I se konafesi a le Ekalesia sa faia i le aso 25 o Ianuari, 1832, sa maua ai e le Perofeta o Iosefa Samita ni faaaliga se lua, ia o loo maua uma i le Mataupu Faavae ma Feagaiga 75. O le faaaliga muamua, ua faamaumauina i fuaiupu 1-22, na tuuina mai i se vaega o toeaina o e na tuuina atu o latou igoa mo le galuega faafaifeautalai. Sa faatonuina e le Alii ia nei toeaiina e uiga i o latou tiute faafaifeautalai ma tofia i latou o ni soa faamisiona. O le faaaliga lona lua, ua faamaumauina i fuaiupu 23–36, na tuuina mai i se vaega lona lua o toeaiina o e sa fia iloa le finagalo o le Alii e faatatau ia i latou. Na faatonuina e le Alii nei toeaiina ina ia mautinoa e tausia o latou aiga, ma ia talia se valaau e talai atu le talalelei.
Ua fetalai mai le Alii ia i latou e mananao e talai atu le talalelei
I ni nai aso ae e te le’i aoaoina atu le lesona lenei, valaaulia se tagata o le vasega ua maua se valaauga o le misiona, se tagata o le vasega e le o toe umi ae auina atu lana talosaga e auauna atu i se misiona, po o se faifeautalai e le’i leva ona foi mai i le misiona e fesoasoani e aoao atu e uiga i le faasoaina atu o le talalelei. Tuu atu i le tagata se kopi o le auivi o le lesona, ma fai atu ia te ia e suesue i le Mataupu Faavae ma Feagaiga 75:1–4 ma sauni e aoao atu le vaega lena o le lesona.
A uma le faigalotu a le vasega, tuu atu le taimi i le tagata o le vasega po o le faifeautalai ua maea le misiona e aoao atu mea na ia saunia.
Valaaulia se tagata o le vasega e faitau leotele le Mataupu Faavae ma Feagaiga 75:1–2. Fai atu i le vasega e mulimuli i le faitauga, ma vaavaai po o ai na fetalai mai i ai le Alii i fuaiupu nei.
Fesili atu: O ai na fetalai mai i ai le Alii i fuaiupu nei? (O toeaiina o e na auina atu o latou igoa mo le galuega faafaifeautalai.)
Ta’u atu i le vasega e lua faaaliga o loo tuufaatasi i le Mataupu Faavae ma Feagaiga 75 ma sa tuuina mai i se konafesi a le Ekalesia. O le faaaliga muamua na tuuina mai i se vaega o faifeautalai ma faamalamalama mai auala e mafai ai ona latou mataalia atili i le fesoasoani atu i isi ia malamalama i la latou savali.
Valaaulia se tagata o le vasega e faitau leotele le Mataupu Faavae ma Feagaiga 75:3-4. Fai atu i le vasega e vaavaai mo le fautuaga a le Alii i toeaina e faatatau i lo latou valaauga e talai atu le talalelei. Atonu e te manao e fautua atu i tagata o le vasega e faailoga mea latou te maua i a latou tusitusiga paia.
Fesili atu: E tusa ai ma fuaiupu 3–4, o a mea na finagalo le Alii e fai e toeaiina a’o talai atu le talalelei?
Valaaulia ni nai tagata o le vasega e faamatala mai o latou manatu i uiga o fasifuaitau “o atu ma aua le faatuai,” “pe faapaie,” ae “galulue ma lo outou malosi”.
A uma ona tali mai tagata o le vasega, faamalamalama atu pe aisea e te manatu ai, e ao ona iloa ma aoao atu e i latou ua valaauina e folafola atu le talalelei, ia faaaliga ma poloaiga ua tuuina mai e le Alii ia i tatou (tagai i le fuaiupu e 4).
Fesili atu: Aisea e te manatu e taua ai ona auauna atu faifeautalai a le Alii ia te Ia i auala nei?
Faasoa atu i le vasega le mea o loo e faia (po o le mea sa e faia, pe afai sa e auauna atu i se misiona) e saunia ai e folafola atu le talalelei i le auala na faamatala mai e le Alii i le Mataupu Faavae ma Feagaiga 75:3–4. Faaiu i le faasoa atu o ou manatu e uiga i mea e mafai ona faia e tagata o le vasega, e faasoa atu ai le talalelei i le ala lenei, i le taimi lenei o o latou olaga.
