I se taimi e le’i mamao ona amata lea o se konafesi a le Ekalesia i le aso 26 o Setema, 1830, na maua ai e le Perofeta o Iosefa Samita se faaaliga a’o faatasi ma ni toeaiina se toaono. E ala i le faaaliga, na aoao ai nei alii e uiga i le faapotopotoina o le au filifilia a le Faaola a o lei oo i Lona Afio Mai Faalua.
Ua molimau mai le Alii e uiga i Lana Togiola ma Lona finagalo e faapotopoto Lona nuu
A o lei amataina le vasega, tusi le faamatalaga lenei i luga o le laupapa: “Ia sii i luga o outou loto ma fiafia” (MF&F 29:5).
Aisea e faigata ai i nisi taimi ona usitai i lenei fautuaga? O a nisi o auala ua e maua e usitai ai i lenei fautuaga?
Faamalamalama atu, o le Mataupu Faavae ma Feagaiga 29:1-3 o loo i ai fetalaiga a le Faaola lea e mafai ona fesoasoani ia i tatou “ia sii i luga o [tatou] loto ma fiafia.”
Ata
O Keriso ma Tamaiti
Faaali atu le ata O Keriso ma Tamaiti (Tusi Ata o le Talalelei [2009], nu. 47; tagai foi i le LDS.org) ma, afai e mafai, o se ata o se matuamoa o ofaofata’i lana toloai. Fesili atu pe i ai se tasi e mafai ona faamatala mai pe faapefea ma pe aisea e ofaofoatai ai e se matuamoa lana toloai. (Afai e le iloa e tagata o le vasega, faamalamalama atu e faapea, a lagona e se matuamoa se tulaga matautia, e valaau atu o ia i lana toloai. A o latou o mai ia te ia, na te faapotopoto i latou i lalo o ona apaau e puipui ai.) Valaaulia se tagata o le vasega e faitau leotele le Mataupu Faavae ma Feagaiga 29:2.
E faapefea ona pei le Faaola o se matuamoa e faapotopotoina ma puipuia lana toloai?
O le a le mea e ao ona faia e le toloai ina ia faapotopoto saogalemu i lalo o le puipuiga o apaau a lo latou tina? (Afai e manaomia, ia faailoa atu e tatau i le toloai ona faia le taumafaiga ia o atu i lo latou tina.)
Tusi le faamatalaga lenei i luga o le laupapa: O le a faapotopoto i tatou e Iesu Keriso a o tatou …
E tusa ai ma le Mataupu Faavae ma Feagaiga 29:2, o a mea e tatau ona tatou faia ina ia faapotopotoina ai e le Faaola? (Faaaoga tali a tagata o le vasega e faamaea ai le mataupu faavae o loo i luga o le laupapa: O le a faapotopoto i tatou e Iesu Keriso a o tatou faalogo atu i Lona siufofoga, faamaulalo i tatou lava, ma valaau atu ia te Ia i le tatalo.)
Faamalamalama atu e faapea, mai lava i le amataga, na vavalo ai perofeta e uiga i le faapotopotoina o Isaraelu. O le aiga o Isaraelu—o le nuu o le feagaiga a le Alii—o le a faapotopotoina i aso e gata ai a o lei oo i le afio mai o Keriso (tagai i le Mataupu Faavae o le Faatuatua 1:10). E faapotopoto e le Alii Lona nuu a o latou faaalia le faatuatua ia te Ia ma tausi Ana poloaiga.
Ina ia fesoasoani i tagata o le vasega ia malamalama ma lagonaina le moni ma le taua o lenei mataupu faavae, ia talanoaina fesili nei:
O a nisi o auala tatou te faalogoina ai le siufofoga o le Faaola? (O tali atonu e aofia ai le, e mafai ona tatou faalogo i Lona siufofoga e ala i tusitusiga paia, o aoaoga a perofeta soifua ma aposetolo, ma le musumusuga a le Agaga Paia.)
E faapefea ona ese le faalogo i le siufofoga o le Faaola mai le na ona lagona o Lona leo?
Aisea e te manatu ai e manaomia ona tatou lotomaualalo ina ia mafai ona faapotopotoina e le Faaola?
Valaaulia tagata o le vasega e mafaufau i ni taimi na latou lagonaina ai le latalata atu i le Faaola e ala i le suesueina o tusitusiga paia, mulimuli i saunoaga a perofeta soifua, po o le tatalo i le Tama Faalelagi. Tuu atu i ni nai tagata o le vasega le avanoa e faasoa mai nei aafiaga, ma faamanatu atu ia te i latou o nisi o aafiaga e paia pe patino tele mo le faasoaina mai.
