov. 2008, 46.) Atonu e te manao e fautuaina tagata o le vasega e tusi i le laina i autafa o a latou tusitusiga paia i le Mataupu Faavae ma Feagaiga 20 po o a latou api mo le vasega po o api talaaga mo le suesueina o tusitusiga paia.
“O le faamoemoega o le pule o le perisitua o le tuuina atu, ia auauna atu, ia siitia, ia musuia” (Elder Richard G. Scott).
Fai i tagata o le vasega e faamatala atu e uiga i ni taimi na latou vaaia ai le au perisitua o tuuina atu, auauna atu, siitia, ma musuia. E mafai ona faaopoopo i ai mea na e vaai ai.
O se vaega o lenei talanoaga, ia faailoa atu, e ui o le faaaliga i le Mataupu Faavae ma Feagaiga 20 e faatatau i e umia le perisitua, ae ua i ai i tagata uma o le Ekalesia le tiutetauave ma le avanoa e auauna atu ai i isi. Ua i ai i tamaitai talavou ni avanoa se tele e auauna atu ai. O nisi e mafai ona filifili e auauna atu faamisiona, ma o le a i ai se aso latou te maua ai le avanoa o le avea ma tagata o le Aualofa, “galulue soosoo tauau ma alii o e o loo umia le perisitua e faateleina le faatuatua ma le amiotonu patino, faamalolosia aiga ma auaiga, ma saili atu ma fesoasoani ia i latou e le tagolima” (O Afafine i Lo‘u Malo: O Le Talafaasolopito ma le Galuega a le Aualofa [2011], 7).
Tuu atu i tagata o le vasega ni nai minute e tusi e uiga i se mea na latou aoaoina mai le Mataupu Faavae ma Feagaiga 20:38–59. Uunaia ia alii talavou e mafaufau e tusi se sini o le a fesoasoani latou te leoleo ai ma le faamaoni ma faamalolosia tagata o le Ekalesia. O lenei mea e mafai ona faia o se vaega o a latou taumafaiga i le Tiute i le Atua.
Valaaulia se tagata o le vasega e faitau leotele le Mataupu Faavae ma Feagaiga 20:60, ma fai atu i le vasega e vaavaai mo le matafaioi a le Agaga Paia pe a faauuina se tasi i se tofi o le perisitua.
Fai i tagata o le vasega e sii o latou lima pe afai latou te molimauina ai se faauuga i le perisitua po o le ua faauuina i se tofi o le perisitua. Valaaulia nisi o i latou o e na sii o latou lima e faasoa mai o latou aafiaga ma soo se lagona na latou maua i le taimi o faauuga. Atonu e te tuuina atu le fesili lenei:
Na faapefea ona avea le Agaga Paia ma se vaega o le faauuga?
Tusi le faamatalaga lenei i luga o le laupapa: E manaomia e i latou e umia le Perisitua le mana o le Agaga Paia e faatasi ma i latou a o latou faatinoina lo latou tiute.
Ina ia fesoasoani i alii talavou e mafaufau i lo latou agavaa pe a faatinoina ia sauniga o le perisitua, valaaulia se tagata o le vasega e faitau le saunoaga lenei a Peresitene Boyd K. Packer o le Korama a Aposetolo e Toasefululua:
Ata
Peresitene Boyd K. Packer
“Tou te maua le pule e ala mai i le faauuina o outou i le perisitua; a o le mana, tou te maua i le usiusitai ma le tauaogaina. …
“O le mana o le perisitua e oo mai mai le faia o lou tiute i mea ua masani ai: auai i fonotaga, talia o tofiga, faitauina o tusitusiga paia, tausia o le Upu o le Poto” (“The Aaronic Priesthood,” Ensign, Nov. 1981, 32–33).
Valaaulia alii talavou e mafaufau ma le agaga tatalo i mea e finagalo le Alii latou te faia, e valaaulia ai le mana o le Agaga Paia ia faatasi ma i latou a’o latou faatino o latou tiute faaleperisitua o loo i ai nei ma le lumanai. Faamamafa atu e i ai foi tiutetauave taua o tamaitai talavou i le Ekalesia. Valaaulia i latou e mafaufau po o a ni mea e finagalo le Alii latou te faia, e valaaulia ai le Agaga Paia a’o latou faatinoina na tiutetauave.
Atonu e te faamatala atu o le Mataupu Faavae ma Feagaiga 20:61–63 o loo ta‘ua ai nisi o faamoemoega o le faia o konafesi a le Ekalesia, e pei o le faatautaia faalauaitele o pisinisi a le Ekalesia.