A uma ona aoao atu le tagata o le vasega po o le faifeautalai ua maea le misiona, tusi le faamatalaga le uma lenei i luga o le laupapa: Afai tatou te faamaoni i le folafolaina atu o le talalelei, o le Alii o le a …
Fai atu i tagata o le vasega e faitau filemu le Mataupu Faavae ma Feagaiga 75:5 ma faailoa mai folafolaga na tuuina mai e le Alii i na faifeautalai.
O le a le mea na folafola mai e le Alii ia i latou o e folafola atu ma le faamaoni Lana talalelei?
Atonu e tatau ona e faamalamalama atu o le upu fusisaito e faatatau i le seleina o au o saito ona nonoa faatasi lea i ni fusi, po o fusisaito. O le maua o “fusisaito e tele” o lona uiga e mau le seleselega.
Mata o a nisi o “fusisaito” e maua e faifeautalai o loo faasoaina atu ma le faamaoni le talalelei? (O fusisaito e mafai ona faatatau i tagata e talia la latou savali [tagata liliu mai] faapea foi ma faamanuiaga e faavavau o loo lisiina i le fuaiupu e 5.)
Fai atu i tagata o le vasega e otooto folafolaga o loo i ai i le Mataupu Faavae ma Feagaiga 75:5 e ala i le faamae‘aina o le faamatalaga o le mataupu faavae o loo i luga o le laupapa. O le vaega lenei o se tasi lea o auala e ono faaupu ai e tagata o le vasega lenei mataupu faavae: Afai tatou te faamaoni i le folafolaina atu o le talalelei, o le a faamanuia i tatou e le Alii i le viiga, mamalu, ma le ola e faavavau.
Aisea e te manatu ai o i latou o e folafola atu ma le faamaoni le talalelei, o le a maua na faamanuiaga maoae e faavavau?
Ua valaau ma faatonu e le Alii ia soa faafaifeautalai
Faamalamalama atu e faapea, ina ua uma ona tuuina mai e le Alii faatonuga ma folafolaga i toeaina o e na o e auauna atu faamisiona, sa Ia faavasegaina i latou i ni soa ma tuu mai i soa taitasi ni faatonuga patino.
Vaevae tagata o le vasega i ni paga. Fai atu i se tagata se toatasi o le paga e faitau filemu le Mataupu Faavae ma Feagaiga 75:6–12 ae o le isi e faitau fuaiupu e 13–14. Fai atu ia te i latou e vaavaai mo tali i fesili nei a o latou faitau:
O ai sa fetalai i ai le Alii?
O a faamanuiaga na folafola mai e le Alii ia i latou pe afai latou te faamaoni i le folafolaina atu o le talalelei?
A ua uma ona faitau e tagata o le vasega a latou fuaiupu atofaina, valaaulia i latou e faasoa i a latou paga ia tali i fesili o loo i luga.
O a ni fautuaga faaopoopo na tuuina mai e le Alii ia William E. McLellin ma Luka Johnson i fuaiupu e 8-11 e mafai ona fesoasoani ia i tatou ia folafola atu ma le mataalia le talalelei? (Tatalo ina ia maua le Fesoasoani—le Agaga Paia—e aoao i tatou ma mo le malosi e tumau ai i le faamaoni.)
O le a le folafolaga na toe fetalai mai e le Alii i na soa taitasi i fuaiupu e 11, 13, ma le 14? (O le a Ia faatasi ma i latou. Atonu e te manao e fautua atu i tagata o le vasega e faailoga lenei folafolaga fai so’o.)
Fai i tagata o le vasega e faailoa mai se mataupu faavae ua latou aoaoina mai i nei fuaiupu. E ui atonu e faaaoga e tagata o le vasega isi upu, e tatau ona mafai ona latou faailoa mai le mataupu faavae lenei: Afai tatou te faamaoni i le folafolaina atu o le talalelei, o le a faatasi le Alii ma i tatou.
O a ni aafiaga na oo ia te oe po o se tasi e te iloa na faamaonia ai ia te oe, o le a i ai le Alii ma i latou o e faasoa atu ma le faamaoni Lana talalelei i isi?