Ia faatatau atu i le mau sa e tusia i luga o le laupapa a’o lei amataina le vasega
E mafai faapefea e le mafaufau i le faapotopotoina e le Faaola, ona fesoasoani ia te oe e sii i luga lou loto ma fiafia?
Valaaulia se tagata o le vasega e faitau leotele le Mataupu Faavae ma Feagaiga 29:1, 3. Fai atu i le vasega e mulimuli i le faitauga, ma vaavaai mo se mafuaaga e sii ai i luga o tatou loto ma fiafia. Ona fai atu lea i tagata o le vasega e faailoa mai se mataupu faavae mai nei fuaiupu, e faamatala ai mafuaaga e mafai ona tatou sii ai i luga o tatou loto ma fiafia.
A maea le taimi, valaaulia ni nai tagata o le vasega e faasoa mai le mataupu faavae na latou mauaina. (O a latou tali e tatau ona atagia ai le mataupu faavae lenei: Ona ua togiola le Faaola mo a tatou agasala, e mafai ona tatou sii i luga o tatou loto ma fiafia.)
O faapefea ona aumai e lau molimau e uiga i le Togiola a Iesu Keriso le fiafia i lou olaga? (A uma ona tali mai tagata o le vasega i lenei fesili, atonu foi e te manao e faasoa atu i ai lau tali.)
Faamalamalama atu o se tasi o auala e faapotopoto ai e le Faaola ia tagata, e ala lea i a tatou taumafaiga e faasoa atu le talalelei. I le faaaliga na faamaumauina i le Mataupu Faavae ma Feagaiga 29, na Ia fetalai mai ai e ala mai ia Iosefa Samita i toeaiina e toaono, ma poloaiina i latou e talai atu Lana talalelei.
Valaaulia tagata o le vasega e faitau filemu le Mataupu Faavae ma Feagaiga 29:4–6. Uunaia i latou e vaavaai mo upu ma fuaitau e faatatau i le galuega faafaifeautalai. Ona fesili atu lea o fesili nei:
O a upu ma fasifuaitau na e mauaina? O a mea ua aoao mai e nei upu ma fuaitau e uiga i le aafiaga o le faasoa atu o le talalelei?
Valaaulia se tagata o le vasega e faitau leotele le Mataupu Faavae ma Feagaiga 29:7–8. Fai atu i le vasega e mulimuli i le faitauga, ma vaavaai mo le faamalamalamaga a le Faaola o mea na valaauina nei alii e toaono e fai ma pe aisea.
O le a le mea sa valaauina e le Faaola nei toeaiina e fai? (“E faataunuu le faapotopotoina o [Ana] ʼau filifilia.”) Na faapefea ona faamatala e le Faaola Ana au filifilia? (O i latou o e “e faalogo i [Lona] leo ma lē faamaaaina o latou loto.”)
E faapefea ona fesoasoani faifeautalai e faataunuu le faapotopotoina o e ua filifilia?
Faamalamalama atu, ina ua maua mai lenei faaaliga, sa toaitiiti lava le faitau aofai o tagata o le Ekalesia. Sa mafai e le Au Paia ona “faapotopoto mai i le nofoaga e tasi” (MF&F 29:8). Ae peitai, a o tuputupu ae le Ekalesia, sa poloaiina e le Alii le Au Paia e faapotopoto i nofoaga eseese. I le taimi nei ua tatou faapotopoto i siteki o Siona po o fea lava o tatou nonofo ai.
O a nofoaga o loo tatou faapotopoto ai i aso nei? (O tali e mafai ona aofia ai aiga, falelotu, ma malumalu.)
Otooto le Mataupu Faavae ma Feagaiga 29:9–13 i le faamatala atu, o nei fuaiupu na folafola mai ai e le Faaola, o le a Ia toe afio mai i le lalolagi i le mana ma le mamalu. O ‘au o e o le a o mai faatasi ma le Faaola i le mamalu i Lona Afio Mai Faalua, o le Au Paia faamaoni o e sa soifua i vaitau uma o taimi i le talafaasolopito o le lalolagi. O le a toetutu e amiotonu ua maliliu, ae o le a faaumatia e amioleaga. O Iesu Keriso o le a “mau faatasi ma tagata i le amiotonu i luga o le lalolagi i le afe o tausaga” (MF&F 29:11).
Ua faamatala mai e Iesu Keriso nisi o faailoga o le a muamua mai i Lona Afio Mai Faalua
Faamalamalama atu o le faapotopotoina o Isaraelu, o se vaega o la tatou sauniuniga mo le toe foi mai o le Faaola. Ua faaali mai e le Alii isi faailoga o le a tutupu i luma mai o Lona Afio Mai Faalua. Fai atu i tagata o le vasega e faitau filemu le Mataupu Faavae ma Feagaiga 29:14–21, ma vaavaai mo faailoga o le a tutupu a o lei oo i le Afio Mai Faalua. Atonu e te manao e fautua atu i tagata o le vasega e maka nei faailoga i a latou tusitusiga paia pe lisi i latou i a latou api o le vasega po o api talaaga mo le suesueina o tusitusiga paia.
