Lesona mo Suesuega i le Fale
Mataupu Faavae ma Feagaiga 20–23 (Iunite 6)
Anomea o Sauniuniga mo le Faiaoga mo Suesuega i le Fale
Aotelega o Lesona mo Suesuega i le Fale i Aso Taitasi
O le aotelega lenei o mea na tutupu, aoaoga faavae, ma mataupu faavae na aoaoina e tagata aoga a’o latou suesueina le Mataupu Faavae ma Feagaiga 20–23 (iunite 6) e le o faamoemoe e aoao atu o se vaega o lau lesona. O le lesona e te aoaoina atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tamaiti aoga.
O lenei lesona o loo faamamafaina ai le valaauga o Iosefa Samita mai le Atua e faatulaga le Ekalesia a Iesu Keriso. Na fesoasoani i tagata aoga ia malamalama ai, o le oo mai o le Tusi a Mamona o le faamaoniga lea o le moni o le Toefuataiga. Na iloa ai foi e tagata aoga upu moni autu e faatatau i le uiga ma le natura o le Aiga Atua.
Sa suesue tagata aoga i tiute o tofi o le perisitua ma aoao ai e faapea, a o maua e atalii o le Tama Faalelagi tofi maualuga atu o le perisitua, latou te maua ai ni tiutetauave ma ni avanoa se tele atu e auauna ai i isi. Na aoao foi tagata aoga i le tiutetauave o loo i ai a e umia le perisitua, e faatautaia sauniga o le talalelei, ma leoleo ma auauna atu i tagata o le Ekalesia.
Sa aoao tagata aoga e uiga i sauniga o le papatisoga ma le faamanatuga. Mo le papatisoga ina ia taliaina e le Atua, e ao ona faataunuuina e se tasi o umia le pule tatau ma faia i le ala sa’o. Sa manatunatu foi tagata aoga i le folafolaga e faapea, afai latou te faamaoni i a latou feagaiga o le papatisoga, ma aai ma feinu ma le agavaa i le faamanatuga, e mafai ona latou maua i taimi uma le Agaga e faatasi ma i latou.
Aso 4 (Mataupu Faavae ma Feagaiga 21–23)
A o aoao tagata aoga e uiga i mea na tutupu i le vaitaimi na faatuina aloaia ai le Ekalesia, sa latou suesue ai i upumoni nei: Sa musuia e le Atua ia Iosefa Samita e toefuatai mai le Ekalesia a Iesu Keriso. Afai e gauai atu tagata taitasi i saunoaga a le perofeta, o le a puipuia i latou e faasaga i le fili ma maua faamanuiaga o le lagi. O papatisoga e ao ona faataunuuina e se tasi ua i ai le pule mai le Atua. A o tatou mananao e auauna atu i le Alii, e mafai ona tatou maua le taitaiga patino mai ia te Ia, ma o le a faamanuia i tatou e le Alii a o tatou mulimuli i le taitaiga ua Ia tuuina mai ia i tatou.
Folasaga
Sa faatulagaina le Ekalesia e faavae i luga o faaaliga mai le Alii i le Perofeta o Iosefa Samita. O lenei lesona o loo faamamafa ai le taua o faaaliga a le Alii i Ana perofeta.
Fautuaga mo le Aoaoina Atu
Mataupu Faavae ma Feagaiga 20–21
Ua faatulaga e le Alii Lana Ekalesia
Ia saunia ia ata o loo i ai i le lesona i ni pepa eseese se lua. Aua nei faatagaina tagata aoga e vaai i ata seia uma ona e mulimuli i faatonuga o loo i lalo.
Fai atu i tagata aoga o le a e faaali atu ia te i latou ni ata se lua, ma e tatau ona latou taumafai e tusi mea latou te vaai i ai. Faamatala atu o le a latou vaai i ata taitasi mo na o le tasi le sekone, o lea e tatau ai ona latou vaai ma le totoa. Faaali atu ia i latou i le ata muamua, tuu atu ia i latou le taimi e tusi ai le ata, ona faaali atu lea o le ata lona lua ma tuu i ai le taimi e tusi ai le ata.
-
O le fea o ata sa faigofie atu ona tusi?
Faaali atu ata uma e lua i le taimi e tasi. Faailoa atu, o ata uma e lua e tutusa le aofai o laina o loo i ai.
-
Aisea na faigofie atu ai ona tusi le ata lona lua? (E faigofie atu ona tusi ia laina e sefululua i se faasologa e iloagofie.)
-
O le a se lesona e mafai ona tatou aoao mai i le tusiaina o nei ata e lua?
Faamalamalama atu e faapea, ina ua toefuatai mai e Iesu Keriso Lana Ekalesia, na Ia tuuina mai ni faaaliga i le auala e tatau ona faatulaga ai, ma o ai e tatau ona taitai i le Ekalesia.
-
O a auala e aumaia ai le maopoopo i le Ekalesia i le i ai o se perofeta ma aposetolo e 12?
Valaaulia se tagata aoga e faitau leotele le Mataupu Faavae ma Feagaiga 20:1-2; ona valaaulia lea o se isi tagata aoga e faitau leotele le Mataupu Faavae ma Feagaiga 21:1-3. Fai atu i le vasega e mulimuli i le faitauga, ma vaavaai mo se tasi o laasaga muamua na faia e Iesu Keriso ia maua ai le maopoopo i Lana Ekalesia.