Valaaulia tagata o le vasega e mafaufau po o le a se latou tala i se uo po o se tagata o le aiga o le sa tauivi a’o auauna atu i se misiona talai. Fai atu ia i latou e faaaoga ia mataupu faavae sa latou aoaoina i le lesona i le aso, ma tusi se tusi puupuu o le faamalosiauga i lena faifeautalai, i a latou api o le vasega po o api talaaga mo le suesueina o tusitusiga paia. Valaaulia tagata o le vasega e faasoa atu i le tusi ni mea e mafai ona fai e faifeautalai e atili folafola atu ai le talalelei ma le faamaoni, ma o a foi nisi o faamanuiaga e oo mai ia i latou o e faia faapea.
A ua uma le taimi na tuu atu i tagata o le vasega e tusi ai a latou tusi, fai atu i nisi o i latou e faasoa mai ni mea na latou tusia.
Otooto le Mataupu Faavae ma Feagaiga 75:15–22 i le faamalamalama atu e faapea, na faatonuina e le Alii ia faifeautalai e faamanuia i aiga o e taliaina i latou. Sa Ia aoao mai foi ia te i latou le mea e fai pe a teena i latou e tagata sa latou faasoa atu i ai le talalelei. (Atonu e te manao e faamalamalama atu o le tutu ese o le efuefu o vae o se molimau e faasaga ia i latou e teena faifeautalai ma la latou savali, e na o tulaga e seasea ona tupu e faia ai pe a poloaiina manino mai e le Alii.)
Ua faamalamalama mai e le Alii le ala e tatau ona lagolagoina ai aiga o i latou ua Ia valaauina e auauna atu i misiona.
Faamalamalama atu o le faaaliga lona lua o loo i le Mataupu Faavae ma Feagaiga 75 e ese se vaega o toeaiina na tuuina mai i ai. Valaaulia se tagata o le vasega e faitau leotele le Mataupu Faavae ma Feagaiga 75:23, ma fai atu i le vasega e vaavaai mo le mea na mananao nei toeaiina ia iloa.
Faamalamalama atu i tausaga popofou o le Ekalesia, o le toatele o alii o e na valaauina e auauna atu faamisiona na i ai ni avā ma ni fanau na faalagolago le tausiga ia i latou. O le taliaina o le valaau e auauna atu o se osigataulaga tele mo le aiga atoa. O se popolega masani mo le toatele o toeaina o le, po o le a le mea o le a tupu i o latou aiga pe afai latou te talia se valaau e talai atu le talalelei i se mea e mamao mai le aiga.
Valaaulia se tagata o le vasega e faitau leotele le Mataupu Faavae ma Feagaiga 75:24-28. Valaaulia le vasega e vaavaai mo faatonuga a le Alii i toeaina o e sa manaomia e talai atu le talalelei, ae sa i ai ni aiga e tausi.
E tusa ai ma le fuaiupu e 24, a auauna atu se tane ma se tama o se faifeautalai faamisiona, o ai e tatau ona fesoasoani e tausi lona aiga?
I le fuaiupu e 26, o le a le faatonuga a le Alii i toeaina e tatau ona fai, pe afai na mafai ona latou maua se nofoaga e mafai ona lagolagoina ai o latou aiga?
I le fuaiupu e 28, o le a le fetalaiga a le Alii ia i latou o o latou tulaga o le a le mafai ai ona latou tuua o latou aiga ina ia folafola atu le talalelei?
Valaaulia se tagata o le vasega e faitau leotele le Mataupu Faavae ma Feagaiga 75:29. Fai atu i le vasega e vaavaai mo le fautuaga na tuuina mai e le Alii i nei alii uma. Atonu e aoga le faamalamalama atu, o se tagata paie o se tagata e le manao e galue.
O le a le fuaitau i le fuaiupu e 29 e mafai ona e faaaogaina e aotele ai le fautuaga a le Alii i toeaina o e sa mafai ona auauna atu i misiona ma i latou o e sa manaomia ona nonofo i le fale e tausi o latou aiga? (“Tuu atu i tagata taitoatasi ia filiga i mea uma.” Ia mautinoa ua malamalama tagata o le vasega, o lenei fuaitau e faatatau ia i tatou uma ma ua poloai mai le Alii ia i tatou ia filiga i mea uma.)
O le a le uiga o le “ia filiga i mea uma”? (Ia faifai pea, faatauanau, mataala, ma galue malosi.)
