Mataupu Faavae ma Feagaiga 72–76:80 (Iunite 16)

Anomea o Sauniuniga mo le Faiaoga mo Suesuega i le Fale

Aotelega o Lesona mo Suesuega i le Fale i Aso Taitasi

O le aotelega lenei o mea na tutupu, aoaoga faavae, ma mataupu faavae na aoaoina e tagata aoga a’o latou suesueina le Mataupu Faavae ma Feagaiga 72–76:80 (iunite 16) e le o faamoemoe e aoao atu o se vaega o lau lesona. O le lesona e te aoaoina atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tamaiti aoga.

Aso 1 (Mataupu Faavae ma Feagaiga 72–74)

A o suesueina e tagata aoga le valaauga e le Alii o Newel K. Whitney e avea ma se epikopo, sa latou aoaoina ai o valaauga e auauna atu i le Ekalesia a Iesu Keriso e sau mai i le Faaola. Na latou aoaoina foi, o epikopo ma peresitene o paranesi e puleaina mataupu faaletino ma faaleagaga o le Ekalesia i a latou uarota ma paranesi. A o aoao e uiga i le galuega a le Perofeta o Iosefa Samita i le faaliliuga musuia o le Tusi Paia, na faailoa mai ai e tagata aoga le mataupu faavae e faapea, o fanau laiti ua paia, ua faapaiaina e ala i le Togiola a Iesu Keriso.

Aso 2 (Mataupu Faavae ma Feagaiga 75)

E ala i le suesueina o faatonuga a le Alii i se vaega o toeaina i le Ekalesia, na aoao ai tagata aoga e uiga i faamanuiaga e tuuina mai e le Alii ia i latou o e faamaoni i le folafolaina atu o le talalelei. Mai le fautuaga a le Alii i se vaega ese mai o toeaina, na iloa ai e tagata aoga, ua poloaiina i tatou e le Alii ina ia maelega i mea uma.

Aso 3 (Mataupu Faavae ma Feagaiga 76:1–49)

A o mafaufau loloto le Perofeta o Iosefa Samita ma Sini Rikitone i le uiga o le Ioane 5:29, sa faapea ona tuuina mai ia i laua se faaaliga mai le Alii. A o lei suesueina le faaaliga, sa iloa e tagata aoga mataupu faavae e faatatau i le naunau o le Alii e faaali mai upumoni ia i tatou. A o suesueina e tagata aoga le vaega muamua o le faaaliga, sa latou faailoa mai ni aoaoga faavae eseese e uiga ia Iesu Keriso ma Satani. Na aoaoina foi e tagata aoga, e ala i le Togiola a Iesu Keriso, o le a faaolaina fanau uma a le Atua, mai le agasala ma le oti, vagana ai atalii o le malaia.

Aso 4 (Mataupu Faavae ma Feagaiga 76:50-80)

A o suesueina mea na vaaia e le Perofeta o Iosefa Samita ma Sini Rikitone i se faaaliga vaaia e faatatau i le malo selesitila, sa faailoa mai ai e tagata aoga ni faamanuiaga e faavavau o le a tuuina mai ia i latou o e talia le molimau a Iesu ma tausi Ana poloaiga. Na iloa foi e tagata aoga e mafai ona faaatoatoaina i tatou e ala i le Togiola a Iesu Keriso. E ala i le faatusatusaina o eseesega i le va o le malo selesitila ma le malo terasitila, na aoaoina ai e tagata aoga, afai tatou te totoa i le molimau ia Iesu, e mafai ona tatou maua le malo selesitila o le Atua.

Folasaga

O lenei lesona e taulai atu i mea na aoaoina e le Perofeta o Iosefa Samita ma Sini Rikitone e uiga i le Faaola, ma malo selesitila ma le terasitila e ala i le faaaliga vaaia o loo faamaumauina i le Mataupu Faavae ma Feagaiga 76.

Fautuaga mo le Aoaoina Atu

Manatua: Ina ia fesoasoani i tagata aoga i a latou taumafaiga e tauloto le mau tauloto i le Mataupu Faavae ma Feagaiga 76:40–41, atonu e te manao e tauloto faatasi ma i latou i le amataga po o le faaiuga o lenei vasega.

Mataupu Faavae ma Feagaiga 76:20–24

Ua vaai Iosefa Samita ma Sini Rikitone i se faaaliga vaaia i le Tama Faalelagi ma Iesu Keriso

Mo le viiga o le faigalotu, valaaulia le vasega e usu le pese “Ua ou Iloa Lo‘u Faaola” (Viiga, nu. 73). E mafai ona fesoasoani upu o lenei viiga i tagata aoga, ia lagona ai le mana o mataupu faavae o le a latou aoao i ai i le aso.

