Anomea o Sauniuniga mo le Faiaoga mo Suesuega i le Fale
Aotelega o Lesona mo Suesuega i le Fale i Aso Taitasi
O le aotelega lenei o mea na tutupu, aoaoga faavae, ma mataupu faavae na aoaoina e tagata aoga a’o latou suesueina le Mataupu Faavae ma Feagaiga 60–64 (iunite 14) e le o faamoemoe e aoao atu o se vaega o lau lesona. O le lesona e te aoaoina atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tamaiti aoga.
O le suesueina o le fautuaga a le Alii i toeaina o e sa malaga mai Misuri i Ohaio, na aoaoina ai e tagata aoga e faapea, e mafai ona aveesea a tatou molimau pe afai tatou te le faasoaina atu. Na iloa foi e tagata aoga o loo i ai i le Alii le mana uma ma e mafai ona faasaoina i tatou, ma e tatau ona tatou faalagolago i la tatou faamasinoga ma le taitaiga a le Agaga pe a tatou faia ni faaiuga.
I la latou suesuega o le Mataupu Faavae ma Feagaiga 63, na aoaoina e tagata aoga, sa aoaiina e le Alii i latou o e sa le’i tausia Ana poloaiga ma faamafanafanaina i latou o e sa faamaoni. Na aoaoina e tagata aoga, o le faatuatua e le maua mai i faailoga ae o faailoga e maua mai i le faatuatua, e tusa ai ma le finagalo o le Atua. Sa latou faailoa mai foi ia upumoni nei: Afai tatou te vaavaai atu i isi ma le tuinanau, o le a tatou le maua le Agaga ma o le a tatou faafitia le faatuatua; afai tatou te faamaoni ma tumau, o le a faapea ona tatou manumalo i le lalolagi; ma o le suafa o Iesu Keriso e paia ma e ao ona tautalagia ma le faaeteete.
A o suesueina e tagata aoga fetalaiga a le Alii i tagata o le Ekalesia o e na agasala, sa latou aoaoina ai o le Alii e agaalofa, loto faamagalo, ma alofa mutimutivale. Sa latou aoaoina foi, afai tatou te le faamagalo atu i isi, tatou te tutu ma le tausalaina i luma o le Alii, ma ua poloai mai le Alii ia tatou faamagalo atu i tagata uma.
I lenei lesona na aoao ai tagata aoga e uiga i osigataulaga na manaomia e le Alii mai le Au Paia a o amata ona latou fausia Siona. Sa faamamafa mai e le lesona ia upumoni nei: Afai tatou te mulimuli i le finagalo o le Alii mo i tatou, o le a le mafai ona faaosoosoina i tatou i mea e sili atu nai lo mea e mafai ona tatou gafatia; e faamanuiaina i tatou a o tatou usitai i le Alii, ma osi atu taulaga na Ia fetalai mai ai ia i tatou; afai tatou te maelega i le faia o mea lelei, ona mafai lea ona tatou ausia mea silisili; ma e tatau ona tatou usitai i le Alii ma o tatou loto ma mafaufau naunautai.
Folasaga
I le taumafanafana o le 1831, sa vaavaaia ai e le Perofeta o Iosefa Samita le faapaiaga o le laueleele lea sa tatau i le Au Paia ona fausia ai Siona i Initipene, Misuri. I le toesea ai o le Perofeta, sa faapea ona liliuese ai nisi o tagata o le Ekalesia i Ohaio mai poloaiga a le Alii ma solia ni agasala matuia. O lenei lesona e taulai atu i nisi o poloaiga na faamamafaina mai e le Alii ina ua toe foi atu Iosefa Samita i Ohaio—e aofia ai le poloaiga ia aloese mai le tuinanau ma ia faamagalo atu i isi.
Ua lapataia e le Alii le Au Paia e uiga i taunuuga o le amioleaga ma le fouvale
Tusi le fesili lenei i luga o le laupapa: Aisea e te manatu e taua ai ona tatou ola e tusa ai ma o tatou talitonuga i le avea ai ma tagata o le Ekalesia a Iesu Keriso? Valaaulia ni tagata aoga e faasoa mai a latou tali i le vasega.