Ua tofia e le Alii toeaina e auauna atu o ni soa faifeautalai
Otooto le Mataupu Faavae ma Feagaiga 75:30–36 i le faamatala atu, i le faaiuga o lenei faaaliga, na tofia ai e le Alii nisi soa faifeautalai e tele atu.
Faaiu le lesona i le valaauliaina o tagata o le vasega e tusi se mea e mafai ona latou faia ina ia filiga atili ai i a latou auaunaga i le Alii. Valaaulia se tagata se toatasi pe toalua o le vasega e faasoa mai o latou manatu ma molimau e uiga i mataupu faavae na talanoaina i le vasega i le aso.
I le aso 29 o Oketopa, 1831, na maua ai e William E. McLellin se valaauga e auauna atu i se misiona i le Iunaite Setete i sasae, ma na valaauina Samuelu H. Samita e avea ma ana soa (tagai i le MF&F 66:5–8). Sa tali atu William McLellin i le valaau; ae peitai, sa ia faaumaina vave lana misiona ma toe foi atu i Katelani, Ohaio, i le faaiuga o Tesema 1831.
E pei ona maua i le Mataupu Faavae ma Feagaiga 75:6–13, sa aoai e le Alii ia William E. McLellin ona o ana muimuiga, faaleaoga le valaauga e auauna atu i setete i sasae, ae valaauina Orson Hyde e sui ia te ia e avea ma soa a Samuelu Samita. Ae peitai, sa toe tuuina mai ma le alofa e le Alii se isi valaauga mo Uso McLellin e folafola atu le talalelei i le Iunaite Setete i saute faatasi ma Luka Johnson e avea ma ana soa. Na talia e Uso McLellin le valaau e auauna atu, ae sana le’i faaauau pea ma le faamaoni. E lei umi ae faapea mai ua ma’i tele o ia mo le faaauauina o lana misiona. Ina ua tuua lana misiona, sa ia malaga atu i Hairama, Ohaio, ma faaipoipo ia Emiline Miller.
Ina ua uma ona auauna atu i ni misiona faaopoopo ma auauna atu mo se taimi o se tasi o le Korama a Aposetolo e Toasefululua,sa tapeina ai le igoa o William E. McLellin i le aso 11 o Me, 1838, ina ua uma ona ia ta‘uta’u atu sa le toe tatalo ma le tausia poloaiga.
O le faatinoga o le tutu ese po o le faamamaina o le efuefu mai vae o se tagata, o se molimau e faasaga ia i latou o e mumusu e talia le talalelei (tagai i le MF&F 24:15; 60:15; 84:92; 99:4). Na faamalamalama mai e Peresitene Iosefa Filitia Samita:
Ata
Peresitene Iosefa Filitia Samita
“Ina ua auina atu e le Alii ia Ona soo e folafola atu le savali o le Talalelei, sa ia faatonuina i latou e tutu ese efuefu o o latou vae o se molimau e faasaga ia i latou o e tetee ia i latou. E faapena foi …na faatonuina e le Alii ia toeaina na o latou mauaina foi lea avanoa. … O le faamamaina o o latou vae, e ala i le faamamaina po o le soloina ese o le efuefu, o le a faamaumauina i le lagi o se molimau e faasaga i le amioleaga. Ae peitai, o lenei faatinoga, sa le tatau ona faia i luma o tagata solitulafono, ‘ne’i e faaita ia te i latou, ae i se mea lilo; ma mulumulu ou vae, o se molimau e faasaga ia te i latou i le aso o le faamasinoga.’ [MF&F 60:15]. O faifeautalai o le Ekalesia o e faia ma le faamaoni lo latou tiute, o loo i lalo o le matafaioi o le tuua o a latou molimau ia i latou uma o e latou te fesootai i la latou galuega. O lenei molimau o le a tu o se molimau ia te i latou o e e teena le savali, i le faamasinoga” (Church History and Modern Revelation, 2 vols. [1953], 1:223; tagai foi i le Tala ma Faamatalaga o Talaaga mo le MF&F 24:15 i le lesona 31).
O le tutu o le efuefu o vae o se tagata o se molimau lea e faasaga ia i latou o e e matuai tetee malosi i auauna faatagaina a le Alii. E na o tulaga e seasea ona tupu e faia ai, pe a poloai manino mai e le Alii. O lenei faatinoga e avea foi o se molimau i lo latou teenaina, ma o i latou o e talai atu le talalelei ia i latou e le toe nafa mo i latou i luma o le Alii.