Valaaulia tagata aoga e mafaufau i le tulaga lenei: A o saofai ai i se vasega i le aoga, na amata talanoaina e lou faiaoga ia tapuaiga i le lalolagi. Ina ua ta‘ua le faa-Kerisiano, sa fesili atu le faiaoga pe o i ai ni Kerisiano i totonu o le vasega, o e e mananao e faasoa atu o latou talitonuga e uiga ia Iesu Keriso.

Afai sa e i ai i lenei tulaga, o le a sau tala o le a fai atu e te talitonu ma iloa e uiga ia Iesu Keriso?

Faailoa atu, e mafai ona tatou aoao i upumoni e tele e uiga ia Iesu Keriso i le Mataupu Faavae ma Feagaiga 76. Fesoasoani i tagata aoga e toe faamanatu le anotusi o lenei faaaliga i le fai atu o fesili nei:

O a mea sa faia e le Perofeta o Iosefa Samita ma Sini Rikitone a’o le’i o la mauaina le faaaliga vaaia ua faamaumauina i le Mataupu Faavae ma Feagaiga 76? (Afai e manaomia, uunai tagata aoga e toe faamanatu le folasaga o le vaega.)
O ai na vaai muamua i ai Iosefa Samita ma Sini Rikitone i le faaaliga? (Afai e le manatua e tagata aoga, valaaulia i latou e vaavaai vave i le Mataupu Faavae ma Feagaiga 76:20–24 e sue ai le tali.)

Valaaulia se tagata aoga e faitau leotele le Mataupu Faavae ma Feagaiga 76:20–24. Fai atu i le vasega e mulimuli i le faitauga, ma vaavaai mo upumoni na aoaoina e Iosefa Samita ma Sini Rikitone e uiga ia Iesu Keriso.

O a upumoni na aoaoina e Iosefa Samita ma Sini Rikitone e uiga ia Iesu Keriso e ala i lenei faaaliga vaaia? Valaaulia se tagata aoga e lisi ia tali i luga o le laupapa.)

E mafai ona faailoa mai e tagata o le vasega ni aoaoga faavae eseese, e aofia ai lenei: O Iesu Keriso o se Tagata soifua, faamamaluina; o le Tama Faalelagi ma Iesu Keriso o ni tagata mavaevae se toalua; o Iesu Keriso o le Alo e Toatasi na Fanaua e le Tama i le tino; o Iesu Keriso o le Foafoa o lenei lalolagi ma le isi lalolagi; ma o i tatou o atalii ma afafine o le Atua. (Ina ia fesoasoani i tagata aoga ia malamalama lelei i le mataupu faavae mulimuli, atonu e te manao e valaaulia i latou e faitau le Mosaea 5:7.)

O le fea o upumoni o loo lisiina i luga o le laupapa e mafai ona e molimau atu e uiga i ai? E faapefea ona e iloa e moni?

Mafaufau e faasoa atu la oe lava molimau e uiga i le Faaola.

Faamanatu atu i tagata aoga o le Mataupu Faavae ma Feagaiga 76:22–24 o se mau tauloto. Fai atu ia te i latou e ta‘u mai isi na faaali i ai Iesu Keriso e ese mai i le Perofeta o Iosefa Samita ma Sini Rikitone. (I la latou lesona o suesuega e faia i le fale mo le Aso 3, na atofaina ai tagata aoga e su’e ni mau faasino i isi tala i tusitusiga paia o loo molimau mai ai perofeta na vaai i le Faaola. Mo se faataitaiga, tagai i le Esoto 33:11; 1 Tupu 11:9; ma le Isaia 6:5; tagai foi i le Mataio 5:8.)

Mataupu Faavae ma Feagaiga 76:50-80

Ua vaai Iosefa Samita ma Sini Rikitone i le malo selesitila ma le malo terasitila i le faaaliga vaaia

Fai atu i tagata aoga e ta‘u mai nisi o nofoaga latou te fia o i ai mo se tafaoga po o se aso malolo. (Lisi a latou tali i luga o le laupapa.) Li’o se tasi o nofoaga e taunuu i ai ua lisiina i luga o le laupapa. Fai atu i tagata aoga e faamatala le ala e tatau ona latou uia ina ia taunuu atu ai i le nofoaga na filifilia. Filifili se isi nofoaga e taunuu i ai mai nofoaga na lisiina i luga o le laupapa, lea e matuai ese lava mai le nofoaga muamua na e li’oina.