Faamalamalama atu, i le taumafanafana o le 1831, a o i ai Iosefa Samita ma isi taitai o le Ekalesia i Misuri e faapaia le laueleele ma le tulaga o le malumalu i Siona, sa i ai nisi o tagata o le Ekalesia sa solia faalilolilo ni agasala matuia. Ina ua toe foi atu le Perofeta i Ohaio, sa ia mauaina le faaaliga ua faamaumauina i le Mataupu Faavae ma Feagaiga 63.
Valaaulia se tagata aoga e faitau leotele le Mataupu Faavae ma Feagaiga 63:1. Fai atu i le vasega e mulimuli i le faitauga ma faailoa mai pe na faapefea ona faatatau atu le Alii i tagata o le Ekalesia i lenei fuaiupu. Valaaulia tamaiti e lipoti mai mea latou te mauaina.
E mafai faapefea ona ese le ta’ua o i tatou lava o tagata o le Alii mai le avea ma tagata o le Alii? (A o talanoaina e tagata aoga lenei fesili, atonu e te manao e faailoa atu e faapea, e toatele le Au Paia sa sili atu mea na latou faia nai lo na o le ta’ua o i latou lava o tagata o le Alii. Sa latou tumau faamaoni.)
Fai atu i tagata aoga e toe vaai vave i le fuaiupu 1 ma vaavaai mo le poloaiga a le Alii ia i latou o e sa ta’ua i latou lava o Lona nuu.
O le a le mea e finagalo le Alii tatou te faia i le avea ai ma Ona nuu? (Aotele tali a tagata aoga e ala i le tusia o le mataupu faavae lenei i luga o le laupapa: I le avea ai ma nuu o le Alii, e tatau ona tatala o tatou loto ma faalogo i Ana afioga ma Lona finagalo e faatatau ia i tatou.)
O le a sou manatu i le uiga o le tatala o o tatou loto?
E faapefea e le tatalaina o o tatou loto ona saunia i tatou e faalogo atu i le siufofoga o le Alii?
O le a se mea e te faia e fesoasoani ai e tatala lou loto?
Aotele le Mataupu Faavae ma Feagaiga 63:2–21 i le faamalamalama atu e faapea, sa aoaiina e le Alii i latou o e sa lē talitonu, sa saili mo ni faailoga, ma sa mulilulua ma isi agasala matuia. Valaaulia se tagata aoga e faitau leotele le Mataupu Faavae ma Feagaiga 63:16. Fai atu i le vasega e mulimuli i le faitauga, ma vaavaai mo se lapataiga na tuuina mai e le Alii.
O le a le uiga o le vaai atu i isi ma le manao? (O le upu manao [tuinanau] o lona uiga “o le i ai o se matuai manao le talafeagai mo se mea” po o se tasi [Taiala i Tusitusiga Paia, “Tuinanau,” scriptures.lds.org]. O le vaai atu i se isi ma le manao tuinanau o lona uiga o le vaai atu ma ni lagona le talafeagai i le tino o se isi tagata, po o se auala e faaosofia ai lagona feusuai. O lenei mea e aofia ai le matamata i ata mataga.)
O le a le mataupu faavae ua e vaaia i le lapataiga a le Alii i le fuaiupu e 16? (E mafai ona faaaoga e tagata aoga nisi upu, ae e tatau ona latou faailoa mai le mataupu faavae lenei: Afai tatou te vaai atu i isi ma le manao tuinanau, o le a tatou le maua le Agaga ma o le a tatou faafitia le faatuatua. Atonu e te manao e valaaulia tagata aoga e faailoga lenei mataupu faavae i a latou tusitusiga paia.)
Aisea e te manatu ai, o le manao tuinanau i le isi tagata e mafua ai ona aluese le Agaga ma se tagata?
O a ni mea e mafai ona tatou faia e faatoilalo ai faaosoosoga e manao tuinanau atu i isi?
O se vaega o le talanoaga e uiga i le aloese mai manao tuinanau, atonu e te manao e tuu atu i tagata aoga taitasi se kopi o le fautuaga lenei mai ia Elder Jeffrey R. Holland o le Korama a Aposetolo e Toasefululua. Valaaulia ni nai tagata aoga e auauai i le faitauina leotele o palakalafa. A uma ona faitau ia palakalafa taitasi, fai atu i le vasega e faamatala mai pe mafai faapefea e le mulimuli i lenei fautuaga ona fesoasoani ia i tatou e faatoilalo ai le faaosoosoga o le manao tuinanau.