-
E tusa ai ma nei fuaiupu, o le a se mea na faia e le Faaola ia maua ai le maopoopo i le, ma fesoasoani e faatulaga ai Lana Ekalesia? (Sa ia valaauina Iosefa Samita o se perofeta, tuuina mai ia te ia poloaiga, ma tuuina mai ia te ia le taitaiga i le auala e faatulaga ai le Ekalesia.)
Aotele tali a tagata aoga i le tusia o le, Na faatonuina e le Atua ia Iosefa Samita e toefuatai mai Lana Ekalesia i luga o le laupapa.
-
Aisea e te manatu e taua ai le i ai o se perofeta i le toefuataiga o le Ekalesia a Iesu Keriso?
Valaaulia tagata aoga e faasoa mai auala na fesoasoani ai a latou suesuega i le aluga o le vaiaso, latou te maua ai le agaga faafetai sili atu mo Iosefa Samita ma lana matafaioi i le toefuataiga o le Ekalesia a Iesu Keriso. Faasoa atu lau molimau na maua e Iosefa Samita faaaliga ma le taitaiga e faavae ai le Ekalesia a le Alii, ma e ala mai ia Iosefa Samita na aumai ai e le Alii le faatulagaina lelei i Lona malo i le lalolagi.
Valaaulia tagata aoga e faitau filemu le Mataupu Faavae ma Feagaiga 21:5-6, ma vaavaai mo faamanuiaga e tolu na folafola mai ia i latou o e talia ma le onosai ma le faatuatua upu a le Perofeta o Iosefa Samita. A uma ona latou faitau, faamatala atu o nei folafolaga e faatatau foi i le mulimuli i le perofeta soifua.
-
E faapefea ona e aotelea faamanuiaga na folafola mai ia i latou o e gauai atu i upu a le perofeta? (O se tasi lenei o auala e ta’ua ai le mataupu faavae: Afai tatou te gauai atu i upu a perofeta, o le a puipuia i tatou e faasaga i le fili ma maua faamanuiaga o le lagi.)
-
Aisea e taua ai le gauai atu (talia ma ola ai) ae le na ona faalogo i upu a perofeta, ina ia mafai ona maua ai nei faamanuiaga?
-
O le a se taimi na puipuia ai oe po o se tasi e te iloa, e faasaga i le fili e ala i le mulimuli i upu a perofeta soifua?
Fai atu i tagata aoga e mafaufau i se aoaoga a le perofeta soifua atonu e manaomia ona latou gauai atu pe ola faalelei ai. Uunai i latou e faia se mea e faatino ai lena aoaoga i le aso.
Tusi le fuaitau “Tatou te iloa …” i luga o le laupapa.
Faamanatu atu i tagata aoga o le Mataupu Faavae ma Feagaiga 20 sa faitau leotele atu i nisi o uluai konafesi a le Ekalesia, lea sa faia e faamanatu ai i tagata o le ekalesia fou le tele o upumoni taua o le talalelei a Iesu Keriso. Vaevae le vasega i ni vaega se fa. Tofi vaega taitasi e faitau se tasi o mau faasino nei, ma vaavaai mo aoaoga faavae e mafai ona aofia i lalo o le ulutala o le “Tatou te iloa …”
A uma ona tuu atu i tagata aoga se taimi e suesue ai a latou fuaiupu, valaaulia i latou e lipoti mai aoaoga faavae na latou mauaina. Fai atu i se tagata aoga e fai ma tusiupu e tusi nei upumoni i luga o le laupapa a o faailoa mai e tagata aoga.
O aoaoga faavae e ono faailoa mai e tagata aoga e aofia ai mea nei:
O loo soifua le Atua ma e le iu, e faavavau, ma e lē masuia (fuaiupu e 17).
Ua faia i tatou i le faatusa ma foliga o le Atua (fuaiupu e 18).
Na tuuina mai e le Atua Lona Alo pele e Toatasi e faasatauroina ma toetu mai (fuaiupu 21–23).
E manaomia e tagata uma ona salamo, talitonu ia Iesu Keriso, ia papatisoina, ma tumau faatuatua ina ia faaolaina (fuaiupu 25, 29).
O le taimi lava e uma ai ona lisi e tagata aoga upumoni na latou mauaina i nei fuaiupu, fai atu ia i latou e filifili se upumoni se tasi e taua ia i latou, ma ua latou iloa lava e moni. Valaaulia ni nai tagata aoga e faasoa mai a latou molimau e uiga i le upumoni ua latou filifilia, ma faamalamalama mai pe aisea e taua ai lena upumoni ia i latou.
Faaiu i le faasoa atu o lau molimau e uiga i upumoni sa talanoaina i le aso, ma lou agaga faafetai mo le auai i le Ekalesia toefuataina a le Alii.
Iunite e Sosoo Ai (Mataupu Faavae ma Feagaiga 24–29)
Ae faapefea pe afai sa e feiloai atu i se tasi sa le o le perofeta, ae na faapea mai na ia mauaina faaaliga mo le Ekalesia atoa? I le iunite e sosoo ai, o le a aoao ai tagata aoga i le auala na taulima ai e le Perofeta o Iosefa Samita lenei faafitauli. O le a latou aoao foi e uiga i nisi o faailoga o le Afio Mai Faalua.