A o lei faitauina e tagata o le vasega nei fuaiupu, ia faamamafa atu e faapea, tatou te le iloa pe faapefea ae pe o afea o le a faataunuuina ai nei valoaga.
A uma se taimi na suesue ai e tagata o le vasega nei fuaiupu, ia faailoa atu e ui lava o le a oo mai nei faailoga ona o le amioleaga, o le a aafia ai tagata uma i luga o le fogaeleele, e oo lava i e amiotonu. Atonu e te manao e faitau atu le saunoaga lenei a le Perofeta o Iosefa Samita:
Ata
Perofeta o Iosefa Samita
“[Ou te] faamalamalama atu e uiga i le afio mai o le Atalii o le Tagata … o se manatu sese e faapea o le Au Paia o le a sosola ese mai faamasinoga uma, ae o e amioleaga o le a tigaina; aua o tino uma ua i ai ina ia tigaina, ma o e amiotonu o le a faigata ona sosola ese [tagai i le MF&F 63:34]; ae o le toatele o le Au Paia o le a sosola, aua o e amiotonu e tatau ona ola i le faatuatua [tagai i le Sapakuka 2:4]; a peitai o le toatele o e amiotonu o le a pauu atu i tulaga o faamai, ma faamai pipisi, ma isi, e mafua ona o le vaivai o le tino, ae peitai e faasaoina i le Malo o le Atua” (Aoaoga a Peresitene o le Ekalesia: Iosefa Samita [2007], 269).
Aisea o le a e manao ai e faapotopoto mai o se tasi o le au filifilia a le Faaola pe a tutupu nei mea?
Ia ta’u atu, afai tatou te faatuatua ia Iesu Keriso ma mulimuli ia te Ia, tatou te maua i taimi uma le filemu, e oo lava i taimi e pei o taimi o loo faamatala mai i le faaaliga lenei. Ina ia faamamafa atu lenei upumoni, atonu e te valaaulia tagata o le vasega e faitau nisi po o fuaiupu uma nei: Ioane 14:27; 16:33; Mataupu Faavae ma Feagaiga 59:23.
Valaaulia se tagata o le vasega e faitau leotele le Mataupu Faavae ma Feagaiga 29:17. Fai atu i le vasega e vaavaai mo le taunuuga o le musu e salamo.
O le a le taunuuga o le musu e salamo? (E tatau ona faamatala mai e tagata o le vasega le mataupu faavae lenei: Afai tatou te le salamo, o le a le faamamaina i tatou e le toto togiola o Iesu Keriso. Atonu e te manao e fautua atu i tagata o le vasega e faailoga lenei mataupu faavae i le Mataupu Faavae ma Feagaiga 29:17.)
Ia faamautinoa atu i tagata o le vasega, o le sauniuniga aupito sili ona taua e mafai ona tatou faia mo le Afio Mai Faalua, o le sau i le Faaola, salamo, ma ia faamamaina ia tatou agasala. Valaaulia tagata o le vasega e mafaufau pe o manaomia ona latou salamo i soo se mea, ma o le a foi le mea e ao ona latou faia e faamamaina ai mai le agasala.
Ua faaali mai e le Faaola upumoni e uiga i le mea o le a tupu pe a mavae le Meleniuma, e aofia ai le Faamasinoga Mulimuli
Tofi atu i tagata taitoatasi o le vasega se tasi o fuaitau nei mai le Mataupu Faavae ma Feagaiga 29: fuaiupu e 22, fuaiupu e 26, po o fuaiupu e 27–28. Valaaulia tagata o le vasega e faitau filemu a latou fuaiupu atofaina, ma faailoa mai se mea se tasi o le a tutupu i le faaiuga o le Meleniuma. (Mo na tagata o le vasega o e ua tofia e suesue le Mataupu Faavae ma Feagaiga 29:26, atonu e te manao e faamalamalama atu o Mekaeli, le agelu sili, o Atamu lea. Tagai i le MF&F 107:54.) A uma se taimi na suesue ai e tagata o le vasega a latou fuaiupu atofaina, fai atu ia te i latou e lipoti mai mea na latou mauaina, e amata mai i le fuaiupu e 22.
Valaaulia se tagata o le vasega e faitau leotele le Mataupu Faavae ma Feagaiga 29:27, ma fai atu i le vasega e vaavaai mo faamanuiaga e tuuina mai i e amiotonu i le Faamasinoga Mulimuli.