Na aoao mai Elder Jeffrey R. Holland:
Ata
Elder Jeffrey R. Holland
“O le mea e aupito sili ona taua, amata i lou aluese mai i tagata, tusi ma tulaga o le a faatamaia ai oe. …
“… Afai e le lelei se ata o le televise, tape. Afai e mataga se tifaga, savali ese mai ai. Afai ua faasolo ina le talafeagai le mafutaga, faauma loa. O le tele o nei faatosinaga, atonu e le leaga i le taimi muamua, ae e mafai ona faaseseina ai a tatou faamasinoga, faapogisa ai lo tatou faaleagaga, ma taitai atu ai i se mea e mafai ona leaga.
“Ia suia mafaufau leaga i vaaiga lelei ma mea fiafia e manatuaina; vaai faalemafaufau i foliga o e alolofa ia te oe ma o le a nutimomomo pe a e faia se mea latou te faanoanoa ai. … Po o a lava mafaufauga e oo atu ia te oe, ia mautinoa e taliaina i lou loto i le na o le valaauliaina.
“Ia atiina ae ma ia i ai i le mea e i ai le Agaga o le Alii. Ia mautinoa ua aofia ai ma lou lava fale po o le fale mautotogi, ia aoao ai le ituaiga o faatufugaga, musika, ma tusi faitau e te tuuina ai iina” (“Ia Le Toe Ulu Mai i Lo’u Agaga Le Ita Mai ia te Au,” Ensign po o le Liahona, Me 2010, 45, 46).
Fesili atu pe i ai ni tagata aoga e mananao e faasoa mai a latou molimau i auala ua faamanuiaina ai i latou mo a latou taumafaiga e ola i le tulafono o le legavia.
Ua poloaiina e le Alii Ana auauna e faamagalo atu i le tasi ma le isi
Faamanatu atu i tagata aoga o latou tofiga mai le Aso 3 o le iunite lenei e taumafai e tauloto le Mataupu Faavae ma Feagaiga 64:9–11, o se mau tauloto. Valaaulia le vasega e tauloto leotele faatasi nei fuaiupu. (E mafai ona faaaoga e tagata aoga a latou tusitusiga paia mo se fesoasoani.) Fesili atu pe i ai se tagata aoga e manao e tauloto leotele na o ia ia nei fuaiupu mo le vasega. Tusi le poloaiga lenei i luga o le laupapa: Ua poloaiina i tatou e le Alii e faamagalo atu i tagata uma.
Aisea e te manatu e taua ai le faamagalo atu i tagata uma, tusa lava pe latou te faatoese mai mo a latou mea sese?
E faapefea ona fesoasoani ia i tatou le tuu atu i le Atua e faamasino ia i latou o e ua faatiga ia i tatou?
O le a se taimi na e lagonaina ai le faamanuiaina ona o le faamagaloina atu o se tasi?
Faailoa atu, o nisi o taimi tatou te naunau ai e faamagalo atu i isi, ae tatou te tauivi e faamagalo i tatou lava.
Aisea e tatau ai ona tatou faamagaloina i tatou lava?
Faasino atu i le mataupu faavae muamua na e tusia i luga o le laupapa i le amataga o le vasega: I le avea ai ma nuu o le Alii, e tatau ona tatala o tatou loto ma faalogo i Lana afioga ma Lona finagalo e faatatau ia i tatou. Valaaulia tagata aoga e mafaufau pe na tatala o latou loto i uunaiga po o musumusuga i le taimi o a latou suesuega o tusitusiga paia i le aso. Uunaia i latou e galulue i uunaiga ma musumusuga latou te maua mai le Alii, ma molimau atu a latou faia faapea o le a avea i latou ma nuu o le Alii.
Ina ia saunia tagata aoga mo a latou suesuega i le vaiaso a sau, atonu e te manao e valaaulia i latou e mafaufau i mea nei: E mafai faapefea ona taavale i luma se maa seia oo ina faatumuina ai le lalolagi? O le a le lelei o le silafia e le Alii o i tatou lava ia? Aisea e lagona ai e matua se tiutetauave malosi e aoao a latou fanau i le talalelei? O a ni taunuuga i matua o le le faia o lena mea? Faailoa atu i tagata aoga, o a latou suesuega o tusitusiga paia i lenei vaiaso, o le a latou iloa ai tali i nei fesili.