Valaaulia se tagata o le vasega e faitau leotele le Mataupu Faavae ma Feagaiga 20:65. Faamalamalama atu e faapea, i lenei fuaiupu, o le upu siilima e faatatau i le palota lagolago e maua e se tagata a o lei faauuina i se tofi o le perisitua. Fai atu i alii talavou i le vasega e mafaufau i le taimi mulimuli na lagolagoina ai i latou e tagata o le latou uarota po o le paranesi ina ia faauuina i se tofi o le perisitua.
O a ni ou lagona ina ua e vaaia le lagolagoina e tagata o lau uarota (po o le paranesi) o lou faauuga? E faapefea e le manatuaina o la latou siilima lagolago ona fesoasoani ia te oe i lau auaunaga faaleperisitua? (O tali atonu e aofia ai, o le a latou lagona atili ai lo latou tali atu i le uarota mo la latou auaunaga ma o le a latou lagonaina le lagolago a tagata o le uarota.)
Atonu e te manao e valaaulia ni nai tagata o le vasega e faasoa mai pe aisea latou te faafetai ai mo le pule o le perisitua. Ia faasoa atu foi lau molimau e uiga i upumoni na talanoaina i le lesona.
O le ta’ua ai o le faamoemoega autu o le perisitua, na saunoa ai Peresitene James E. Faust o le Au Peresitene Sili:
Ata
Peresitene James E. Faust
“O le tausiga o isi o le ute tonu lea o le tiutetauave o le perisitua. O le mana e faamanuia, e faamalolo, ma faatautaia ai sauniga faaola o le talalelei” (“Power of the Priesthood,” Ensign, May 1997, 41).
Sa saunoa Elder W. Grant Bangerter o le Fitugafulu, e faatatau ia i latou o e umia le perisitua i le avea ai ma “auauna” o e leoleo i luga o tagata o le Ekalesia:
Ata
Elder W. Grant Bangerter
“Mo ni nai tausaga sa ou maua ai le avanoa e aoao patino ai mai ia Peresitene Marion G. Romney, o le sa aoaoina i matou e uiga i le ‘faavae o le Ekalesia’—o lona uiga o faaaliga na tuuina mai e faatatau i le faatulagaga o le Ekalesia, lea sa faataatia mai ai aiaiga faavae e tatau ona taitaiina ai. O toeaina, o loo ta’u mai i le vaega e 20 o le Mataupu Faavae ma Feagaiga, e fesoasoani atu i ai le perisitua maualalo, e tatau ona ‘leoleo i luga o le Ekalesia.’ (F. 42, 53.) O se vaega o lena ‘leoleo i luga’ e faia i le asiasi atu i maota o tagata o le au paia, ma i le aoaoina o i latou e fai o latou tiute. I se isi faaaliga, o loo ta’ua faapitoa ai le korama a toeaina o se tino o ‘faifeau nonofomau.’ (MF&F 124:137.) O i latou e umia le Perisitua Arona e ta’ua foi o ‘auauna nonofomau.’ (MF&F 84:111.)” (“The Power of the Priesthood,” Ensign, Nov. 1975, 69).
Na faamatala e Peresitene James E. Faust o le Au Peresitene Sili le tala lenei e uiga i se alii talavou e umia le perisitua o le sa siitiaina ma faamalosiaina se tuaoi sa manaomia le fesoasoani:
Ata
Peresitene James E. Faust
“I ni nai tausaga ua mavae sa tonu ai i se korama a ositaulaga e ao mai ni meaai mo e matitiva e avea o se galuega auauna atu. Sa fiafia lava Simi o se tasi o ositaulaga e auai, ma sa naunau foi ia tele atu ana meaai e ao mai nai lo o se isi lava tagata. Na oo i le taimi na feiloai ai le au ositaulaga i le falesa. Sa latou o ese uma i le taimi e tasi ma toe foi mai i le falesa i se taimi tuupoina i le afiafi. Sa faateia tagata uma, ona sa leai ma se mea na i ai i le taavale a Simi. Na foliga mai sa to’a lava o ia, ma sa ula nisi o tamaiti ia te ia. …
“… Sa fesili atu le fautua ia Simi pe o faanoanoa. Na fai mai Simi, ‘Leai, e le o faanoanoa tele. Ae ina ua ou alu e ao mai meaai, sa tele ni meaai na ou mauaina. Sa tumu la‘u taavale. A o ou toe foi mai i le falesa, sa ou afe i le fale o se tamaitai e le auai i le ekalesia ma ua tetea ma lona toalua, ae e nofo i totonu o le eria o le tatou uarota. Sa ou tuitui i le faitotoa ma faamatala atu i ai le mea sa matou faia, ma sa ia valaauliaina a’u i totonu. Sa amata ona ia su’e solo se mea e tuu mai ia te a’u. Sa ia tatalaina le pusaaisa, ma na ou vaaia sa tau leai se mea na i ai i totonu. Sa leai ma ni mea i kapoti. Mulimuli ane, sa ia maua ai se tamai apa pisi [peaches].’