O a faamanuiaga o le a oo mai ia i tatou, pe afai ua tatou potopoto mai i le Faaola? (E tatau ona faailoa mai e tagata o le vasega le aoaoga faavae lenei: O i latou o e sa ola amiotonu ma o mai ia Iesu Keriso o le a maua le ola faavavau. Atonu e te manao e uunaia i latou e faailoga lenei upumoni i le Mataupu Faavae ma Feagaiga 29:27.)
Faaiu i le tuuina lea o le ata o Iesu Keriso ma tamaiti i luga o le laupapa. Ona tusi lea o le upu A’u i luga o le laupapa. Valaaulia tagata o le vasega e mafaufau po o fea latou te tuuina ai le upu A’u pe afai e faaalia i lona tulaga lo latou latalata i le Faaola. Fai atu i tagata o le vasega e faasoa mai ni aafiaga na latou oo i ai ina ua latou mulimuli i uunaiga, na faapea ona aumai ai i latou e latalata atili atu i le Faaola. Valaaulia i latou e filifili se mea se tasi o le a latou faia e faatino ai le mea na latou aoaoina i le aso ma faalatalata atili atu ai ia te Ia.
Na faamautinoa mai e Elder Neil L. Andersen o le Korama a Aposetolo e Toasefululua, a’o saunoa mai i alii talavou o le Ekalesia, lo tatou tiutetauave e faapotopoto mai le au filifilia a le Atua:
Ata
Elder Neil L. Andersen
O a outou misiona o le a avea ma se avanoa paia e aumai ai isi ia Keriso ma fesoasoani ai e saunia mo le Afio Mai Faalua o le Faaola.
“Ua leva ona fetalai le Alii e uiga i sauniuniga talafeagai mo Lona Afio Mai Faalua. Na Ia tautino atu ia Enoka, ‘O le a ou auina atu i lalo mai le lagi le amiotonu; ma o le a Ou auina atu le upumoni i fafo mai le eleele, … ma o le a ou faia ia tafi le lalolagi i le amiotonu ma le upumoni e pei o se lolo, e faapotopoto mai i fafo la’u au filifilia mai i itu e fa o le lalolagi.’ [Mose 7:62.] Na valoia e le perofeta o Tanielu e faapea i aso e gata ai o le a taavale atu ai le talalelei i tuluiga o le lalolagi, e pei o se ‘maa i [se] mauga, a e lei tofia i lima.’ [Tanielu 2:45.] Na saunoa Nifae e uiga i le Ekalesia i aso e gata ai e toalaiti le faitau aofai, ae ua salalau atu i tuluiga uma o le lalolagi. [Tagai i le 1 Nifae 14:12–14.] Na tautino mai e le Alii i lenei tisipenisione, ‘Ua valaauina foi outou e faataunuuina le faapotopotoina o la’u au filifilia.’ [Mataupu Faavae ma Feagaiga 29:17.] … O a outou misiona o se avanoa ma tiutetauave maoae e taua i lenei faapotopotoina folafolaina ma ua soofaatasi i ō outou taunuuga e faavavau” (“Sauniaina o le Lalolagi mo le Afio Mai Faalua,” Ensign po o le Liahona, Me 2011, 50–51).
Na faamalamalama mai e Elder Bruce R. McConkie o le Korama a Aposetolo e Toasefululua le mea e tatau ona faapotopoto i ai le Au Paia:
Ata
Elder Bruce R. McConkie
“O siteki o Siona ua … faatulagaina i tuluiga o le lalolagi. I lenei sootaga, sei o tatou mafaufau loloto i nei upumoni: O se siteki o Siona o se vaega o Siona. E le mafai ona e fatuina se siteki o Siona e aunoa ma le fatuina o se vaega o Siona. O Siona o e loto mama; tatou te maua le mama o le loto e ala i le papatisoga ma le usiusitai. O se siteki e i ai ona tuaoi faafaafanua. O le faatuina o se siteki e pei lava o le faavaeina o se Aai o le Paia. O siteki uma i le lalolagi o le nofoaga lea e faapotopoto i ai mamoe ua leiloloa o Isaraelu o e nonofo i lona eria.
“O le nofoaga e faapotopoto ai tagata Peru o totonu o siteki o Siona i Peru, po o nofoaga o le a le o toe umi ae avea ma siteki. O le nofoaga e faapotopoto ai tagata Sili o loo i totonu o Sili; mo tagata Polevia o totonu o Polevia; mo tagata Korea o totonu o Korea; ma faapena uma lava i le mamao ma i le lautele o le lalolagi. O tagata Isaraelu ua faataapeapeina o loo i totonu o atunuu uma, ua valaauina e faapotopoto i le lafu a Keriso, i siteki o Siona, ma e pei ona faatulagaina ai i o latou atunuu” (“Come: Let Israel Build Zion,” Ensign, Me 1977, 118).