Afai e te mulimuli i le ala na e faamatalaina mo le nofoaga muamua, mata e te oo atu ai i le isi nofoaga lenei?
O a aafiaga o le taunuuga e te filifilia, i le auala e ao ona e uia ina ia e oo atu ai iina?

Valaaulia tagata aoga e susue a latou taiala suesue i le “Mataupu Faavae ma Feagaiga 76: Auivi o le Faaaliga Vaaia” o le ata o loo i le lesona mo le Aso 3.

Ata

malo o mamalu

O le a le fesootaiga o le tatou talanoaga e uiga i auala ma nofoaga e taunuu i ai, i le faaaliga vaaia ua faamaumauina i le Mataupu Faavae ma Feagaiga 76? (Mai lenei faaaliga vaaia, ua tatou aoao ai e uiga i auala, po o le filifiliga, e tau atu i taunuuga e faavavau e mafai e i tatou taitoatasi ona uia.)

Valaaulia se tagata aoga e faitau leotele le Mataupu Faavae ma Feagaiga 76:51–53, lea e faamatalaina ai le ala i le faaeaga i le malo selesitila. Fai atu i se isi tagata aoga e faitau leotele le Mataupu Faavae ma Feagaiga 76:72–79, lea o loo faamatala ai le ala i le malo terasitila. Fai atu i le vasega e mulimuli i le faitauga, ma vaavaai mo auala e ese ai le ala i le malo selesitila ma le malo terasitila.

O a nisi o eseesega na e matauina i le va o i latou o e mautofi i le faaeaga i le malo selesitila ma i latou o e mautofi i le malo terasitila? (Atonu o se tasi o aafiaga iloga atonu na matauina e tagata aoga o le, o i latou o e mautofi i le malo terasitila, “o e sa lei totoa i le molimau ia Iesu” [MF&F 76:79].)

Fai atu i tagata aoga e toe faamanatu le Mataupu Faavae ma Feagaiga 76:51–53, ma vaavaai mo se mataupu faavae na aoao mai i na fuaiupu.

Tusi le mataupu faavae le uma lenei i luga o le laupapa: Afai tatou te totoa i le molimau ia Iesu, …

Mai mea ua e aoaoina i fuaiupu 51–53, e faapefea ona e faaumaina lenei mataupu faavae? (Atonu latou te faaaogaina isi faaupuga, ae e tatau ona faailoa mai e tagata o le vasega le mataupu faavae lenei: Afai tatou te totoa i le molimau ia Iesu, e mafai ona tatou maua le faaeaga i le malo selesitila o le Atua.)

Ina ia fesoasoani i tagata aoga ia malamalama lelei i lenei mataupu faavae, ia talanoaina fesili nei:

O le a lou manatu i le eseesega i le va o le i ai o se molimau i le Faaola ma le toa i lena molimau?
O a nisi o amioga ma uiga faaalia o le a e vaaia ia i latou o e e totoa i a latou molimau i le Faaola?
O le a se mea na fesoasoani ia te oe ia e lototoa i lau molimau ia Iesu Keriso?

Faasoa atu lau molimau e faapea, o i latou taitoatasi ua i ai le faamoemoe e maua le faaeaga i le malo selesitila. Valaaulia i latou e mafaufau loloto pe o filifiliga o loo latou faia, e taitai atu ai i latou i le taunuuga e faavavau, lea o le a aumai ai ia i latou le fiafia sili. Uunai i latou ia totoa i a latou molimau ia Iesu Keriso.

Iunite e Sosoo Ai (Mataupu Faavae ma Feagaiga 76:81–119; 77–83)

Ina ia saunia tagata aoga mo a latou suesuega i le aluga o le vaiaso a sau, atonu e te manao e valaaulia i latou e mafaufau i mea nei: Aisea ua faamoemoe mai ai e le Alii ni mea se tele mai ia i latou, o e ua mauaina le tele o le malamalama ma le poto? E le gata i le faamaeaina o la latou suesuega o le faaaliga vaaia na tuuina mai i le Perofeta o Iosefa Samita ma Sini Rikitone, ua faamaumauina i le Mataupu Faavae ma Feagaiga 76, i le iunite e sosoo ai, o le a aoao ai tagata aoga i mea ua faamoemoe mai e le Alii ia i latou o e ua Ia tuuina mai i ai mea e tele. O le a faitau ai foi tagata aoga i le faamalamalamaga o “manu e fa” o loo ta’ua i le Faaaliga 4:6–9.