“’Sa faafaigata ona ou talitonu i ai. Sa i ai nei tamaiti laiti uma sa taufetuli solo lea sa manaomia ona fafagaina, ma sa ia tuuina mai ia te au lenei apa pea. Sa ou tago i ai ma tuu i totonu o la‘u taavaletoso, ma ou alu atu i le auala. Pe a o le afa o le vaifale na ou oo i ai, ae ou lagonaina le mafanafana o lo’u tino atoa, ma na ou iloaina sa manaomia ona ou toe foi atu i lena fale. Sa ou tuuina atu meaai uma ia te ia.’
‘Na fai atu le faufautua, ‘Simi, ia aua lava ne’i galo ia te oe le lagona sa e lagonaina i lenei afiafi, aua o le mea tonu lava lena e faatatau i ai.’ Sa tofo Simi i le niuterene o auaunaga e le faatuaoia” (“Niuterene Faaleagaga,” Ensign po o le Liahona, Nov. 2006, 54).
Mataupu Faavae ma Feagaiga 20:46. “O le tiute o le ositaulaga o le talai atu, aoao atu, faamalamalama atu, apoapoai atu, ma papatiso atu, ma faamanuia le faamanatuga”
Ata
Peresitene Wilford Woodruff
Fai mai Peresitene Uilifoti Uitilafi: “sa ou malaga i le faitau afe o maila ma talai atu le Talalelei o se Ositaulaga, ma, e pei ona sa ou fai atu muamua i faalapotopotoga, sa lagolagoina a’u e le Alii ma faaali mai Lona mana i le puipuia o lo’u olaga i le tele o le taimi a’o ou umia lena tofi, e pei ona ia faia a’o ou umia le tofi o se Aposetolo. Sa lagolagoina e le Alii soo se tagata e umia se vaega o le Perisitua, pe o ia o se Ositaulaga, se Toeaina, se Fitugafulu, po o se Aposetolo, pe afai na te faalauteleina lona valaauga ma faia lona tiute” (Deseret Weekly, Nov. 7, 1896, 641). (Tagai foi i le Boyd K. Packer, “The Aaronic Priesthood,” Ensign, Nov. 1981, 33.)
Na faamamafa mai e Peresitene Boyd K. Packer o le Korama a Aposetolo e Toasefululua, e faapea, e taua tele i le Alii le faauuina o le perisitua i le ala e tatau ai:
Ata
Peresitene Boyd K. Packer
“E na o se tasi lava e i ai le pule ma ‘ua lauiloa i le ekalesia ua ia te ia le pule,’ e mafai ona e maua atu ai le perisitua. (MF&F 42:11.)
“O le perisitua e le mafai ona faaee atu pei o se tipiloma. E le mafai ona tuulima atu e pei o se tusi faamaonia. E le mafai ona kilivaina atu ia te oe e se avefeau pe lafo atu ia te oe i se tusi. E na o le faauuina i le ala tatau e oo atu ai. E tatau ona i ai iina se tasi ua faatagaina o umia le perisitua. E tatau ona tuu ona lima i luga o lou ulu ma faauu oe.
“O se tasi lena o mafuaaga e tele ina femalagaa’i ai le Au Pulega Aoao—e tuuina atu ki o le pule o le perisitua. Ua maua e peresitene uma o siteki i soo se mea i le lalolagi lana pule i lalo o aao o se tasi o le usoga pulefaamalumalu o le Ekalesia. E le‘i i ai lava se tuusaunoaga se tasi.
“Manatua nei mea. O le perisitua e matuai taua tele i le Alii. E matuai faaeteete o ia i le auala e faaeeina ai, ma o ai foi [e faaeeina atu]. E le faia lava faalilolilo” (“The Aaronic Priesthood,” Ensign, Nov. 1981, 32).